Comunicación La XDLA solicita la ellaboración d’un llibru d’estilu pa garantizar un tratamientu afayadizu de la cultura asturiana en RTPA by asturnet 21 de xunu, 2015 La XDLA vieno acabante solicitar la ellaboración d’un llibru d’estilu pal tratamientu de la cultura asturiana en RTPA que fine pa con situaciones que nun se puen volver a repetir como’l d’una noticia sobre’l Fueru d’Avilés, que según la cadena taba en lengua provenzal. Na primer edición del informativu del vienres 19 de mayu, TPA informaba de que’l Fueru d’Avilés, el primer testu xurídicu nel nuestru idioma, diba esponese nel Centru Niemeyer. Si nun fuera poca cosa nun destacar el datu de la llingua del documentu, la canal pública afirmó que taba escritu en lengua provenzal. Como diz la XDLA na nota de prensa na que dacvía l’anuncia de la so petición, “sería impensable pensar nun informativu de TVE que falara d’una esposición sobre los Cartularios de Valpuesta, primer documentu en castellanu, ensin destacar esti fechu y señalando, amás, que taba escrito nuna llingua romance, ensin reseñar cuála”. La Xunta pola Defensa de la Lllingua Asturiana (XDLA) yá criticó nel 2005 que “la convocatoria pa trabayadores de RTPA nun valorara los conocimientos de llingua y cultura asturiana -mentes que se solicitaben conocimientos en llingües estranxeres que nun taben protexíes pola llexislación-. Nesi momentu, munchos sectores critiquemos que, amás de violar l’Estatutu y la Llei d’Usu, con esta convocatoría podría conformase una plantiya na que naide tuviera capacitación pa usar el nuestru idioma, colo que podríen quedar marxinaes multiples formes d’espresión de la cultura asturiana”.<ª/p> Con eses blimes, pala XDLA, “yera imposible facer un cestu curiosu y prueba d’esto ye que lo del Fueru nun ye un casu aisláu. Asina, hai díes informábase del Premiu Princesa d’Asturies a la Wikipedia recordando qu’esta enciclopedía llibre taba escrita hasta n’esperantu. Sicasí, nun había nenguna referencia a la existencia d’una Wikipedia n’asturianu. Parez que tampoco nengún redactor s’interesó en contactar colos sos editores pa qu’esplicaren cómo funcionaba o qué-yos paeciera’l premiu”. La situación más recién d’esta riestra de despropósitos d ela TV pública asturiana cincaba a la propia asociación: “El Día de les Lletres pasáu, los redactores de TPA renomaben a la nuestra organización como Xunta pola Oficialidá. Too ello depués de recibir el reconocimientu que nos brindó l’Academia de la Llingua Asturiana, que según la nuestra televisión taba acabante d’entregar unos premios y reivindicar ¡un Estatutu d’Autonomía p’Asturies! Pensamos qu’estos errores nun se toleraríen nin en primeru de Periodismu.” Pala XUnta Pola, “nun tien sentíu que los trabayadores de la televisión pública desconozan la realidá llingüística y cultural del so país. Necesiten formación y unos mínimos sobre los que trabayar. Nun se puen volver dar casos como los mentaos enantes, impensables en cualquier televisión pública del mundu. Tampoco nun se pue entender l’usu de palabres asturianes, como argayu, que na TPA acaben en -o, adaptándolo a la normativa del castellanu, cuando la única llingua que por llei ta obligada a protexer RTPA ye l’asturianu. Mesmamente, munches veces fúxese de les palabres asturianes populares y utilicen el so equivalente en castellanu”. La situación ye tan cafiante que pala XDLA nun paga la pena ” falar yá de tolos productos y actividaes culturales que queden fuera de les cámares de TPA pol fechu d’utilizar l’idioma propiu d’esta tierra, cuando lo normal sería que tuvieren una discriminación positiva.” Si se xunta a too lo mentao la reivindicación constante ¡ de la toponimia oficial., “onde hai veces que s’usen formes dobles que nun tán oficializaes, mentes que de forma oral la toponimia tradicional nun s’utiliza” poco más se tien de dicir. La XDLA aprovecha pa recorda-yos a los redactores qu’anguaño “existen ferramientes, como la web de Softastur, que permite consultar tola toponimia oficial del nuestru país. Amás, nun se pue dexar de llau la forma tan peculiar y estraña a la fonética asturiana que tienen munchos presentadores de pronunciar topónimos como Xixón o El Requexón” . Por too esto, la XDLA solicita a RTPA que trabaye nun llibru d’estilu qu’estableza unos mínimos sobre’l tratamientu de la llingua y la cultura asturiana nos medios públicos: “Toos estos temes tendríen que quedar recoyíos nesi testu, dalgo que xunto a la formación afayadiza y constante sobre la nuestra realidá cultural y llingüística, permitiría que TPA cumpliera los mínimos que se-y esixen a cualquier televisión pública del mundu, polo menos la d’un país democráticu y respetuosu cola so audiencia”. 21 de xunu, 2015 0 FacebookTwitterPinterestEmail
Comunicación Los ximielgos Torres viaxen a Asturies pa cocinar el pitu de caleya esta selmana en Cocina2 de RTVE by asturnet 21 de xunu, 2015 L’espaciu televisivu de cocina conducíu polos chefs Sergio y Javier Torres na primer cadena de TVE, muévese esti martes al interior d’Asturies. Cada selmana, los ximielgos visiten una localidá de la xeografía española coles mires d’amosar les sos materies primes y les sos distintes formes de preparación gastronómica. Nesta ocasión, el programa va tar nel valle de Sariegu pa conocer al pitu de caleya, un pollu criáu nel campu, como persabe cualaquier asturianu. Nel valle de Sariegu, los hermanos Torres van atopase per primera vegada con un pollu criáu en llibertá que pue llegar a pesar hasta seis kilos. El Pitu de caleya n’asturianu tien gracies a la so alimentación una carne bien apreciada na gastronomía. Y dempués de ver el so hábitat, Javier va querer arreyase más na cultura asturiana y nun va perder la oportunidá d’ellaborar sidra de forma artesanal. Sergio, pel so llau, va conocer un platu perantiguu que se cuez demientres más de doce hores nun fornu de lleña. A la de cocinar, Javier optará por cocinar un platu fríu ya intensu y Sergio, por un canelón rellenu de pitu de caleya. 21 de xunu, 2015 0 FacebookTwitterPinterestEmail
Comunicación La XDLA reclama presencia del asturianu na RTPA menos anecdótica y más aiciones como la Selmana de les Lletres by asturnet 19 de mayu, 2015 A pesar de los pasos alantre daos na Selmana de les Lletres, l’usu del asturianu na RTPA vuelve ser “una anécdota y ye grave sobre manera la inexistencia de programación infantil nel nuestru idioma” pala Xunta Pola Defensa de la Llingua Asturiana que vieno acabante d’entrugase nuna nota de prensa asoleyada esti día qué va pasar agora. RTPA y Llingua Asturiana: ¿Agora qué? ye’l títulu del documentu onde la XDLA reclama que se pase de les anécdotes a una programación seria. Esta Selmana de les Lletres Asturianes, la RTPA dio-y un tratu que la XDLA califica de curiosu a la realidá llingüística del nuestru país, sobre manera na RPA, onde l’idioma tuvo presente a lo llargo de tola emisión. Nel casu de la televisión, “fixéronse coses más aislaes y anecdótiques, pero tamién se dieron pasos históricos. Un exemplu ye l’usu del gallego-asturianu en delles pieces informatives o la emisión, pela primer vez na historia, de la información metereolóxica n’asturianu”. La respuesta de l’audiencia foi más que positiva y 24.000 ciudadanos pudieron ver cómo s’usaben con normalidá les llingües del país na so televisión. Sicasí, “pasada la Selmana de les Lletres volvimos a l’anormalidá y el nuestru idioma yá ye l’anécdota, con menos d’un 5% de la emisión nel casu de la televisión y un vergonzante 2% nel de la radio”. Por eso, la Xunta pola Defensa de la Llingua Asturiana (XDLA) “quier preguntar qué va pasar agora cola situación del asturianu na RTPA. Y ye que nun sería lóxico tener qu’esperar un añu, hasta la próxima Selmana de les Lletres, pa volver ver un usu del idioma propiu mínimamente normal. Les canales públiques tán obligaes por llei a ser partes actives nel procesu de normalización del asturianu y, por eso, tienen que dar pasos alantre, pero estos tienen que ser continuos y non cosa d’un día. Sicasí, la diglosia y el complexu d’inferioridá formen parte de la mentalidá de los directivos de RTPA, que piensen que con doblar una vez al añu una película o programar dellos reportaxes sobre la situación del idioma coincidiendo cola Selmana de les Lletres yá tán cumpliendo cola llei y contentando les necesidaes de l’audiencia asturiano”. Pala XUnta “ye especialmente dolioso que nuna xornada dedicada a la tresmisión interxeneracional del idioma, la TPA nun dedicara nin un minutu a la emisión de programación infantil. Too esto vuélvese más grave cuando’l doblaxe al asturianu de la serie gallega Los Bolechas foi tou un éxitu que llegó a tar perriba n’audiencia d’otros productos en castellanu -como Bob Esponxa o Peppa Pig-. Mesmamente, la productora gallega que realiza la serie publicó dellos llibros n’asturianu sobre los personaxes, mostrando asina l’interés d’adaptar a Asturies y al asturianu la so ufierta cultural -compuesta por llibros, discos, espectáculos teatrales y actividaes d’ociu de toles menes-. Sicasí, el desinterés de la TPA fixo que Los Bolechas quedara, otra vuelta, nuna anécdota ensin continuidá dientro del procesu de normalización del nuestru idioma”. La XDLA quier siguir insistiendo na importancia d’una programación infantil estable dientro de la emisión de TPA. Por eso, l’asociación “solicita a la cadena que merque capítulos nuevos de la serie gallega y qu’apoye toles iniciatives d’ociu derivaes d’ella que permitan esparder l’idioma propiu ente les xeneraciones nueves. Amás, recordamos qu’esti branu va estrenase en Xapón una serie nueva de la franquicia de Dragon Ball, productu qu’a lo llargo de los años noventa se convirtió nel primer fenómenu de mases que faló gallegu, vascu y catalán. Ye más, años depués d’estrenase, tovía sigue programándose con datos d’audiencia perriba de los demás dibuxos animaos”. Por mor d’eso, la XDLA solicita a la dirección de RTPA “que negocie xunto les otres cadenes autonómiques de territorios billingües, l’adquisición d’esta serie -tou un símbolu de la normalización de les llingües minoritaries- pa la so emisión n’asturianu”. 19 de mayu, 2015 0 FacebookTwitterPinterestEmail
Comunicación Damian Barreiro presenta’l so ensayu sobre la TV n’Avilés by asturnet 4 de mayu, 2015 “Caleya Sésamu. El papel de la televisión na tresmisión interxeneracional d’una llingua”, de Damián Barreiro y Premiu «Máximo Fuertes Acevedo» d’Ensayu, va presentase esti Xueves, 7 de mayu, a les 12.00 hores. na Feria del Llibru y Discu n’Asturianu (na Antigua Pescadería Municipal, Avilés). Barreiro trai a colación nel llibru la paradoxa de que “si vamos a entrugar a cualquier escuela vamos poder comprobar que Mickey Mouse ye más famosu que Pelayo; que Dora the Explorer tien más devotos que la Santina; y quhai más xente que conoz les aventures de Pocoyó que les de Gonzalo Peláez”. Y esi ye’l puntu de partida del so ensayu. Na opinión de Barreiro, “esto pasa nAsturies, pero lo mesmo podría pasar nuna escuela de Xapón, Suecia o Venezuela; ye probable quente los neños los protagonistes de los dibuxos animaos de moda sían más famosos que los héroes nacionales. Nes xeneraciones anteriores, los mitos fundacionales y mesmamente la relixón pasaben de pas a fíos y de güelos a nietos de forma oral, porque ensin radio nin televisión los cuentos contábense xuntol calor del llar. Yera la forma en que cada sociedá tresmitía la so historia, la so forma de vida y la so llingua. Yera la manera de nun desaparecer como pueblu. Depués, eses histories empezaron a deprendese nos llibros y, más tarde, nes escueles al xeneralizase lenseñu obligatoriu. Sicasí, agora los mitos que se deprienden son los que salen na televisión. Hai neños asturianos que nun saben lo que ye un trasgu, un busgosu o una xana, pero son quién a dicir de corrío tolos personaxes de la serie Digimon”. Damián Barreiro (A Estrada, Pontevedra, 1984) ye llicenciáu en Periodismu pola UPV/EHU. Depués de formar parte de la plantiya del selmanariu Les Notícies y del diariu dixital Asturies.com, collaboró con otros medios de comunicación, como la Televisión Local de Xixón, el periódicu Diagonal Asturies, les revistes Atlántica XXII, Anuariu de la Música Asturiana o Vertigü, amás del diariu La Nueva España na so sección «Escolinos». Nel añu 2013 ganó’l Premiu d’Ensayu «Fierro Botas», convocáu pol Conceyu de Xixón, cola obra “Lespeyu onde miranos: televisiones de proximidá nEuropa Occidental y procesos de recuperación identitaria”. Un añu depués fíxose col Concursu d’Investigación Llingüítica de l’Academia de la Llingua Asturiana col artículu “La nación televisada: llingua y identidá nos programes nasturianu de TPA”, publicáu na revista Lletres Asturianes. 4 de mayu, 2015 0 FacebookTwitterPinterestEmail
Comunicación TPA estrena concursu de tonada embaxo’l nome de Cantadera by asturnet 14 d'abril, 2015 Un nuevu programa arranca’l sábadu 18 abril a les 22 hores en TPA. El nome ye “Cantadera”, que ya recibiere un programa especial d’añu nuevu, y ye’l clásicu formatu de concursu de canción asturiana que popularizara Carlos Jeannot y retransmitiera Tele Oviedo a lo llargo de munchos años. Esta vegada, van ser Chus Pedro y Sonia Fidalgo los conductores d’un progama qu’enta nun se pue atopar na web de la RTPA y que tien una páxina en Facebook onde s’anunciaba la primer emisión pal sábadu pasáu. El programa arrancará esti sábadu con un conciertu/entrevista a Marisa Valle Roso; les actuaciones de Enrique Castañón y Belén Arboleya, en tonada ayerana, y de Liliana Castañón y Manuel Roza Llera, en tonada soberana; la presencia como invitáu de Celestino González Tino Arnizu; la presentación del nuevu CD de Vicente Prado El Pravianu; la visita De Romandela a la sidrería Tírate al Matu; y el cierre cola actuación de José Manuel Requero El Maestru. Como los concursos de canción asturiana de siempres el programa tendrá Gaiteru oficial, Berto Varillas,y Panderetera oficial, Silvia Suárez.. El xuráu va tar formáu pol gaiteru y la panderetera oficiales, el presentador Laude Martínez, l’escritor Ismael Arias y quintu ún miembru que va camudar cada selmana. 14 d'abril, 2015 0 FacebookTwitterPinterestEmail
Comunicación “El rostru impenetrable” va poder vese en TPA a la Carta tol añu by asturnet 18 de febreru, 2015 El rostru impenetrable va poder vese na páxina web TPA a la Carta hasta’l 24 d’avientu d’esti añu. Con esti llargumetraxe Gonzali Producciones abría camín al doblaxe cinematográficu na televisión autonómica asturiana. Trátase d’un western fechu n’Estaos Xuníos d’América, que dirixera y protagonizara Marlon Brando, al que tamién acompañaba’l conocíu actor Karl Malden. La Televisión del Principáu d’Asturies estrenólu nuna emisión el 27 d’avientu de 2013, faciendo dos reposiciones, el 10 de mayu y el 8 setiembre de 2014, con perbonos datos d’audiencia en tolos casos. El versionáu cuntó cola participación de más de venti persones, siendo doblaos los actores principales por Carlos Novoa (Marlon Brando), José Antonio Lobato (Karl Malden), Ana Blanco Rozada (Katy Jurado) y Ana Díaz Morán (Pina Pellicer). El director del doblaxe foi Illán Gonzali. El Rostru Impenetrable, con un 5,1%, superó l’audiencia media de la cadena del 27 d’avientu de 2013 cuando s’emitiera per primer vegada (4,9%) y del mes (4,7%). Los espacios programaos con anterioridá tuvieron per baxo de la media de TPA -‘Date una vuelta’ 3,9%, y ‘Superasturianos’ 4,5%-. Per otru llau, la película de la tarde en castellanu, Green Lantern (2011), tuvo tamién per baxo d’esta media, al quedar nun 4,4%. La emisión d’quella, al traviés del hashtag #ElRostruImpenetrable, foi ún de los espacios más comentaos na nueche del vienres 27 d’avientu ente los usuarios de Twitter n’Asturies, xenerando más d’un 80% de comentarios positivos. La Televisión del Principáu dAsturies entamó a ufiertar online’l doblaxe al asturianu El rostru impenetrable realizáu por Gonzali Producciones el 10 de xineru d’esti añu y dende esi día algamó les 50000 reproducciones nun periodu de namái que cuatro meses. Gonzali Producciones tien doblao n’asturianu hasta agora seis llargumetraxes, nueve capítulos d’una serie d’animación y trés curtiumetraxes; asina como otros trés curtiumetraxes en gallego-asturianu. L’últimu d’estos trabayos foi’l versionáu de Dirty Harry, película protagonizada por Clint Eastwood, que tamién emitió la TPA al empiezu d’añu. La productora publicó en DVD los doblaxes La nueche de los muertos vivientes (inclúi como estra la película White Zombie subtitulada n’asturianu), McLintock, El tercer home, y Los viaxes de Gulliver. 18 de febreru, 2015 0 FacebookTwitterPinterestEmail
Comunicación La UP convoca un Cursu de Doblaxe prácticu en Xixón by asturnet 11 de febreru, 2015 Entamáu pola Universidá Popular de Xixón con Gonzali Producciones vieno acabante de conocase un cursu que va desarrollase del 6 al 17 d’abril, nel Centru de Cultura Antiguu institutu, baxo’l títulu de Cursu Práuticu de Doblaxe, integráu dientro de la programación pal primer semestre de 2015 d’esti departamentu de la Fundación Municipal de Cultura. El cursu consta de 40 hores, con sesiones de llunes a vienres y horariu de 10 a 14:30. Ufierta unos conteníos que se dividen en nueve capítulos: Respiración, Espresión Verbal, Dicción, Interpretación, Proyeición de la voz ante’l micru, Sincronización, Sonorización ante’l micru, Téunica de doblaxe, Llectura espresivo y Mímesis. Fadránse exercicios de doblaxe sobre fragmentos de series y películes en toles sesiones. Daráse diploma d’asistencia a aquelles persones que lu pidan y asistieren a lo menos al 80% de les sesiones. Esti cursu, que ta encamentáu a persones con della esperiencia n’interpretación y/o llocución, abrió’l periodu de matriculación esti pasáu martes 10 de febreru, cubriendo la totalidá de les places ufiertaes antes d’esi meudía, amosando asina l’interés que xenera la estaya de doblaxe. Gonzali Producciones vien faciendo dende 2010 el versionáu n’asturianu, castellanu y gallego-asturianu, d’obres cinematográfiques, ente otres la serie d’animación Les Aventures de Superman y los llargumetraxes Los viaxes de Gulliver, El tercer home, McLintock, La nueche de los muertos vivientes, El rostru impenetrable y Harry el suciu, éstos dos últimos emitíos na Televisión del Principáu d’Asturies. Los interesaos puen afayar más información nes webs de la Universidá Popular (http://up.gijon.es) y Gonzali Producciones (http://gonzaliproducciones.net/FORMACION)Información sobre’l cursu 11 de febreru, 2015 0 FacebookTwitterPinterestEmail
Comunicación El papel de los medios centra l’alderique en Nava en marcha by asturnet 11 de febreru, 2015 Esti xueves va desenvolvese la segunda de les charles del ciclu “Trenes, radios, redes y patates. ¿Cuál ye’l so sitiu en Nava?”, qu’entama pa esti mes de febreru l’asociación Nava en marcha.Nesta segunda charla que lleva por títulu “¿Y a mi quién m’informa? Radio Nava y el papel de los medios de comunicación”, falaráse del procesu sancionador que tien enriba la mesa Radio Nava y del papel de los medios de comunicación como ferramienta del sistema. La cita ye esti xueves a les 19 hores na Casa Cultura “Marta Portal” de Nava y va siguir los dos xueves que resten del mes con otres dos propuestes. El 19 de febreru l’alderique ye teunolóxicu y va llevar por títulu “Texendo redes, apropiándonos d’Interné”, falando de les alternatives comunitaries pal accesu a la rede, cuntando cola participación del escritor y trabayador de les TIC Miguel Moro y de César Díez, representante del proyectu Guifi.net. Pa finar el mes, el xueves 26 de febreru, a la mesma hora y nel mesmu llugar”, Mario Morilla, d’Ecoloxistes n’acción, y un representante de güertos colectivos de Paraes y Precaries d’Uviéu van participar nún alderiquee sobre la realidá y les alternatives del campu asturiano que lleva por títulu “Ente ocalitos y bardiales, ¿ónde semo les patates? ¿ónde pacen les vaques?”. 11 de febreru, 2015 0 FacebookTwitterPinterestEmail
Comunicación La RTPA protagoniza la griesca política de final de lexislatura by asturnet 9 de febreru, 2015 La RTPA protagoniza la griesca política de final de lexislatura, por mor del enfotu que tan poniendo’l PP y el PSOE n’aprovechar la segunda llei de reestructuración del sectur públicu pa nomar un Conseyu d’Alministración y un director pa seis años cuando la lexislatura ya ta finada. IX, Foro y UPyD albidren que nun ye oportuno que’l parlamentu escueya agora al director de la RTPA pa los próximos seis años a menos de dos meses de la so disolución y esti día pela mañana torgó na Xunta de Voceros la posibilidá que plantegaben PSOE y PP. Na Xunta de Voceros d’esta mañana aplazóse la decisión de poner en marcha la normativa pa modificar el conseyu d’alministración de la RTPA y el cambéu de director. Nun ye oportunu qu’a un parlamentu al que-y queden dos meses pa la so disolución escueya cargos pa los próximos seis años, repitió’l voceru d’IX, Aurelio Martín, que defendió la llexitimidá de la mesa de la cámara pa tomar les decisiones democrátiques que considere oportunes, incluyida la de frenar la tramitación rellacionada cola RTPA nun parlamentu que ta escosu. El voceru d’IX referíase a que los votos d’IX, Foro Asturies y UPYD puean paralizar esos trámites na mesa de la cámara onde tien tres votos frente a los dos de PSOE y PP. Creemos que dende’l puntu de vista de la exemplaridá ye meyor que lo faiga’l nuevu parlamentu, alvirtió sobre les intenciones de PSOE y PP. El director xeneral de RTPA, Antonio Virgili, lleva nomáu en funciones dende hai más de tres años, nuna situación dafechamente anormal ya insólita ente les televisiones autonómiques nel Estáu español. L’Unicu dirfector nomáu pola XUnta Xeneral del Principáu foi JHosé Manuel Ornia nel entamar del Ente 9 de febreru, 2015 0 FacebookTwitterPinterestEmail
Comunicación La Voz d’Avilés sigue en llucha by asturnet 6 de febreru, 2015 El voceru parlamentariu d’IX na Xunta Xeneral, Aurelio Martín, y el diputáu Luís Álvarez Payu, caltuvieron un alcuentru esta mañana colos representantes de los trabayadores de La Voz d’Avilés, que s’atopen en huelga ante los dos despidos comunicaos pola empresa y que siguen desendolcando acitividaes sindicales pa desplicar la situación na que s’alcuentra’l conflictu. A xuiciu de los trabayadores estos despidos, el 25% de la plantiya, enmarquense na decisión de la empresa d’amenorgar drásticamente los gastos de personal, gastos que dende 2009 yá s’amenorgaren nun 45%. Sigún informaben los trabayadores esti día “a lo llargo del procesu, los apoderaos de La Voz d’Avilés y responsables del grupu El Comerciu non solo nun fueron capaces de xustificar la supuesta mala situación de la empresa, sinón que la documentación qu’apurrieron dexaba aseverar lo contrario. Entá asina persistieron en reclamar a los trabayadores retayos salariales d’hasta’l 28% como alternativa pa evitar los despidos. La empresa, dicen, refugó toes y cada una de les alternatives de diálogu plantegaes polos trabayadores y aportunó n’imponer drásticos retayos estructurales”. 6 de febreru, 2015 0 FacebookTwitterPinterestEmail