Educación

Asturnews ufre imáxenes de l’aición de la Xunta enllenando’l Milán de pancartes reivindicatives. Pa ver les semeyes, calca equí

El Primer Conceyu Internacional de la Llingua Asturiana piesllase esti xueves n’Uviéu col programa que vien darréu:

16:00 Ponencia. Jose Ramón Fernández González (Universidá d’Uvieu)

La formación de palabras compuestas en asturiano. Estudio morfosintáctico y semántico.

16:45 Ponencia. Jose Ramón Morala (Universidá de Lleón)

El proceso de castellanización al sur de la cordillera

17:30 Descansu

17:45 Ponencia. Jeannick Le Men(Universidá de Lleón)

Sobre algunas áreas lexicas

18:30 Ponencia Ana María Cano González (Universidá d’Uvieu, ALLA)

La llingua asturiana na documentación de los primeros años del sieglu XIV.

PIESLLE DEL CONCEYU

20:00 Alderique. «La llingua nes tierres ástures: Propuestes de collaboración llingüística y cultural».

Nel Club de Prensa de La Nueva España

Emilio Gancedo (Lleón)

Alfredo Hernández (Zamora)

Antonio Bárbolo (Miranda do Douro)

Xose Antón González Riaño (Asturies)

Empobina: Javier Rodríguez Muñoz.

La profesora d’Historia de la Universidá d’Uviéu y académica de la Llingua Asturiana Isabel Torrente fízose esti miércoles delles entrugues sobre Uviéu na temprana dómina medieval na segunda xornada del Primer Conceyu Internacional de la Llingua Asturiana.

La xornada d’esti miércoles entamó con una ponencia de Max Pfister de la Universidá de Saartandes sobre “La importancia del asturiano paea el LÉXICO ETIMOLÓGICO ITALIANO” y cuntó darréu con delles comunaciones de Clara E. Prieto Entrialgo, de la Universidá d’Uviéu, Vicente José Marcet Rodríguez, de la Universidá de Jaén, yFrancesc González y Planas, de la de la Universidá e Girona, que nos averaron a los gráficos y la sintaxis na documentación medieval lleonesa y asturiana.

Na xornada tamién intervinieron David García López y Margarita Torre Sevilla, de la Universidá de Lleón, y presentáronse tres llibros sobre testos asturianos del XIV, documentos orisxinales dle Monasteriu San Vicente y el tercer volume de les “Propuestes Etimolóxiques” de García Arias.

Paul O’Neill de la Universidá d’Oxford nel Coneyu amosó’l valir filolóxicu de la llingua asturiana nuna comunicación sobre “El pretéritu y tiempos averanos nel dominiu llingüísticu ástur” a la que dió llectura esti miércoles nel Campus d’El Milán, nel Primer Conceyu Internacional de Llingua Asturiana. El mozu investigador inglés ufrió una comunicación dafechu n’asturianu, amosando’l so conocimientu l’idioma, al falar de la evolución dixebrada de les formes comunes del dominiu llingüísticu de nueso.

El rector de la Universidá d’Uviéu, Vicente Gotor, afitó esti martes nel Salón d’Actos de la Facultá de Filoloxía que la llingua asturiana tien de tar, de la manera más afayadiza, ente la ufierta de títulos de la Universidá, nuna intervención en llingua asturiana (la segunda del so mandatu) na qu’amosó’l so compromisu pa col asturianu diciendo que “La nuestra Universidá persupo siempre que yera la Universidá d’Asturies y los asturianos. Una Asturies que falaba n’asturianu, pensaba y sentí la llingua y que quier seguir calteniendo les sos señes d’identidá idiomática”.

Gotor pronuncióse a favor del títulu de llingua asturiana na Facultá de Filoloxía, nel actu d’abertura del I Conceyu Internacional de la Llingua Asturiana, organizáu pola Academia de la Llingua y que se desendolca hasta’l xueves na mentada facultá. Xunto a elli intervinieron la presidenta de l’Academia de la Llingua Asturiana, Ana Cano, la directora xeneral de Promoción Cultural y Política Llingüística del Principáu, Consuelo Vega, y el conceyal de Cultura del Ayuntamientu d’Uviéu, José Suárez Arias-Cachero, qu’afalagó’l compromisu del rector faciendo alcordanza de qu’estes coses nun salen gratis n’Asturies, el país onde “lo que importa nun pasa y lo que pasa nun importa”.

L’Academia de la Llingua Asturiana celebra dende esti martes el I Conceyu Internacional de la Llingua Asturiana, embaxu’l títulu de “Más de mil años d’historia d’una llingua nel país de los ástures”. L’actu d’inauguración tuvo llugar a les 12 del meudía nel Salón d’Actos de la Facultá de Filoloxía, n’El Milán y darréu d’elli pronució la conferencia inaugural l’Académicu y Caderlagu d’Historia de la Universidá d’Uviéu, Francisco Javier Fernández Conde, que faló de la «Particularidá histórica del País Ástur».

El Conceyu sigue esti miércoles col programa que va darréu:

16:00 Ponencia. Max Pfister (Universidá de Saarlandes)

La importancia del asturiano para el Lessico Etimologico Italiano (LEI)

16:45 Comunicación. Clara E. Prieto Entrialgo (Universidá d’Uvieu)

“Vierbo por vierbo”: les inserciones documentales y los sos problemes filolóxicos (un exemplu asturianu de 1295)

17:00 Comunicación. Vicente Jose Marcet Rodríguez (Universidá de Jaen)

La configuración de los usos gráficos romances en las escribanías leonesas durante la Edad Media

17:15 Comunicación. Francesc González i Planas (Universidá de Girona)

Aspeutos de la sintaxis de la documentación medieval lleonesa.

17:30 Alderique

17:45 Descansu

18:00 Ponencia. Isabel Torrente (Universidá d’Uvieu, ALLA)

Más entrugues sobre Uvieu na temprana dómina medieval.

18:45 Comunicación. David García López.

Estado lingüístico de Senabria y La Carbayeda a comienzos del siglo XXI.

19:00. Comunicación. Paul O’Neill (Universidá d’Oxford)

El preteritu y tiempos averaos nel dominiu llingüísticu ástur: Formes comunes pero una evolución dixebrada.

19:15 Alderique

19:30 Presentación llibros

Testos asturianos de lo cabero del sieglu XIV), Mª Josefa Sanz (Univ. d’Uvieu)

Documentos orixinales nel Monesteriu de San Vicente (1239-1250), Andrea Miranda Duque / Celia Álvarez Arias.

Propuestes etimolóxiques (3), Xose Lluis García Arias (Univ. d’Uvieu, ALLA)

20:00 Ponencia. Margarita Torres Sevilla (Universidá de Lleón)

Monarquía y nobleza: las transformaciones en el territorio leones de los siglos X y XI.

Asturnews ufre una galería de semeyes del I Conceyu Internacional de Llingua Asturiana que recueye momentos de los tres díes que dura’l conceyu.

La galería pue vese nesti enllaz.

Xunta Moza convoca un paru simbólicu de 15 minutos como siguiente pasu na so campaña reivindicativa pola inclusión del asturianu nos planes d’estudios universitarios como títulu de grau Con una mesa informativa, pegaes de cartelos, repartu de dípticos nos campus universitarios y l’engalane del aulariu del Milán con banderes d’Asturies sigue la campaña pola dignificación de la llingua na Universidá d’Uviéu Tres de la colocación de delles pancartes y cientos de cartelos y del repartu de los dípticos informativos la pasada selmana, la Xunta Moza, como yá anunciare, sigue alantre cola campaña reivindicativa pola inclusión del asturianu nos planes d’estudios universitarios como títulu de grau.

Esta vez, los estudiantes del Campus del Milán tán convocaos a secundar un paru simbólicu que va facese’l llunes 10 de payares a les 12.00 hores y que va tener una duración de 15 minutos. Con esti paru, la organización pro defensa de la llingua asturiana quier “reclamar el sofitu que la comunidá universitaria-y tien que dar al asturianu como llingua propia d’Asturies, naguando pola so inclusión nos planes d’estudiu ensin discriminaciones de nenguna triba. L’asturianu tien que tener un encaxe amañosu na Facultá de Filoloxía y, por estensión, na Universidá d’Uviéu”.

Según la Xunta, “arriendes d’eso, hai que falar de los alcuerdos algamaos va muncho na Universidá, y recordar que yá nel añu 1996 la Facultá de Filoloxía demandó la creación d’una llicenciatura de Filoloxía Asturiana. Tamién fai falta mentar la unanimidá algamada na Xunta Xeneral nel añu 2001 que, colos votos del PSOE, PP y IU, reclamó la titulación. Los antecedentes amuesen que cualquier solución que nun sía un títulu de grau dexa al asturianu en una posición de discriminación gratuita y inesplicable que la Xunta Moza y la Xunta pola Defensa de la Llingua Asturiana nun vamos sofitar”.

La presidenta de l’Academia de la Llingua Asturiana y exdecana de la Facultá de Filoloxía de la Universidá d’Uviéu, Ana Cano, aguarda que s’algame la creación d’un ‘maior’ d’asturianu y non un minor como’l propuestu pol decanu d’anguaño, José Antonio Martínez, pa integralu dientro del futuru Títulu de Grau de Filoloxía.

La Caderalga atalanta qu’un minor nun ye abondo pa la formación del profesoráu de llingua asturiana porque la so carga llectiva ye inferior a la del actual títulu propiu ufiertáu pola Universidá y que s’exixe pa dar clas d’asturianu nel bachilleratu.

La organización Xunta Moza, mocedá de la Xunta pola Defensa de la Llingua Asturiana, entamó güei una campaña reivindicativa “pola inclusión del asturianu nos planes d’estudios universitarios como títulu de grau”. La iniciativa entamó cola instalación de cuatro pancartes, nun repartu de dípticos y una pegada de cartelos nel Campus del Milán y col envís de qu’esta seya una primer acción “d’una riestra d’elles” que quieren esponer lo que la organización piensa de la solución que se tien que-y dar a la llingua na Facultá de Filoloxía.

“A estes altures, depués de pidir la propia Facultá de Filoloxía en 1996 la creación d’una llicenciatura de Filoloxía asturiana, qu’igualara l’idioma d’Asturies no académico a les demás llingües peninsulares, nun se pue contemplar otra cosa que nun seya equivalente a esti pidimientu”, afirmó la organización. “El marcu académicu européu nuevu nun pue valir como sida p’arrequexar l’asturianu nuna categoría menor”, comenten.

Pa la Xunta, “hai que sorrayar que, siendo la Universidá la institución cultural más importante de la sociedá, nun pue ser cómpliz de la marxinación y l’amenorgamientu que carez l’asturianu”. Según el comunicáu, “el fechu de perdese a lo último del cursu pasáu una votación de cálter políticu contra una propuesta que técnicamente asitiaba l’asturianu nun sitiu dignu pa cualquier llingua, nun val d’escusa pa renunciar a ello”. La organización pide “la inclusión del asturianu como un títulu de grau a sabiendes de que p’algamalo nun hai más que materializar les bones pallabres y los xestos, tornándolos nuna realidá concreta na que la llingua propia d’Asturies tenga el sitiu que merez”.

Mientres na Facultá de Filoloxía acércase la fecha de la Xunta de Facultá onde van votase les propuestes del actual decanu, que pretende que l’asturianu entre nos planes d’estudiu oficiales al traviés d’un minor, y del profesor Fernández de Castro, que va promovor una enmienda pa sacar al asturianu de los planes d’estudiu.

Sicasí, y d’aprobase na Facultá de Filoloxía d’Uviéu lo mesmo’l minor que’l maior, esti ha pasar pela aprobación, en Madrid, del organismu que revisa toos y caún de les nueves titulaciones de Grau. N’otres ocasiones mandóse a Madrid la petición de crear la llicenciatura en Filoloxía Asturiana y esta refugóse.

Comunicáu de Xunta Moza sobre la fin del encierru na Universidá d’Uviéu

La Xunta pola Defensa de la Llingua Asturiana (XDLLA) entamaba a les 10 de la mañana d’esti miércoles una campaña de sensibilización col enseñu de la asignatura d’asturianu en primaria y secundaria faciendo una serie de visites a escueles públiques y concertaes onde se tean faciendo especialmente bien les campañes de matriculación y onde un porcentaxe mui altu d’alumnos y alumnes formen los grupos d’escolarización.

Nel casu concretu de La Corredoria 1, una escuela pública d’Uviéu, un 88% d’escolinos y escolines de primaria asisten a les clases de llingua asturiana con normalidá.

Nesta entrevista de la Xunta pola Defensa de la Llingua Asturiana (XDLLA) fecha col director del centru La Corredoria 1, Francisco Torres, “demostróse a les clares que, cuando hai apoyu na dirección d’una escuela, la matriculación na asignatura de Llingua Asturiana ye mui alta. La Corredoria 1 ye un colexu que ta nel cascu urbanu del norte d’Uviéu y onde, de 459 alumnos, 404 tán matriculaos na asignatura de Llingua Asturiana. La dirección de la escuela, que en tou momentu collaboró cola Xunta y valoró mui positivamante la iniciativa inxertada dientro d’esta campaña, fixo un repasu de la hestoria de l’asignatura nel centru queriendo falar primero de la importancia que tien el trabayu siguíu de más de diez años ufiertando l’enseñu d’asturianu pa qu’esti porcentaxe de matriculación seya tan altu”.

Según dixo Francisco Torres, “el papel del profesoráu, que n’Asturies ta cada vez más sensiblizáu cola necesidá de normalizar la materia, ye fundamental pa esplicar esti éxitu. Con un profesoráu que puxe por ello y una collaboración curiosa cola dirección del centru establécense los calces amañosos pa que pas y más, que, a la fin –como bien sorrayaba’l director–, son los que deciden matricular a los neños, tengan una visión completa de la importancia real que tien esta asignatura na educación de los sos rapacinos”.

La XDLLA quier dexar claro que n’Asturies, “en términos globales, la situación de la enseñanza d’asturianu nun ye tan bona como na escuela de La Corredoria, ente otres coses porque’l marcu llegal que regula la presencia de la llingua asturiana nel sistema educativu ye mui curtiu, probe y discriminatoriu, y por eso ye más claramente inaceptable que s’incumpla dende les alministraciones”.

Nel casu d’esta escuela d’Uviéu, ún de los aspectos más importantes d’esta campaña qu’entamamos de sensibilización y visibilización del enseñu d’asturianu “ye demostrar que ye una asignatura que pue impartise con normalidá y con una demanda pergrande”.

Nueves visites

Nestes selmanes van siguir faciéndose visites a otros centros públicos y concertaos qu’igual que’l de La Corredoria dexer bien claro qu’hai una demanda qu’espeya la sensibilidá presente na sociedá asturiana pa cola so llingua propia.

Esti fechu quier resaltalu la Xunta dientro de la campaña de denuncies que vien faciendo añu tres añu al empezar el cursu académicu, cola novedá d’apurrir, nesti cursu, exemplos d’escueles onde les coses se tean faciendo acordies cola llegalidá.