Conceyos

El grupu políticu Conceyu Abiertu pide’l cumplimientu del acuerdu plenariu de 1999 pa la reconstrucción de la ponte ferroviara d’El Rebalde, que data del añu 1850 y sobre la que la Conseyería de Cultura acaba declarase “incompetente pa pronunciase sobre’l so abandonu” por tar desmontáu enantes de la entrada de la Llei de Patrimoniu (1/2001) polo que nun contaría con protección patrimonial efectiva.

Conceyu Abiertu por Noreña pide, que’l gobiernu llocal actue “dempués de pronunciase Patrimoniu y ratificar que la ponte nun tien dengún tipu de protección”, y recuerden que “yá nun hai escuses pa que l’Ayuntamientu actúe sobre los materiales de cara a preservalos y estudiar la so reconstrucción como s’alcordara en Plenu de 26-11-1999”. CA recuerda coomo “Dende’l gobiernu del conceyu dicíase que nun se podía actuar sobre ellos ensin saber si taben protexíos y, si yera asina, baxo mandatu de la Conseyería”, y pide qu’agora que ta aclariao, el Conceyu de Noreña tomes les midíes oportunes.

Conceyu Abiertu afirma que l’archivu del espediente pola inhibición de la Conseyería “nun quita dengún valor patrimonial a la ponte y l’únicu fechu pol que l’Ayuntamientu nun ye sancionáu ye porque se desmontó un añu enantes de la entrada en vigor de la llei”. Pa la formación “tampoco nun quinta responsabilidá política a los distintos gobernantes que, dende 1999, nun cumplieron l’acuerdu plenariu de reconstruyila, abandonándola y posiblemente faciendo que los noreñeses perdiéramos un importante elementu patrimonial”.

“La pelota ta nel teyáu del gobiernu municipal, pue intentar salvar y protexer el patrimoniu o siguir col vergoñosu abandonu y l’incumplimientu los acuerdos”, rematen dende CA.

Gracies al llabor de los vecinos, animaos pola propuesta del grupu de monte de l’Asociación de Vecinos de Celoriu «La H.oguera», la parroquia de Celoriu, en Llanes, recuperó yá 375 topónimos menores. Nomes de llugar conseñaos al traviés de la documentación medieval y la tradición oral viva que s’acompañen d’un trabayu fotográficu de más de 790 semeyes y un vídeu del trabayu del campu.

Ente los collaboradores tuvo l’hestoriador y etnógrafu Ramón Sordo Sostres.

Ente los topónimos recoyíos, los de los regatos de la parroquia: La Bola, Pontigu, Chicu, Martinh.uentes y L’Aguañaz. Pueden vese tolos topónimos na páxina web hogueraceloriu.com

El miércoles 6 de xunu fallóse’l V Premiu al Pueblu Exemplar de Grau (añu 2012), convocáu pola Conceyalía de Cultura del Conceyu de Grau. Nesta ocasión presentáronse cinco candidatures (Panicera, Parroquia de Báscones, Santa María Grau, Santa María Villandás y Rañeces).

Tres el correspondiente alderique’l xuráu alcordó por unanimidá conceder el premiu a la candidatura de la localidá de Santa María Grau, presentada pola Asociación “El Gueyo”.

El Xuráu “valoró l’ampliu cumplimientu de tolos criterios a valorar, el so espíritu cooperativu y collaboración con entidaes benéfiques ya instituciones, amás de les sos obres y llogros na recuperación y revitalización del so patrimoniu, recuperación de les sos tradiciones como les filanderes, gastronomía y fiestes, destacando finalmente’l so sobresaliente esposición documentada y el proyectu al que pretenden destinar el premiu: los materiales pa la construcción d’un centru social fechu en sestaferia polos vecinos”.

La Fundación José Cardín Fernández aprovecha les nueves tecnoloxíes “col fin de dar un más plenu cumplimientu a los sos fines” y crea la Biblioteca Dixital Maliaya, “abierta a tola sociedá y bien en particular a la villaviciosina”.

nella recuéyense testos d’ensayu al rodiu de la cultura de Villaviciosa, incluyendo documentos gráficos y escritos.

Biblioteca Dixital Maliaya

Esti miércoles 2 de mayu, a les 20:00, con motivu de la Selmana de les lletres, va celebrase un recital de poesía n’asturianu que va contar cola presencia de J.I Pidal Montes, Rubén d’Areñes, Casilda Riu y Javier Cayado, acompañaos pola guitarra de Roi Sampedro, del grupu folk Mezá.

A partir d’esto llunes 30 d’abril puede visitase na Casona del Bravial de Blimea la esposición “Campañes de normalización llingüística nel conceyu de Samartín”, un repás a tol llabor lleváu a cabu pol serviciu de normalización del conceyu dende l’añu 2005. Tará abierta n’horariu, de llunes, miércoles y vienres de 9 a 14 h. y martes y xueves de 11 a 13 y de 17 a 20 hores. El miércoles 2 de mayu, a les 9,00 hores, alumnos del IES Virxe de Cuadonga van visitar la Casona del Bravial pa ver la esposición y conocer el Muséu de la Memoria y l’Oficina de Normalización Llingüística. Estes y otres actividaes van celebrase a lo llargo de tola selmana xunto a un sortéu de llibros en Facebook, onde se participa colgando testos lliterarios n’asturianu.

El xueves 3 de mayu a les 10:30 hores, va tener llugar la presentación del llibro ‘Memorial del monstruu’, de Dolfo Camilo Díaz, gallardonáu col Premiu Montesín de Lliteratura Xuvenil nel añu 2010. Va asistir como públicu invitáu alumnos del IES Juan José Calvo Miguel.

Nel pisu baxu del edificiu polivalente La Baragaña de Candás, va ufrise al públicu, dende’l 25 d’abril al 18 de mayu, una esposición de delles campañes en llingua asturiana dirixíes al públicu infantill y entamaes pol Serviciu de Normalización Llingüística de la Mancomunidá d’El Cabu Peñes. Otra de les meses de la esposición tará destinada a della información al rodiu de la Selmana de les Lletres Asturianes qu’esti añu 2012 va tar dedicada a la Ilustración.

El mesmu espaciu, y nes mesmes feches, va acoyer otra esposición de dibuxos del autor escritor y ilustrador Sidoro Villa Costales, que cunta con obres como Nun-yos tengas perceguera o Mael al debalu ente otres munches, y qu’amuesa un refileru d’ilustraciones orixinales fechos pa dalgunu de los sos llibros, y otros trabayos que van dende los empobinaos al públicu más mozo hasta otros p’adultos.

Iniciativa pol Asturianu queremos amosó’l so “fondu maltar” pola situación política na que s’alcuentren les mancomunidaes del país, como la Mancomunidá d’Avilés y, principalmente, la Mancomunidá del Cabu Peñes, “onde la engarradiella ente’l PP y el PSOE pue afeutar a la continuidá del so Serviciu de Normalización Llingüística (SNL)”, espliquen. De fechu, aseguren, “el francimientu de dicha mancomunidá supondría que, polo menos, los gozoniegos quedaren privaos d’un serviciu que lleva furrulando dende 2004”.

Pa Iniciativa pol Asturianu la inestabilidá que vienen encarando los SNL dende’l so entamu débense principalmente a dos factores, “la falta d’un conveniu ente’l Gobiernu del Principáu d’Asturies y los Conceyos, que faiga de los SNL un serviciu fixu del so organigrama” y “la falta de compromisu políticu y económicu del Principáu y de los Conceyos”.

Iniciativa pol Asturianu refuga que cola xida de la crisis, “se zarren servicios que yá teníen una partida presupuestaria alcordada”, como ye’l casu de la Casa de la llingua de Corvera, el SNL de la Mancomunidá del Sueve y, agora, el SNL de la mancomunidá en Gozón.

Sicasí, mientres zarren servicios y nun se fai nada por evitalo, anúnciase la creación d’otros nuevos n’Illas y Castrillón, lo que dende’l colectivu “nun correspuende a un plan coherente de política llingüística”. Estos conceyos pertenecen a la Mancomunidá d’Avilés, xunto col conceyu del mesmu nome y el de Corvera. Nes sos propuestes de coordinación de programes, falen d’oficines d’información a la mocedá, de consumu y de los telecentros, pero non de la normalización llingüística.

Poro, dende Iniciativa pol Asturianu, esixen a diches mancomunidaes “qu’igüen un plan pa que tolos conceyos que les formen puedan ser atendíos por un SNL”.

La Conceyalía de Cultura presentó los actos pa la celebración de la Selmana de les Lletres Asturianes, cola que pretende fomentase la llectura de lliteratura asturiana, poner en valor la cultura d’Asturies ya impulsar la normalización de la llingua asturiana ente la xente mozo. Los actos van desenvolvese del 30 d’abril al 4 de mayu na Casona del Bravial y van cuntar cola participación d’alumnos d’Educación Secundaria del conceyu.

La selmana va arrincar cola inauguración de la esposición “Campañes de normalización llingüística nel conceyu de Samartín”, que ye un repás per toles campañes feches nesti sentíu dende l’añu 2005 en distintos ámbitos: enseñu, comerciu, hostelería o alministración llocal, ente otros. L’horariu de visita, mientres tol mes de mayu, ye de 9 a 14 hores.

El miércoles 2 de mayu, a les 9,00 hores, alumnos del IES Virxe de Cuadonga van visitar la Casona del Bravial pa ver la esposición y conocer el Muséu de la Memoria y l’Oficina de Normalización Llingüística.

Al otru día, el xueves 3 de mayu a les 10:30 hores, va tener llugar la presentación del llibro ‘Memorial del monstruu’, de Dolfo Camilo Díaz, gallardonáu col Premiu Montesín de Lliteratura Xuvenil nel añu 2010. Va asistir como públicu invitáu alumnos del IES Juan José Calvo Miguel.

A lo último, dende’l perfil en facebook de la Oficina de Normalización Llingüística convidase a la población a publicar na so muria testos inéditos o reproducciones d’autores n’asturianu, colos que van participar nel sortéu d’un llote de llibros.

Cola intención de facer presente la llingua asturiana dende los primeros años de vida de los neños y neñes y concienciar a los padres de la importancia del so llabor pa la conservación del nuestru patrimoniu llingüísticu, Man.co.si, al traviés del so Serviciu de Normalización Llingüística, editó esti añu “El llibru pa lo más piquiñino de la casa”, un guapu cuadernu ilustráu nel que se pueden dir rexistrando les evoluciones de los neños y neñes nos sos primeros años, dende’l so nacimientu hasta’l primer añu d’escuela. La presentación del llibru va facese esti xueves, 19 d’abril, a les 12:00 hores, na Sede de Man.Co.Si en Paraes (Nava)

“El llibru pa lo más piquiñino de la casa” ye una revisión actualizada del “Llibru del naciatu”, editáu en 2008 pol Serviciu de Normalización Llingüística de Man.co.si, xunto con otros conceyos de los qu’integren la Rede de Normalización Llingüística nos conceyos. Nesta nueva versión participen tamién los conceyos de Samartín del Rei Aurelio, Llangréu, Mieres y Cangas del Narcea, y la Mancomunidá del Cabu Peñes.

El llibru repartiráse ente los padres que vayan a empadronar a los sos fíos y fíes nos conceyos qu’integren la mancomunidá, pudiéndo solicitase tamién un exemplar, hasta fin d’esistencies, nel Serviciu de Normalización Llingüística de la Comarca de la Sidra, na sede de Man.co.si en Paraes (Nava).

Xunto col llibru, repartiráse una carpeta que inclúi un baberu con dibuxos y vocabulariu referente a los primeros años d’infancia, un pallabreru, un mididor y una pegatina pal coche col lema “Cuidadín, que voi dientro”, inspiráu nel clásicu “Bebe a bordo”.

Amás d’esta actuación, el Serviciu de Normalización Llingüística de Man.co.si tien previsto pa los prósimos meses un nuevu repartu de materiales de les campañes del ámbitu de la hostelería, talleres de llectura n’asturianu en Nava y Villaviosa y el tradicional repartu de les lletres de pan, el día de les lletres asturianes, que se celebrará esti añu’l vienres 4 de mayu. Como antesala a esti día, celebraráse’l miércoles 2 de mayu un recital músicáu de poesía n’asturianu nel teatru riera de Villaviciosa, con dalgunes de les voces más interesantes del panorama de la nueva poesía fecha n’asturianu.