Comunicación

El próximu 26 de marzu de 2011 va tener llugar el VII Alcuentru Creando Redes de solidaridá nel Oriente d’Asturies, que s’entama dende la Rede d’Asociaciones de calter social d’esta fastera, col sofitu del Centru de Voluntariáu y Participación Social “El Prial” del Area VI de Servicios Sociales.

Programa completu

Estudios Gona convoca 21 places pal “I Cursu Técnicu Audiovisual Polivalente Gona 2011”. Un nuevu programa d’estudios, de trés meses de duración (372 hores), que se va desenrrollar nestos nuevos estudios cinematográficos instalaos n’Asturies. El cursu ta empobináu a mayores de 18 años en posesión del títulu n’Educación Secundaria Obligatoria o equivalente y van distribuyise en tres grupo de siete alumnos caún. El cursu va impartise n’horariu de 9 a 15 hores de llunes a vienres, en Morcín, llar de los Estudios Gona.

La preinscripción ha facese n’Estudios Gona, cai Gamonal, 33163 Polígonu d’Argame (Morcín) o tamién per corréu postal certificáu non más tarde el 22 de marzu. Los candidatos escoyíos van ser citaos el 28 de marzu a una prueba escrita. El resolvimientu d’almitíos va ser publicáu na páxina web de Gona el 15 d’abril.

El cursu tien un costu de 6.000 euros, de los cualos 4.700 euros son sovencionaos por Caxastur en forma de beca al alumnu. Pa los 1.300 euros restantes l’alumnu puede solicitar a La Caxa un préstamu tipu 0%, con un plazu d’hasta 6 meses y unos gastos de formalización de cien euros, con garantía personal y amortización mensual.

Información del cursu

Esti xueves 10 de marzu, la Tertulia Enrique García Rendueles, qu’aconceya cada selmana nel Chigre L’Ayalga, na cai Prendes Pando, en Xixón, tuvo como ponente al periodista Inaciu Galán, qu’abrió la so intervención faciendo un repás a la hestoria del periodismu n’asturianu, sobremanera dende los años setenta, pero comentando tamién esperiencies anteriores, como’l periódicu n’asturianu “Ixuxú”, espublizáu nel añu 1901 por Pachu’l Peritu.

Ente los temes sobre los que s’aldericó na tertulia tuvo la política de sovenciones a medios de comunicación pa la promoción del asturianu, la necesidá de reforciar la reivindicación sobre medios públicos y privaos pa un mayor grau d’usu del asturinau, asina como la situación de la llingua asturiana nos medios del dominiu llingüísticu del asturianu fuera de les llendes actuales de la comunidá autónoma d’Asturies. La tertulia cuntó cola participación activa de los presentes, comparándose la situación de los medios de comunicación n’asturianu cola que viven otres llingües minorizaes o recordando episidios de represión llingüística que se dieron nel Ente Públicu de Comunicación del Principáu d’Asturies dende’l so entamu.

Software llibre, el xueves 17 de marzu La Tertulia Enrique García Rendueles recibé la selmana que vien a l’asociación Softastur, que va falar de software llibre y llingua asturiana, de magar les ocho la tarde, y como siempres, nel Chigre L’Ayalga, nun actu abiertu a tol públicu interesáu.

La Tertulia Enrique García Rendueles tien esta selmana al periodista y escritor Inaciu Galán, redactor d’Asturnews, como ponente, y el tema a tratar sedrán los medios de comunicación asturianos, la so incidencia social y les perspeutives de futuru d’una rede comunicacional propiamente asturiana.

Dende la organización de la Tertulia afirmen que “lloñe de lo que nun principiu pudiere paecer, el tema a desendolcar ye bien enguedeyáu”, darréu qu’hai qu’entamar por definir lo “qué son medios de comunicación asturianos, desendolcar la custión de la ghetización social de los ámbetos comunicacionales n’asturianu y valorar la esistencia y/o necesidá de xenerar una rede comunicacional propiamente asturiana”.

La Tertulia celébrase tolos xueves nel llocal L’Ayalga, asitiáu na cai Prendes Pando 11, de la ciudá de Xixón. L’horariu ye de magar les 20 hores y l’asistencia ye abierta a tol públicu.

La canal autonómica anunció estos díes l’estreñu del programa “Dicires”, que definen como un “diccionariu audiovisual del asturianu” y que va emitir 120 microespacios con una duración d’ente 20 y 40 segundos, repetíos hasta cinco vegaes al día. El programa ta producíu por Ediciones Trabe y cuenta col asesoramientu llingüísticu del escritor Antón García y la realización de Juan Tizón y Sofía Castañón.

Asina, el programa va emitise nestos horarios: enantes de Mirasturies: el pasáu recién, a les 09:45; enantes de TPA Noticias 1.ª edición, que principia a les 14.00; enantes del programa Conexión Asturias, a les 18:00; enantes de TPA Noticias 2.ª edición, que principa a les 20.30; y enantes de TPA Noticias 3.ª edición, que s’emite a les 00.30.

Cada programa inclúi una selección de términos propios del asturianu y del gallego-asturianu. Les pallabres incluíes tán escrites y pronunciaes n’asturianu y traducíes, al final de cada espaciu, al castellanu, inglés, árabe, rusu y chinu. Na parte final de cada episodiu delles cares pronuncien nes sos llingües la pallabra asturiana a la que se refier el microespaciu.

La periodista y escritora Beatriz R. Viado va falar sobre “Ausencies y presencies femenines nos medios de comunicación” el miércoles, día 9, na Casa de Cultura de Piloña y coincidiendo col Día de la Muyer.

Esti miércoles, 9 de marzu, na Casa Cultura de L’Infiestu, a les 18:00, la periodista y escritora Beatriz R. Viado va ofrecer una charla que lleva por títulu ¿Ónde tán les muyeres? Ausencies y presencies femenines nos medios de comunicación. Esta iniciativa ta entamada pol Conceyu Piloña y organizada al traviés del Centru Asesor de la Muyer y el Serviciu de Normalización Llingüística.

Beatriz R. Viado (El Remediu-Nava, 1976) ye periodista y escritora n’asturianu. Foi directora del selmanariu Les Noticies y redactora del magazine cultural El Summum. Anguaño collabora cola revista Atlántica XXII, el periódicu Diagonal Asturies y la publicación feminista Muyeres Ateyabana, editada pol colectivu Milenta Muyeres.

Ye coautora del llibru El país del silenciu (Publicaciones Ámbitu, 2007), fechu a comuña cola escritora Ana Vanessa Gutiérrez, nel que se recueyen histories de vida de muyeres asturianes que vivieron la Guerra Civil. Nel añu 2003 ganó’l I Premiu Enriqueta González Rubín de periodismu n’asturianu.

L’asociación cultural Xeira, esmolida pola nula presencia del gallego-asturiano, “a llingua propia dos conceyos máis occidentales d’Asturias, na programación da televisión pública asturiana (TPA), falóu a lo llargo del ano pasao cos alcaldes d’esos conceyos pra feryes chegar a nosa preocupación sobre esta carencia”. Agora amañen “un documento unde se recoye ese sentir pra que lo apoyaran os alcaldes que lo visen ben. Despóis d’esos contactos, manifestaron el sou apoyo el alcaldesa d’El Franco y os alcaldes de Navia, A Veiga, Taramunde, Samartín, Santalla, Pezós, Eilao y Grandas”.

Darréu ufrimos el documentu mentáu:

Por úa TPA máis nosa

“As noticias recurrentes sobre el interés da Televisión de Galicia por chegar cuas súas emisióis en gallego al estremo occidental asturiano fain destacar a falta d’úa programación propia, da mao da TPA –a televisión de todos os asturianos–, que recoya a realidá llingüística del estremo occidental d’Asturias. Nel preámbulo da llei de Medios de Comunicación Social, que creaba el Ente Público de Comunicación del Principao d’Asturias, destacábase qu’úa radio y televisión propias axudarían a «potenciar as peculiaridades y el afianzamento da identidá asturiana, a través da difusión, conocemento y desarrollo dos valores históricos y culturales en toda a súa variedá y riqueza», y nel artículo 3, apartao f), poñía entre os sous fines a «promoción da cultura y a educación, con especial protección del bable, mediante a promoción del sou uso y difusión nos medios de comunicación social». A Llei d’Uso y Promoción del Bable, qu’asegura pral gallego-asturiano un trato igual al del asturiano en conto a promoción y reconocemento, tería que llevar á TPA a abrirye un espacio tamén á nosa fala. Efectivamente, un servicio público como a TPA tería que procurar valir como elemento cohesionador da nosa identidá como asturianos y, pra nosoutros, el gallego-asturiano, a nosa fala, forma parte mui importante da nosa personalidá como asturianos y asturianas del occidente. Despóis de cuase cuatro anos y medio d’emisión chegóu el hora de qu’el gallego-asturiano teña úa presencia digna na súa programación porque tamén eso axudaría a qu’el resto d’Asturias conoza miyor a nosa realidá. Con iniciativas d’ese xeito é posible afianzar úa Asturias cohesionada y orguyosa da súa riqueza cultural y llingüística.

La TPA estrena esti sábadu 5 de Marzu, a les 12:00 hores la cuarta temporada del programa “Nós” que s’empobina a percorrer la trayectoria d’un de los investigadores mozos más activos de la nuesa historia contemporánea, Rafael Rodríguez Valdés, direutor de la Revista d’Historia Contemporánea Erada.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA, y esti añu grábase per primera vegada depués de cuatro años nun formatu HD o d’Alta Definición.

Son munchos los activistes en favor del asturianu que trabayen pola inclusión d’una versión n’asturianu de la rede social Twitter. La compañía propietaria cunta con un espaciu pa pidir nuevos idiomes y ufrise como traductor de la web a esos idiomes dende’l que se puede reclamar la versión asturiana de la rede na que conviven más de 150 millones d’usuarios de tol mundu.

Páxina onde reclamar Twitter n’asturianu

L’Asociación de Telespectadores y Radioyentes d’Asturies (ATR) convocaba apocayá un concursu de rellatos curtios pola mor del so quince aniversariu. Nes bases, espuestes na web espresábase que namás s’almitíen obres en castellán, lo que foi denunciao pol blogue “Falar y lleer”, siguiendo a esta iniciativa de protesta otres persones. L’ATR respondió de forma positiva y camudó les bases, reconociendo que “foi un error” nun incluyir l’asturianu nes bases.

Dende l’ATR comentaron a les persones que protestaron por esta omisión del asturianu que nun pretendíen “eclipsar l’asturianu”.

El concursu tien abiertu’l plazu hasta’l 15 d’abril y cunta cola collaboración de l’Asociación d’Escritores d’Asturies, la RPA, Sinjania-Taller d’Escritura Creativa y la Llibrería Cervantes d’Uviéu.

El casu aseméyase al qu’asocedió nel mes de xineru, cuando una protesta del Conceyu Universitariu pol Asturianu (CUPA) fizo que la Universidá d’Uviéu camudare les bases del so I Certame Lliterariu, incluyendo tamién agora la posibilidá de presentar obres n’asturianu.

Bases completes del concursu d’ATR