Convocatories

Ta acabante d’abrise’l plazu pa presentar obres al XVII Premiu Teodoro Cuesta de Poesía. El plazu d’entrega va terminar el 9 de payares próximu, cuando se cumplen 178 años del nacimientu de Teodoro Cuesta. Hai que mandar cinco copies del poemariu presentáu embaxo’l sistema de pliques na Casa Cultura Teodoro Cuesta de Mieres.

El Premiu ta dotáu con 4.000 euros. Nel añu 2006 ganaron ax aequo Pablo Texón Castañón y Pablo Rodríguez Medina y ente los ganadores d’otros años tán autores como Xuan Bello, Berta Piñán, Lourdes Álvarez, Vanessa Gutiérrez, Chechu García, Martín López-Vega, Marta Mori y otros.

Bases completes

Esti vienres va presentase un nuevu llibru de Xaviel Vilareyo: ‘La causa más probable’. L’actu va tener llugar a les siete y media la tarde na Llibrería Asturiana de la Editorial Trabe y va correr a cargu del escritor Ánxel Álvarez Llano y d’Antón García, director d’Ediciones Trabe, amás del propiu autor.

A esa mesma hora y tamien na Llibería Asturiana va presentar Vilareyo la esposición ‘La fueya en blanco’, consistente n’obres en pintura y colax sobre dellos temes y formatos y que va tar nel Aula Abierta de la Llibrería Asturiana de Trabe hasta’l 17 de setiembre.

Xaviel Vilareyo ñació en Mieres del Camín en 1967 y ye autor de llibros de poesía y ensayu. La Llibrería Asturiana de Trabe ta allugada na cai Padre Buenaventura de Paredes 4 d’Uvieu. N’acabando l’actu de presentación va sirvise un vinu a tolos asistentes.

Redacción.

Sigue abiertu’l plazu pa presentar candidaturea al Premiu Timón, que l’Asociación de la conocida como ‘vagamar lliteraria en Xixón’ convoca “col envís de facer reconocencia de la trayectoria lliteraria y/o’l llabor de promoción de la lliteratura asturiana”. Pa ello l’asociación L’Arribada abrió apocayá’l plazu pa la presentación de candidatures dende esti momentu y hasta l’1 de setiembre.

Según indiquen les bases de la convocatoria, les candidatures van poder ser presentaes por una persona un coleutivu a les señes de correu lletrónicu que siguen: arribada_sectec@yahoo.es

El Premiu quier sirvir de reconocencia a trayectories bien llarges y por ello, pa esta edición de 2007, “opten al premiu los/es escritores n’asturianu que ñacieren nel añu 1957 o anteriormente”. Pal fallu del premiu la Xunta Direutiva de l’Asociación Cultural l’Arribada va aconceyar un xuráu integráu por persones venceyaes a la cultura del país.

El galardón va entregase en Xixón demientres la celebración de l’ARRIBADA 2007, que ta pesllando yá la programación d’esti añu, nel que va pasar de seis a nueve díes de celebración.

Redacción.

La Conseyería de Cultura, Comunicación Social y Turismu convocó apocayá’l I Premiu d’Ensayu ‘Marta Portal’, que permite presentar obres en castellán o n’asturianu, dotáu con 6.000 euros y la espublización de la obra. El plazu pa presentar orixinales acaba l’1 d’ochobre.

El concursu abarca cuatro modalidaes: investigaciones sobre dalguna personalidá asturiana, estudios sobre la influencia que’l mediu familiar y sociocultural tuvo neses personalidaes, investigaciones sobre autores hispanoamericanos galardonaos col Premiu Príncipe d’Asturies y estudios sobre cualquier asuntu que tenga que ver coles rellaciones hispanomexicanes: emigración, exiliu, cultura, comerciu, etc.
Bases completes

Redacción.

L’actor Carlos Alba, conocíu pol nome del so personaxe estrella ‘Cellero’, va poner clas d’interpretación del monólogu asturianu ente los díes 20 y 24 d’agostu nel Teatru Prendes de Candás, de 6 a 9 de la tarde. El cursu ta empobináu a los aficionaos d’esti xeneru de tanta sonadía n’Asturies ensin necesidá d’esperiencia.

Los exercicios van ser d’espresión corporal, creación del personaxe y creación lliteraria. La inscripción tien que de facese nel teatru o llamando al telefonu 985 871 021.

Redacción.

Hasta esti domingu van celebrase los últimos tres díes del Festival Intercelticu na so edición de 2007. Mientres los díes anteriores del Festival taben dedicaos a un país celta caún, la fin de selama va tar va dedicada cuasi dafechu y el baille d’Asturies, cola participación de munchos de los grupos que yá tuvieron n’Aviles estos díes.

El vienres pela tarde y el sábadu y el domingu tol día, va celebrase un Mercáu tradicional astur na Plaza d’Alfonso VI. El pieslle de los actos va tener llugar n’El Parche, onde va celebrase l’Andecha de paises celtes coles bandes de baites ‘Pitlochry and Blair Atholl Pipe Band’, ‘Bagad Landi’, ‘Banda de Gaites Ledicia’, ‘Banda de Gaites Esbardu’ y los grupos de baille ‘Curran – Fegan’, ‘Inquedanzas’, ‘Dawnswyr Môn’, ‘Ballocheam Highland Dancers’, ‘Danserien LannTivizio’ y el ‘Grupu de Baille Esbardu’. A les 21:15 va ponese’l ramu na mesma plaza nel actu de ‘La xuntanza de les cultures’ y a les diez de la nueche, el pieslle.

Programa completu de la fin de selmana

Vienres 27

• 11:00 a 14:00 y 18:00 a 21:00 Amuesa: Asturies na emigración (Palaciu de Valdecarzana)
• 12:15 Música na cai (Les Meanes, Centru Comercial “El Atrio”, Cai La Cámara y El Parche)
• Banda de Gaites Ledicia
• 17:00 a 19:30 Xornaes d’estudiu: Baille y danza tradicional n’Asturies (ver detalle) (Palaciu de Valdecarzana)
• 17:30 Xuegos y deportes populares: Talleres llibres de bolos, llave y rana. (Bolera de Llaranes)
• Club popular de cultura de Llaranes
• 18:00 a 23:00 Mercáu tradicional astur (Plaza d’Alfonso VI)
• 18:00 Xuegos tradiconales (El Parche)
• Club La Peonza
• 19:00 Música na cai (Les Meanes, Centru Comercial “El Atrio”, Cai La Cámara y El Parche)
• Grupu de baille del Centru asturianu de Bruseles
• 19:00 Taller de baille: Asturies (Plaza de Camposagrado)
• El Escarpín (Centru asturianu de Lausanne)
• 19:30 Raigaños Celtes (El Parche)
• Danzantes de Trabáu (Degaña)
• 21:00 Dende lloñe: Homenax a la emigración asturiana (El Parche)
• Grupu de baille del Centru asturianu de Bruseles
• El Escarpín (Centru asturianu de Lausanne)
• 22:30 Sestaferia: Marcha celta (desfile de paises celtes) (El Parche – La Cámara – Doctor Graíño – Pza. Vaticano – Cai Juan XXIII – Complexu deportivu Aviles)
• Banda de gaites Villa d’Aviles
• Grupu de baille del Centru asturianu de Bruseles
• El Escarpín (Centru asturianu de Lausanne)
• Danzantes de Trabáu (Degaña)
• L’Aire
• Banda de Gaites Ledicia
• Inquedanzas
• Dawnswyr Môn
• Banda de gaites Cenceyu de Llangreu
• L’Augua
• Bagad Landi
• Danserien Lann Tivizio
• Curran – Fegan
• Banda de gaites La Reina del Truebano
• La Tierra
• Pitlochry and Blair Atholl Pipe Band
• Ballocheam Highland Dancers
• El Fueu
• 23:15 Lluna Celta, la gran nueche de los celtes. (Complexu deportivu Aviles, Polideportivu d’El Quirinal)
• Jorge Tuya (Tonada)
• Alberto Varillas (Gaita)
• David Varela (Curdión)
• Bandes de gaites de los paises celtes
• Grupos de baille de los paises celtes

Sábadu 28

• 11:00 a 14:00 y 18:00 a 21:00 Amuesa: Asturies na emigración (Palaciu de Valdecarzana)
• 12:00 a 23:00 Mercáu tradicional astur (Plaza d’Alfonso VI)
• 17:00 Torneu de bolos (Batiente) (Bolera de Los Canapes)
• 18:00 Xuegos tradiconales (Plaza Carlos Lobo)
• Club La Peonza
• 19:00 Música na cai (Les Meanes, Centru Comercial “El Atrio”, Cai La Cámara y El Parche)
• Grupu de baille del Centru asturianu de Bruseles
• El Escarpín (Centru asturianu de Lausanne)
• 20:15 Canción asturiana (El Parche)
• Julio Mallada
• Laudelina Hortal
• Juan Robledo
• Iñaki Santianes (gaiteru)
• 23:15 Nueche interceltica (El Parche)
• La Bandina
• Capercaillie

Domingu 29

• 11:00 a 14:00 y 18:00 a 21:00 Amuesa: Asturies na emigración (Palaciu de Valdecarzana)
• 12:00 a 23:00 Mercáu tradicional astur (Plaza d’Alfonso VI)
• 17:30 Taller de bolos (Batiente): Talleres llibres (Plaza Camposagrado)
• 19:00 Alcuentru de Paises Celtes (El Parche)
• Alcuentru de los paises celtes allegaos dende los distintos caminos.
• Aporte de banderes cola interpretación del himnu de cada país celta.
• 19:30 Enantes de la griesca: Preludiu a la batalla (El Parche)
• Recreación musical de los momentos d’enantes de la griesca entre celtes y romanos.
• 19:45 El suañu celta (El Parche)
• Llectura d’un testu históricu en toles llingües del Festival
• Suelta de Palombes
• 20:00 Andecha de paises celtes: despedida final (El Parche)
• Les Bandes de Gaites:
• Pitlochry and Blair Atholl Pipe Band
• Bagad Landi
• Banda de Gaites Ledicia
• Banda de Gaites Esbardu
• Los Grupos de Baille:
• Curran – Fegan
• Inquedanzas
• Dawnswyr Môn
• Ballocheam Highland Dancers
• Danserien Lann Tivizio
• Grupu de Baille Esbardu
• 21:15 El ramu: La xuntanza de les cultures (El Parche)
• 22:00 Pieslle (El Parche)

Redacción.

L’Ayuntamientu de Villaviciosa dio entamu estos díes a una nueva iniciativa d’ociu pa los neños del conceyu, ye’l ‘Parque encantáu’, un espaciu d’ociu que va entamase los llunes, martes y miercoles nel conceyu maliayu. El Parque encantáu ye un programa d’ociu que van llevar alantre monitores de la asociación xuvenil El Glayu.

El programa incluí un programa de tiempu llibre con conteníu educativu nel qu’hai cuentacuentos, gymcanes o manualidaes plástiques ente otres actividaes, que cada día van dir rotando “dientro de la imaxinativa hestoria d’un parque que ta embaxo un encantamientu”, comenten los organizadores.

Les actividaes son nel parque de La Villa, na zona de La Pergola. Anque nun taba previsto que’l programa se desenrrollara de llunes a vienres, a la fin va facese de llunes a miercoles d¡11:30 a 13:00 hores. Si la iniciativa tien esitu, l’Ayuntamientu va estudiar estendela al mes d’agostu.

Redacción.

El Grupu de Baille Tradicional San Felix de Candás va asoleyar, coincidiendo col III Alcuentru cola Cultura Atlántica que va celebrar en Candás ente los díes 23 y el 28 d’agostu, la revista ‘El Cuirno’.

Los responsables de la revista ta acabante de zarrar los conteníos del tercer númberu de la so revista añal, qu’esti añu axunta trabayos d’investigación de Xose Lluis García Arias ‘Falemos de los pendientes’, Pedro Busto ‘Santa Marina Valles: Un exemplu de sincretismu n’El Cabu Peñes’, Alberto Álvarez Peña ‘Melecina tradicional en Carreño y Gozón’ y ‘Una urna de piedra na capiya de Santa María Magdalena na parroquia de Samartín de Bocines’, Armando Rodríguez ‘Marañueles na mar’, David Fernández ‘La Casa los Busto’ y el Grupu de Baille T. San Felix ‘Sobre la ropa tradicional usao na villa de Candás’.

En cuantes la parte lliteraria, axúntense los versos y proses d’Avelino Llera, Inaciu Galán, Xurde Fernández, Aurelio G. Ovies, Nines Balmori y Arancha Prado García-Jove.

Redacción.

El Centru d’Arte de La Llaboral organiza tres talleres col nome de ‘Ferramientes llibres pa creadores’, los talleres van tratar sobre vidiu, audiu y hardware. L’horariu va ser de 16 a 21 hores y tien una matrícula de 50 euros. Los talleres van celebrase nel mes d’agostu, pero’l plazu d’inscripción ta yá abiertu.

Nel casu de vidiu, el taller va titulase ‘Grabar, xenerar ya interactuar’ y va celebrase del 6 al 10 d’agostu. El taller va tratar de crear programes pal tratamientu del vidiu en tiempu real. Les solicitúes de matricula van poder facese hasta’l 23 de xunetu.

El taller d’audiu va ser ‘El directu, l’estudiu y más allá. Actuaciones y xeneración de soníu en directu coles habilidaes necesaries pa grabar y remezclar pistes’, ente’l 13 y el 17 d’agostu, tando abiertu’l plazu pa presentase hasta’l 30 de xunetu.
El hardware va tratase nel taller ‘Arduino y la lletrónica abierta’ ente’l 20 y el 24 d’agostu. Arduino ye una plataforma abierta pa computación física. Les solicitúes van tar abiertes hasta’l 6 d’agostu.

Redacción.

Dende ayeri xueves ta abierta nos Xardinos del Náuticu de Xixón la esposición ‘Xente mozo. Muncho que dicir’, organizada pola Obra Social Fundación ‘la Caixa’. L’amuesa ta dientro del programa ‘Xente mozo con valores’, un ciclu que según los orgranizadores “quier fomentar la reflexón crítica ente la mocedá, les families, los educadores y la población en conxuntu”.

La esposición quier que “los xóvenes se reconozan como una parte fundamental de la cadena social y afita’l calter tresformador que caracterizó siempres a la mocedá” y va tar abierta de llunes a domingu n’horariu d’11:00 a 14:00 hores y de 18:00 a 22:00 hores pela tarde.