Comunicación

Al cocer, mengua. Los plazos trazaos nos últimos meses pol Gobiernu autonómicu dende’l so departamentu de Comunicación, dirixíu por Jorge Fernández León, pa echar a andar la futura radiotelevisión pública asturiana dilátense y fixen agora meres emisiones de señal en pruebes pa los últimos meses de 2004, hasta que’l nuevu ente ufra una programación regular non antes de mediaos de 2005. La Xunta Xeneral del Principáu yá nun nomará al conseyu d’alministración de la tv hasta’l prósimu periodu de sesiones, depués del veranu.

Pesie a les facilidaes que ta poniendo de la so parte el nuevu Gobiernu central, llideráu pol socialista José Luis Rodríguez Zapatero -desistimientu del recursu d’inconstitucionalidá que presentara l’anterior Executivu del PP, cesión al Principáu de la tercer canal de televisión pública-, el llargu partu de la radiotelevisión autonómica asturiana postérgase otra vuelta más y afita 2005 como l’añu nel que previsiblemente empezará emitir con regularidá el nuevu ente.

Antes d’ello, inda queden munchos pasos, que según Fernández León resúmense na aprobación del conseyu de la tv pola Xunta Xeneral, a partir del regresu a l’actividá parlamentaria na seronda prósima, na primer emisión d’una señal pa identificar la canal por eses mesmes feches y na posterior constitución del equipu directivu, qu’habrá decidir cómo va xestionase la radiotelevisión pública.

Too ello supondrá un nuevu retrasu d’a lo menos un añu a partir d’anguaño, según los cálculos del responsable de Comunicación del Principáu, nun procesu cuyos últimos pasos sedrán la contratación de personal y la concreción de la programación.

El periodismu dixital y el tradicional, asina como l’audiovisual alcontráronse abellugaos nos diálogos del Fórum 2004 a lo llargo d’estos caberos díes con un alderique alrodiu del futuru que tien la comunicación nun mundu global.

Al desafíu que suponen tanto la prensa gratuita como internet, los periódicos de pagu plantegáronse na Xornada sobro “El pluralismu na prensa, paz y diálogu multicultural” que tienen de dir a la gueta d’una rempuesta nel so internu: “Los periódicos son iguales a como eran hace 20 años, y, a grandes rasgos, no muy distintos de lo que eran hace un siglo” manifestó Jesús Ceberio, director d’El País, quien xunta Juan Luis Cebrián y José Vidal Beneyto dixo tamién que’l periódicu ye un productu del pasáu, “de la era industrial”, y ficieron alcordanza de que tamos ya hai tiempu na “era dixital”.

Nel Fórum 2004 coincidíen esta selmana una bona riestra de xornaes alrodiu de la situación na que s’alcuentren los medios de comunicación. La comunicación audiovisual global yera’l motivu d’otru diálogu que se cellebraba’l vienres 28 y el sábadu 29 y a lo llargo de tola selmana tuvo llugar el nomáu INPUT 2004. El direutor d’esi diálogu ‘Ciutadans televidents. INPUT 2004’, Joan Úbeda, afirmó que los alderiques taben dexando nidio que la televisión tien unos efeutos enforma importantes como pa dexala al “augurio del mercado”. Pa’l dieutor d’INPUT 2004, la televisión va acabar convirtiéndose “nun tema de salú pública”,porque ye un mediu al que tien de tratase con procuru, porque moviliza a millones de persones.

El director del diálogu pidió-yos a les televisiones privaes que “tengan un mínimo de responsabilidad social” ya que talamente como hasta agora “podrían continuar haciendo negocio” ensin facer lo que faen nesti momentu, qu’atalantó enforma peligroso.

El presidente d’INPUT 2004, Hansjurge Rosenbauer, afitó pela so parte que les tendencies de la televisión que se vieren nel festival son la producción de ficción en nuevos formatos gracies al emplegu de les cámares dixitales y de documentales ca vegada más comprometíos políticamente.

Rosenbauer dixo tamién que namái que la televisión pública pue garantizar “la continuidad de buenos programas” ya que nun ta obligada pel mercáu.

Web oficial del Fórum

La futura radiotelevisión pública asturiana da un pasu más p’hacia la so creación. El Gobiernu central aprobó na so xuntanza de güei un decretu pol que se-y cede a Asturies la xestión del canal propiu de televisión pol que ta llamáu a emitir el nuevu ente autonómicu de comunicación, venti años depués de la primer concesión de xestión del tercer canal de tv a una comunidá autónoma.

Asturies tendrá agora les facultaes que yá tien la pionera Cataluña dende 1984. Depués d’ella, algamaron la xestión directa d’un canal propiu de televisión pública -pasu fundamental pa contar con una tv autonómica- Galicia (1985), Andalucía (1988), la Comunidá Valenciana (1988), Madrid (1988), Canarias (1998), Castiella-La Mancha (2001) y esti mesmu añu les autonomíes de Baleares y Estremadura.

D’esti mou, el Principáu llega nel novenu llugar na carrera pola puesta en marcha de radiotelevisiones públiques de titularidá autonómica, y failo amás nun momentu de transición tecnolóxica p’hacia la televisión dixital. El Real Decretu aprobáu güei pol Executivu de Madrid, que respuende a la solicitú fecha pol Gobiernu autonómicu hai agora un añu, obliga a Asturies a emitir dende’l primer momentu simultáneamente n’analóxico y en dixital, yá que la primera de les técniques habrá desapaecer a curtiu plazu.

L’Executivu asturianu, beneficiáu na so intención d’echar a andar esti añu la tv autonómica pol reciente accesu’l PSOE al Gobiernu central, piensa en xunetu como’l mes más afayadizu pa nomar al conseyu d’alministración del futuru ente, pasu fundamental pal nacimientu real de la radiotelevisión pública asturiana.

Resume oficial de la midida na web del Gobiernu central

La Selmana Negra de Xixón intentará esclariar si los medios de comunicación manipularon o ayudaron a asoleyar la verdá nes hores que sucedieron a los atentaos del pasáu 11 de marzu en Madrid. El certame policiacu, que dedicará una de les sos actividaes centrales al 11-M, otorgará-y amás un llugar destacáu a l’actualidá sociolliteraria d’Arxentina ya incluyirá conciertos de Dixebra, Xuacu Amieva y Manta Ray.

Según avanzó güei el director del eventu, Paco Ignacio Taibo II, la próxima edición de la Selmana Negra entamará un alderique baxo’l títulu ‘Información y poder’ nel que varios espertos intentarán analizar el papel de los medios énte los atentaos islamistes de Madrid. Ente los ponentes tará l’escritor Pepe Rodríguez, qu’amás presentará’l llibru ‘Mentiras de Estado’, ellaboráu como repás ya interpretación de la manipulación informativa a partir de los ataques terroristes perpetraos en cuatro trenes de cercaníes n’estremaes estaciones madrilanes.

La situación social y lliteraria d’Arxentina tendrá tamién un llugar propiu nel certame de lliteratura policiaca de Xixón: Los arxentinos Guillermo Orsi, ganador del últimu premiu Umbriel de novela negra por ‘Sueños de perro’; Carlos Balmaceda, ganador del Memorial ‘Silverio Cañada’; y Raul Argemí, premiu ‘Luis Berenguer’, falarán de la situación nel so país, depués del cambiu de rumbu que supuso l’accesu al poder del presidente Néstor Kischner.

El programa de la Selmana Negra, que na so edición de 2004 desendolcaráse del 9 al 18 de xunetu nel so allugamientu habitual a la vera’l ríu Piles, inclúi amás un alderique sobro la guerra civil española nel que van intervenir ente otros Jorge Semprún, Pedro de Silva, Juan Antonio de Blas, Francisco Sevillano, y la documentalista Monse Armengou.

Nel llau musical, el certame reserva un llugar específicu pa la música fecha n’Asturies, que tará representada pol gaiteru Xuacu Amieva y los grupos Dixebra y Manta Ray.

El Gobiernu asturianu piensa nel mes de xunetu como fecha afayadiza pa constituir el conseyu d’alministración de la futura radiotelevisión pública autonómica, cuyes primeres emisiones tán previstes pa los últimos meses d’esti añu dende una sé provisional na Universidá Llaboral de Xixón. La elección y nomamientu de los conseyeros nel veranu abriría’l calendariu real del nacimientu del nuevu ente de comunicación, postergáu en varies ocasiones.

El camín llegal pa ello ta destorgáu dende’l pasáu 30 d’abril, fecha na que’l nuevu Gobiernu central presidíu pol socialista José Luis Rodríguez Zapatero retiró formalmente’l recursu que’l PP interpusiera énte’l Tribunal Constitucional pa frenar la creación de la radiotelevisión asturiana nos términos deseyaos por PSOE ya IX-BA.

Estes dos fuercies polítiques introduxeren na Llei d’acompañamientu de los presupuestos pa 2004 un testu concebíu ‘ad hoc’ pa poder constituir el conseyu d’alministración del futuru ente públicu ensin los conseyeros que-y correspuende nomar al PP, que refuga y bloquea el nacimientu de la tv pública asturiana al camentar que ye un proyectu caru y secundariu.

Agora, según fontes del propiu Gobiernu asturianu, los altos cargos encargaos d’idear les llinies mayestres del futuru ente amuesen la so predisposición a promover los trámites burocráticos pertinentes nel mes de xunetu, antes de les vacaciones parlamentaries d’agostu.

Asturnews cellebra el so primer mes de vida como diariu cultural asturianu con 275.000 accesos rexistraos a la so páxina web, mientres que les estadístiques cifren en 25.000 les visites recibíes dende la so salida a Internet, el pasáu 19 d’abril. Nes sos primeres cuatro selmanes, Asturnews suscitó l’interés de llectores de 30 países d’Europa, Asia y América.

La estadística que mide l’audiencia y difusión de páxines web estrema ente accesos -entraes a la páxina, lo qu’inclúi por exemplu la llectura de los titulares de portada- y visites, conceptu que define l’usu más o menos continuáu de la páxina por parte d’un llector o llectora que, darréu accede a la web, navega polos sos conteníos calcando nel desarrollu d’una noticia, na axenda de servicios o en cualquier otra sección.

Acordies con estes definiciones, Asturnews rexistró 275.000 accesos y 25.000 visites de llectores ente’l 19 d’abril y la medianueche del 19 de mayu.

Por países, el diariu cultural asturianu suscitó l’interés de llectores de 30 países d’Europa, América y Asia, ente ellos Israel, Finlandia, Canadá y estaos de fala castellana como Arxentina, México, Venezuela, Honduras y Colombia.

El cambiu de signu políticu del Gobiernu central cuaya nun relevu nel centru territorial de Televisión Española n’Asturies. L’hasta agora director de Radio Nacional d’España nel Principáu, el periodista llangreanu Pedro Alberto Marcos, sedrá’l nuevu director de TVE-Asturies, cargu del que quedará desaloxáu José Antonio Ovies, censuráu polos trabayadores del centru al acusalu de manipulación y falta de profesionalidá.

A lo llargo de la so trayectoria llaboral, Marcos -cuyu nomamientu foi confirmáu esta mañana según fontes de la redacción de TVE n’Asturies- caracterizóse por postures favoratibles al usu de la llingua asturiana na comunicación periodística.

Integrante de la Plataforma Periodistes pol Asturianu, el futurible director del centru territorial de Televisión Española n’Asturies, allugáu en San Esteban de les Cruces, desendolcó la so carrera profesional lligáu al mediu radiofónicu, primero en ‘Radio Juventud’ de Llangréu y más tarde en Radio Cadena na mesma llocalidá, hasta la integración d’esa entidá en Radio Nacional d’España.

Yá na cadena pública, Pedro Alberto Marcos foi xefe d’informativos y algamó la dirección de RNE n’Asturies n’avientu de 2000, en sustitución de Sara Fernández-Nespral.

Nel asientu qu’agora va ocupar el periodista llangreanu dexará de sentase el so actual inquilín, José Antonio Ovies, protagonista d’un reciente informe ellaboráu por gran parte de los trabayadores del centru territorial de TVE-Asturies nel que lu acusen de continues práctiques de manipulación en favor de los intereses polítiques del PP, de falta de procuru col productu informativu y d’una fonda desconocencia de la realidá asturiana.

El nuevu diseñu del diariu dixital arxentinu Clarín, la infografía y la información local foron tres de los cimeros protagonistes de los alderiques qu’a lo llargo de dos díes caltuvieron los alumnos de Periodismu de la Universidá del país Vascu (UPV-EHU) y profesionales del mundu del periodismu dixital, ente los que s’alcontraba’l direutor d’Asturnews, Próspero Morán.

Xunta elli participaron nel Seminariu alumnos y profesores de la UPV amás de los periodistes de Tele 5, Jesús García ya Ignacio Escolar, profesores universitarios, como Guillermo López o José Alonso, infografistes como Alberto Cairo, de “El Mundo”, el direutor del diariu Dixital del Bonaerense “Clarín”, Guillermo Culell, y otros nomaos especialistes en periodismu dixital como José Cervera, Darío Pescador, Javier Castañeda, Javier Candeira o el Director del Master en Periodismu Dixital del Institutu Universitariu de Postgráu (IUP) Paco Olivares.

El direutor del Clarín dixital presentó’l nuevu diseñu del diariu, que rompe pa colos formatos tradicionales y fai un importante apueste pola navegación intuitiva ya informativa, col desaniciu de la bçcolumna de davegación que davezu apaez a manzorga en toles publicaciones dixitales.

Grandes cadenes de televisión, de radio y de diarios tán protagonizando ún de los sos fracasos “más estrepitosos” al demostrar que los periodistes conviértense en “novelistes” al serviciu de les prises y l’entretenimientu, especialmente antes y durante de la guerra d’Iraq. Asina lo entiende Ignacio Ramonet, director de ‘Le Monde Diplomatique’ y cabezaleru antiglobalizador, que participa nel VII Salón del Llibru Iberoamericanu de Xixón.

El meyor exemplu d’esi fracasu, según Ramonet, constitúilu el silenciu mediáticu sobro les tortures practicaes n’Iraq por militares de les fuercies d’ocupación, hasta que fotos d’eses práctiques captaes por non periodistes saltaron a les portaes de tol mundu. Eso demuestra, sorrayó el director de ‘Le Monde Diplomatique’, que la prensa “nun vio nada nun añu” -n’alusión a los doce meses que pasaron dende la entrada de les tropes norteamericanes en Bagdad.

O dicho d’otru mou, les empreses miraron pa otru llau y nun quisieron publicar lo que realmente taba ocurriendo, síntoma de que los medios de comunicación, lloñe de ser una garantía democrática, son “un problema” pa la propia democracia y obliguen a los profesionales del periodismu a convertise en “novelistes” presionaos pa “mentir, entretener ya informar de forma rápida y barata”.

Tal panorama fai inda más urxente una rexeneración, qu’a xuiciu de Ramonet pasa por una ‘altermundialización’ con participación ciudadana capaz de da-y la vuelta a una tortiella planetaria na que 500 millones de persones occidentales viven con folgura mientres otros 5.500 millones subsisten en situación de necesidá, más de la mitá na miseria.

Nun almuerzu con periodistes cellebráu esta mañana nel marcu’l Salón Iberoamericanu, Ignacio Ramonet reivindicó el movimientu antiglobalizador como única corriente capaz de convocar manifestaciones “planetaries” -citó les cellebraes en tol mundu en febreru de 2003 contra la ocupación d’Iraq- y d’entamar verdaderes “asamblees de la Humanidá, non de los Gobiernos”, tales como’l Foru Social de Porto Alegre.

No concreto, Ramonet suxirió como primeres midíes pa propiciar el cambiu el desaniciu de los países fiscales, una moratoria del agua y, mui especialmente, la introducción de la llamada ‘tasa Tobin’ -un impuestu que llimita la movilidá de capitales y revierte nos ciudadanos- na inminente Constitución Europea. nesti puntu, el periodista d’orixen gallegu foi especialmente críticu, y demandó que la Carta Magna europea se someta a referéndum en tolos países a los qu’afecta, faciendo posible que los ciudadanos llean antes el testu pa que puean decidir el so votu.

Asturnews ye noticia na prensa editada en castellán y n’euskera. El diariu euskaldún ‘Berria’, sucesor d’Egunkaria’, asoleyó dedicó-y la so contraportada al nuevu diariu cultural asturianu, siguiendo un interés que yá amosara el periódicu de tirada estatal ‘El Mundo’ pocos díes depués de la salida d’Asturnews a la rede, el pasáu 19 d’abril.

Nun reportaxe publicáu el pasáu Primeru de Mayu, ‘Berria’ destacó l’actividá d’Asturnews como un proyectu llamáu a contribuyir a la normalización del usu periodísticu y de calidá de la llingua asturiana, mientres que la información de ‘El Mundo’ centrábase en sorrayar el propiu surdimientu del diariu cultural como arriquecimientu’l panorama de medios de comunicación.

El nacimientu d’Asturnews mereció tamién atención nes emisores Radio Nacional d’España y Radio Llangréu, y ocupa un llugar propiu nun especial publicitariu sobro cultura asturiana qu’espubliza a partir de mañana el diariu ‘La Nueva España’ na so versión dixital.

Reportaxe publicáu en ‘Berria’