Educación

Los oxetores a l’asignatura d’Educación pa la Ciudadanía y los Derechos Humanos (EpC) presentaron n’Asturies 40 recursos xudiciales frente a los 362 que se presentaran en navvarra, la comunidá autónoma con mayor rempuesta al enfotu de dellos partíos como’l PP y asociaciones cíviques averaes a la derecha por finar cola asignatura.

Según un estudiu realizáu pol Área Xurídica de l’asociación Profesionales pola Ética, presentáu en Madrid, tres de Castiella La Mancha ye con 334 recursos la que recueye más actividá nesti sen, seguida por Castiella y Llión (251), Andalucía (180) y la Comunidá Valencia (178).

Les comunidaes onde menos recursos se presentaron foron Cataluña (13), Baleares (11) y Estremadura (4)y Madrid y País Vascu onde nun se presentó dengún.

El Conceyu Universitariu pol Asturianu (CUPA), organización que cunta con representación nel Claustru de la Universidá d’Uviéu, espresó güei al traviés d’un comunicáu “el so deséu de que la Xunta de Facultá de Filoloxía de la Universidá d’Uviéu apruebe mañana xueves la propuesta d’entrada del asturianu nes enseñances reglaes” presentada pol decanu de la mesma. Nel mesmu reconocen “preferir el maior al minor” pero añaden “que la fórmula propuesta pol decanu va permitir un pasu hestóricu pal asturianu”.

Recuerden amás dende’l CUPA que d’aprobase’l minor quedaría “abierta la posibilidá de que la propia demanda del enseñu d’asturianu na Universidá, convierta’l ‘minor’ nun ‘maior’ nun futuru”.

Dende’l CUPA reconocen ser “conocedores de les dificultaes internes y esternes, que n’otres ocasiones yá echaron p’atrás les propuestes de reglar los estudios de Filoloxía Asturiana na Universidá d’Uviéu” y coinciden con otros axentes de la Universidá en que “de presentase y consiguir que s’aprobara la propuesta de ‘maior’, yá refugada na Xunta de Facultá enantes del branu, esta diba atopar el refugu de la insititución encargada d’aprobar los títulos en Madrid, como pasó n’otres ocasiones cola llicenciatura de filoloxía asturiana”.

El CUPA cree qu’esta selmana “va decidise ente que l’enseñu del asturianu tea na Universidá d’Uviéu o non”, yá que nun se tien conocencia de propuestes de ‘maior’, sinón de ‘minor’ o de desaniciu del enseñu del asturianu, propuesta esta última presentada pol profesor Félix Fernández de Castro.

Camienten dende’l CUPA que ye “perimportante’l pasu d’asitiar al asturianu dientro de les enseñances reglaes al mesmu nivel qu’otres llingües oficiales” y “esperen que la propuesta del Decanu José Antonio Martínez s’apruebe y l’asturianu dea esti pasu tan importante na so hestoria”, pa lo que piden “esponsabilidá y consensu a tolos miembros de la Xunta de Facultá”.

Esti xueves tendrá de votase la propuesta sobre la nueva ufierta de titulaciones del decanu, José Antonio Martínez, con cinco títulos de grau y un Minor d’asturianu, en llugar del Maior que plantegara la exdecana Ana cano y que foi refugáu na anterior Xunta de Facultá.

La Xunta de la Facultá de Filoloxía de la Universidá d’Uviéu va reunise esti xueves dende les 10.30 hores pa votar la propuesta del decanu Martínez, como alternativa a la que se refugó forzando la dimisión d’Ana Cano y qu’incluyía la posibilidá de cursar dientro del Maior del títulu de grau Llingües Modernes, un bloque d’asignatures d’asturianu como Llingua A, que sumaba un total de 72 creitos, o bien otru de 42 creitos, como LLingua B, o como Minor. La propuesta d’agora reduz a 48 creditos la carga llectiva del asturianu quedando conformao como Minor.

La propuesta de Martinez ufre la creación de cinco títulos de grau: Llingua Española y les sos Lliteratures, Estudios Ingleses, Estudios Clásicos, Llingues y Lliteratures Romániques y Comparaes, y Llingues y Lliteratures Modernes. Caún d’estos títulos va tener el so Maior correspondiente. Nel casu de Llingües Modernes, dientro del Maior, los alumnos van tener una Llingua A y otra Llingua B, que van poder ser francés, italianu, portugués o alemán. Francés, italianu y portugués, tamién van ser a estudiase dientro del grau de Romániques.

El Seminariu de Filoloxía Asturiana amuesase favoratible

El Seminariu de Filoloxía Asturiana, que ta compuestu por una docena de profesores, investigadores y doctorandos de la Facultá de Filoloxía de la Universidá d’Uviéu anunció que va dar el so “apoyu ensin reserves” a la propuesta del actual decanu, José Antonio Martínez, de crear un “minor” de llingua asturiana ente los nuevos graos del Espaciu Européu.

”La mayor parte de los profesores de Filoloxía Asturiana apoyamos la propuesta del minor”, aseguró hai poco’l profesor Ramón d’Andrés. “Y facémoslo ensin nenguna reserva porque entendemos que ye la única posibilidá de dar un pasu hestóricu na nuesa facultá, como ue colocar al asturianu dientro del ámbitu de los estudios reglaos”, siguió.

L’Academia y les organizaciones asturianistes refuguen lapropuesta

Poro, la propuesta nun gusta nin a l’Academia de la LLingua nin a la exdecana Ana Cano nin a organizaciones como Fai o la Xunta Moza, qu’entamó una campaña hai poco pa reclamar el “maior”.

La presidenta de l’Academia de la Llingua Asturiana y exdecana de la Facultá de Filoloxía de la Universidá d’Uviéu, Ana Cano, aguarda que s’algame la creación d’un ‘maior’ d’asturianu y non un minor como’l propuestu pol decanu d’anguaño, José Antonio Martínez, pa integralu dientro del futuru Títulu de Grau de Filoloxía.

La Caderalga atalanta qu’un minor nun ye abondo pa la formación del profesoráu de llingua asturiana porque la so carga llectiva ye inferior a la del actual títulu propiu ufiertáu pola Universidá y que s’exixe pa dar clas d’asturianu nel bachilleratu.

Les organizaciones estudiantiles que trabayen nel ámbitu del asturianu, como Fai!, coinciden en xeneral en considerar, como esta organización que “la propuesta del Decanu nun ta a l’altura de les necesidaes y capacidaes científiques de los propios estudiosos de la llingua asturiana na institución académica. Personal que vien demostrando la so capacidá, incluso nes situaciones más adverses, y que tien nesta reforma universitaria la oportunidá de quedar nel sitiu que merez”. Amás del fechu de que “la mencionada propuesta nun cubre les necesidaes formatives de los futuros filólogos que quieran tener como ámbitu d’estudiu y actuación la llingua asturiana” y de que’un “minor” n’asturianu “nun llegaría al mínimu de los conteníos básicos p’asegurar que la llingua pueda siguir siendo enseñada nos centros de primaria y secundaria por maestros y profesores filólogos cualificaos. Poro, l’horizonte d’una meyora educativa quedaría definitivamente descartáu”.

El Campus d’Humanidaes paró güei por segundu llunes consecutivu en demanda d’un títulu de grau pa la llingua asturiana, a iniciativa de la Xunta Moza, completándose la aición con una charra informativa y con una concentración delantre l’aulariu de Filoloxía onde participaron más d’un centenar d’estudiantes y docentes.

Esta acción vien a sumase a les entamaes pola organización pa reclamar un tratu dignu y igualitariu pa la llingua asturiana na universidá asturiana. Nun comunicáu que fizo públicu dfarréu de l’aición, la Xunta Moza “considera irrenunciable la materialización de los alcuerdos aprobaos pola Facultá de Filoloxía y pola Universidá d’Uviéu, que yá dende l’añu 1996 vienen reclamando la puesta en marcha d’un títulu de grau de filoloxía asturiana”.

Según la Xunta “nun esiste nenguna razón técnica qu’impida llograr esti oxetivu. En nengún foru universitariu ta en cuestión la esistencia de la llingua asturiana, esiste profesoráu abondo pa poner en marcha la titulación y esiste demanda d’estudiantes, mui perenriba de la qu’hai anguaño na mayoría de les titulaciones de la Facultá de Filoloxía. De la mesma manera, la llexislación en materia educativa n’Asturies esixe la ufierta de l’asignatura de llingua asturiana en tolos ciclos y graos. Ye la Universidá d’Uviéu la que tien que garantizar la formación del profesoráu necesario”.

La Universidá asturiana tien que se rexir por criterios técnicos y por esa razón nun ye “asumible nenguna fórmula que marxine a la llingua asturiana, imponiendo restricciones a les persones que voluntariamente quieran estudiala nel ámbitu universitariu”. Por eso, la Xunta Moza va siguir trabayando pa “implicar a tolos sectores de la comunidá universitaria na defensa del nuesu patrimoniu llingüísticu y de los derechos educativos más elementales”.

La ufierta de cursinos d’asturianu como actividá estraescolar nes escueles del conceyu de Lleón ta teniendo una demanda bien importante. Cerca d’ochenta escolinos de quintu y sestu cursu de primaria” tán yá apuntaos a los cursos, que van entamar esti mes.

Una rempuesta que nos trece centros ufiertaos (el 90% del conceyu) pa esti cursu supón que’l 20% de los apuntaos en cursinos estraescolars escueyan llingua asturlleonesa.

Los cursinos son de baldre y el plazu ta tovía abiertu p’apuntase.

L’Ayuntamientu de L.lena vieno acabante esti llunes les bases poles que se manda la convocatoria de subvenciones del conceyu empobinaes a actividaes en navidá, pal añu 2008

Les asociaciones de L.lena que realicen programes d’actividaes culturales Navideñes, nel Conceyu, nel presente añu, van poer participar nesta convocatoria na que s’afita que en función del interés, cada actividá propuesta va poder subvencionase nuna cuantía d’hasta’l 100% del presupuestu total de la mesma.

Para optar a estes subvenciones ye preceptivu que l’asociación figure inscrita nel Rexistru d’Asociaciones del Conceyu y cumpla les condiciones establecíes nel mesmu.

Los interesaos tienen de presentar un Proyectu desglosáu, incluyendo necesariamente una descripción de l’actividá y el presupuestu desglosáu, amás del númberu de participantes previstos.

Van valorase actividaes abiertes y la so repercusión social y la subvención ha xustificase primero del 28 d’avientu del añu en cursu con memoria xustificativa de l’actividá fecha y factures orixinales o copies compulsaes.

La Xunta Moza va dar el llunes día 17 una charla informativa a les 10.00 hores nel salón d’actos de Filosofía y que va tar siguida d’un paru de 15 minutos y d’una concentración en defensa d’un títulu de grau de llingua asturiana.

Les actividaes enmárquense dientro la campaña de denuncia y sensibilización que ta faciendo Xunta Moza pa desixir un tratu dignu y igualitariu pal asturianu na institución académica y que se van facer nel Campus de Milán.

Nun comunicáu fechu públicu esti día, la Xunta Moza diz siguir trabayando pa implicar a tolos sectores de la comunidá universitaria na defensa del nuesu patrimoniu llingüísticu y de los derechos educativos más elementales.

El Campus d’Humanidaes paró ayeri llunes 10 de payares en demanda d’un títulu de grau pa la llingua asturiana, siguiendo la iniciativa de la Xunta Moza que se completaba con una concentración delantre l’aulariu de Filoloxía onde participaron más d’un centenar d’estudiantes y docentes.

Esta acción vien a sumase a les entamaes pola organización pa reclamar un tratu dignu y igualitariu pa la llingua asturiana na universidá asturiana. La Xunta Moza considera irrenunciable la materialización de los alcuerdos aprobaos pola Facultá de Filoloxía y pola Universidá d’Uviéu, que yá dende l’añu 1996 vienen reclamando la puesta en marcha d’un títulu de grau de filoloxía asturiana.

Sigún la Xunta “nun esiste nenguna razón técnica qu’impida llograr esti oxetivu. En nengún foru universitariu ta en cuestión la esistencia de la llingua asturiana, esiste profesoráu abondo pa poner en marcha la titulación y esiste demanda d’estudiantes, mui perenriba de la qu’hai anguaño na mayoría de les titulaciones de la Facultá de Filoloxía. De la mesma manera, la llexislación en materia educativa n’Asturies esixe la ufierta de l’asignatura de llingua asturiana en tolos ciclos y graos. Ye la Universidá d’Uviéu la que tien que garantizar la formación del profesoráu necesario”.

Nun comunicáu fechu públcu esti día, la Xunta desplica tamién que “la Universidá asturiana tien que se rexir por criterios técnicos y por esa razón nun ye asumible nenguna fórmula que marxine a la llingua asturiana, imponiendo restricciones a les persones que voluntariamente quieran estudiala nel ámbitu universitariu”.

El sindicatu docente ANPE calificó esti día la orde ministerial d’ordenación de les enseñances universitaries pa la incorporación de les universidaes españoles al Espaciu Européu d’Educación Superior (EEES) o Plan Bolonia de “pasu atrás” na dignificación de la so profesión y nel diseñu de la carrera profesional de los docentes.

Nel comunicáu qu’asoleyó esti martes, el coleutivu daba anuncia de la desapaición d’especialidaes de Maxisteriu “necesaries pal sistema educativu”, como la d’Educación Física, Inglés y Música: de magar l’añu 2011 van existir sólo especialidaes de Maestru d’Educación Infantil y Maestru de Primaria.

La nueva ordenación va facer desapaecer tamién “les especialidaes de Pedagoxía Terapéutica y Audición y Llinguaxe”, que pal sindicatu son “necesaries nun sistema educativu como l’español, qu’escolariza a un altu númberu d’alumnos con necesidaes educatives especiales”.

Vicente Gotor atechóse esti llunes na “non oficialidá” pa nun pronunciase sobre’l “maior” pa Filoloxía na xunta del claustru universitariu cellebráu esti llunes cuando un miembru de la organización Fai!, presente nesti órganu académicu, instó al Rector de la Universidá d’Uviéu a “cumplir la so pallabra, no que cinca a la defensa de la filoloxía asturiana, y sofitar un marcu dignu y non discriminatoriu pa los estudios del idioma d’Asturies na universidá asturiana, asina como a entamar otres midíes que faigan posible la visibilización esterna del idioma na imaxe corporativa y l’usu alministrativu y científicu del asturianu ensin torga nenguna”.

La rempuesta de Vicente Gotor centróse na defensa de la propuesta del decanu de transición de Filoloxía, que defiende un tratu d’escepción y claramente discriminatoriu frente al restu de los estudios impartíos na facultá, proponiendo un MINOR que yá foi calificáu por Fai! nel informe “Filoloxía Asturiana y Espaciu Européu d’Educación Superior” como “vergonzante, triste ya indignante, al condenar a la llingua asturiana a una carga de 48 crÉItos ECTS como máximo, carga a toes lluces insuficiente pa formar profesionales mínimamente competentes nel estudiu del idioma, y que ye incluso inferior a la carga llectiva actual col títulu d’especialista”.

Amás, sorpresivamente pal coleutivu estudiantil, el Rector aludió a la “non oficialidá” de la llingua asturiana “pa negar el so apoyu a un rangu superior pa los estudios de filoloxía que’l del MINOR, porque seguramente nun sedríen aceptaos en Madrid pola ANECA, responsable de les nueves titulaciones al ser esta una llingua non oficial”.

Según Fai!, Vicente Gotor “paez escaecer que dende hai bien d’años tanto la propia Universidá d’Uviéu como’l parlamentu asturianu aprobaron nel añu 1996 por unanimidá la creación d’esta titulación, con una demanda social importantísima ya innegable regulada na Llei d’Usu, a la que-y hai que dar unes soluciones afechisques”.

Esta aparente falta d’interés “contrasta coles sos declaraciones, tres de la crisis xenerada na facultá de filoloxía, col vetu y espulsión de los estudios de llingua asturiana, onde aseguró acertada y públicamente que defendería un marcu dignu y non discriminatoriu coles demás llingües impartíes na universidá asturiana”.

Per último, nun comunicáu asoleyáu tres del claustru, dende Fai! vuelvese “a instar al Rector a que s’involucre y cumpla los sos compromisos pre y post-electorales y acabe d’una vegada por toes cola situación d’indefensión y arrequexu na que s’encuentra l’idioma d’Asturies na nuestra universidá, buscando una solución que concilie, ensin reserves nin pasos atrás, les necesidaes d’una formación apropiada nesti campu que demanden les propies lleis asturianes, asina como la non discriminación frente al restu de llingües, poniendo a la llingua asturiana al mesmu nivel que cualquier otru estudiu de filoloxía n’Asturies”.

Informe “Filoloxía Asturiana y Espaciu Européu d’Educación Superior”