Conceyos

Esti miércoles día 17 de marzu a les 20 hores, la sala polivalente de la Casa de Cultura de Grau va ser l’escenariu de la presentación del primer númberu d’esta publicación que va distribuyise gratuitamente ente los asistentes a la presentación. “Villa y Alfoz” cunta con 80 páxines más portaes, b/n y un cuadernín central a color.

Nsti primer númberu pueden atopase trés artículos sobre’l Bron de San Xuan, d’Álvaro Valdés, les pintures de la Ilesia de Restiellu, de Beatriz Canitrot y un artículu sobre William Parker Carroll n’Asturies y Peñaflor, d’Alicia Laspra.

L’actu enmárcase dientro de les III Xornaes d’Estudios Llocales, entamaes pol Círculu d’Estudios Pramarenses, la Conceyalía de Cultura y el Muséu Etnográficu de Grau, cuntando cola collaboración d’Ediciones La Cruz y la Conseyería de Cultura del Principáu.

Dempués del conflictu vivíu en Xixón pola marxinación d’un ciudadanu que tentó usar l’asturianu nuna oficina municipal, l’Ayuntamientu entama a cumplir les midíes previstes nel Plan de Normalización aprobáu en 2009, no que cinca a la posibilidá de facer les xestiones alministratives n’asturianu. Una posibilidá pa la que ye imprescindible que la insititución ufra modelos normalizaos na so versión n’asturianu y qu’agora entama a facese realidá colos primeros once trámites disponibles na rede.

La páxina web del Ayuntamientu de Xixón ufre yá los formularios pa solicitar casorios nel Ayuntamientu, entamu xeneral, instancia, recursu, inscripción nel rexistru de pareyes de fechu, presentación de quexes y suxerencies, solicitú d’empléu, ficheru d’acreedores, ficheru de deldores y solicitú de la tarxeta ciudadana. Los formularios lletrónico nun pueden, sicasí, rellenase colos meses n’asturianu, un fallu técnicu que de xuru podrá solucionase

La Oficina Municipal de la Llingua foi la encargada de facer les traducciones de los documentos, que se sumen a otres iniciatives entamaes pa la normalización del asturianu, como l’apaición del topónimu Xixón nes equipaciones ya instalaciones d’equipos deportivos del conceyu o les actividaes entamaes pa la mocedá dende la citada oficina.

Páxina onde pueden descargase los formularios n’asturianu

Güei llunes, 1 de marzu, entamen les actividaes programaes pola Asociación Vecinal de los Pueblos de la Parroquia de Blimea nel Centru Social de la llocalidá. El primer actu previstu ye una charra del escritor Chechu García, que va falar sobre’l cómic asturianu a partir de les 18.30 hores.

Mañana martes, Marcelino García-Noriega Fernández y la doctora Elena Fernández Fernández van dar la conferencia “Hábitos saludables na nutrición infantil”, a la mesma hora, y el miércoles, llega’l turnu del teatru, cola representación de “Mujeres en guerra”, a cargu de la compañía Quimérika, del IES Calvo Miguel.

La Selmana Cultural pon sigue’l xueves con Carlos Cuesta, periodista y críticu gastronómicu, y Luis Alberto Martínez Abascal, xefe de cocina de Casa Fermín, que van falar del pasu de la cocina tradicional a la de vanguardia. Amás, el vienres, y como pieslle de les actividaes, va celebrase un recital del Coru de Voces Blanques del Conservatoriu del Nalón na Ilesia de Santa María y va facese una cena de xermandía nel restorán Casa Delfina, incluyendo ne programa un homenaxe a Higinio Montes Moreno y el sortéu d’un cómic d’Alfonso Zapico.

La Conceyalía de Cultura de Grau organiza la estancia nel conceyu moscón de la Esposición ‘Miraes 2009’, qu’entama l’Asociación Profesional de Fotoperiodistes Asturianos (APFA) y la Conseyería de Cultura d’Asturies. Del 17 al 26 de febreru de 2010 Corredor y Sala d’esposiciones de la Casa Cultura de Grau van acoyer “Miraes”, una selección de les meyores semeyes del añu 2008 publicaes na prensa asturiana.

La mayoría d’eses semeyes fueron publicaes na prensa asturiana, anque dalguna tamién tuvo proyección en diarios d’espardimientu nacional. Cuasi 40 profesionales de la fotografía de prensa asturiana participen nesta amuesa.

L’Agrupación del PAS n’Uviéu esixe al Ayuntamientu d’Uviéu qu’utilice y fomente el nome de les folixes que se realicen na ciudá y nel conceyu n’asturianu. Anque reconocen que dempués de munchos años, l’Ayuntamientu y la Sociedá Uvieína de Festexos espublizen un cartel animando a la participación na folixa baxu’l títulu “Uviéu de Antroxu”, y “s’allegren del pasu”, reclamen “que’l nome de les distintes folixes que se realicen na ciudá s’usen n’asturianu (San Xuan, Martes de Campu, L’Ascensión…)” y lo mesmo col nome de la ciudá: Uviéu.

El PAS pregunta al Conceyal de Cultura, Señor Arias-Cachero “qué pasa coles Ordenances Municipales que se diben a aprobar nel Consistoriu y que a día de güei nun se sabe nada”. Los asturianistes dicen nun saber “si tán paralizaes o l’Equipu de Gobiernu y la Comisión de Cultura les escaeció”.

Pa finar l’Agrupación del PAS de Uviéu reclama al Conceyal de Cultura qu’esclarie “cómo s’atopa’l procesu d’ellaboración de les ordenances y si esiste realmente dalgún tipu de voluntá por llevales alantre”.

L’Ayuntamientu de Tinéu va desendolcar un proyectu destináu a la recuperación de les varidaes tradicionales de cerezal nel conceyu. El proyectu, denomáu ‘Cerezal + Biodiversidá’, cuenta con un presupuestu de 89.000 euros, de los que 62.000 apórtalos la Fundación Biodiversidá. Con esti programa pretenden recuperar, cola téunica del inxertu, la presencia de la cerezal nel paisaxe.

L’oxetivu del proyeutu ye realizar 3.000 inxertos de variades de cereza llocal como la negra picona, la francesa, la mul.larina y l’ácida, sobre otros tantos patrones recoyíos de los montes del conceyu.

Xuventú Asturianista, mocedá venceyada al PAS, ta acabante denunciar que l’Ayuntamientu de Xixón, al traviés de la Conceyalía de Cultura Tradicional y Llingua Asturiana, vuelva a organiza la gala “Xixón fala n’asturianu” onde según la organización moza “se mos intenta vender lo mucho que fai pol asturianu l’Ayuntamientu gobernáu pol PSOE ya IU”.

Ye por ello que XA denuncia “la hipocresía y la poca vergoña que tienen, en especial IU con Jesús Montes Estrada a la cabeza”, y recuerden que fueron “los que prometieron la oficialidá nel Estatutu, los que dicen defender la llingua asturiana” quien organicen esti actu.

Xuventú Asturianista entrugáse “qué faen nesta conceyalía y qué utilidá tien si nun s’usa la toponímia oficial nel propiu Ayuntamientu, si nun hai un usu real de la llingua asturiana nel Ayuntamientu, nin les webs arrellaes (propia web del Ayuntamientu, Teatru Xovellanos…)”.

A too esto, Xuventú Asturianista añade la so solidaridá con un casu pol que va más d’un mes “un ciudadanu foi menospreciáu y humilláu pol usu del asturianu nun trámite del Ayuntamientu”, lo que recuerden “vulnera la Ordenanza Municipal d’Usu del Asturianu aprobada por ellos mesmos”.

Ye pola suma d’estos fechos pola que Xuventú Asturianista denuncia “la hipocresía d’Izquierda Unida, la falsedá política del Señor Montes Estrada, Conceyal de Cultura y Llingua Asturiana y edil d’IU en Xixón” y piden la dimisión del Conceyal de Cooperación, Llingua Asturiana y Cultura Tradicional y animen a los ciudadanos “que realmente tienen afectu a la llingua asturiana a manifestase contra esti tipu d’actos que solo valen pa xustificar la paupérrima política llingüística que lleven alantre”.

L’Asamblea de Ciudadanos por la Izquierda pidió estos díes na Comisión de Cultura y Deportes d’Uviéu que se pida a la Conseyería de Cultura y Turismu “l’entamu del procesu d’oficialización de la toponimia tradicional”. El llider de la formación, Roberto Sánchez Ramos, camienta que Uviéu “nun ye ayeru a la tradición” polo que “ha sumase ysolicitar la so integración nel estudiu del mapa toponímicu d’Asturies.

El Conceyu de L.lena –al traviés del Serviciu de Normalización Llingüística–, y collaboración cola Academia de la Llingua Asturiana y la Xunta Cultural Rebelgu, entama un cursu d’asturianu p’adultos en La Pola. Les clases entamen l’1 de febreru y van ponese na Casa Cultura.

Nel cursu van dase les característiques llingüístiques del conceyu y va durar 36 hores. L’actividá val trenta euros, que se van destinar a comprar el material didático, y al final va dase un certificáu oficial de l’Academia de la Llingua Asturiana. El plazu de matrícula ta abiertu hasta’l vienres 29 de xineru y la inscripción faise na Casa Cultura.

Ta abiertu’l plazu p’apuntase nel cursu d’afondamientu p’adultos qu’entama la Estaya de la Llingua d’Avilés. L’horariu sedrá de 19:00 a 21:00 hores, martes y xueves. La duración ye de 30 hores, entamando’l 2 de febreru y finando’l 25 de marzu. Pa facer esti cursu ye necesario tener otru fechu anteriormente d’aniciu de cualesquier muérganu oficial afayadizu pa ello: Academia de la Llingua Asturiana, Conseyería de Cultura, Conseyería d’Educación, IAAP, Estaya de la Llingua, AUPA, Universidá Popular o Servicios de Normalización.

La matrícula ye de baldre. P’apuntase pue facese per corréu llectrónicu: estayallingua@ayto-aviles.es, per teléfonu: 663 820 132 o na oficina de la Estaya: Casa Municipal de Cultura d’Avilés, plaza de Domingo Álvarez Acebal, 2, primer pisu.