Comunicación

“Si nun quies taza, taza y media”. La primer campaña escontra l’asturianu orquestada mediáticamente ensin dengún sofitu rial quedó esti xueves desmotada cuando más del 80% de los llectores de La Nueva España na so versión dixital votaron favoratiblemente a que seya obligatoria la enseñánza de Llingua Asturiana o l’alternativa de Cultura Asturiana na educación Primaria. “L’Oviedín”, como se conoz popularmente a lo más rancio de la sociedá capitalina, tien montada esta selmana cola collaboración del periódicu asturianu una campaña que noma “tercera vía” y na que diz que participen 500 pás descontentos, qu’ayeri nun apaecieron nin pa votar escontra lo que diz el periódicu que denuncien.

Dende la campaña mediática qu’esti mesmu periódicu y la desaniciada “Hoja del Lunes” d’Uviéu entamaron nos años 90 nun se vía cosa igual nos medios de comunicación asturianos. Una noticia que falaba d’una campaña de pás d’escolinos qu’en númeru pretendíu de 500 taben a la escontra de que se fora ufiertar nel cursu escolar que vién l’asignatura de Llingua Asturiana o l’alternativa de Cultura Asturiana pa los que nun quixeran escoyer la llingua del país. Nel mesmu miércoles 17 en que se facía esparder la noticia, les propies asociaones de pás desmentíen qu’esistiera denguna denuncia nin recoyiuda de firmes.

La Federación d’Asociaciones de Pás y Más d’Alumnos/es d’Asturies dicía na tarde del xueves nun tener recoyía quexa dala alrodiu d’esta cuestión: María Elena González, presidenta de la FAPA Miguel Virgós, principal federación de pás y más d’alumnos/es d’Asturies, afirmaba esti miércoles que’l so coleutivu nun recibió nenguna quexa alrodiu la falta d’una llingua estranxera como alternativa na primaria. Nesi sen, podrá escoyese ente “Llingua Asturiana” o “Cultura Asturiana” -asignatura impartida en castellán.

Asina, dende la Federación d’Asociaciones de Pás y Más Miguel Virgós manifiestaben que sí tan recoyendo quexes alrodiu d’otres munches cuestiones, nun siendo ésta motivu nengún de quexa o conflictu colos pás y les más d’alumnos y alumnes,

La Nueva España destacaba na so edición d’esti miércoles la recoyida de 500 presuntes firmes de pás y más contra la falta d’idioma estranxeru como alternativa, énte les más de 20.000 persones qu’escueyen Llingua Asturiana cada añu,.

La rialidá de la campaña, qu’enta sigue desenvolviéndose nel mentáu mediu, queda desaniciada dafechu col enfotu del propiu periódicu en desenvolvela convirtiéndola nel motivu principal de la xornada como “Encuesta del Día” cuando lo normal ye qu’otres noticies más populares como la abbdicación/coronación o el partíu de la selección española nel mundial recoyeran esa atención preferente, como asocede davezu sigún la llínia editorial d’esti mediu de comunicación.

La votación d’ayeri, que güei silencia La Nueva España convirtiendo la noticia en llectura namái que pa los suscriptores de la so edición dixital, nun dexa llugar a dubies: Más del 81% de los llectores voten faboratiblemente a la obligatoriedá de la enseñanza de la Llingua na primaria y namái que’l 18% voten negativamente.

La Xunta pola Defensa de la Llingua Asturiana (XDLA) pide a tolos partíos con representación parllamentaria qu’afiten a la RTPA como ferramienta de normalización social del asturianu na Llei nueva que se tra preparando. Depués de la superación esta mañana del Plenu de Totalidá colos votos de PSOE, PP ya IU, la organización cívica quier dirixise sobre too a socialistes y populares, porque Foru Asturies y Izquierda Xunida yá presentaron enmiendes qu’introducíen la normalización llingüística como una de les misiones del serviciu públicu de radio y televisión d’Asturies.

Otra manera, la XDLA recuerda’l manifiestu ‘Cinco puntos por unos medios al serviciu públicu d’Asturies’, al que se sumaron una trentena d’entidaes y que se presentó na sede de l’Academia de la Llingua Asturiana. El documentu apoyáu pola totalidá del asturianismu cultural y por una parte importante de los movimientos sindicales esixe a los grupos parllamentarios que conviertan a la televisión y a la radio pública nun instrumentu al serviciu de la sociedá asturiana, fomentando la industria audiovisual y l’usu del nuestru idioma.

Ye de reseñar que RTPA ye un mediu públicu que, d’alcuerdu cola llexislación vixente -Estatutu d’Autonomía y la Llei d’Usu del Asturianu-, tien qu’usar y fomentar l’usu del idioma. Sicasí, la dexadez de funciones de los gobernantes, oposición y dirección de RTPA despreció hasta’l momentu la llexislación autonómica.

El llar de l’Academia de la Llingua Asturiana sirvió esti miércoles pa la presentación de la nueva propuesta del Proyectu TermAst d’es Academia que tien como protagonista la ‘Terminoloxía del fútbol’, ellaborada nesta ocasión por David Fernández Fernández. L’actu cuntó con una representación del Sporting y del Uviéu, asina como de numberosos profesionales del periodismu deportivu y en llingua asturiana ente los que s’alcontraba Carlos Novoa, el primeru en facer comentarios n’asturianu nuna retrasmisión d’un partíu pa una emisora comercial, en concreto un choque pa Radio Vetusta ente l’Uviéu y el Sevilla que se xugó’l 30 d’abril del 2000.

Ente otros tamién participare nel actu Miguel Fernandi, de RPA, que retresmitiere en llingua asturiana partíos del Uviéu y dellos otros equipos n’Onda Peñes, Radio Sele y la propia RTPA.

Pol conxuntu esportinguista tuvo presente’l direutor de Comunicación, Manfredo Álvarez, mientress que pol Real Uviéu vieno’l so capitán, Diego Cervero.

Ana Cano, presidenta de l’Academia de la Llingua Asturiana (ALLA), entamó l’actu desplicando l’orixe del proyeutu TermAst, pa depués agradecer a David Fernández el so trabayu, que fa algamar dolce propuestes terminolóxiques, siendo enforma significativa qu’esta quedare colgada na web na “viéspera del Mundial de Fútbol Brasil 2014”.

Tres de qu’Ana Cano reclamare una presencia “pala que siempres hai bones pallabres na direicción de la RTPA” pero poco más, David Fernández punxo dellos exemplos de la riqueza terminolóxica de la llingua asturiana na fastera deportiva y futbolística.

Como cada añu, los fotoperiodistes asturianos faen balance y ponen de nuevo énte los güeyos de la ciudadanía aquelles imáxenes coles que s’ilustraron los aconteceres del exerciciu anterior. Nun se correspuenden, necesariamente, coles noticies qu’entós se consideraron más relevantes, porque’l tiempu tamién apurre un nuevu prisma a les miraes y revela cómo acontecimientos que resultaben aparentemente menores revistíen una singularidá que-yos facía merecer una nueva güeyada.

D’esta mezcla, de la constatación de lo que foi y del descubrimientu de lo que pudo pasar inalvertío, surde la colección d’imáxenes que compón Miraes 2014 -una escoyeta de 92 imáxenes onde se revisen socedíos y protagonistes del añu 2013 n’Asturies- que va poder visitase nel Muséu Barjoja de Xixón ente’l 6 de xunu y el 3 d’agostu.

Radio 5 Todo Noticiae sigue’l so percorríu per España con una serie de programes especiales pol so 20º aniversariu, que se cumplió’l pasáu mes d’abril. Nesta ocasión, la ciudá escoyida ye Uviéu, que celebra la so tradicional fiesta del “Martes de Campu” onde podrá vese y sentise’l programa especial a les 12 del meudía nel Campu San Francisco. Les celebraciones d’estos venti años de serviciu públicu van llevar a la emisora a distintos puntos de la xeografía española, aprovechando les fiestes y cites culturales que van tener llugar nestes localidaes nos próximos meses.

El percorríu de Radiu 5 pa conmemorar el so 20º aniversariu llega a Uviéu esti martes por cuenta de les celebraciones del Martes de Campu’, tamién conocíu como ‘La Balesquida’, fiesta local de la capital asturiana. Ente les 12.05 y les 12.30 hores, la emisora Todo Noticies va ufiertar un programa especial dende’l Paséu de los Álamos, nel campu de San Francisco.

El programa va cuntar cola presencia del alcalde d’Uviéu, Agustín Iglesias Caunedo; el presidente de la Confrería de La Balesquida, José Antonio Alonso; y el músicu americanu afincáu n’Asturies Michael Llee Wolfe.

Una nueva parada nesta programación especial de Radiu 5, qu’empezó en febreru cola emisión dende la see de la UNESCO en París pa celebrar el Día Mundial de la Radio.

Les celebraciones de los 20 años de la primer emisora española Todo Noticies van llevar a Radiu 5 a distintos puntos de la nuesa xeografía aprovechando les sos fiestes y cites culturales, como, por casu, los Sanfermines de Pamplona.

Esti miércoles 4 de xunu, a les 13,30 horas, bel Centru de Cultura Antiguu Institutu de Xixón, na caí Xovellanos, va presentase’l llibru L’espeyu onde miranos: televisiones de proximidá n’europa Occidental y procesos de recuperación identitaria”, de Damián Barreiro, editáu por Trabe y ganador en 2013 del sestu premiu Fierro Botas, cuneando cola presencia del autor y l’equipu editorial .Ye esti un completu ensayu sobre l’importante papel que los medios de comunicación tienen na pervivencia d’un idioma.

“L’espeyu onde miranos: televisiones de proximidá n’europa Occidental y procesos de recuperación identitaria”, foi la obra ganadora en 2013 del sestu premiu Fierro Botas, que concede l’Ayuntamientu de Xixón al traviés de la Conceyalía d’Educación, Cultura, Mocedá y Fiestes.

El premiu, concedíu por unanimidá, quixo premiar lo interesante del tema, de gran actualidá anguaño y la novedá que representa no que tien de ver col so conteníu, rescamplando sobremanera l’análisis que l’autor fai de les televisiones de proximidá mesmo n’Europa como nel estáu español y la so visión personal y nacional d’Asturies como país con identidá propia, los xéneros televisivos y l’idioma como xerme d’una industria cultural.

El 10 de mayu pasáu emitióse otra vegada en TPA la película El rostru impenetrable (One-Eyed Jacks), doblada al asturianu por Gonzali Producciones. Esta primera reposición llegó al 7% de l’audiencia, con una xubida de cuasi dos puntos (1,9) dende la emisión anterior, el 27 d’avientu de 2013, convirtiéndose nún de los espacios más vistos del día na cadena. El llargumetraxe, según los datos de Kantar Media, tuvo perriba de la media del día (4,6%) y del mes (6,5%).

El rostru impenetrable ye un western de 1961 interpretáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. Foi la única película dirixida por Marlon Brando. En 1961 tuvo nominada al Oscar na categoría de Meyor Fotografía (collor) y llogró la Concha d’Oru a la meyor película nel Festival de San Sebastián.

El doblaxe tuvo dirixíu por Illán Gonzali, con un repartu de más de venti dobladores, ente ellos Carlos Novoa, José Antonio Lobato, Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán. L’Academia de la Llingua Asturiana foi responsable del asesoramientu lingüísticu.

Una sentencia xudicial refugaba esta selmana tolos argumentos apurríos pa xustificar la sanción de venti díes d’emplegu y sueldu impuesta por RTVE al periodista Xuan Cándano, a instancies del sindicatu UGT. El principal motivu yera una supuesta incompatibilidá por figurar nuna productora que namái tuvo actividá de 1990 a 1996. cuando Cándano s’atopaba n’escedencia del ente radiotelevisivu estatal. El periodista asturianu dexaba bien a les clares ayeri na so cuenta de Twiter lo que significa la sentencia: “¡ una victoria del periodismu llibre y de la ciudadanía. Y una derrota de los enemigos de la democracia”.

Nel fallu, el xuez Manuel Barril Robles reprocha al sindicatu UGT so comportamientu nesti casu, por denunciar a Cándano tres recibir un anónimu al traviés d’un SMS al Secretariu Xeneral de la seición y considera que lo qu’hai ye un enfotu de venganza haza’l periodista pola publicación d’un informe sobro les actividaes empresariales del sindicatu na revista que dirixe, Atlántica XXII.

Sentencia completa

El doblaxe d’El Rostru Impenetrable (ONLINE ) ye’l programa más vistu de ‘TPA a la carta‘, teniendo superao la cifra record de 50.000 reproducciones, mui lloñe de les poco más de quince mil reproducciones que tien el programa más descargáu d’Asturianos en el mundo”, uno de los más vistos na web de tola programación de la canal . Ye tamién el títulu que más rápido foi algamando esa posición cimera nel siguimientu per internet. La noticia afita entá más l’encamientu fechu dende la sociedá civil pa llograr una parrilla con más presencia del asturianu pol granible resultáu que s’algama.

El Rostru Impenetrable, con un 5,1%, superó l’audiencia media de la cadena del 27 d’avientu (4,9%), día de la so emisión, y del mes (4,7%). Los espacios programaos con anterioridá tuvieron per baxo de la media de TPA -”Date una vuelta” 3,9%, y ”Superasturianos” 4,5%-. Per otru llau, la película de la tarde en castellanu, Green Lantern (2011), tuvo tamién per baxo d’esta media, al quedar nun 4,4%.

La emisión d’quella, al traviés del hashtag #ElRostruImpenetrable, foi ún de los espacios más comentaos na nueche del vienres 27 d’avientu ente los usuarios de Twitter n’Asturies, xenerando más d’un 80% de comentarios positivos.

La Televisión del Principáu d’Asturies entamó a ufiertar online’l doblaxe al asturianu El rostru impenetrable realizáu por Gonzali Producciones el 10 de xineru d’esti añu y dende esi día algamó les 50000 reproducciones nun periodu de namái que cuatro meses.t

Dirixíu y producíu por Illán Gonzali, cuenta con un repartu de más de venti actores de doblaxe, ente ellos Carlos Novoa (Marlon Brando), José Antonio Lobato (Karl Malden), Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán. L’Academia de la Llingua Asturiana fizo l’asesoramientu llingüísticu.

El rostru impenetrable (One-Eyed Jacks, 1961) tien una duración de 135 minutos y ta interpretáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. Foi la única película dirixida por Marlon Brando. En 1961 tuvo nominada al Oscar na categoría de Meyor Fotografía (collor) y llogró la Concha d’Oro a la meyor película nel Festival de San Sebastián.