Comunicación

Güei empiecen les emisiones regulares de la canal pública de televisión asturiana cola programación, a les ocho, del parte informativu de la tarde. Énte la puesta en marcha de la RTPA y la “presencia marxinal del asturianu nes sos emisiones”, la Xunta pola Defensa de la Llingua Asturiana denunció “‘l despreciu del Gobiernu asturianu pola opinión de los asturianos, que dende hai más de 15 años vien manifestándose mayoritariamente a favor de la esistencia d’emisores públiques de radio y televisión qu’emitan íntegramente n’asturianu” y acusólu d’ “avanzar nel procesu de substitución y desaniciu de la llingua”.

La Xunta pola Defensa de la Llingua Asturiana considera inalmisible que la presencia de l’asturianu nes emisiones de la RTPA se solventen cola “especial protección al bable” que figura na llei que dio pie a la creacción del Ente de Comunicación públicu asturianu. “El Gobiernu asturianu demuestra que non solo nun tien intención de trabayar na defensa del patrimoniu llingüísticu d’Asturies, sinon que mantien firme la so voluntá de siguir avanzando nel procesu de substitución y desaniciu de la llingua asturiana”, asegura la organización cívica nun comunicáu públicu.

“La esperiencia d’otres comunidaes con llingua propia que yá cunten con organismos de radiotelevisión amuesanos que los medios de comunicación audiovisuales son ferramientes indispensables de normalización social de les llingües amenazaes”, poro l’asociación en defensa de la llingua asturiana considera que quita-y esi usu na televisión pública a l’asturianu ye “imponer el castellanu nun ámbitu nuevu d’usu que-y va dar más puxu na presión qu’exerce pola sustitución llingüística total y apostar pola muerte segura del nuesu idioma autóctonu”.

Por ello, la Xunta pola Defensa de la Llingua Asturiana acusa al Gobiernu asturianu “d’actuar d’espaldes a la Constitución, qu’afita como obligación de los poderes públicos «promover les condiciones pa que la llibertá y la igualdá de los individuos y de los grupos nos que s’integra seyan reales y efectives, a la vez que reconoz y garantiza’l derechu a la llibre espresión y al accesu a los medios de comunicación públicos de los grupos sociales significativos, respetando el pluralismu de la sociedá y les demás llingües d’España»; de nun respetar l’Estatutu d’Autonomía d’Asturies, qu’otorga a Asturies les competencies sobre’l desarrollu llexislativu y execución del rexime de tolos medios de comunicación social y sobre’l fomentu y protección del asturianu; y d’incumplir la Llei 1/98, d’Usu y Promoción del Asturianu, qu’obliga a l’Alministración Autonómica a velar por una presencia axeitada del asturianu nos medios de comunicación nos que participe”.

La Radiotelevisión del Principado de Asturias (TPA) va estrenar les sos emisiones regulares el prósimu vienres, 9 de xunu, colos partes informativos de les ocho y media la tarde. Echa a andar d’esta manera la televisión pública asturiana que, anque yá empezó a emitir en pruebes dende la so se na Laboral de Xixón, va dir a poco y a poco completando la so parrilla de programación.

Esti empiezu d’emisión “ye’l pasu definitivu pa la puesta en marcha d’un complexu tecnolóxicu que se va encargar de la emisión regular de la programación” al travies d’un sistema basáu dafechu na tecnoloxía dixital, según afirmaron los responsables de la canal pública rexonal que tovía nun confirmen los conteníos de tala programación.

El director d’Asturnews, Próspero Morán, ye l’únicu asturianu invitáu como ponente nun congresu internacional que va desendolcase esti mes en Madrid entamáu pola Universidá Complutense de Madrid que va analizar la blogosfera en lengua castellana. El profesor de periodismu de la Universidad Carlos III de Madrid va falar del papel que xueguen los blogs nel ámbitu educativu y na enseñanza del periodismu.

El Primer Congreso Internacional de Blogs y Periodismo en la Red entama’l 26 d’abril en Madrid y desendólcase hasta’l 27 con un ampliu programa nel que participen ponentes como’l periodista y blogger Ignacio Escolar, el profesor de la Universidad Antonio Nebrija Jesús Flores y el mexicanu Jorge Sánchez Badillo. Próspero Morán intervendrá na xornada inaugural na que se tratarán dellos temes que van del estáu actual del periodismu y la so relación cola Rede, hasta la espansión del fenómenu blog, tanto nel entornu de los medios como na propia sociedá, y les tendencies del periodismu profesional y les nueves tecnoloxíes dixitales.

Los weblog son una modalidá de diarios dixitales que tienen como especial característica el que son los propios llectores los que contribuin a la so redacción coles sos aportaciones y comentarios. La función de los profesionales del periodismu nestos medios interactivos céntrase en contrastar y seleccionar les informaciones o comentarios recibíos pa la so publicación nel blog. Al empar cada testu puede retrucase o ampliase desque apaez colgáu na rede, d’una manera asemeyada al funcionamientu de les cuentes personales de corréu electrónicu. La pluralidá informativa y d’opinión ye ún de los principales atractivos d’estos nuevos medios de periodismu alternativu, son poro canales de “democratización de la propia sociedá y de fomentu del espíritu críticu”, sigún afirma Próspero Morán.

Web del Congreso Internacional de Blogs y Periodismo en la Red

L’Asociación Profesional de Radio y Televisión del Principáu d’Asturies manifiestase contraria al recorte de personal na Radio Televisión Española, al considerar que la reducción drástica de personal nun ye denguna ayuda pa salir del deficit financieru pel que ta pasando l’ente, al tiempu qu’alvierten que desfacer tantos puestos de trabayu va llevar a xubir l’empleu precariu nesti sector.

No tocante a Asturies, los profesionales de la radio y la televisión asturianos manifiesten que l’hipoteticu pieslle de la emisora de Xixón y la incertidume sobre’l Centru Territorial «puede baxar la ufierta de medios n’Asturies y perxudicar el papel de RTVE como elementu de cohesión del país».

L’ex alcalde socialista de Mieres Misael Fernández Porrón ye’l candidatu propuestu conxuntamente polos grupos parlamentarios del PSOE y d’Izquierda Xunida-Bloque por Asturies pa presidir el Conseyu d’Administración de la Radio Televisión del Príncipáu d’Asturies (RTPA) tres la dimisión de Bernardo Díaz-Nosty. Porrón súmase a los otros dos ex alcaldes socialistes nel organismu cimeru del Ente Públicu.

La mesa de la Xunta Xeneral va decidir esti miércoles 28 l’aceptación del candidatu pa ocupar la presidencia del Conseyu de RTPA, muérganu executivu del Ente nel que tán presentes dende la so puesta en marcha otros antiguos cargos públicos del PSOE como l’ex rexidor de Valdés, Jesús Landeira o el de Llanes, Manuel Amieva, amás de la ex conseyera de Trabayu, Angelina Álvarez.Nel Conseyu tamién tán propuestos pol PSOE ya IX-BA, la notaria Montserrat Martínez, la economista María Luzdivina Rodríguez, l’escritor Francisco Alonso, el profesor de la Universidá d’Uviéu Benito Aláez y el escritor Adolfo Camilo Díaz

El primer presidente del Conseyu d’Administración del Ente Públicu, el caderalgu de Comunicación Bernardo Díaz-Nosty, un independiente, presentó la so dimisión del cargu va unos meses por razones personales. Fernández Porrón, alcalde socialista de Mieres hasta les últimes elecciones municipales, va ser el presidente del Conseyu de la RTPA embaxo’l que escomiencen les primeres emisiones de la parriella de programación, tres finar el periodu de prebes, una realidá que va visualizase dientro de delles selmanes, si se cumplen los plazos previstos polos responsables de la televisión autonómica.

La Unión Europea quier reducir ente un 40 y 60 por cientu el sobrecoste que supón l’usu del teléfonu móvil pa les llamaes ente comunicantes residentes nos países miembros. La propuesta quier que los usuarios si tán de viaxe o en residencia temporal per cualaquier país comunitariu paguen los mesmos precios de los sos países de residencia habitual. La Comisión Española del Mercáu de les Telecomunicaciones ye l’únicu órganu regulador que s’opón dafechu a esta propuesta.

El coste d’usar el teléfonu nel estranxero pero dientro de la Unión Europea va reducise a la mitá el prósimu añu según les propuestes perfilaes el martes pola Comisión, una maniobra que va golpear duramente les ganancies de los operadores. La Comisión Europea dixo que diera tiempo de sobra a la industria pa que recurtie los precios, pero que ésta nun lo ficiera.

La Comisión estima que los ingresos poles tarifes del llamáu ‘roaming’ suponen un total de 10.000 millones d’euros, y esta nueva regulación diba suponer un aforru pal consumidor d’ente’l 40 y el 60 por cientu nes llamaes feches nel estranxero. Les tarifes por una llamada de cuatro minutos n’itinerancia varíen de los 0,20 a los 13 euros a lo llargo de los 25 Estaos miembros, siendo’l beneficiu de les llamaes nel estranxero ente’l 90 y el cien por cien pa los operadores, afirmó la UE.

Pel so llau, la CMT (Comisión española del Mercáu de Telecomunicaciones) opúnxose dafechu güei a la propuesta de Bruseles y propón fixar un tope namás a los precios que paguen los consumidores finales y non a les tarifes que cobren unes operadores a otres pol usu de les sos redes nel estranxero. La CMT ye l’únicu regulador européu que s’ opón a la implementación d’esta midida.

El nuevu reglamentu va ocupase de les tarifes al por mayor y de reducir les tarifes ente operadores, va eliminar toa tarifa de ‘ itinerancia’ o ‘roaming’ poles llamaes recibíes al viaxar al estranxero dientro la UE ya introducir el principiu del ‘preciu del país d’orixen’, según el cualu un usuariu que viaxe al estranxero dientro la UE pagaría siempre los precios que habitualmente paga nel so país de residencia: la tarifa local si fai una llamada local o la tarifa normal internacional si llama a otros destinos de la UE.

El gobiernu español decidió proponer a tres espertos en derechu constitucional pa la vacante reservada a esti estáu na comisión de la Carta Europea de Llingües Minoritaries. Los tres nomes encamentaos son los d’Alberto López Basaguren, Miguel Ángel García Herrera (entrambos titulares d’una cátedra de Derechu Constitucional na Universidá del País Vascu) y José Cofre Sirvent, profesor titular de Derechu Constitucional na Universidá de Alicante.

El Ministeriu d’Administraciones Públiques, que dirixe Jordi Sevilla, unvió los tres nomes de los constitucionalistes pa qu’ente ellos salga la persona que va ocupar la vacante na comisión d’idiomes minoritarios de la Unión Europea. La terna de los candidatos españoles conocióse de la respuesta del Ministeriu a una pregunta de la diputada vasco-navarra Uxue Barkos, de Nafarroa Bai, fecha nel Congresu de los Diputaos sobre l’asuntu.

La Fundación Príncipe d’Asturies ye la responsable de la invitación fecha a la organización europea de les televisiones públiques Eurovisión pa que celebre n’Uviéu una de les sos reuniones los prósimos díes 21 y 22 d’abril. L’añu que vien la capital asturiana va volver acoyer un alcuentru de televisiones, nesti casu iberoamericanes.

Les reuniones de les organizaciones supranacionales de televisión n’Uviéu tan relacionaes colos eventos de remembranza del venticinco aniversariu de la Fundación Príncipe d’Asturies y suponen, a xuiciu de la institución que dirixe Graciano García, “una reconocencia al llabor de la Fundación” en favorecer l’intercambiu cultural y la comunicación ente los países d’Europa y Latinoamérica.

La revista Lletres Asturianes de l’Academia de la Llingua llega al so númberu 90 con una entrega dedicada a asoleyar dellos de los trabayos presentaos por diversos especialistes nes últimes Xornaes d’Estudiu. Ente los artículos d’investigación publicaos destaquen el firmáu por Ignaciu Llope embaxo’l títulu “Xuegos d’identidá na tierra Navia-Eo: un averamientu críticu” y del de Carmen Alen tituláu:”Algunas consideraciones sociolingüísticas sobre dos lenguas minoritarias: el occitano y el asturiano”.

Otros trabayos qu’apaecen nesti númberu de Lletres Asturianes son “El bable y los bablistas. La paya nel güeyu axenu. Un documentu de Matías Conde” de Rafael Rodríguez Valdés, “La reivindicación asturianista dende la emigración en Barcelona” de Iván Cuevas y “Un sainete del XVIII: ‘Los asturianos picados'” de Ramiro González Delgado.

Completen esti númberu 91 les avezaes secciones de Faza Lliteraria, onde’l profesor García Arias recupera un poema anónimu de 1848 y Daniel García Pedrayes publica delles versiones del poeta balear Joan Salvat-Pappaseit. El remate d’esta entrega pónenlu les Notes y Anuncies, con diverses reseñes de trabayos filolóxicos y noticies de variu calter sobre l’actualidá llingüística asturiana.

Un de los foros d’aficionaos a la metereoloxía más populares de la rede nel estáu foro.meteored.com permite d’apocayá l’emplegu de la llingua asturiana nos mensaxes unviaos al alderique. Na última camudación de les normes d’usu d’esti foru abrióse la posibilidá de que los usuarios se comuniquen en cualquier idioma del estáu, sea oficial o non.

Veceros asturianos d’esti alderique na rede sobre asuntos metereolóxicos resalten la importancia de que la nuestra llingua pueda valir pa comunicase nun de los foros más populares d’esta materia y llamen l’atención de que los únicos alderiques asemeyaos del nuestru país: www.asturmet.com y www.meteoasturias.com nun usen l’asturianu nos sos foros.

Pa los usuarios de Meteored que se feliciten pol so plurillingüismu “la inclusión del asturianu como llingua vehicular pa falar de meteoroloxía nun foru a nivel estatal radica na falta de prexuicios del equipu d’alministración y la so valentía al tener qu’enfrentase a opinones contraries (notar qu’un foru d’esti calter nun trabaya por amor al arte, sinon que, tien que nutrise económicamente de daqué pa poder mantenese)”. Sicasí, no tolos usuarios del foru paecen igual de gustosos, ya que “en meteored.com tan surdiendo opiniones a la escontra y al favor d’esti cambeu d’actitú, opiniones qu’amuesen que, pesie a qu’el falar nuna llingua o n’otra nun condiona l’accesu nin la compresión del foru xeneral, entá hai xente que piensa qu’esta decisión tien un tresfondu políticu”,a firmen estos veceros asturianos.

Les señes del enllaz nel que puede atopase el siguimentu n’asturianu son estes y esti otru enllaz onde puede atopase’l siguimientu metereolóxicu de la zona norte de la península, onde ta incluída Asturies.