Comunicación

La Radio del Principáu d’Asturies qu’hasta momentu namás funcionaba en pruebes va empezar güei a emitir cinco programes especiales de música de tres a cuatro de la tarde, de los que cuatro son n’asturianu. Carlos Rubiera, Xune Elipe, Ismael Mª González Arias y Roberto Bernabeu son los encargaos, xunto a Chus Neira, d’estrenar la programación de la radio pública asturiana.

Esta tarde va estrenase la programación musical de la Radio del Principáu d’Asturies, que se puede sintonizar nes canales 106.4 y 95.4 de la FM, col programa ‘Abriendo camín’ que, dirixíu por Carlos Rubiera, va recorrer los caminos de la música tradicional nos últimos trenta años d’historia.

Ismael Mª González Arias va ser l’encargáu de conducir cada martes el programa ‘Música, músiques’, mentes que los miercoles va ser Xune Elipe, vocalista de Dixebra, el que s’encargue de facer lo propio col espaciu ‘Rockmería’.

Les tardes de los xueves van correr a cargu de Roberto Bernabeu con ‘Llugar pal placer’, mentes que los vienres, el periodista Chus Neira va falar sobre intersecciones musicales contemporánees, n’ ‘El intercambiador’.

L’Asociación de Periodistes Europeos (APE) va celebrar la so XLIV Congresu Internacional y la so Asamblea Xeneral n’Uvieu, ente’l 5 y el 7 d’ochobre próximos, con motivu de la celebración del XXV Aniversariu de los Premios Príncipe d’Asturies. Más d’un cientu de profesionales de la informaicón de venti países diferentes van reunise nel Hotel Reconquista pa debatir sobre la responsabilidá de los periodistes na sociedá d’anguaño.

Baxo’l títulu”Deberes internacionales de la Unión Europea: Poder y responsabilidá de los periodistes”, el XLIV Congresu Internacional de l’Asociación de Periodistas Europeos va analizar el papel d’Europa na escena internacional nuna primer sesión de debate, na que van participar como ponentes el director de la Gazeta Wyborza de Polonia, Adam Michnik; l’escritor chilenu y Premiu Cervantes 1999, Jorge Edwards; el director de Relaciones Esteriores y Multilaterales del Conseyu d’Europa, Jack Hanning. Moderada pol periodista asturianu y miembru del conseyu de dirección de RTVE Diego Carcedo, na sesión tamien van intervenir el diplomáticu y escritor Jose María Ridao, l’editor d’European Business Magazine, Athanase Papandropoulos; el presidente del conseyu de dirección de l’axencia de noticies checa CTK, Tomas Vrba; la corresponsal en Madrí del selmanariu alemán Der Spiegel, Helene Zuber; y Michel Theys, de l’Agence Europe de Belxica.

Los participantes tamien van estudiar nuna segunda sesión el papel de los periodistes y los medios europeos ente los grandes conflictos del sieglu XXI. Esti debate va tar moderáu por Eileen Dunne, presentadora d’informativos de la RTE1 d’Irlanda, y van participar como ponentes Sylvain Cypel, redactor xefe del diariu frances Le Monde; l’escritor y periodista Juan Cueto, especialista en comunicación audiovisual y patronu de la Fundación Príncipe d’Asturies; y María Fernanda Gabriel, corresponsal de la Radio Televisión Portuguesa (RDP-RTP). Como comentaristes, van intervenir Felipe Sahagún, miembru del conseyu editorial del diariu El Mundo; William Horsley, corresponsal en Bruseles de la BBC; l’escritor y periodista alemán Horst Keller; Javier Fernández Arribas, director d’informativos de Punto Radio; y Pascale Bourgaux, de la RTBF belga.

L’Asociación Europea de Periodistes (APE) fundóse en 1961 en San Remo (Italia) por 70 periodistes de los entós seis estaos miembros de la Comunidá Económica Europea. Anguaño, tien 22 secciones nacionales y como organización independiente ensin ánimu de lucru mantien relaciones cola UNESCO y esfruta del estatus consultivu del Conseyu d’Europa.

Desque la Radio del Principáu d’Asturies comenzare cola so emisión en pruebes nel dial 106.4 de la FM, la emisora asturiana Radio Sele, que venía emitiendo pel 106.5, vióse obligada a cambiar el so dial, yá que sofría abondes interferencies que tapecíen la so retresmisión. A partir d’agora, la radio independiente y n’asturianu va emitir al travies del 106.1 de la FM, amás del so servicio habitual pela internet na páxina www.radiosele.net.

Televisión del Principáu d’Asturies (TPA) empiezó’l pasáu vienres 8, festividá del Día d’Asturies, les sos emisiones per satelite p’America, Europa y Norte del Africa, al travies del Hispasat 1C. Dende esi día, les emisiones tamien pueden siguise na Internet, na dirección http://www.rtpa.net . La emisión TPA per satelite va dinfundise 24 hores los 365 díes del añu, na modalidá de multidifusión, col envís d’axustar la programación a los diferentes usos horarios de los diferentes países.

La señal de la TPA n’America va integrase na plataforma de RTVE, qu’hasta agora espardía un paquete de 7 les canales españoles de Televisión (Canal Internacional de TVE, 24 hores, DOCU TVE; les autonómiques TV3, ETB y TVG y Antena 3 Internacional).

Pa Europa y Norte del Africa, TPA va integrse na plataforma Europa, qu’anguaño esparde un paquete de 6 canales españoles (Teledeporte, Canal Clásicu, Docu TVE, TVE 50 años y Clan TVE).

La comunidá asturiana fuera del Principáu estímase, según datos del Conseyu de Comunidaes Asturianes, nunes 300.000 persones.

La Televisión del Principáu d’Asturies va estrenar la so emisión matinal mañana, festividá del Día d’Asturies, con una programación especial dende’l Santuariu de Cuadonga. Pela so parte, la Radio del Principáu va empezar tamien la so emisión en pruebes mañana col tema musical ‘Xirandiyes’, una adaptación de tres dances asturianes fecha por Felpeyu, que s’escoyó como recuerdu y homenaxe a los músicos Igor Medio y Carlos Redondo que morrieron el pasáu mes de xunu nun accidente de tráficu.

La celebración del Día d’Asturies va vali-y a la RTPA pa estrenar les sos emisiones mesmo na televisión, cola programación matinal, que na radio. Los periodistes Cristóbal Ruitiña y Diana Sánchez van ser los encargaos de presentar un programa especial dende Cuadonga, nel que se va retresmitir l’oficiu relixosu y la procesión a la Santina. Nesti programa especial televisivu tamien se va poner un reportaxe especial grabáu pela mañana con una cámara subacuática nel Llagu Enol de la qu’unos submarinistes saquen una replica de la Virxe del fondu del llagu.

Per otra parte, el periodu de pruebes de la Radio del Principáu d’Asturies va emitir un bucle siguíu de música pa meter, a lo llargo de tol mes de setiembre, los sos espacios informativos. Mañana, amás de rindir homenaxe a Igor Medio y Carlos Redondo col tema de Felpeyu ‘Xirandiyes’, la RPA va poner especial atención nos temes de los grupos que van intervenir nos conciertos programaos en Nava con motivu del Día d’Asturies.

zp>La reciente anuncia del entamu d’operaciones d’Air Asturias y la de les conesiones que va entamar darréu Air Berlin, con escala en Palma Mallorca, dan un xiru inesperáu a la política alrodiu de los vuelos de baxu costu del Principaú d’Asturies, hasta agora fondamente criticada.

Nuna nueva encuesta, Asturnews propón dende esti entamar de Setiembre que los llectores manifiesten la so opinión sobre la política del gobiernu del Principáu, dende la so portada, na tema de les conesiones pol aire col estranxeru con esta entruga: ¿Ye bona la política’l gobiernu colos vuelos de baxu costu?

El conseyeru d’Economía y Alministración Pública, Jaime Rabanal, anunció ayeri la convocatoria d’un concursu públicu pa una nueva canal de televisión dixital autonómica. De les cuatro canales de la TDT rexonal, el Gobiernu asturianu reservó pa si tres d’ellos, destinando ún pa la TPA; guardando un segundu pa la mesma fin; y dexando’l terceru pa prestar servicios ‘on line’ como yá lo fai’l Principáu dende la internet.

La ufierta pública pa la canal que’l Principáu sacó a concursu ta abierta hasta’l prósimu 30 de setiembre y va tar basada en siete puntos, según desplicó Jaime Rabanal, nos que se va estimar los conteníos de la mesma, el plan tecnicu del proyectu y la so ayuda pal desarrollu económicu, tecnolóxicu ya industrial d’Asturies. Los licitadores de la ufierta habrán de tener un capital mínimu d’ún millón d’euros, desembolsáu polo menos nun cincuenta por cientu, y namás van poder presentar una propuesta.

La concesión de la canal va ser por un plazu de 10 años, con posibilidá de ser prorrogaos por otros diez, y obliga a emitir, a lo menos, cuatro hores diaries de producción propia.

A partir d’esti miercoles, 16 d’agostu, y hasta’l prósimu día 31, la sala d’esposiciones del Edificiu de Servicios Múltiples de Salas va acoyer la esposición itinerante ‘Asi nos ven’; una muestra centrada nos artículos de prensa nacional ya internacional y na visión del ‘Paraísu Natural’ que tienen los periodistes que visitaron Asturies nos viaxes de conocimientu organizaos pola Sociedá Rexonal de Turismu.

La muestra recueye tamien una serie d’imáxenes que faen un recurríu pol llabor promocional turísticu del Principáu d’Asturies.

El 10 d’agostu’l camión mariellu brillante de stop-discrimination de la UE marchó nel so tercer viaxe per toa Europa cola intención d’informar a los ciudadanos sobre los sos derechos sigún la llexislación de la UE y de cada país. Esta campaña, que fadrá parada en Xixón nel mes de payares, ta pensanda pa que la Unión Europea puxe pola llucha contra la discriminaicón y promocione la diversidá nel sitiu de trabayu.

Con ocasión de la presidencia finlandesa de la UE, la xira d’esti añu va empezar en Helsinki y va pasar per 13 estaos miembros visitando 22 ciudaes de tola UE. Na xira de cuatro meses, el camín va recorrer 13610 quilómetros y XXX milles náutiques hasta’l final de payares, mes nel que la caravana va visitar España. Les sos últimes cites van ser n’España: en Xixón el 15 de payares, en Madrid el 17 y, finalmente, en Valencia’l 21 d’esi mes.

L’escenariu de 50 metros cuadraos tendrá un programa informativu y d’entretenimientu fechu especialmente xunto colos socios locales de la campaña, incluyíos ministerios, sindicatos y asociaciones d’emplegu en cada país.

Aquellos que visiten la caravana van recibir información y asesoramientu sobre cómo la xente puede protexese contra la discriminación nel puestu de trabayu cola ayuda de les directives de la UE.

L’Asociación de Periodistes pol Asturianu denunció nun comunicáu fechu públicu na tarde d’ayeri la so preocupación ente les primeres emisiones de la televisión autonómica, ‘nes que la llingua asturiana nun tuvo nenguna presencia’. Pa los profesionales del mediu ‘nun tien nengún xacíu que nuna comunidá con llingua propia s’inore la so existencia nun mediu públicu que quier ser reflexu d’Asturies’ y entienden que ye ‘intolerable y incomprensible’ que e tapeza parte de la realidá asturiana, al empar que se tán vulnerando les lleis que regulen la presencia de la llingua asturiana na RTPA.

Periodistes pol Asturianu considera que, polo que se vio nestes primeres emisiones de la televisión pública asturiana, se ta falando de ‘parcialidá y de discriminación pa con una parte importante de la población asturiana’ y por ello reclama qu’esti mediu que ta pagáu con dineru públicu ‘tien de tener presencia de la llingua pa que’l mediu, como tal, funcione como una ferramienta de normalización y non d’aniquilación llingüística’.

Los profesionales del periodismu tachen de chocante’l fechu de que nun s’atienda a los principios d’actuación nos que s’inspira’l mediu: ‘Promoción de la cultura y la educación, con especial protección del bable, pente la promoción del so usu y difusión nos medios de comunicación social’. Asina, aseguren que la promoción de les llingües minorizaes ye ún de los motivos básicos que xustifiquen la puesta en marcha d’estos medios, por eso encuentren ‘difícil d’entender que s’arrequexe esti potencial nel mediu acabante d’echar a andar’.