Conceyos

La toponimia tradicional de 36 pueblos ribeseyanos y más de 500 barrios y zones del conceyu yá ta aprobada, dempués de da-y el preste’l Plenu. Agora pa la so oficialización namás queda la firma del Conseyu de Gobiernu y la so publicación nel BOPA. Tolos topónimos van tar namás n’asturianu, sacante la capital del conceyu que va ser Ribeseya/Ribadesella y El Carme/El Carmen. PSOE, IX y PP aprobaron por unanimidá la toponimia.

Ta acabante facese públicu’l presupuestu de la Fundación Municipal de Cultura de Xixón, que llidera’l concejal Justo Vilabrille. De los 11.320.000 euros que remanará l’añu que vien la Conceyalía, un descensu del 2,04% con respectu a 2009.

Los gastos xenerales van costar a les arques del conceyu 1,8 millones, la estaya de muesos 2,7 millones, proyectos culturales y de promoción de les artes 2,5 millones, la rede de biblioteques llévase 1,7 millones, la Universidá Popular 857.500 euros y educación 704.600 euros, siendo la partida más pequeña la dedicada a la promoción de la cultura tradicional y la llingua asturiana, con 392.800 euros d’inversión.

Andecha Astur de Noreña celebra les propuestes presentaes pa camudar los nomes de casi según la Llei de Memoria Hestórica, y piden que les nueves denominaciones seyan n’asturianu, “en reconocimientu a la nuesa llingua y cultura asturianes, victimes tamién de la política uniformizadora y aculturizadora del franquismu”.

Dende Andecha Astur consideren necesarios los cambios “anque lleguen bastante tarde, siendo más bien frutu d’una imposición llegal, que de la voluntá política de quitar honores a facistes, dalgo que yá se podría y debería facer va bastantes años”. Andecha ve necesario agora la investigación “de la represión a los y les noreñenses y la dignificación de les victimas del Franquismu nel nuestru conceyu”.

Andecha Astur ta d’alcuerdu col informe d’espertos no que se refier a los cambeos propuestos y la pitición a la ilesia de la retirada de la placa “a los caidos por dios y por españa” qu’exhibe na so fachada. Nesti sen, Andecha pide, otra vuelta, al Ayuntamientu que faga tolos tramites posibles pa qu’esta placa honorífica desapareza de la via pública. De igual manera, consideramos necesario siguir buscando documentación de cara a elliminar del caleyeru la cai de “doña Ramona” que tuvo como únicu méritu “ser la muyer noreñense del militar golpista Camilo Alonso Vega”.

De toes formes, Andecha Astur considera que les nuevas denominaciones de les cais deberíen tar na llingua de los noreñenses y asturianos, dalgo poco o nada frecuente nel caleyeru noreñense, quedando cai “de la Llibertá”, “Xardines del Ayuntamientu” y “de la Concordia”, esta última coincidente n’ambes llingües. Amás d’avanzar na normalización del idioma, sedría tamién un reconocimientu a la nuesa llingua y cultura, victimes de la política uniformadora y aculturizadora del franquismu.

L’Agrupación del Partíu Asturianista en Llangréu (PAS), denunció “l’escasu compromisu” que l’Ayuntamientu de Llangréu tien, y l’olvidu permanente de los sos compromisos colos derechos lingüísticos de los asturianofalantes.

Pa l’Agrupación asturianista “bueno sería que dende la institución más próxima a los ciudadanos, como ye l’Ayuntamientu, se promoviera una campaña de promoción y fomentu de la Cultura y Llingua Asturiana”.

Dende l’Agrupación del Partíu Asturianista en Llangréu (PAS), recuerden al Ayuntamientu “qu’amparándose nel marcu xurídicu vixente, esto ye, na Llei del Principáu d´Asturies1/1998, d’Usu y promoción del Asturianu, xunto cola Carta Europea de les Llingües Rexonales y Minoritaries, aprobada pol Conseyu d`Europa en 1992 y ratificada pol Congresu de los Diputaos d’España” pue facer “un mayor fomentu y amparu, nel nuestru casu, de la Llingua Asturiana”. Y recuerden que “l’Ayuntamientu tien competencies pa ello”.

El PAS, propón al Ayuntamientu una campaña visible de fomentu y promoción de la Cultura y Llingua Asturiana “en collaboración coles sociedaes culturales y empresariales del conceyu, aprovechando’l tiempu de Navidá que s’acerca, con lletreros lluminosos n’asturiano y música con melodíes típiques asturianes”.

La Mancomunidá del Sueve, formada polos conceyos de Piloña, Parres y Caravia, va poner na Casa Cultura de L’Infiestu, en Piloña, la so Oficina de Normalización Llingüística. Paula Cristobal Caso va ser la responsable de la mesma y va tener al so cargu a otres dos persones. Con una sovención de 12.000 euros per parte de la Dirección Xeneral de Promoción Cultural y Política Llingüística.

Güei, vienres 20 de payares el Polideportivu de Vega en Sariegu va acoyer a partir de les siete la Esfoyaza Popular, que llega esti añu a la so sétima edición. L’Ayuntamientu collabora col Grupu Deportivu 6 Conceyos pa esti eventu, nel que van facese llabores como la esfueya de panoyes o enrestrar con blimes, entamase xuegos d’antaño, espadañes y bilortos. Amás, va entamase un amagüestu con sidra del duernu, amenizáu polos cuentos y cosadielles de Milio’l del Nido. Toes estes actividaes van ser gratuítes y los organizadores piden a los participantes na esfoyaza que vaigan «vistíos d’época».

La Xunta pola Defensa de la Llingua Asturiana denunciaba esti día en rueda de prensa l’arrequexamientu de la llingua asturiana nes campañes de promoción entamaes pol Conceyu Xixón, “lo que non solo incumple lo previsto na Ordenanza Municipal sobre l’usu de la Llingua Asturiana sinón, inclusive, la toponimia oficial aprobada cuantayá pol Conceyu y pol Gobiernu Asturianu”.

Según la Xunta “campañes como “Gijón de Sidras”, destinaes, figurámonos, a la promoción turística y del sector hosteleru dedicáu a la sidra, asalten ámbitos d’usu del asturianu onde l’idioma mantién una presencia fuerte y normalizada pa sustituir por una terminoloxía ayena y más averada a otres cultures como la del vinu”.

Na Xunta Pola camienten que l’arrequexamientu de la llingua asturiana nestes campañes “non solo ye un fechu qu’hai que denunciar no qu’afecta al usu del idioman’espacios públicos, sinón tamién no negativo que ye p’aquellos productosque se quieren promocionar, porque-yos quiten el valor d’especificidá qu’aporta l’idioma propiu y les palabres coles que’l nuestru pueblu nomó y identificó esos productos”.

La Xunta pola Defensa de la Llingua Asturiana va volver a proponer, otra vez, al gobiernu del Conceyu de Xixón qu’afite les midíes previstes na Ordenanza Municipal sobre l’Usu de la Llingua Asturiana, y que se dean a la Oficina de la Llingua capacidaes tresversales pa poder llevar alantre un llabor efectivu, xeneralista y non sectorizáu de visualización y usu de la llingua asturiana.

El vicealcalde de L.lena, Agripino Pérez, y la presidenta de l’Academia de la Llingua Asturiana, Ana Cano, firmaron un conveniu de collaboración esti vienres col envís d’afalar l’usu y la normalización del asturianu nel conceyu, comprometiéndose a “trabayar de forma conxunta na dignificación de la llingua asturiana”.

El conceyu de L.lena, según recordó Agripino Pérez, trabayar nesti campu al traviés de la Conceyalía de Política Llingüística que dirixe David Suárez. Ente les acciones destacó, por exemplu, la ellaboración d’un folletu turísticu coles fiestes del conceyu qu’incluirá les principales celebraciones, la rotulación de les dependencies del Ayuntamientu o la campaña «El mio primer vocabulariu en llingua asturiana II”. Amás, en L.lena, los vecinos que presenten documentos n’asturianu nel Ayuntamientu reciben contestación na mesma llingua.

El centru, que lleva’l nome de Tito Fernández, el popular cineasta nacíu en San Esteban, va agospiar toa triba d’actividaes culturales: conciertos, esposiciones, representaciones teatrales, conferencies y talleres. Tamién va ser la sede de la Escuela de Branu Rafael Altamira qu’organiza la Universidá Rei Juan Carlos I.

L’edificiu que va agospiar l’equipamientu cultural foi sometíu a una reforma fonda. Enantes d’entamar la intervención, l’antiguu templu de San Esteban presentaba delles patoloxíes qu’aconseyaben una restauración urxente. La primer fase de les obres consistió na consolidación de los elementos estructurales de la ilesia, calteniendo na midida de lo posible los mesmos criterios y materiales del diseñu primitivu. Primero, foi necesario adecuar y llimpiar l’entornu de la ilesia pa facilitar les tarees de restauración y depués fixéronse les demoliciones de les cubiertes y forxaos de madera y emprimó la reconstrucción de la estructura de madera de les cubiertes. Como elementu más innovador visible na intervención, incluyóse una escalera nueva d’accesu al coru fecha con elementos metálicos y de madera.

Esta primer fase desendolcóse nos años 2004 y 2005. Dempués, en 2007 entamó a trabayase na segunda fase, que consistió nel acondicionamientu del interior del edificiu pa habilitalu como espaciu cultural. Del mesmu mou, procedióse a acondicionar l’entornu y la parcela na que ta a llugada l’edificiu, d’accesos complicaos polos fuertes desniveles de les cais. L’oxetivu fundamental d’esta intervención, concluyida esti añu, yera dotar a la ilesia vieya d’unos accesos peatonales al traviés d’una escalinata de trazáu suave y cómodu, sofitada nel trazáu primitivu, al que quitaron los sos elementos más angostos ya incómodos.

El Conceyu de Parres ta acabante entrar nel llistáu de 40 conceyos qu’oficializaron yá la so toponimia, según afita la Llei d’Usu del asturianu de 1998. Les nueves denominaciones, aprobaes pola Xunta de Toponimia primero, pasen a tener la consideración de denominaciones oficiales.

20 conceyos más tienes abiertu’l procesu pa normalizar l’usu de la so toponimia tradicional al traviés de la so oficialización.