Comunicación

Yá ta disponible’l cuartu programa de radio “Iniciativa pol Asturianu nes ondes”, mediu de difusión de les actividaes de la organización onde cada mes pueden sentise entrevistes con miembros d’Iniciativa pol Asturianu y persones d’otros colectivos pa conocer y aldericar alredor del asturianu y la so situación. Nesta ocasión, Samuel Gradín, director del programa, entrevista a Penelope Miranda, del Serviciu de Normalización Llingüística de L.lena, y Arancha Prado, del SNL de la Mancomunidá del Cabu Peñes.

Dambes dos formen parte de l’Asociación de Trabayadores de Normalización Llingüística, y fálennos nesta entrevista del so llabor y de los problemes qu’atopen. La segunda parte d’esta llarga ya interesante entrevista va poder sentise’l mes que vien.

Amás, nesti programa entrevístase a Vítor Suárez, Vicepresidente d’Iniciativa pol Asturianu, onde comenta’l so llabor y les acciones d’iniciativa pol Asturianu nos meses últimos y lo previsto pa los meses vinientes.

Iniciativa pol Asturianu nes ondes ye un programa radiofónicu mensual que da anuncia de les actividaes de la organización. Dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que dura caúna de les emisiones hai tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

El programa emítese en Radio Sele, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)… y puede sentise tamién nes canales d’Iniciativa pol Asturianu n’Ivoox y YouTube.

Sentir el programa

Yá ta disponible’l tercer programa de radio d’Iniciativa pol Asturianu nes ondes fechu na Universidá Asturiana de Branu (UABRA), en Cangas del Narcea, y onde tuvieron como convidaos la presidenta de l’Academia de la Llingua Asturiana, Ana Cano y el direutor de la UABRA Xosé Antón González Riaño.

Iniciativa pol Asturianu nes ondes ye un programa radiofónicu mensual que da anuncia de les actividaes de la organización. Dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que dura caúna de les emisiones hai tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

El programa emítese en Radio Sele, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)… y puede sentise tamién nes canales d’Iniciativa pol Asturianu n’Ivoox y YouTube.

Descarga’l tercer programa d’Iniciativa pol Asturianu nes ondes

Yá puede sentise la segunda edición d’Iniciativa pol Asturianu nes ondes, con Xosé B. Álvarez, vocal de rellaciones internacionales de la organización, que comenta les actividaes nesta estaya, y los músicos Marisa Valle Roso y Pablo Carrera, que falen de la so carrera y del usu del asturianu nel mundu de la música. La presentación y dirección del programa ta al cargu de Samuel Gradín.

Iniciativa pol Asturianu nes ondes va poder sentise n’emisores a lo llargo de tola xeografía d’Asturies. Pel momentu yá se llegó al alcuerdu d’emitir el programa en Radio Sele, Radio Ujo, AllerFM, Radio L.lena, Radio Kras, Radio Noreña, Radio Alma (Bruseles)… anque se sigue en conversaciones con otres radios pa entamar coles emisiones tamién con elles, col envís de llegar al máximu númberu posible d’asturianos. Pa los que prefieran sentilu na rede o llevalu nos sos dispositivos, podrán descargalu tamién na canal d’Ivoox de la organización.

Sentir el segundu programa d’Iniciativa pol Asturianu nes ondes

Iniciativa pol Asturianu anunció güei que Radio L.lena va sumase a la rede de radios qu’emiten el so programa, Iniciativa pol Asturianu nes ondes. Radio L.lena súmase asina a esti proyectu al que yá se sumaren Radio Sele, AllerFM, Radio UJO y la emisora de Bruseles, Radio Alma, que lleva a los emigrantes asturianos na capital belga, les noticies de la reivindicación llingüística. El programa puede sentise amás na canal d’Ivoox de la organización, según espliquen.

Radio L.lena volvió a emitir en 2011 dempués d’un parón de diez años. Emite nel 105.8 de la FM pa tol conceyu de L.lena. Dende Iniciativa pol Asturianu agradecieron “a Radio L.lena y a toles emisores que radien el programa la so collaboración nel espardimientu del llabor de la organización y de les noticies de la llingua asturiana”.

“Iniciativa pol Asturianu nes ondes” ta dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que dura la emisión de cada mes hai tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

Sentir el primer programa d’Iniciativa pol Asturianu nes ondes

TPA emitió anoche’l primer capítulu del nuevu programa de Xuan Bello, “Clave de fondo”, una versión pa televisión del programa homónimu que venía faciendo na RPA. L’escritor Xuan Bello presenta esti programa d’entrevistes a personalidaes asturianes, qu’afonden na cara desconocida y privada de los invitaos al traviés de conversaciones “na llende de l’amistá y la confidencialidá”.

Esti sedrá un programa selmanal de conversaciones de trenta minutos de duración aprosimao ente l’escritor Xuan Bello y personalidaes venceyaes a Asturies. RPA tamién va emitir semanalmente, a partir del vienres 15 de xunu a les 14:00, la so propia versión radiofónica d’esti espaciu d’entrevistes, que se va sofitar n’efectos sonoros y cantares.

Clave de fondo, producíu por TPA en collaboración cola productora Un mar de dudes, va alternar entevistes a personalidaes con otres a asturianos desconocíos pal gran públicu. El so nexu d’unión ye que toes elles “tienen daqué interesante que cuntar”, como esplica’l director y presentador del espaciu, Xuan Bello.

El programa entama con una semeya personal y biográfica del invitáu, que va sirvir de puntu de partida de la entrevista. Les entrevistes van realizar “na llingua que-y resulta más cómoda y natural al invitáu, yá seya castellán o asturianu”, y nun tonu cercanu pa favorecer una conversación intensa y íntima. L’invitáu tamién va escoyer l’allugamientu para grabar l’alcuentru, que dacuando se producirá en casa del propiu presentador y otres nel salón o’l taller de trabayu del invitáu.

Ente los convidaos próximos Juan Luis Rodríguez Vigil, ex presidente del Principáu d’Asturies; Fulgencio Argüelles, destacáu novelista; Federico Muñiz, xinecólogu xubiláu del hospital de Mieres; Fernando Beltrán, unu de los poetes españoles del momentu; Chema’l de la Mar del Medio, n’alusión al míticu restorán que rexenta La Mar del Medio, unu de los restauradores más conocíos; Alberto Menéndez, l’estampador grabador más reconocíu del Principáu y l’últimu imprentador antiguu d’Asturies; y Santiago Somoano Simón, un carpinteru comprometíu cola causa de salvar la posteridá de los horros y les paneres asturianos.

TPA estrena la serie documental ‘Ende’, una radiografía de la identidá

Amás, tamién ayeri, estrenóse la serie documental ‘Ende’, una radiografía de la identidá asturiana qu’inclúi semeyes cinematográfiques de persones anónimes, escoyíes al azar a lo llargo d’un viaxe pelos territorios fronterizos d’Asturies, baxo la dirección de Ramón Lluís Bande.

Esti microespacio, ellaboráu por De la Piedra Producciones, d’una duración averada de 5 minutos, pretende esbozar un dibuxu de les llendes alministratives del país, amás d’una radiografía del estáu actual de la identidá asturiana.

Iniciativa pol Asturianu anunció estos díes que col envís de siguir meyorando la so comunicación y coincidiendo colos seis meses del entamu de la so actividá pon en marcha una un programa radiofónicu mensual que va dar anuncia de les actividaes de la organización. El programa, del que yá puede sentise na rede’l primer capítulu, llámase “Iniciativa pol Asturianu nes ondes” y ta dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que va durar la emisión va haber tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

iniciativa pol Asturianu nes ondes va poder sentise n’emisores a lo llargo de tola xeografía d’Asturies. Pel momentu yá se llegó al alcuerdu d’emitir el programa en Radio Sele, Radio Ujo y AllerFM, anque se sigue en conversaciones con otres radios pa entamar coles emisiones tamién con elles, “col envís de llegar al máximu númberu posible d’asturianos”, espliquen dende la organización. Pa los que prefieran sentilu na rede o llevalu nos sos dispositivos, puede descargas tamién na canal d’Ivoox d’Iniciativa pol Asturianu.

Nel primer programa, “que tien una estructura distinta por ser l’estrenu”, va ser entrevistáu Inaciu Galán, presidente de la organización, que va facer un repás pelos primeros seis meses d’actividá de la organización, campañes, etc. Darréu podrá sentise a Denis Soria, vocal de dominiu llingüísticu, que falará de los avances fechos nos contactos con organizaciones de Lleón, Zamora o Miranda del Douro.

“De los horarios en caúna de les emsiores daráse anuncia na páxina web y los perfiles en redes sociales d’Iniciativa pol Asturianu”, espliquen los coordinadores d’esti nuevu proyectu.

Sienti o descarga’l primer programa

Los llectores del periódicu La Crónica de Piloña alcuentren, dende’l pasáu mes d’abril, un espaciu reserváu pa la llingua asturiana. Trátase de “El llavaderu”, una columna d’opinión roblada por Daniel Cueli Canto na que l’autor piloñés analiza con una güeyada crítica l’actualidá del conceyu. La Crónica de Piloña súmase asina a otres publicaciones en castellán qu’acuten un espaciu pa la nuestra llingua. Hasta agora, la presencia del asturianu nel periódicu reducíase namás qu’a la tira cómica “Había una vez… una viesca”, fecha por Enrique Carballeira. La Crónica de Piloña ye una publicación mensual de dolce páxines editada en L’Infiestu dende l’añu 2004 y qu’esti mes de mayu llegará a los 100 númberos espublizaos.

Ayeri mesmo anunciábase que güei vienres el periódicu La Voz de Asturias nun diba tar nos quioscos. 89 años dempués de la so salida al mercáu, el diariu diz adiós por problemes económicos, como fizo va poco la cabecera Público, que se ficiere col periódicu asturianu va unos meses.

La Voz de Asturias foi ún de los periódicos en castellán que más usó la llingua asturiana nes décades últimes, con presencia n’artículos d’opinión, viñetes, n’especiales culturales y dacuando en noticies xeneralistes.

Edición dixital del periódicu

Les radios llibres y comunitaries d’Asturies organicen una xornada con delles actividaes pa esti vienres 20 d’abril. Los actos quieren reivindicar la llibertá d’emisión y protestar polos intentos fechos dende’l gobiernu central de retira-yos les antenes y evitar con ello que radio como Radio Sele o Q-k sigan emitiendo. Los actos van tener llugar na Plaza la Escandalera d’Uviéu.

Programa completu d’actividaes

Les radios llibres d’Asturies, que viven momentos complicaos dempués de les actuaciones de la Provincial de Telecomunicaciones d’Asturies, dependiente del Gobiernu d’España, pide a colectivos asturianos el so sofitu al traviés d’un “Manifiestu d’apoyu a les radios llibres asturianes”. Ente les peticiones ta la esixencia de que “s’acaben darréu les midíes de presión pa coles radios llibres y comunitaries asturianes” y el reconocimientu “del llabor desenvueltu por estes emisores y la planificación de frecuencies que respuenda a la demanda de Servicios de Comunicación Comunitarios n’Asturies pa cumplir lo establecío nel artículu 32.2 de la Llei 7/2010”.

Esti ye’l manifiestu completu:

MANIFIESTU D’APOYU A LES RADIOS LLIBRES ASTURIANES

Dende________________________________________________________________

queremos mostrar la nuestra protesta más firme pola actuación de la Xefatura Provincial de Telecomunicaciones d’Asturies respecto de les emisores comunitaries.

La Xefatura Provincial de Telecomunicaciones d’Asturies, dependiente de la Secretaría d’Estáu de Telecomunicaciones y pa la Sociedá d’Información (Ministeriu d’Industria, Turismu y Comerciu) entamó l’unvíu de cartes a les comunidaes de propietarios onde s’asitien los equipos d’emisores de radios non autorizaos. Nelles ríquen-yos información de la titularidá de los equipos y infórmenlos de les sanciones posibles que lleguen hasta multes de 500.000 €.

Consideramos que l’envís de la midida ye en cierto’l presionar a estes emisores y asustar a les comunidaes de propietarios que dieron el preste a la instalación d’equipos.

Tala interpretación correspuéndese pa detrás coles declaraciones del Xefe Provincial a dalgunes de les radios afectase onde-yos indica la so fin de favorecer el pieslle d’estes emisores que lleven tantos d’años emitiendo na “illegalidá”.

Trátase, poro, d’una midida d’acosu y de criminalización pa coles radios llibres y comunitaries asturianes por una situación d’irregularidá que ye responsabilidá de l’Administración autonómica y estatal.

Asturies cuenta con una tradición importante de les denomaes radios llibres y comunitaries que principiaron a surdir a empiezos de los años ochenta. A pesar del importante llabor desenvueltu por estes iniciatives ciudadanes nel ámbitu de fomentu de la cultura asturiana, la participación ciudadana, el pluralismu y l’exerciciu de la llibertá d’espresión, les distintes Administraciones evitaron el reconocimientu llegal d’estes emisores dexándoles nuna situación de precariedá y indefensión.

En vez d’actuar contra les radios comunitaries ye necesario facer efectivu l’artículu 4.1 de la Llei 7/2010, de 31 de marzu, Xeneral de Comunicación Audiovisual qu’indica de manera testual que “Toles persones tienen el derechu a que la comunicación audiovisual s’ufra al encruz d’una pluralidá de medios, bien públicos, comerciales, bien comunitarios, que reflecten el pluralismu ideolóxicu, políticu y cultural de la sociedá”.

Poro, MANIFESTAMOS:

• El nuestru apoyu y solidaridá pa coles radios llibres y comunitaries asturianes.

• Esiximos que s’acaben darréu les midíes de presión pa coles radios llibres y comunitaries asturianes.

• El reconocimientu del llabor desenvueltu por estes emisores y la planificación de frecuencies que respuenda a la demanda de Servicios de Comunicación Comunitarios n’Asturies pa cumplir lo establecío nel artículu 32.2 de la Llei 7/2010.