Comunicación

La casualidá quixo que l’entamu oficial de l’actividá de l’Asociación de Profesionales de la Comunicación d’Avilés coincida cola tradicionalmente reivindicativa xornada del Primeru de Mayu. Y eso brínda-yos la oportunidá d’espresar públicamente so “esmolición pola situación llaboral que se xeneró nel sector”.

Nun comunicáu fechu públicu esti día pola nueva Asociación, dizse que “la crisis económica vieno disparar una reconversión larvada nos últimos años que, namás n’Asturies, supunxo la destrucción de cientos de puestos de trabayu. La tresformación que ta suponiendo’l desenvolvimientu d’internet o la implantación de la TDT acordies con una regulación obsoleta del espaciu radioeléctricu, sumáronse al descensu d’ingresos publicitarios pa favorecer el cese d’actividá de decenes de pequeñes empreses, el despidu de cientos de profesionales y la precarización xeneralizada en tol sector, incluyíos los medios públicos”.

Les perspectives de futuru nun llamen al optimismu pa esta nueva Asociación darréu de que “llegó a asumise de forma xeneral, y ello nel meyor de los casos, que’l máximu beneficiu económicu ha ser l’oxetivu fundamental y únicu de la empresa periodística.”

Dende esta asociación consideren amás que, “magar la necesaria viabilidá económica de too proyectu empresarial, el llabor de los medios de comunicación tien un componente de vocación de serviciu a la ciudadanía que n’Asturies nun se puede cumplir afechiscamente nes condiciones actuales”.

.

Los escolinos y profesores d’asturianu del IES Monte Narancu d’Uviéu protagonicen esti sábadu na TPA “Nós” nuna visita pel centru educativu na que s’amuesa’l proyectu de centru d’esti Institutu qu’atiende a una población plurillingüe con alumnos que vienen d’Ecuador, colombia, Brasil, Marruecos, Rumanía o Costa de Marfil, ensin escaecer a los d’Uviéu o del conceyu vecín de Las Regueras.

El direutor y la profesora d’asturianu del Centru amuesen les instalaciones y aporten col periodista Próspero Morán les aules y la biblioteca del Centru, onde los neños despliquen lo que fain na clas de llingua asturiana.

La fórmula 1 fai dende dellos sábados camudar la programación en llingua asturiana de la TPA, lo qu’obliga a revisar les hores de programación cada sábadu, tando prevista nesti casu la emisión de Nós pa les 12,15 hores.

La organización de l’Arribada, anunció que nesti mes entamen les actividaes de l’Arribada 2010, que correspuenden a la estaya Rolda 2010. Pal entamu de la citada estaya va celebrase una mesa redonda col títulu “Diarios dixitales n’asturianu”, onde se quier “abrir un alderique sobre la realidá de los medios redactaos na nuestra llingua esistentes na rede, dende los xeneralistes a los de conteníos culturales”. Nel actu van tar representantes de cabeceres qu’actualmente s’afayen n’internet.

L’actividá ta programada pal viniente vienres, 30 d’abril, a les 20:00 hores. El llugar sedrá’l Centru Municipal Integral de L’Arena, en Xixón, na cai Canga Argüelles, 16-18.

Amás, pal viniente mes de mayu anúnciase una xornada en Villaviciosa (Per Asturies) y dos actos en Xixón (Rolda), estos dos últimos titulaos “Asturies años 60, tiempu de cambios” y “El futbol y el llibru”.

Ta acabante apaecer una nueva iniciativa radiofónica de calter llibre y col envís de “difundir iniciatives culturales”, ye Radio ArteNativa, que funciona al traviés de la rede col programa del mesmu nome, y que tuvo’l so entamu esti martes, 20 d’abril, cola entrevista fecha al cantautor Alfredo González.

L’espaciu ñaz na rede pa dar a conocer ya impulsar los llabores de les persones que tean somorgiaos en proyectos culturales de toa triba.

Web de Radio ArteNativa

L’Aconceyamientu de Xuristes pol Asturianu (AXA) y la Xunta pola Defensa de la Llingua Asturiana (XDLA) protagonicen esti sábadu na TPA “Nós” cola primera campaña pala defensa de los derechos llingüísticos que desendolquen conxuntamente aprovechando la potencialidá de les nueves tecnoloxíes.

El programa que dirixe Próspero Morán recueye la rueda prensa que tuvo llugar el 30 de marzu nel Llar Solidariu d’Uviéu y cola qu’entamó una rellación de collaboración formal ente les dos organizaciones, pa llevar alantre en común campañes pa la defensa de los derechos llingüísticos n’Asturies.

La primera d’estes campañes ye una consecuencia directa del Informe del Comité d’Espertos del Conseyu d’Europa que recomendaba al gobiernu español l’apertura d’un diálogu colos falantes d’asturianu pa meyorar l’estatus llegal del idioma.

La fórmula 1 fai dende dellos sábados camudar la programación en llingua asturiana de la TPA, lo qu’obliga a revisar les hores de programación cada sábadu, tando prevista nesti casu la emisión de Nós pa les 12,15 hores.

Presentación de la campaña conxunta de l’AXA y la Xunta

La Conseyería de Cultura y Turismu, al traviés de la Dirección Xeneral de Política Llingüística ta acabante convocar un cursu pa profesionales de la Radiotelevisión del Principáu d’Asturies (RTPA). El cursín, tituláu “Falar y más falar”, va ser en llinia y va formar al personal del Ente “nel usu oral y escritu del asturianu”.

Nel mesmu van dase les ferramientes básiques pa escribir n’asturianu y va apurrise un averamientu prácticu al so usu n’ámbitos cotidianos, como’l trabayu, el mediu urbanu, los viaxes o les tecnoloxíes nueves y con una atención especial al llinguaxe periodísticu.

El plazu de matrícula acaba’l 26 d’abril y el cursu va dase ente’l 10 de mayu y el 21 de xunu. El cursu tien una duración de 60 hores y faise en collaboración col Institutu Asturianu d’Alministración Pública Adolfo Posada.

El periódicu Les Noticies estrenó esti vienres pasáu nueva cabecera, dexando atrás el so llogotipu fundacional, col que abrieron 680 númberos de 1996. La única cabecera n’asturianu que se pública en papel, entama asina un procesu d’anovación y adaptación a les nueves tecnoloxíes, nun momentu mui difícil pa les publicaciones informatives en papel. Les Noticies, que se publica de mena selmanal, ye l’únicu periódicu asturianu dirixíu por una muyer, Beatriz R. Viado, y tien como editor al empresariu Inaciu Iglesias.

La revista de l’asociación Furmientu “El Llumbreiru” vieno acabante cumplir esti mes cinco años “amosando que’l lleonés esiste y formó y sigue formando parte del patrimoniu cultural de los zamoranos”.

A lo llargo de cinco años y trimestralmente, la revista espublizó hasta’l momentu un total de ventiún númberos con noticies sobre’l propiu idioma, una estaya lliteraria y otra d’artículos divulgativos y d’opinión. Y nos caberos meses tien una granible presencia en redes sociales como Facebook.

Na editorial d’esti últimu númberu amuesen que “El Llumbreiru” nació en marzu de 2005 depués d’ingresar en Furmientu socios nuevos, “mozos, entusiastes y preparaos”. Sigún asoleyen nesa editorial “lo que se pretendía cola publicación de ‘El Llumbreiru’ yera allumar, refundiar lluz sobro ún de los aspeutos más escurecíos ya inoraos del nuesu patrimoniu cultural”.

A lo llargo de cinco años, la publicación foi espeyando la evolución del movimientu de reivindicación llingüística en Zamora afitando pasu ente pasu la visibilidá de la llingua de nueso nesi territoriu.

Páxina en Facebook de Furmientu

Toli Morilla protagoniza esti sábadu 10 d’abril el programa Nós na TPA nel que ye’l novenu programa d’esta tercer temporada. El programa emítese alrodiu de les 12 la mañana y va presentanos un conciertu nel Ca Beleño del cantautor asturianu, de los que vien ufriendo esti 2010 coles sos versiones de Bob Dylan n’asturianu como referente.

El conciertu tuvo llugar nel mes de febreru pasáu nel Ca Beleño d’Uviéu y cuntó con un auditoriu bultable.

Toli Morilla espublizó’l so primer discu en solitariu “Nunca des la espalda” en 1998, entamando’l so camín como ún de los meyores compositores asturianos. En 2003 edita’l so segundu discu en solitariu, “Entre el barro y las preguntas”. En 2004 publica “Nueche d’insomniu”, un discu que recibie les meyores crítiques y qu’usa testos de grandes poetes en llingua asturiana.

Col cantar “Azul y gris”, incluyíu nel álbum “Entropía” (2007), gana’l premiu al Meyor Cantar en Llingua Asturiana d’esi mesmu añu y ye nomináu pa los Premios de l’Academia de les Artes y Ciencies de la Música. El so nuevu discu Diez cantares de Bob Dylan n’asturianu fai honor al so títulu con diez magnífques versiones n’asturianu autorizaes personalmente por Bob Dylan. Contién canciones mítiques como Hurricane, Knockin’ On Heaven’s Door o Don’t Think Twice It’s All Right y ayalgues escondíes como The Man In Me o Sara, arropaes por una gran variedá de músicos y instrumentos.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

Una bayura de medios dixitales y blogs españoles vienen acabantes d’asoleyar otra vuelta esti vienres el manifiestu na defensa defensa de los drechos fundamentales n’internet y escontra la llei d’economía sostenible que’l Gobiernu camienta aprobar darréu y qu’ufre al Ministeriu de Cultura la posibilidá torgar una páxina web ensin intervención xudicial.

El Manifiestu foi asoleyáu per primera vegada’l martes 2 d’Avientu simultáneamente en castellán, inglés, catalán, gallegu y asturianu, y reproduse tamién na nuesa llingua. El Manifiestu “Na defensa de los drechos fundamentales n’internet” espublizose por mor de la inclusión nel Anteproyectu de Llei d’Economía sostenible de modificaciones llexislatives que cinquen al llibre exerciciu de les llibertaes d’expresión, información y el drecho d’accesu a la cultura al traviés d’Internet y qu’agora se convierten en llei cola aprobación del proyeutu mentáu.

Manifiestu d’Avientu n’Asturnews escontra la Llei d’Economía Sostenible