Comunicación

Una entrevista col direutor del festival Intercélticu de Lorient, Lisardo Lombardía, va protagonizar la emisión d’esti sábadu de “Nós” na TPA a les 12,15 la mañana. El programa fadrá un percorríu pela trayectoria d’esti mélicu, etnógrafu y xestor cultural que dende va dos años ye’l cabezaleru del festival más importante del Arcu Atlánticu.

Nós, espaciu dirixíu y presentáu pol periodista asturianu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

La Escuela de Música Tradicional de Llangréu va protagoniza la emisión d’esti sábadu de “Nós” na TPA a les 12,16 la mañana. El programa fadrá un percorríu peles instalaciones de la Escuela llangreana y dirá conociendo a profesores y alumnos de la man del so direutor Jesús Solís.

L’Asociación Softastur, que vieno acabante de traducir dafechu la suite oficial del sistema operativu Ubuntu en Llingua Asturiana, va ser la protagonista del programa “Nós” que s’emite na TPA esti sábadu depués de les 12 y delantre de “Camín de Cantares”.

El programa recueye una de les instalaciones públiques d’Ubuntu que fizo esti añu l’Asociación que facía anuncia esti mes de la xera entamada hai poco de tornar tamién la versión educativa d’esti sistema operativu: Edubuntu, empobinada a escolinos de los 6 a los 18 años.

El trabayu desendolcáu dende Softastur veráse reflexáu, como se describe nel programa que presenta y dirixe Próspero Morán, na próxima versión del Sistema Operativu Ubuntu: Jaunty Jackalope que saldrá n’abril, y qu’inclúi aplicaciones como la suite ofimática OpenOffice, Gimp, Firefox, etc…

El siguiente oxetivu de Softastur, non menos ambiciosu ye agora Edubuntu, una derivación oficial de la distribución GNU/Linux Ubuntu, destinada pal so usu nel ámbitu escolar. Edubuntu desendólcase en collaboración con docentes y teunólogos de múltiples países. Edubuntu construyóse sobro Ubuntu ya incorpora usos educativos específicos, con un oxetivu nidiu: la población ente los 6 y los 18 años.

La segunda xornada del Congresu de Cultura Xaponesa va acoyer güei a les 12 la conferencia “Cultura de pallabres, cultura de silencios” pola Sra. Doña Masako Ishibashi (Corresponsal de Kyodo News y Maestra d’Ikebana). A la una la tarde, la profesora de les Universidaes de Keio y de Musashi, Mano Ando, va amosa “Una visión xaponesa d’Asturies y la gaita”.

Yá pela tarde, María Esther García va falar, a partir de les cinco, de “La guapura del haiku” , ufriendo un recital audiovisual.

A les seis de la tarde Sabel Tuón Ces, autora, xunto col Sr. D. Takechi Moritaku del primer Diccionariu asturianu-xaponés, va echar la conferencia: “Asturianu-xaponés, ¿por qué non?”, onde se va presentar la primer fase de los trabayos pa un diccionariu ente estos idiomes.

La xornada va pesllase con una conferencia/ exhibición titulada “La evolución del Yudu al traviés de les edaes n’Occidente” pol maestru de yudu Víctor Valle.

Programa completu del I Congresu de Cultura Xaponesa

El Plenu de la Xunta Xeneral del Principáu d’Asturies (XXPA) refugó güei colos votos del PSOE y IU-BA-Verdes una moción del PP que solicitaba al Conseyu de Gobiernu la realización de manera urxente de les actuaciones necesaries pa que les conexones ente Asturies y Madrid nun constituyan un “monopoliu” d’Iberia, implicando pa ello al Ministeriu de Fomentu pa facer una ufierta competitiva.

Atlántica XXII ye’l nome de la nueva revista bimestral que vien a ocupar un espaciu nel periodismu d’actualidá asturianu nel que’l reportaxe de fondura informativa hai tiempu que nun tien l’espeaciu que merez. La nueva revista presentase dende la so cabecera como una “revista asturiana de información y pensamiento”, que dirixida por Xuan Cándano cunta con 16 accionistes y trescientos suscriptores enantes d’apaecer que tienen de garantizar la so pervivencia.

Análisis, opinión, reportaxes, entrevistes ya imáxenes componen el so primer númberu que saliera esti viernes a la cai y tres días después, esti llunes 9 de marzu, va presentase públicamente nel Aula Magna de la Universidá d’Uviéu, nun actu nel que participen, ente otros, el rector, Vicente Gotor, y el director de “Atlántica XXII”, el periodista asturianu Xuan Cándano.

La programación en llingua asturiana emitida pola televisión pública asturiana, amosó perbonos resultaos d’audiencia nesti mes. Les trés emisiones más vistes fueron, les del 14 y 21 de febreru de “Camín de cantares”, con un 22’2% en dambos casos pal programa presentáu por Xosé “Ambás”; y la emisión del día 26 d’“Al aldu: xente de casa”, programa presentáu por Inaciu Galán, que tuvo un 16’5% d’audiencia, convirtiéndose nel programa más vistu de la TPA nesa xornada, onde l’autonómica consiguió un 6’8% de l’audiencia total.

Destaquen tamién en febreru, los bonos resultaos de los concursos y muestes de folclor, que tamién usen l’asturianu como llingua vehicular y de los propios conteníos. El “Concursu de tonada” emitíu’l día 1 consiguió un 6’2, mientres que la “Muestra de Folclor d’Uviéu” del mesmu día llegó hasta’l 13’7%. Nesi mesmu día “Pieces”, presentáu por Vanessa Gutiérrez, marcó un bon resultáu, con un 8’8% del “share”.

El 21 de febreru, la emisión del ‘Premiu al meyor cantar’ dende Mieres, consiguió superar la media de la canal en mediu puntu, con un 9,5%, nun programa presentáu por Vanessa Gutiérrez y Naciu Varillas, onde actuaron Musicos pola Oficialidá, Felpeyu, Alfredo González, Bacotexo y Herbamora.

”Nós”, programa presentáu por Próspero Morán, fizo tamién nesti mes bonos datos dientro de la franxa horaria de la mañana, que sigue resistiéndose-y a la TPA, magar de los tamién, positivos resultaos d’Al aldu, con “La risión”, “A galmiaes”, “Recetes con cuentu”, “Xente de casa” y “L’axenda”.

Y febreru terminaba esti sábadu con dos bonos datos pa ‘Nós’ col 4,3% y ‘Camín de cantares’, que col 18,1% del share llideró la programación del día en TPA, que tuvo una media esti sábadu del 8,8%.

Asturnews va ufrir a partir d’esti mes un resume mensual de los datos d’audiencia de los programes en llingua asturiana emitíos pela televisión pública asturiana.

La TPA estrena güei, llunes, 2 de marzu, a les 13:30 hores la nueva temporada del programa de cocina “El gusto es mío”. Cristian González presenta esta nueva etapa nel que TPA prescinde de Goyo González, bien criticáu pol so desconocimientu de la realidá cultural asturiana.

L’espaciu, presentáu pol ex reporteru de “Con dos de azucar”, preséntase como un espaciu de gastronomía renováu, más completu y con un nuevu plató, asitiáu n’Avilés.

El programa va convidar un día a la selmana a un estudiante de dalguna de les escueles d’hostelería d’Asturies, amás de diferentes profesionales especializaos en protocolu y hostelería van ayudar a resolver toes aquelles duldes que surden a la hora de sentase a la mesa, remanar los cubiertos, ordenar los alimentos o preparar la presentación de los mesmos.

Una de les novedaes d’esta edición ye la presencia nel plató, amás de los habituales cocioneros profesionales, d’un personaxe relevante del panorama políticu, social y cultural d’Asturies, que van convertise en cocineros por un día. Los cantantes Rosa María Lobo, Vicente Díaz, Pipo Prendes y la presentadora de ‘La gran noche de Terapia’, Lía Beltrán, van ser los primeros en pasar pol plató-cocina.

L’asociación “Movimiento Asturiano por la Paz” va presentar güei, xueves 26 de febreru, a les siete la tarde, un vidiu p’afalar el voluntariáu. L’actu va celebrase nel Club Asturianu de Prensa de La Nueva España, n’Uviéu.

Páxina del colectivu “Asturianos pola paz”

La televisión pública asturiana (TPA), va estrenar esti vienres 27 y n’horariu de máxima audiencia, una versión renovada del programa “Terapia de Grupo”, embaxo’l nome “La gran noche de Terapia”. Una gala que va presentar cada vienres Lía Beltrán, que fuere presentadora de TeleUviéu y hasta va poco, reportera del programa “Con dos de azucar”, de la TPA. El programa tuvo tola selmana un adelantu cola tira cómica de diez minutos de duración que va seguir emitiéndose de llunes a xueves a les 22 hores.

L’espaciu arrancó la nueva temporada na cadena autonómica esti llunes con un 7,2% de ‘share’ y 30.000 espectadores de media nel primer microespaciu que s’emitió a les 22 hores. La TPA decidió programa esti microespaciu unos díes enantes del gran estrenu d’esti sábadu de ‘La gran noche de Terapia’, la gala que va presentar Lía Beltrán, xunta los actores Alberto Rodríguez, Pedro Durán, Joanquín Pajarón y Gloria Pidal.

‘Terapia del grupo’ inclúi de llunes a xueves dos estayes d’humor, una d’elles fixa. ‘El chigre’, serie de ficción na que se recrea’l típicu bar asturianu, y la otra variable, que pue ser Versión asturiana, parodia de películes doblaes al asturianu en clave d’humor; Tatami, estaya na que’l maestro Sensei da clases de kárate al alumnu Donato, o cualquier otru ‘sketch’.

La Gala d’esti vienres va emitise de 22 a 24 hores, producida por Zebrastur y va cuntar cola collaboración de Pedro Durán, Joaquín Pajarón y Alberto Rodríguez, que van interpretar a los yá perconocíos personaxes de La Marquesina, Toño, Raikkonen, Petiso y Samba, ente otros. Nel programa van facese entrevistes con personaxes d’actualidá nel panorama estatal, como la cantante Soraya, que va ser la primer entrevistada.

La música va tener tamién el so espaciu, y tán concertaes actuaciones d’artistes como David Bustamante o Los Chicos; amás de grupos y solistes asturianos.

La nueva apuesta de TPA, “La gran noche de Terapia”, va tener amás secciones fixes como “El consultorio de La Marquesina” y “Yes mundial”, un concursu de talentos que quier descubrir a los artistes más “llamativos” d’Asturies. El ganador va llevase 6.000 euros.

Pa esti programa, TPA estrena plató, el más grande d’Asturies, asitiáu n’Avilés y con una estensión de 900 metros cuadraos.