Convocatories

La Mancomunidá Comarca de la Sidra, en collaboración cola Conseyería de Cultura y Turismu, entama un cursu básicu d’asturianu de 25 hores. El cursu va desendolcase tolos llunes, martes y xueves dende les 19,30 h. a les 21 h. na casa de cultura Marta Pérez Portal de Nava.

Al cursu poder apuntase toles persones que tean interesaes, llamando al númberu de teléfonu 985718413 o mandando un corréu lletrónicu a les señes que van darréu: normastur@lacomarcadelasidra.com. A los alumnos que s’apunten va dáse-yos un diploma acreditativu.

El Conceyu Abiertu pola Oficialidá sigue cola campaña pa llevar la reivindicación de la oficialidá a tolos conceyos d’Asturies. Pa ello, la organización, qu’axunta a docenes d’asociaciones, convoca esti sábadu 27 d’ochobre, una Caravana pola Oficialidá pel suroccidente asturianu. La marcha va percorrer los conceyos de Cangas, Tinéu, y Allande.

Siguiendo la filosofía qu’acompaña a les caravanes feches hasta agora, la movilización y les actividaes que l’acompañen van ser entamaes poles organizaciones y colectivos de los propios conceyos, asinamesmo les actuaciones musicales van correr a cargu d’artistes llocales.

Les actividaes d’esta caravana pel suroccidente van siguir de tarde en Cangas: los músicos Pedru Pereira, Rafa Lorenzo, Ambás, Diego Pangua, Dolfu R. Fernandez y Roberto Ablanedo van actuar a partir de les siete nel Teatru Toreno. Dempués del conciertu va facese un filandón nel Bar Caniecho. Toa una xornada de reivindicación a la que’l CAO convoca a tolos asturianos del suroccidente.

Los próximos díes 2, 3 y 4 de xineru de 2008 va celebrase na Biblioteca Lorenzo Rodríguez Castellanos del Campu San Francisco d’Uviéu una Xunta d’Escritores coordinada por Xaviel Vilareyo y embaxo’l tema ‘Lliteratura asturiana y compromisu’. Pa ello la organización “convida a los escritores y estudiosos asturianos a participar con una conferencia, esposición o presentación de llibros sobre’l tema de la Xunta o sobre cualesquier otru relacionáu cola llingua y lliteratura”.

Pa ponese en contactu y unviar propuestes pue mandas un corréu lletrónicu a xuntadescritores@wanadoo.es

La Comarca de la Sidra, al travies del so programa ‘Creación’ y afalada pol Serviciu de Normalización Llingüística y el Serviciu de la Mocedá. Mancomunidá Comarca de la Sidra tien abiertu’l plazu pal V Concursu de cómic n’asturianu hasta’l 15 de payares viniente.

El concursu inxertase dientro’l programa de promoción artística y d’una manera tresversal en Programa de Normalización del usu del Asturianu de la Mancomunidá de la Comarca la Sidra empobináu a la mocedá, al ser el cómic una espresión artística cercana al llector mozu. Dempues de les cuatro ediciones anteriores onde se vieron trabayos de calidá estraordinaria, la convocatoria d’esti añu respuende a los mesmos criterios: escritos n’asturianu, temática llibre, autores mayores de 14 años de cualesquier orixe y unos premios que van de los 200 euros de los dos accesit al premiu primeru de 500 euros, amás del espublizamientu de les meyores hestorietes presentaes.

El concursu incluye una categoría paralela d’ellaboración de Tires Cómiques empobinada a escolinos d’enseñanza primaria y secundaria de los distintos centros educativos de la Comarca de la Sidra, onde los participantes tienen d’ellaborar una tira con una estensión máxima de cinco viñetes. Nesti casu los premios van ser de material didáuticu, deportivu y d’esparcimientu pa los tres meyores trabayos de les distintes modalidaes.

El plazu de presentación de los trabayos tanto na categoría de Cómic pa mayores de 14 años, como la de Tires Cómiques pa escolinosos acaba’l 15 de payares. Dempues va facese con toles obres presentaes una esposición itinerante pelos diferentes centros culturales de la Comarca de la Sidra, asina como por dellos espacios culturales asturianos.

Bases completes

L’Estaya de Cultura del Conceyu d’Ayer y la Sociedá Humanitarios de Samartín convoquen el primer Premiu Joaquín Rodríguez Muñiz, un certame empobináu a los trabayos d’investigación rellacionaos col patrimoniu cultural d’Asturies y del conceyu d’Ayer. Al concursu pueden presentase autores menores de 25 años. El plazu termina’l 30 de payares de 2007

Los trabayos tienen de tener un llargor d’ente 5 y 25 fueyes per una sola cara. Tienen de mandase a la Casa de Cultura d’Ayer, asitiada na Avenida la Consitutción 31, 33670 de Morea (Ayer). El premiu ye de 600€, placa conmemorativa y la posibilidá d’espublización de la obra.

Los neños de Xixón menores de 13 años –de 0 a 12 incluidos– van poer viaxar de baldre, dende’l llunes 1 d’ochobre, nos autobuses urbanos col únicu requisitu de tener la Tarxeta Ciudadana. La noticia adelantóla’l domingu la Empresa Municipal de Transportes de Xixón S.A. con una nota de prensa.

En total van ser más de 22.500 neños ente los 0 y los 12 años incluyíos los que van beneficiase darréu d’esta medida que ye pionera n’España.

Otres ciudaes del norte, como Santander, ufren gratis los viaxes n’autobus a les families numberoses.

La Sociedá Humanitarios de Samartín de Morea, del conceyu d’Ayer, ta acabante de convocar el cuartu Concursu de Monólogos ‘Pepe Campo’, un premiu que quier premiar monólogos de tema modernu, yá seya en versu o non. Esti concursu, los certámenes entamos dende va unos años pola Asociación H.a Xareos y dalguna esperiencia televisiva más tán consiguiendo aztualizar ún de los xéneros más esitosos dende siempres n’Asturies y consiguir con ello caltener la conexón popular que siempres tuvieron.

Les bases abren el certame a toles persones interesaes, col númberu de trabayos que-yos pete. Va premiaase con 600 € aquel monólogu, ensin asoleyar, qu’a xuiciu del xuráu presente más valir lliterariu. El ganador de la edición anterior nun va poder presentase. El premiu podrá repartise o quedar ermu y el monólogu tien que tratar d’un tema d’actualidá social, política y cultural. La obra podrá ser en versu o prosa; tendrá que tar en llingua asturiana y valoraráse la corrección llingüística y gramatical, asina como’l so carácter normalizador del idioma. El llargor de los trabayos tendrá de ser d’un máximu de cuatro folios, en prosa o ente 150 y 200 versos El plazu d’entrega de los monólogos fina’l 21 d’ochobre del 2007 y tienen que se mandar a les señes de los Humanitarios de Samartín (apartáu correos 8, 33.670 – Morea Ayer-Asturies). Cada trabayu tien que dir nun sobre zarráu, ensin remite, col orixinal y tres copies, y amás, dientro’l sobre habrá otru sobre onde se conseñen los datos del concursante.

L’añu pasáu ganaron el concursu Isaac de l’Arada ya Inaciu Galán y González col monólogu sobre la conducción ‘Asturianos al volante…’ presentáu nel II Certame de Monólogu Modernu de H.a Xareos por esti últimu.

El Grupu d’Opinión ‘Algamar’ que ñació apocayá en Siero cola idea d’afalar el diálogu social y que se presenta como “esmolecíu pol tema ecolóxicu y del desarrollu urbanísticu”, va entamar güei les sos actividaes con un alderique tituláu ‘Construyendo Asturies, Urbanismu y ecoloxía’, que va cuntar cola presencia de Carlos Lastra López, Profesor de la Universidá d’Uviéu y presidente d’A.N.A. y Xuan Pedrayes Obaya, Doctor n’arquiteutura.

L’actu va celebrase nel salón d’actos de la Casa la Cultura de La Pola Siero, güei miércoles, 26 de setiembre a les 19:30 hores. N’Algamar esmuel “la falta de planificación racional del tipu d’Asturies que pretendemos construyir. Precisamos un modelu territorial equilibráu qu’integre les ales y la zona rural nun desarrollu sostenible que nun marafundie los recursos naturales, que nun vienda la costa o’l campu asturianu a los intereses especulativos del capital”.

Pa ello, Algamar cree que “l’urbanismu tien que dar respuesta real a la demanda de vivienda, y los poderes públicos tienen que facilitar l’accesu a esti bien básicu”. Algamar opina que tien de fuxise de “de modelos tipu Marbella, de la masificación turística, y de les grandes infraestructures (Caliao, Lada-Velilla…), o’l monocultivu enerxéticu…”, yá qu’estes formes “nun atienden pal verdaderu desarrollu económicu d’Asturies nin busquen respuesta a les necesidaes coleutives, sinón que van tres del enriquecimientu y espoxigue de grandes grupos económicos y de poder. Lo que pue paecer un problema concretu nun pueblu o nun conceyu va tener consecuencies globales”. “Tolo que se faiga n’Asturies aféutamos”, añaden.

Va cuasi un añu los responsables de la Llibrería Paraxuga tuvieron de camudar de llocal por problemes y ayenos y dende entós dellos problemes alministrativos lleven torgando l’apertura de Paraxuga na cai Paraísu. Güei a la fin, Yolanda y Dulce Gil Fernández van reinaugurar la so llibrería, qu’agora torna como Llibrería-Café.

‘Paraxuga Llibrería ya Café’ va inaugurase güei xueves de magar les 19:00 hores, nel nuevu llocal del establecimientu, asitiáu na cai Paraísu, 2, baxu (Uviéu).

El Grupu d’Opinión ‘Algamar’ “esmolecíu pol tema ecolóxicu y del desarrollu urbanísticu”, convoca un alderique tituláu ‘Construyendo Asturies, Urbanismu y ecoloxía’, cola presencia de Carlos Lastra López, Profesor de la Universidá d’Uviéu y presidente d’A.N.A. y Xuan Pedrayes Obaya, Doctor n’arquiteutura.

L’actu va celebrase nel salón d’actos de la Casa la Cultura de La Pola Siero, el miércoles, 26 de setiembre a les 19:30 hores y el coleutivu cree que va tratase “un asuntu de gran importancia y actualidá”. N’Algamar esmuel amáas “la falta de planificación racional del tipu d’Asturies que pretendemos construyir. Precisamos un modelu territorial equilibráu qu’integre les ales y la zona rural nun desarrollu sostenible que nun marafundie los recursos naturales, que nun vienda la costa o’l campu asturianu a los intereses especulativos del capital”.

Pa ello, Algamar cree que “l’urbanismu tien que dar respuesta real a la demanda de vivienda, y los poderes públicos tienen que facilitar l’accesu a esti bien básicu”. Algamar opina que tien de fuxise de “de modelos tipu Marbella, de la masificación turística, y de les grandes infraestructures (Caliao, Lada-Velilla…), o’l monocultivu enerxéticu…”, yá qu’estes formes “nun atienden pal verdaderu desarrollu económicu d’Asturies nin busquen respuesta a les necesidaes coleutives, sinón que van tres del enriquecimientu y espoxigue de grandes grupos económicos y de poder. Lo que pue paecer un problema concretu nun pueblu o nun conceyu va tener consecuencies globales”. “Tolo que se faiga n’Asturies aféutamos”, añaden.