Convocatories

El Seminariu de Filoloxía Asturiana, coordináu por Ramón d’Andrés, organiza’l miércoles y el xueves dos actos nos que Juan Carlos Moreno Cabrera, Catedráticu de Llingüística Xeneral na Universidá Autónoma de Madrid, va ser el protagonista. El primeru va celebrase mañana, la presentación del so llibru últimu, “El nacionalismo lingüístico. Una ideología destructiva”. L’actu va ser a les ocho la tarde nel Club de Prensa Asturiana, asitiáu na cai Calvo Sotelo 7 d’Uviéu.

El xueves va celebrase’l segundu y últimu actu previstu, la conferencia “La llingüística y la diversidá de les llingües”, del mesmu autor. El Salón d’Actos de la Facultá de Filoloxía del Edificiu Alministrativu del Campus del Milán, n’Uviéu y de magar les once la mañana va acoyer la conferencia.

Juan Carlos Moreno Cabrera ye un destacáu especialista en llinguaxe y diversidá llingüística mundial, autor de dellos llibros de referencia na materia.

N’entrambos actos, primero del conferenciante intervenir fadrá una presentación Guillermo Lorenzo González, profesor de Llingüística Xeneral de la Universidá d’Uviéu.

La presidente de l’Academia de la Llingua Asturiana dio anuncia esti vienres pasáu pela mañana, na entrega de los premios añales de la institución, de les novedaes na convocatoria de concursos pal 2009, pa los que l’Academia tien plazu yá abiertu.

D’un llau, Cano dio anuncia de l’apertura del Premiu de Creación Lliteraria “Llorienzu Novo Mier”, a la poesía, dempués de munchos años nos que l’Academia nun incluyía nengún premiu pa esti xéneru nos sos gallardones.

Amás, l’ALLA abre tamién esti añu, per primer vegada, un concursu de cómics n’asturianu. Premiu que, según dixo Ana Cano, xurdió pola iniciativa de delles persones venceyaes al cómic en llingua asturiana, que ficieron una propuesta a l’ALLA.

Actes de los Premios de l’ALLA 2008, entregaos esti vienres pasáu

L’Academia de la Llingua Asturiana va entregar güei, vienres 30 de mayu, los sos premios d’investigación y lliteratura nel Hotel NH Principáu, asitiáu n’Uviéu. L’actu va ser a les doce la mañana y va cuntar cola presencia de la presidenta de l’ALLA, Ana Mª Cano y nél van entregase los premios de novela, teatru, llectures pa rapazos, ensayu ya investigación lliteraria y filolóxica.

Dempués del actu va celebrase un almuerzu colos ganadores, que nun van sabese hasta mañana mesmo. D’otru llau, l’ALLA tien yá convocaos los sos Premios 2009, nel que s’inclúi un nuevu gallardón, el de cómics n’asturianu.

Antonio Alonso, Francisca Iglesias, Pablo Suarez, Helena TrexoN Jose Luis Campal, Aurora Sanchez, Inaciu Galan, Xurde Fernandez y Josep Carles Lainez algamaron los premios de l’Academia 2008 que se dieron a conocer na mañana d’esti vienres nun actu que se desendolcó nel Hotel NH Principado n’Uvieu.

Esti añu, los concursos de recoyida oral de léxicu asturianu, d’investigación sobre lliteratura asturiana, de recoyida de material lliterario oral y de Curtios Cinematográficos quedaron ermos por decisión del xuráu.

Los demás premios quedaron repartíos como sigue:

L’escritor y profesor candasín Xurde Fernández algamó con “Díes d’Iviernu”‘l premiu del Concursu de Creación Lliteraria “Llorienzu Novo Mier” 2008 que, sigún anunció Ana Cano na comunicación del fallu va dedicase tamién a la poesía na convocatoria añal de 2009.

El xuráu del galardón d’esti añu formáronlu Miguel Ramos Corrada como presidente, Carlos Rubiera Tuya como vocal y Xosé Ramón Iglersias Cueva como secretariu.

L’escritor Josep Carlos Laínez ganó’l Concursu Teatru de l’Academia con Thule por decisión d’un xuráu formáu por Miguel Ramos Corrada como presidente, Adolfo Camilo Díaz como vocal y Marta Moria como secretaria.

Inaciu Galán, Antonio Pérez y José Luis Campal y Aurora Sánchez foron respeutivamente los galardonaos col premiu Federico Fierro Botas polos sos trabayos “Poesíes asturianes en Nostalgia” y “Cosiquines de pocu más o menos, qu’algamaron accésit de 150 euros y “Poesíes non recoyíes de Marcos del Torniello de 1899 a 1930” ganador d’un accésit de 300 euros.

El xuráu del premiu tuvo formáu por Ana María Cano, como presidenta, José Luis García Arias como vocal y Corsino García faciendo de secretariu.

Inaciu Galán, Antonio Pérez y José Luis Campal y Aurora Sánchez foron respeutivamente los galardonaos col premiu Federico Fierro Botas polos sos trabayos “Poesíes asturianes en Nostalgia” y “Cosiquines de pocu más o menos, qu’algamaron accésit de 150 euros y “Poesíes non recoyíes de Marcos del Torniello de 1899 a 1930” ganador d’un accésit de 300 euros.

Los concursos d’investigación foron a parar esti añu al trabayu tituláu “Toponimia de la parroquia de Trespena (Proaza) del que son autores Antonio Alonso de la Torre y Francisca Iglesias Álvarez y al “Diciionariu politécnicu de la llingua asturiana (Tomu III, Ciencies matemátiques) del que ye autor Pablo Suárez García.

El Seminariu de Filoloxía Asturiana, grupu d’investigación adscritu al Departamentu de Filoloxía Española de la Universidá d’Uviéu, anuncia la celebración de les I Xornaes de Trabayu “Llabor en Tienda. Nueves Tendencies na Llingüística Asturiana” pa los díes 6, 7, 8 y 9 d’ochobre d’anguaño.

Actualmente, dientro la Universidá d’Uviéu y n’otres d’España y del estranxeru, alredor de la llingua asturiana tán en marcha proyectos y planteamientos d’investigación bramente novedosos, qu’abren caminos metodolóxicos y llinies d’estudiu venceyaos a les corrientes más avanzaes de la llingüística europea y mundial.

“Llabor en Tienda” quier ser un alcuentru científicu y universitariu, onde los investigadores asoleyen ante la comunidá universitaria (profesores, estudiantes, otros investigadores) los proyectos y iniciatives nos qu’agora mesmo tán trabayando, llogrando asina un sanu intercambiu de conocencies y afalando a los futuros investigadores del fechu llingüísticu asturianu a escazar per nueves llinies de trabayu.

Les xornaes desenvolveránse en sesiones de pela mañana y pela tarde, y nelles intervendrán unos venti especialistes en campos como la investigación esperimental fonética, la gramática xenerativa, la lexicografía y lexicoloxía, la dialectometría, la toponimia, el drechu llingüísticu comparáu, la llingüística de corpus, la llingüística variacional, la lligüística computacional, l’estudiu de la llingua medieval, y otres. Dedicaránse tamién partaces esclusivos pal ámbitu lleonés y pal gallego-asturianu. Ramón d’Andrés va ser el coordinador del eventu.

La Conseyería de Cultura y Turismu ta acabante convocar el Premiu Juan Uría Ríu, na so XXIX edición, col envís d’afalar, los trabayos d’investigación sobre cultura asturiana.

El primer ta dotáu con 6.000 euros, pudiendo quedar ermu. Los trabayos tienen de ser inéditos y con una estensión mínima de 200 fueyes, a dos espacios y per una sola llana.

El premiu ye unu de los más prestixosos no qu’a l’estudiu de la cultura asturiana se refier.

El Conceyu Universitariu pol Asturianu (CUPA), organización independiente asturianista y universitaria na que participen alumnos, maestros, personal d’alministración y servicios y vieyos alumnos, anunció apocayá la presentación de candidatures a les Eleiciones al Claustru de la Universidá d’Uviéu “pa llevar la voz de los universitarios asturianistes al Claustru”. Nun comunicáu unviáu güei anuncien los actos entamaos por mor d’esta campaña, qu’incluyen, esti domingu a les 17 hores, un actu na alcordanza del 25 de mayu de 2008 n’Uviéu.

L’eventu va convertise “nel actu central” de la campaña del CUPA pa les elecciones al Claustru de la Universidá d’Uviéu y va entamar frente al Edificu Hestóricu de la Universidá d’Uviéu a les cinco la tarde. Dende esi llugar va salise nun circuitu hestóricu-cultural pol Uviéu del 25 de mayu de 1808, al cargu del historiador Javier Cubero de Vicente.

Media hora más tarde, a les 17:30, na puerta de la Catedral d’Uvoéu van facer una ufierta floral na alcordanza de los 200 años del 25 de mayu, darréu van intervenir dellos de los candidatos del CUPA y va interpretase l’Himnu d’Asturies y la Marcha Procesional de Llanes a la gaita, que va tocar Xaime Menéndez.

Xunto a estos actos, el CUPA anuncia na nota de prensa, que va organizar otros nos campus de Xixón (el 26 de mayu pela mañana) y de Mieres (el martes 27 de mayu, tamién pela mañana).

El CUPA colgó amás el so programa llingüísticu pa la Universidá d’Uviéu, un documentu nel que desenrrolla “les polítiques progresives pa la normalización del asturianu na Universidá d’Uviéu”.

Programa completu del CUPA

Izquierda Asturiana concedió na so segunda edición, el Premiu 25 de mayu, al abogáu Xurde Blanco “pola so defensa de los drechos de los falantes d’asturianu y constituyir un referente cívicu y personal”. El gallardón creóse pa premiar a persones, asociaciones o entidaes asturianes que destaquen pola so defensa de les llibertaes, la defensa de los drechos d’Asturies o la auto-organización ciudadana. La pasada edición la entidá premiada foi Coordinadora Ecoloxista d’Asturies.

La entrega va celebrase’l vienres 23 de mayu n’Uvieu, coincidiendo con dellos actos d’Izquierda Asturiana, “que va homenaxear asina’l 200 aniversariou de la revolución de 1808”.

El xuráu, presidíu por Inaciu Llope, aconceyó’l vienres pasáu pa tomar la decisión y reconoció “la so constante defensa de los falantes d’asturianu, al traviés d’una trayectoria que lu llevó a un compromisu personal insobornable, y que-y supunxo problemes y renuncies nel planu profesional y personal”.

Xurde Blanco ye lletráu del Serviciu Xurídicu del Principáu d’Asturies y miembru de l’Aconceyamientu de Xuristes pol Asturianu, entidá dende la que desenrrolla llabores de documentación, denuncia y divulgación rellacionaes cola reconocencia xurídica de la llingua asturiana. Bien conocíos son los casos personales que lu llevaron a enfrentase nos xulgaos col Gobiernu d’Asturies por mor de les múltiples prohibiciones que sufrió pa usar l’asturianu na tratamitación de permisos y otros documentos.

El vienres, sábadu y domingu d’esta selmana, la estación d’autobuses de Llangréu va acoyer la “II Muestra Cultural Tolo d ’Asturies”. Durante tola selmana van tener cabida nel recintu ferial músicos de diversos ámbitos de la escena asturiana, esposiciones d’instrumentos, vestimenta y artesanía tradicional, xuegos y deportes, puestos de venta de productos gastronómicos tradicionales y una feria del discu y del llibru n’asturianu. L’eventu ta organizáu pol Ayuntamientu de Llangréu.

El 24 de mayu entama oficialmente la Muestra pero un día antes va cellebrase un conciertu (a les 22:00 hores) nel que van participar Nuberu, los vascos del Iñaki Diéguez Tríu y los gallegos Marfiul. Al día siguiente, 24 mayu, a les 12:00 hores tendrá llugar la inauguración oficial de la feria cola apertura de la I Feria del discu y el llibru n’asturianu, los puestos de venta, y les distintes esposiciones. Na inauguración van participar dellos grupos de baille tradicional y la Banda Gaites del Conceyu de Llangréu.

Pa esti sábadu tamién tan previstes les actuaciones del grupu aragonés Alfaye/Martín (13:30 hores), Xentiquina, embaxi dirección de Nacho Fonseca (18:00), y la bandina tradicional “A Seques”. A les 22:00 hores va tener llugar el platu central del día con un conciertu nel que van tar tocando Dixebra, Los Chiquitrinos ya’l grupu bretón Hammon Martín-Quintet.

La xornada dominical entama a les 13:30 hores, col recital de tonada asturiana al cargu d’Avelino Fernández Corte, Fernando Valle Roso y Marisa Valle Roso pa siguir a les 18:00 col conciertu del llangreanu Héctor Braga y rematar con un homenaxe un a la música d’acurdión, nel que van tomar parte dellos curdionistes vieyos y mozos cola embaxo la coordinación de Xose Antón Fernández “Ambás”.

L’Academia de la Llingua Asturiana va entregar el vienres 30 de mayu los sos premios d’investigación y lliteratura nel Hotel NH Principáu, asitiáu n’Uviéu. L’actu va ser a les doce la mañana y va cuntar cola presencia de la presidenta de l’ALLA, Ana Mª Cano y nél van entregase los premios de novela, teatru, ensayu ya investigación lliteraria y filolóxica.

Dempués del actu va celebrase un almuerzu colos ganadores, que nun van sabese hasta’l mesmu día. D’otru llau, l’ALLA tien yá convocaos los sos Premios 2009, nel que s’inclúi un nuevu gallardón, el de cómics.