Comunicación

El País Vascu adelántase a Asturies. L’ente áutonómicu de comunicación Euskadi Irrati Telebista (EITB) anunció güei que ta desendolcando una canal de noticias de 24 hores, asemeyada a les que xestionen TVE o CNN+ pero que namái va funcionar per Internet. El Gobiernu Vascu autorizó yá’l gastu correspondiente, que nun taba previstu nel contratu programa que vincula añalmente al Executivu con EITB y qu’acaba col calter pioneru del portal dixital informativu plantegáu pa la futura radiotelevisión pública asturiana.

N’europa nun hai munchos proyectos d’esta mena en fase de desendolcu y nos países llatinos destaca namái el portal propiu de 24 hores de la radiotelevisión pública italiana (RAI).

No que cinca al Estáu español, los plantegamientos que se faen dende’l proyectu d’Ente públicu de Radio y Televisión del Principáu alluguen como’l tercer pegollu de la futura empresa autonómica de comunicación un portal dixital dafechu estremáu de la Radio y la Televisión, magar que la so redacción vaiga trabayar en comuña pa estos otros medios de comunicación. Estos plantegamientos yeren pioneros y asitiaben el proyectu asturianu como’l más novedosu de los esistentes.

Agora, énte’l prollongáu retrasu n’apaición de la radiotelevisión asturiana, cuyes primeres emisiones regulares tán previstes pa la primavera de 2005, tornen a adelantase otres comunidaes que recueyen les bones idegues que s’ufierten dende Asturies pero que nun atopen namái que pilancos nel so desendolcu.

Como ya adelantare Asturnews el pasáu 15 de xunu, el Principáu fai los últimos retoques nos planos de la sé provisional dende la que la radiotelevisión autonómica empezará emitir en prebes, a partir de la seronda prósima, na Universidá Llaboral de Xixón. Les instalaciones, distribuyíes en dos plantes y con un plató de 200 metros cuadraos, tarán llistes en tornu a marzu del añu que vien y funcionarán como sé central del futuru ente públicu a lo menos hasta 2010.

Esa ye la previsión del director de l’Axencia pal Desarrollu de la Comunicación y Proyectos Culturales del Principáu, Jorge Fernández León, que plantega la futura plantiella de la radiotelevisión como un grupu d’unos 90 trabayadores ente los qu’habrá emplegaos d’alministración y publicidá, pero sobre too redactores capaces de manexar los tres soportes que va incluyir l’ente públicu: tv, radio ya internet.

El presidente d’Onda Cero, Javier González Ferrari, negocia con Menchu Álvarez del Valle la participación de la veterana llocutora asturiana na nueva programación de la emisora que na temporada que vien darréu quier superar la situación na que quedara depués de los caberos cambios que se produxeron nel mundu l’audiovisual y que ficieren salir de la emisora a munches de les sos estrelles radiofóniques.

La güela de Letizia Ortiz y pernomada locutora de Radio Oviedo y Radio Nacional d’España nes caberes décades del sieglu pasáu ta siendo afalagada polos directivos de la cadena Onda Cero pa que faiga dalguna collaboración na nueva programación de les emisores qu’agora son propiedá de Planeta.

Ferrari presentó na capital d’España la programación de la temporada d’Onda Cero y ente les novedaes de les que fizo anuncia alcontrábense les negociaciones cola güela de la Princesa d’Asturies que, sigún el propiu Ferrari, tienen posibilidaes de dir p’alantre, magar que les conversaciones s’alcuentren entá na estaya d’aniciu.

Menchu Álvarez del Valle ye anguaño periodista xubilada y trabayó en Radio Oviedo y Radio Nacional d’España ente los años 1947 y 1990, calteniéndose durante toos estos años como la voz señera de la emisora.

El Principáu fai los últimos retoques nos planos de la sé provisional dende la que la radiotelevisión autonómica empezará emitir na Universidá Llaboral de Xixón. Les instalaciones, distribuyíes en dos plantes y con un plató de 200 metros cuadraos, tarán llistes en tornu a marzu del añu que vien y funcionarán como sé central del futuru ente públicu a lo menos hasta 2010.

Esa ye la previsión del director de l’Axencia pal Desarrollu de la Comunicación y Proyectos Culturales del Principáu, Jorge Fernández León, que plantega la futura plantiella de la radiotelevisión como un grupu d’unos 90 trabayadores ente los qu’habrá emplegaos d’alministración y publicidá, pero sobre too redactores capaces de manexar los tres soportes que va incluyir l’ente públicu: tv, radio ya internet. “Eso nun significa que tol mundu lo faiga too a la vez”, precisa Fernández León, sinón que la mayor parte’l personal habrá tar preparada pa saltar d’un mediu a otru.

El departamentu de Comunicación del Executivu autonómicu ultima’l proyectu d’habilitación del vieyu conventu de la Universidá Llaboral como sé de la futura tv autonómica, que llanzará una señal en prebes a finales d’esti añu pero que nun podrá tener una programación estable hasta mediaos de 2005, depués que se nome al equipu xestor y s’esbille a la plantiella.

Darréu reciba’l documentu definitivu, dientro d’aprosimadamente un mes, el Conseyu de Gobiernu aprobará’l pliegu de condiciones pa convocar el concursu públicu de la obra, a partir d’un plantegamientu qu’estructura les futures instalaciones en dos plantes cola redacción, l’archivu, les oficines de producción y los controles nel primer pisu. Na planta baxa allugaránse un plató d’unos 200 metros cuadraos -que pol so altor ocupará tamién espacios de la primer planta- y dependencies destinaes a la recepción y les xeres alministratives.

Resueltes la convocatoria y la posterior alxudicación de les obres, la previsión ye que los trabayos pa reconvertir el conventu de la Llaboral como sé de la tv autonómica asturiana puean empezar na seronda y se prollonguen unos cinco meses, de mou que les instalaciones tean llistes pal empiezu de la primavera de 2005.

L’asturianu ha tener una presencia destacada nos programes infantiles de la radiotelevisión autonómica pa garantizar la pervivencia del idioma. Asina lo entiende’l director de l’Axencia pal Desarrollu de la Comunicación y Proyectos Culturales del Principáu, Jorge Fernández León, qu’apuesta pol usu de la llingua asturiana “en tou tipu d’emisiones” del futuru ente públicu y defende’l valor audiovisual del asturianu como “daqué positivo que puea consumise con gustu”.

En declaraciones a Asturnews, el responsable de Comunicación del Gobiernu autonómicu amosóse partidariu d’incorporar la llingua asturiana “con normalidá” na parrilla de programación de la futura televisión pública, qu’empezará a emitir una señal llocalizable a finales d’esti añu y tará en condiciones técniques de mantener una programación regular en tornu a xunu de 2005.

Neses emisiones, Fernández León sostién que l’asturianu tien qu’incorporase “con normalidá, intelixencia y calidá”, y el so usu ha facese habitual, ensin afitar un porcentaxe de salida, “en debates y programes informativos”.

Daqué d’especial relevancia, si se toma en cuenta que’l Gobiernu’l Principáu plantega que la producción propia de la futura radiotelevisión áutonómica debe centrase nos espacios informativos y escluir, por exemplu, los programes dramáticos -series, películes pensaes pa televisión- por una razón contundente: El coste d’esos espacios, asegura Fernández León, “ye inabordable”.

El Tribunal Constitucional destorgó’l llunes pasáu el tortuosu camín de la tv pública asturiana, al desestimar el recursu que presentara l’anterior Gobiernu central, presidíu por José María Aznar, contra’l cambiu llegal promulgáu pol Gobiernu asturianu pa superar el bloquéu’l PP, que vien negándose a nomar los sos representantes nel conseyu d’alministración del futuru ente públicu de comunicación.

Tolos pasos siguientes, poro, daránse n’Asturies, empezando pola constitución del conseyu nos meses finales de 2004 y la propuesta de director por parte’l Gobiernu, que yá manexa nomes “anque nin los propios candidatos lo saben”. Lo que sí tien claru l’Executivu autonómicu ye’l modelu de televisión que quier: Una tv “cuya única obsesión nun seya’l ‘prime-time’ y na que tolos asturianos alcuentren dalgo que-yos interese”, según la definición del responsable de Comunicación del Principáu.

Francisco Pañeda yá ye’l nuevu director de Radio Nacional d’España n’Asturies. El periodista xixonés, qu’hasta agora trabayaba na redacción del centru territorial de Televisión Española, allugáu en San Esteban de les Cruces, tomó güei posesión del so cargu al frente de la cadena pública nel Principáu.

Na so primer alocución como director de Radio Nacional n’Asturies, Pañeda amosó’l so envís de defender el pluralismu informativu y la prosimidá a los ciudadanos, ufriendo una información de calidá lo más amena posible. Toos esos estremos casen dafechu, según el nuevu responsable de RNE, col calter de serviciu públicu que tien la cadena radiofónica.

Francisco Pañeda formóse como periodista na redacción del diariu xixonés ‘El Comercio’, decanu de la prensa escrita asturiana, y pasó depués a desempeñar llabores de redactor en Radio Nacional d’España y nel centru territorial de TVE n’Asturies, qu’agora abandona pa regresar a la radio pública.

Asina, Pañeda fai el camín inversu al so antecesor nel cargu, Pedro Alberto Marcos, que’l pasáu 4 de xunu asumió la dirección de Televisión Española n’Asturies procedente de RNE.

La pelota de la radiotelevisión asturiana yá ta dafechu nel teyáu del Gobiernu autonómicu. El Tribunal Constitucional (TC) alcordó ayeri desestimar el recursu presentáu pol PP baxo l’anterior Executivu de José María Aznar y abre definitivamente la puerta al nacimientu’l futuru ente de comunicación públicu, que según les previsiones del Principáu empezará a emitir con regularidá a mediaos de 2005.

La decisión del Constitucional valtia l’últimu pilancu que-y quedaba por superar a la tv autonómica asturiana nel ámbitu estatal y echa per tierra les pretensiones del Partíu Popular, que decidiera denunciar la presunta inconstitucionalidá del cambiu llegal que PSOE ya IX-BA ‘colaren’ na Llei d’acompañamientu de los presupuestos pa permitir que’l conseyu d’alministración del futuru ente pudiera constituyise ensin los conseyeros que-y correspuende nomar al PP, decidíu a bloquear el proyectu nun faciendo esos nomamientos.

El cambiu de signu políticu del Gobiernu central, qu’agora preside’l socialista José Luis Rodríguez Zapatero, foi decisivu pa destorgar el camín de la tv autonómica asturiana: El pasáu 30 d’abril, l’Executivu pidió-y al Constitucional la retirada’l recursu presentáu pol anterior Gobiernu, y un mes depués cedió-y a Asturies la xestión de la tercer canal de televisión, pola que ta llamada a emitir la futura autonómica.

Magar de les facilidaes que lleguen dende Madrid, el director del departamentu de Comunicación del Principáu, Jorge Fernández León, estimó hai agora una selmana que la Xunta Xeneral yá nun nomará al conseyu d’alministración antes del veranu y poro habrá qu’esperar a la seronda pa dar el primer pasu decisivu na etapa final del nacimientu’l nuevu ente.

Según prevé’l responsable autonómicu de la estaya de Comunicación, la radiotelevisión pública asturiana emitirá en prebes a finales d’esti añu, pero nun tendrá una emisión regular hasta mediaos de 2005, darréu se remate’l procesu de nomamientu l’equipu directivu, s’esbille la plantiella de trabayadores y se determine’l modelu de xestión del futuru ente de comunicación.

L’usu abusivu d’estudiantes de Periodismu en práctiques pa facer el llabor d’un redactor de plantiella nun ye esclusivu de les comunidaes autónomes que cuenten con facultá propia. “Falemos d’Asturies”, exemplificó’l decanu de la Facultá de Xornalismo de Santiago de Compostela, Miguel Túñez, na apertura d’un congresu qu’afondó dende la capital gallega na vinculación entre precariedá llaboral y desinformación.

La facultá compostelana, que caltién alcuerdos con medios de comunicación implantaos n’Asturies pa la inclusión d’estudiantes en llabores de práctiques nos meses de veranu, ta acabante espublizar una encuesta ente los sos llicenciaos qu’asoleya un altu índiz de precariedá nel sector: Según los datos d’esi documentu, ún de cada diez periodistes trabaya ensin negún tipu de contratu, la mitá cobren un salariu brutu mensual inferior a 900 euros y los niveles de temporalidá son casi absolutos nel casu específicu de les televisiones.

Nesi contextu de falta de garantíes llaborales, les práctiques de veranu -de les que la Facultá de Xornalismo de Santiago xestiona 100 places en Galicia y Asturies- empeoren les condiciones, según Túñez, non por sigo mesmes, “sinón pol usu que les empreses faen d’elles”.

Nesti sen, los profesionales aconceyaos xunta’l decanu na I Xornada Profesional de la Federación de Sindicatos de Periodistes, que se cellebró’l sábadu pasáu en Compostela, fixeron un llamáu a llimitar les xornaes llaborales de los estudiantes, reforzar el so control tutorial cola creación d’un departamentu de siguimientu nes facultaes ya incluso bloquear les práctiques en ciertes empreses qu’acaben d’executar despidos y demanden estudiantes pa cubrir esos puestos vacantes a un preciu enforma más baratu.

Periodistes de Cataluña, Madrid, Baleares, La Rioja, Canarias y Portugal denunciaron en Galicia que “lo que más-yos preocupa a les empreses ye que sigamos viviendo na precariedá pa poder siguir manipulando la información” y definieron el pluralismu informativu como el trabayu con garantíes de dignidá y llibertá pa los profesionales, frente a quienes lu entienden como una mera abundancia d’empreses de comunicación.

Nel congresu cellebráu en Santiago, nel que quedó patente la precariedá na que faen el so llabor los periodistes n’empreses como Localia, onde según los sos propios emplegaos el sueldu mediu mensual ta perbaxo de los 600 euros, quedó constituyida una comisión xestora de la que saldrá un sindicatu de periodistes pal ámbitu de Galicia.

Web del Colexu de Xornalistas de Galicia

Recuperar el pluralismu democráticu cola collaboración de los trabayadores. Con esi envís declaráu, l’hasta agora director de Radio Nacional d’España n’Asturies, el periodista llangreanu Pedro Alberto Marcos, tomó esti mediudía posesión al frente’l centru territorial de Televisión Española, allugáu en San Esteban de les Cruces, en sustitución de José Antonio Ovies.

Marcos, que pidió “un marxe de confianza” a la plantiella’l centru que va dirixir, destacó nuna alocución pública el so respetu pol pluralismu informativu, daqué que’l delegáu del Gobiernu n’Asturies, Antonio Trevín, presente na toma de posesión, enunció con otres pallabres: “Hai qu’abrir les ventanes pa que tolos aires puean circular per esta casa”, señaló.

Nesi sen, Trevín aseguró que’l centru territorial de TVE n’Asturies “nun pue ser namás el centru d’Uviéu, Xixón y Avilés”, y alitó al nueu director a lliderar una nueva etapa na que la televisión pública seya “más de la sociedá que del Gobiernu”.

Suscribió esi estremu el director de l’Axencia pal Desarrollu de la Comunicación del Principáu, Jorge Fernández León, que destacó’l papel de los medios de titularidá pública como entidaes obligaes a “refrescar partes qu’otros nun refresquen y dir onde otros nun van”. Pa facer posible esa concepción de los medios públicos como serviciu y non como negociu, el responsable de Comunicación del Gobiernu ásturianu ya ideólogu de la futura radiotelevisión autonómica propuso la firma d’alcuerdos con TVE pa desendolcar producción de conteníos y da-y con ello “más oportunidaes” al sector audiovisual asturianu.

Pol so llau, Manuel Lombao, director de la Estaya de Centros Territoriales de Televisión Española, eloxó la función informativa de les delegaciones de TVE como “imposible d’asumir por otros” y reclamó-y al Gobiernu autonómicu sofitu institucional pa poder ampliar la presencia, l’esfuerzu y los medios de Televisión Española n’Asturies.

Magar d’ello, l’altu cargu de TVE sorrayó’l papel esencial de los trabayadores del centru p’afitar la dignidá, la profesionalidá y la pluralidá informatives, yá que, aseguró, “esi camín nun lu recuerren nin parlamentarios, nin sabios”, n’alusión al comité d’espertos recientemente nomáu pol Gobiernu central p’ameyorar los conteníos de les emisiones de TVE.

La prensa asturiana yá tien hestoria. Un llibru ellaboráu por doce investigadores de la Universidá d’Uviéu y editáu en comuña cola Asociación de la Prensa, debuxa la evolución del periodismu asturianu dende la so apaición como tal, a primeros del sieglu XIX, hasta la Primer Guerra Mundial. Dambes entidaes preparen yá un segundu volume que-y dará continuidá cronolóxica a la investigación yá asoleyada.

La prensa d’Asturies nun contaba con un estudiu monográficu estensu qu’analizare la so hestoria, sacante dalgunes incursiones puntuales y una aprosimación asoleyada en 1976 por Manuel Fernández Avello cola casa editorial Ayalga, polo que’l profesor de la Universidá d’Uviéu Jorge Uría, cordinador de la nueva obra, sorrayó la importancia de la investigación acabante espublizar pol so calter pioneru.

Daqué con especial importancia nun llugar -Asturies- que nun cuenta con estudios superiores de Periodismu nin tampocu con un colexu profesional del gremiu, pero que dende hai dos sieglos amuesa una destacada vitalidá nos procesos de comunicación periodística. Exemplu d’ello foi’l diariu ‘El Noroeste’, vinculáu al director Antonio Oliveros, qu’al rodiu de 1914 tiraba unos 10.000 exemplares diarios.

‘Historia de la prensa en Asturias. Nace el cuarto poder’ respuende a la investigación d’una docena d’espertos n’estremaos archivos y hemeroteques, a la gueta d’un análisis de la vinculación ente los hechos hestóricos de cada dómina y el so reflexu nel papel de les páxines de los periódicos del momentu.

El direutor d’Asturnews plantegaba en Murcia la necesidá de dexar de llau el conceutu de periodista multimedia y afitase na definición fonda de lo que vraeramente tien de ser el perfil del periodista dixital, camín de lo que nomó el “metaperiodista”, un periodista dixital que ye conocedor fondu del periodismu como profesión nes sos estremaes facetes, asina como de referencies humanístiques fundamentales pa poder comunicar a la sociedá, y perconocedor de les tecnoloxíes que permiten costruir la información multimedia”.

El Catedráticu asturianu de Tecnoloxía de la Información de la Facultá de Ciencies de la Comunicación de Málaga, Bernardo Díaz-Nosty, foi l’encargáu d’entamar les Xornaes sobre Tendencies del Periodismu Dixital que se cellebren nel Salón d’Actos de la Cámara de Comerciu de Murcia, dientro les Xornaes SICARM , coles que la Consejería de Economía, Industria e Innovación quier averar la Sociedá de la Información a la rexón murciana, a lo llargo d’una selmana con demostraciones teunolóxiques pa los ciudadanos y Xornaes especializaes como la enfotada nel periodismu dixital.

La propuesta de Morán facíase al abellugu de les Xornaes de Periodismu Dixital que se cellebren entamaes pola Consejería de Economía murciana en collaboración cola Asociación de la Prensa. El direutor d’Asturnews, qu’aprovechaba pa presentar la esperiencia d’esti mediu en Murcia, participaba como Direutor del Cursu d’Espertu en Periodismu Dixital de la Universidá d’Uviéu faciendo de ponente na mesa titulada “El periodista digital: perfil de un nuevo comunicador”, na que participaben tamién Rafael Carrasco Polaino, coordinador del Área informática aplicada a la Comunicación del Centro Universitario Villanueva; Pedro Manuel Moreno, Vicesecretariu de Comunicación de la UNESCO; Silvia Llombart Monner, Directora de Lamalla.net; y Juan Antonio de Heras, Vicepresidente de l’Asociación de la Prensa de Murcia como moderador.

Leonarda García, Profesora de Tecnoloxía de la Rafael de la Universidá Católica de Murcia, dixera na primer riestra de ponencies, falando de la formación universitaria del periodista dixital, que “periodistas digitales seremos todos o no seremos periodistas” y Próspero Morán retrucó-y plantegando la imposibilidá de que toos aportemos a una especialización como periodistes on-line cuando ye dafechamente imposible qu’eso ocurra, “como tampoco sucedió con la llegada de la radio o la televisión, no todos se convirtieron en periodistas radiofónicos ni audiovisuales”.

Apertura de Nosty

Bernardo Díaz-Nosty, ún de los más nomaos especialistes na comunicación del sieglu XXI faló sobro “el déficit mediático en España” averándo a los presentes a una murnia realidá, la del nuesu Estáu, que depués matizaríen dellos otros especialistes.

La converxencia con europa na formación del periodista dixital foi la primer de les meses de ponencies que se presentaben en Murcia cuntando cola participación d’especialistes universitarios como Pedro Antonio Rojo,profesor de Tecnología de la Información de la Universidá de Murcia, Pedro García-Alonso, Direutor de Posgrado de la Universidá Complutense de Madrid, Leonarda García, profesora de Tecnología de la Información de la Universidá de Murcia, y María José Cantalapiedra, profesora de “Periodismo Electrónico Multimedia” de la Universidá del País Vascu.

La profesora Cantalapiedra empobinó la so intervención a entrugase retóricamente “¿cómo se consiguen buenos profesores enla Universidad?”, plantegando qu’ensin bona formación yera dafechamente posible llograr bonos profesionales. Sigún la profesora vasca, “hace falta invertir y exigir al profesor universitario, pero para eso hay que ofrecerles contraprestaciones económicas dignas. Y esto lo digo con sentido del humor, porque si me falta el sentido del huor acabaré tirándome a la ría (de Bilbao)”.

Nuna intervención enllena de referencies humorístiques, la profesora de la UPV dexó bien nidio cuálu yera’l problema cimeru de la enseñanza’l periodismu na Universidá: “No se como piensan converger con Europa, porque si no te pagan al final va a aquerer trabajr en la Universidad sólo el más torpe o el más vocacional”

Pela so parte, Leonarda García faló del perfil d’alumnu con formación instrumental y dixo que yera pernecesaria, pero tamién una formación de base, porque’l periodista nun pue ser un espertu informáticu, ye más importante la formación cultural d’esti periodista que tien de tar formáu cultural y teunolóxicamente, pero tamién nos saberes tradicionales. Sigún la profesora de la Universidá Católica de Murcia continúa siendo más importante los valores culturales, la veracidá, la credibilidá

Los conteníos dixitales y el futuru del periodismu dixital son les materies alrodiu de les que se montaba l’alderique pela tarde nestes Xornaes de Periodismu Dixital coles que Murcia quier aportar la so reflesión a los debates que se tan faciendo en toa España alrodiu de les nueves formes de facer periodismu.

Datos sobro les Xornaes en SICARM