Educación

El Conseyu de Gobiernu de la Universidá d’Uviéu axunta esti vienres a les 10 de la mañana pa, ente otros asuntos, escoyer los Premios Extraordinarios de Doctoráu 2011-2012 y aprob ar el calendariu escolar de 2014.

El Conseyu tamién tien d’estudiar el reglamentu del Trabayu de Fin de Gráu de la Escuela Superior de Mines y decidir sobre delles sostituciones nes Comisiones delegaes del Conseyu de Gobiernu.

SUATEA desixe darréu una solución clara pa la docencia de la llingua asturiana al entender que l’alministración asturiana nun puede siguir safándose de la so responsabilidá nun problema que lleva abiertu décades. La Secretaría de Llingua asoleyó la petición güei con motivu de l’aprobación va dellos díis de la nueva llei d’educación (LOMCE), qu’implica una modificación curiosa del currículu en toles asignatures.

SUATEA entiende que ye’l momentu d’iguar la situación de precariedá del enseñu de la llingua asturiana, situación que lleva décades ensin tener una solución clara que dignifique definitivamente la situación de la materia y los docentes de la mesma.

Dende l’aniciu de la presencia na escuela de la llingua asturiana, yá nel cursu 1983-84, la materia pasó per dellos encaxes normativos qu’en nengún casu valieron pa da-y una presencia amañosa en condiciones de normalidá y igualdá col restu de les asignatures. Asina, pesie a toles promeses, sigue ensin haber una especialidá docente que permita un accesu a la mesma de los docentes interesaos, que son anguaño interinos nun 95% de los casos. Sigue habiendo torgues pa la xeneralización de la ufierta en tolos tramos educativos y sigue ensin ser llingua vehicular en nenguna otra materia, pesie a la demanda existente nel alumnáu y la disponibilidá de profesionales pa facela.

L’aprobación de la nueva llei d’educación puede suponer una nueva agresión a les materies de llingua asturiana y de gallego-asturiano. Yá nel primer borrador de la llei la materia directamente desapaecía, y foi la presión social y la movilización de los docentes de l’asignatura y los colectivos implicaos na defensa del idioma lo que fexo que s’incluyera una modificación nel proyectu que dexaba la puerta abierta a un desendolcu normativu de la materia per parte del Principáu.

Dende SUATEA dicen persaber que la única solución clara pa encaxar dafechu y dignificar la llingua asturiana y el gallego-asturiano nel sistema educativu ye la oficialidá, qu’esti sindicatu vien reclamando dende la so fundación. Pero tamién sabemos que, énte l’ausencia absoluta de voluntá política per parte del gobiernu asturianu pa iguar esta situación, ye necesaria la presión social pa que la contrarreforma educativa del gobiernu central nun implique un deterioru tovía mayor de les condiciones nes que s’imparte l’asignatura.

Por too ello, SUATEA desixe que la obligada redefinición del currículu asturianu a consecuencia de l’aprobación de la nueva llei d’educación traiga una nueva situación pa la llingua asturiana y el gallego-asturiano onde:

-Se críe definitivamente la especialidá docente, s’incluya na plantiya ordinaria y salgan les places a concursu-oposición.

-Se garantice la dotación horaria amañosa de l’asignatura en tolos niveles.

-Se xeneralice la ufierta en tolos tramos educativos, dende educación infantil al bachilleratu.

-Se dea la posibilidá d’escoyer la llingua asturiana y el gallego-asturiano como llingües vehiculares d’otres materies.

P’acabar, SUATEA quier sorrayar que la igua d’esta inxusticia histórica ye responsabilidá esclusiva de l’alministración asturiana, y que polo tanto ye a esta a quien-y toca mover ficha pa solucionar un problema que tenía que tar iguáu cuantayá.

Esti xueves 5 d’avientu a les 19:00 hores presentase’l llibru «La hestoria L’Anguleru» nel Salón d’Actos del palaciu Valdecarzana d’Avilés (Cai Sol, 1).

«La hestoria L’Anguleru» ye un proyectu que protagonicen el Grupu Infantil Villa Allegre d’Avilés, el Colexu Públicu Xovellanos de Panes y l’Asociación Cultural Garabuxada de l’Arena, y cuenta cola ayuda de la Fundación Caja Rural de Asturias, del Colexu Xovellanos de Panes y de l’AMPA. Les ilustraciones son del dibuxante Christian Bartsch y los testos, de Paloma González, Carmen Alonso y Víctor Raúl Pintado Rey, «Vitu».

L’actu va tar dividíu en dos partes:

Una mesa introductoria, guiada por Román Álvarez, conceyal de Cultura del Ayuntamientu d’Avilés, y na que van participar Marta del Arco, xefa de Sección de Centros de la Conseyería de Bienestar Social y Vivienda; Xosé Lluis Remis, asesor d’Enseñanza de Llingua Asturiana de la Conseyería d’Educación, Cultura y Deporte; José Manuel Vega, de la Fundación Caja Rural de Asturias; Sandra Rúa y Mónica Gallego, del AMPA del Colexu Públicu Xovellanos de Panes.

Y la presentación del llibru, propiamente dicha coordinada por Esther Prieto, d’Ediciones Trabe, y na que participen Montserrat Machicado, d’Estaya de la llingua d’Avilés; Tamara Saiz, directora del Colexu Públicu Xovellanos de Panes; Víctor Raúl Pintado Rey, «Vitu», coautor de los testos; Fernando González y Christian Bartsch (ilustrador), de la Asociación Cultural Garabuxada.

Desque Asturies participa nes pruebes PISA, Asturies consigue algamar y superar la cifra de los 500 puntos nos trés categoríes de midida de competencies: Matemátiques, Ciencies y Llectura, colo que pue dicise qu’apreba l’exame. Los datos de la evaluación internacional realizada a alumnos de 15 años de 65 países de los cinco continentes dexen al Principáu significativamente percima de la media nacional, pero tamién de la media de los países de la Unión Europea.

Asturies llogra los 500 puntos en Matemátiques, pero llega a los 504 en comprensión llectora y pega un sorprendente estirón de 15 puntos, hasta algamar los 517 en competencia de ciencies, asitiándose nesti postreru estremáu en segundu llugar nel ranking nacional, solo por detrás de Castiella y Llión.

Nesta clasificación nacional, por comunidaes, arrenunciaron al estudiu singularizado les comunidaes de Canaries, Castiella La Mancha y Valencia, amás de Ceuta y Melilla. Nun fai falta esplicar el porqué: meyor nun participar que faelo y acabar na cola.

Andalucía, Baleares, Estremadura y Murcia ocupen los postreros puestos (non siempres nesti orde) nos trés categoríes. Pela parte de riba los protagonistes tamién son los mesmos: Navarra, Madrid, Castiella y Llión y Asturies.

El 93,3% de los xestores educativos refuga la idea de que la desapaición de la llingua asturiana nun tendría consecuencies sociales y educatives nʼAsturies, mentanto que menos dʼun 7% afitaría la irrelevancia social y educativa del fechu de que lʼasturianu llegare realmente a desapaecer. Estos datos, perimportantes, amuesen el sofitu de los xestores de los centros educativos al caltenimientu de la llingua asturiana, tanto na sociedá como nel sistema educativu, identificando la llingua como un ñiciu definitoriu de la cultura dʼAsturies. Estos son los principales resultaos del estudiu fechu a lo llargo del cursu 2012/2013 por Isabel Hevia, y que l’Academia presentare esti miércoles n’Uviéu, sobreʼl valir cultural y educativu que-y atribuyen a la enseñanza de la llingua asturiana los miembros de los equipos direutivos (Direutores, Xefes dʼEstudiu y Secretarios/es) de los Centros Públicos dʼEducación Primaria dʼAsturies.

El decisivu papel que xueguen los xestores de centros educativos dendeʼl puntu de vista del lideralgu pedagóxicu, de la meyora na organización y les anovaciones educa- tives, del afitamientu de les rellaciones cola comunidá escolar, etc. paez incuestionable na sociedá de güei. Pues bien, una investigación que se presentó esto miércoles pela mañana n’Uviéu, en forma dʼavance de resultao, focalizaʼl so interés, xustamente, al rodiu dʼesti ámbitu. Nesti sen van los principales resultaos del estudiu fechu a lo llargo del cursu 2012/2013 sobreʼl valir cultural y educativuque-y atribuyen a la enseñanza de la llingua asturiana los miembros de los equipos direutivos (Direutores, Xefes dʼEstudiu y Secretarios/es) de los Centros Públicos dʼEducación Primaria dʼAsturies.

Con un ámbito de 240 centros educativos asturianos de titularidá pública (CEB+CRA+CP) quʼimparten enseñances dʼEducación Primaria y con un marxe dʼerror del 5% y un nivel de confianza del 95% pa esta población, que na muestra encamentada ye de 148 centros, fízose un muestréu aleatoriu estratificáu con afixación pro-porcional. La primer estratificación fízose per zones o fasteres dʼAsturies: 24 cen- tros del Occidente (dʼellos, 10 de la fastera específica del Navia-Eo), 85 de la zona Centru, 26 de les Cuenques y 13 del Oriente. La segunda estratificación fízose per conceyos dientro de cada fastera.

Nos 63 conceyos asturianos del muetréu presentose un cuestionariu zarráu autoalministráu, aplicáu per mediu dʼentrevista personal de mou presencial nos centros educativos, ente marzu y mayu de 2013.

Como se dixo, los resultaos dʼesta investigación algámense tres un procesu de re- coyida dʼinformación que toma como referencia les valoraciones de 148 xestores dʼE- quipos Direutivos de centros educativos públicos espardíos per toa Asturies. Dʼesti mou, analícense les opiniones dʼestos xestores no que cinca a la presencia escolar de la llingua asturiana nos centros educativos.

La mayor parte de los xestores educativos tresmiten un altu nivel de conformidá cola idea de que la Llingua Asturiana ye un valor cultural dʼespecial importancia pʼAsturies: un 57,40% ta “mui dʼalcuerdu” y un 37,20% “abondo dʼalcuerdu”.

Considerando nel so conxuntu les opiniones de los xestores, pue afirmase quʼhai una predisposición peralta a que los estudiantes conozan y usen la llingua asturiana: un 61,50% ta “mui dʼalcuerdu” y un 33,80% “abondo dʼalcuerdu”.

Cuasi la totalidá de les persones encuestaes (94,5%) diz que la llingua asturiana ye daqué clave na conformación de la identidá como asturianos y asturianes del alumnáu. Gráficu 5. Lʼasturianu ayuda a conformar la identidá asturiana del alumnáu. Nesti casu podemos ver queʼl cuestionamientu del papel de la llingua asturiana como conformadora de la identidá del alumnáu ye dafechu minoritariu (5,5% de respuestes).

El 93,3% de los xestores educativos refuga la idea de que la desapaición de la llingua asturiana nun tendría consecuencies sociales y educatives nʼAsturies, mentanto que menos dʼun 7% afitaría la irrelevancia social y educativa del fechu de que lʼastu- rianu llegare realmente a desapaecer. Estos datos, perimportantes, amuesen el sofitu de los xestores de los centros educativos al caltenimientu de la llingua asturiana, tanto na sociedá como nel sistema educativu, identificando la llingua como un ñiciu definitoriu de la cultura dʼAsturies.

Los xestores de los centros educativos asítiense de mou abrumadoramente favo- ratible a la enseñanza de la llingua asturiana. Una gran mayoría (91,2%), ente los que tán “mui dʼalcuerdu” y “abondo dʼalcuerdu”, tresmiten la opinión de que la enseñanza de la llingua asturiana ha formar parte del currículum escolar, como pasa nes otres co- munidaes autónomes onde hai una llingua propia distinta del castellán. Esta actitú favoratible de los xestores, bien encalzada pola Alministración, podría xugar un papel fundamental pa meyorar la presencia escolar de la llingua asturiana, darréu de la importancia que tienen les sos valoraciones na dinamización y promoción de les enseñances nel centru.

L’estudiu también amuesa que’l 94% de los xestores tán a favor de que les lleis educatives garanticen la presencia del asturianu nel sistema educativu. Gráficu 9. Les lleis educatives han garantizar la presencia del asturianu nel sistema educativu. Esti resultáu ye dʼespecial importancia nel contestu de lʼaprobación de la LOMCE, da- rréu quʼesta llei dexa finalmente en manes –y responsabilidᖠdel Gobiernu del Prin- cipáu dʼAsturies lʼasitiamientu curricular del Área de Llingua Asturiana.

Otros datos qu’amuesa l’estudiu pasen por que’l 84,5% sofita la idea dʼuna coordinación interllingüística ente les materies del blo- que llingüísticu del currículum. La idea de que les materies llingüístiques han dir caúna pel so llau ye una opción, como vemos, minoritaria a xuiciu de los xestores educativos de los centros (14%).

Un 88,50% de los xestores camienta que la enseñanza de la llingua asturiana ye un factor positivu que favorez y fai posibleʼl fechu de trabayar competencies básiques del currículum. Dase, nʼefeutu, un gran alcuerdu dʼopinión al considerar que la enseñanza de la llin- gua asturiana contribúi de mou positivu a lʼadquisición de les competencies básiques. Namái un 2% de les persones encuestaes nun comparte esta valoración. Los datos amuesen que los xestores son conscientes de queʼl deprendizax de la llingua promueve, ente otres coses, nueves perspeutives de la comunicación llin- güística y tresmisión cultural, conocimientu del contestu social más averáu, respetu polos valores interculturales y ciudadanos, construcción de la identidá personal y co- leutiva, etc.

Finalmente, manifiéstase un gran alcuerdu dʼopinión al refugar la idea de que lʼestudiu de la llingua asturiana perxudique los progresos de los escolinos y escolines: un 95,3% amuesaʼl so desalcuerdu con esta idea. Estos datos vienen a afitar la idea de la rentabilidá educativa de la enseñanza del asturianu y la so influencia positiva na meyora de los deprendizaxes instrumentales básicos.

Les conclusiones del estudiu nun upen ser más favorables. Acordies colos resultaos algamaos, podemos sintetizar lo que sedríen les conclu- siones más interesantes de la investigación.

1.El nivel de conocencia y usu del asturianu per parte de los Equipos Direutivos ye especialmente altu y tresmítenos la idea de que la llingua asturiana na vida de los centros pue tener una viabilidá inmediata, si se tomen les midíes almi- nistratives afayadices.

2.Paez indiscutible’l valir social y educativu de la llingua asturiana según les opiniones de los direutivos de los centros públicos d’Educación Primaria; poro, re- fúgase dafechu cualquier decisión que ponga en peligru la so sobrevivencia na vida pública y escolar.

3.La presencia del asturianu nel currículum ye rentable, al marxe del so valir como ferramienta pʼalgamar una competencia plena nesta llingua, dendeʼl puntu de vista de la so rellación con otres árees del currículum y como sofitu necesariu na adquisición de les competencies básiques.

4.Los direutivos de centros camienten, de mou inequívocu, que la presencia de la llingua asturiana precisa dʼun mayor compromisu de l’alministración educativa pa facese más efeutiva, cuestión esta quʼenllaza col fechu de la necesidá dʼuna regulación llegal en positivo y acordies col marcu llegal.

5.La co-oficialidá de la llingua asturiana contribuyiría a iguar munchos de los pro- blemes curriculares dʼesta materia, como puen ser la so presencia normal en toles etapes y niveles educativos, la xeneralización a tolos centros al marxe de la so titularidá y l’usu del asturianu como llingua vehicular pal tratamientu de de- terminaos conteníos non llingüísticos.

6.Los resultaos de la investigación son coherentes dafechu colos dʼestudios sociollingüísticos anteriormente fechos nʼAsturies, pero tienen la importancia de la so focalización nun ámbitu especialmente “sensible” y “estratéxicu”: los equipos direutivos de centros escolares.

Los principales sindicatos del ámbitu educativu súmense mañana xueves a les 10:30 hores a la concentración entamada en favor de les escueles 0-3 delantre la Conseyería d’Educación. La llarga llucha pola dignificación d’esta etapa de la enseñanza sigue, sigún asoleyaba esti miércoles el sindicatu SUATEA nuna nota de prensa.

Nesta llucha xúntense tanto les Asociaciones de Padres y Madres como’l personal que trabaya neses escueles mientres les diferentes Alministraciones miran pa otru llau y niéguense a asumir les sos responsabilidaes. Dende la Conseyería d’Educación propónense continuos retayos qu’afecten al carácter educativu y asistencial d’estos centros.

Les consecuencies súfrenles, d’un llau, les families que ven menguada la calidá de l’atención de les sos fíes y fíos y del otru la plantiya de los centros que ve como con menos efectivos tien d’atender les mesmes obligaciones. Danse despidos, les baxes del personal nun se cubren y remiéndase l’apertura de nuevos centros col desplazamientu de la plantiya adscrita a otros de nueva apertura.

Pa SUATEA, la dignificación de les escueles 0-3 pasa per:  La integración de la rede de les escuelas infantiles de 0-3 nel sistema educativu, reconociéndose’l so carácter educativu y asistencial. Mantenimientu del nivel de calidá, d’atención y educación de la rede.  Que l’apertura de nuevos centros implique la dotación de la plantiya y recursos amañosos pal so funcionamientu con nueves contrataciones y nun robando los existentes n’otres escueles.  La recuperación de la plantiya qu’había en cada centru al anicio del cursu escolar.  Que les baxes que se xeneren na plantiya se cubran de secute p’asegurar el bon funcionamientu de los centros.

El Muséu del Xurásicu d’Asturies cierra les actividaes de la Selmana de la Ciencia colos monólogos de The Big Bang Theory esti vienres, 22 de noviembre, a les 19 hores. Más d’un centenar de persones esfrutaren del humor d’estos científicos d’universidaes y organismos d’investigación que se dediquen como afición a amosar al públicu una manera de ver la ciencia ensin parar de rise, teniendo pol nome una parodia de la pernomada serie de televisión The Big Bang Theory.

El grupu, formáu a raigañu del concursu de divulgación científica Famelab en marzu de 2013, cuenta con investigadores de distintos ámbitos (bioloxía, matemátiques, física, inxeniería, ente otres), que sopelexen les meyores más recién en ciencia de “una forma risondero y comprensible”.

Eduardo Sáenz de Cabezón, Oriol Marimon, Daniel García, Miguel Abril ya Irene Olga Puerto Giménez son los cinco científicos de The Big Van Theory que van participar nesta actividá.

Esta actividá completó les places, al igual que’l taller “Científicos per un día”, qu’a la mesma hora de los monólogos va dexar a los neños de 4 a 13 años realizar dellos esperimentos, como reconstruyir la erupción d’un volcán, introducir un güevu nuna botella, llanzar cohetes o facer una masa lloco.

Un grupu d’Erasmus forzó la puerta d’un pub del cascu antigüu pa marchar con 62 botelles de licor, un ordenador y un reló de paré, según informó la Policía Nacional, camentando que lo que queríen yera montar una fiesta nel so pisu d’eEstudiantes.

Nesti casu, insólitu n’Uviéu hasta’l momentu, según el relatu policial, avisóse en Comisaría de que se produxera un robu con fuerza nun Pub del cascu antiguu. Yeren les 4 de la madrugada, y l’encargáu del local alcontró la puerta forzada, inorando si desapaeciera daqué. Avisáu’l propietariu comprobó que faltaben 62 botelles de licor que dexara enriba de la barra al zarrar, un ordenador y un reló de paré.

Un testigu dixo que vio a dos mozos y dos moces con delles bolses y un carru de la compra salir per una puerta llateral del Pub coles botellesy qu’al llama-yos l’atención, ficiéron-y un corte de manga y otros xestos de despreciu, y profirieron delles palabres n’idioma distintu al español, pa depués adientrase nun edificiu cercanu.

La Universidá d’Uviéu y la Universidá de Illinois vienen acabante de roblar esti miércoles pela mañana un conveniu de collaboración col que van trabayar de forma conxunta n’actividaes y programes de docencia, investigación ya intercambiu de profesores y estudiantes. Na rueda de prensa darréu de roblar el conveniu, el rector de la Universidá, Vicente Gotor, desplicó’l conteníu del alcuerdu xuntu col director del ‘Rexonal Economic Applications Laboratory’ (REAL), Geoffrey Hewings, y cola presencia de los profesores d’economía aplicada Fernando Rubiera y Esteban Fernández.

Gotor dixo que’l conveniu empobínase a los máster y la realización de tesis conxuntamente ente dambes universidaes. El rector esplicó que la Universidá d’Illinois alcuéntrase ente les 50 primeres del índiz de Shanghai y ente les 15 primeres del mundu n’estudios d’economía.

Geoffrey Hewings, destacó la importancia de la collaboración ente universidaes nel campu de les Ciencies Sociales. y quiso afitar que na Universidá d’Illinoisdase-y muncha importancia al intercambiu internacional, como amuesa’l fechu de que nos últimos trés años, ocho estudiantes de posgrado de la Universidá d’Uviéu, estudiaran n’Illinois.

L’alcuerdu robláu esti día establez que cada institución puede ufiertar a la otra, durante los cinco años de vixencia, actividaes educatives, culturales y d’investigación, amás del intercambiu de profesores y alumnos de posgrado pa investigación, conferencies y alderiques.

Esti xueves 21 de payares a les 20:00 hores, na Casa de los Alberti, en Ciañu de Llangréu, sigue en marcha l’actividá cultural pal mes de payares y dientro la programación de Los xueves de castilletes y carbón que vien desenvolviéndose esti mes, mañana xueves día 21 visita Ciañu’ lprofesor de la Universidá d’Uviéu Xosé Antón González Riaño que va lleer la ponencia “Enseñanza n’asturianu, La UABRA una experiencia pedagóxica”.

Esta charra enmárcase dientro les xornaes culturales De Castilletes y carbón que per cuartu añu consecutivu, organicen la Fundación Nuberu y l’Ayuntamientu de Llangréu. Trátase d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles y xiren alredor de les interrellaciones ente cine, mina, música, lliteratura, economía, política…

Los xueves de castilletes y carbón van siguir con un recital lliterariu nel que van participar destacaos escritores en llingua asturiana. L’actividá de De castilletes y carbón remata’l 4 d’avientu, día de Santa Bárbara, con un conciertu del grupu Nuberu na Casa la Cultura de La Pola Llaviana.