Comunicación

Nun tien igua. El PSOE ta enfotáu na ruptura del gobiernu sigún amuesa l’acusación ayeri d’Ana Rosa Migoya d’inxerencia pela parte de Valledor por criticar la xestión d’Ornia na convocatoria de prebes de selección del personal. La entruga ye ¿cómo nun va poer criticar un miembru del gobiernu la xestión d’un muérganu independiente al que-y paga’l presupuestu? La rempuesta podría dase esta mañana nel Conseyu de Gobiernu adelantáu col qu’entamente les vacaciones polítiques.

Ana Rosa Migoya acusó ayeri al so compañeru Valledor “d’Inxerencia intolerable” nel Ente Público de Comunicación por sofitar les crítiques d’IX-BA al procesu de selección de personal pala televisión autonómica que, sigún afitó Migoya, causaren “un fondu malestar” nel internu del executivu asturianu. El PSOE tamién censuró ayeri, sigún recueyen güei tolos medios impresos asturianos que Valledor y la coalición a la que pertenez “quieren mediatiza” un proceso” de selección “que tá rexíu polos principios de méritos, igualdad y capacidá”, sigún afirmó Migoya, que defendió la figura del presidente del Ente de Comunicación, José Ramón Pérez Ornia, porque siempre actuó con “independencia y obxetividad”. El problema ye que les crítiques d’IX-BA xurden de los compromisos públicos que fizo’l propiu Ornia nel Paralamentu, na prensa y na xunta de l’Asociación de la Prensa na qu’informó de la convocatoria de les prebes de selección. Nella dixo que la so intención yera que l’asturianu puntuara talamente igual que cualaquier otru idioma estranxeru, pero a lo postrero, sigún fontes de la coalición “l’ingles (y nes places nes que parez que los candidatos afayadizos nun saben inglés el francés tamién val) tien una prueba subxetiva (casualmente) y non obxetiva, una entrevista sin temariu y una preba escrita que nun se sabe si va esistir o non, colo que non se pue preparar”.

El temariu, sigún critica IX-BA, ye confusu y poco nidiu, porque nun matiza nin bibliografía pa preparalu nin nada asemeyao, colo que queda al albor del tribunal lo que se vaya entrugar, lo que supón una indefensión imposible d’aceptar nuna convocatoria pública. El fechu amás de que la preba d’idiomes seya obligatoria ya eliminatoria ye un casu únicu, ya que nes úniques places nes que se piden prebes d’idiomes son obligatories, pero non eliminatories.

¿La TV pertenez al gobiernu?

No fondero de la polémica alcuéntrase tamién la visión del pautu de gobiernu y de la dependencia de la TV d’esi gobiernu que se tien dende les files socialistes. Per un llau, la falta d’esperiencia de cogobiernu fai que se plantée ‘gobiernu pueda cesar a Valledor o a Rafa Palacios peles sos crítiques, cuando quien noma rialmente a los conseyeros d’IX-BA ye la propia coalición, como nun podía ser d’otramiente. Y per otru lláu, les declaraciones d’estos díes sobro la pertenencia de la TV al executivu ponen en dubies la so independencia, anque esti día ya entamra a falase d’Ornia non como fizo la selmana pasada Fernando Lastra (como un miembru más del executivu d’Areces) sinon como un “proyeutu” del executivu. No fondero alcuéntrase la posibilidá espuesta a lo llargo de munchu tiempu por medios como La Nueva España de que la TV asturiana seya una “Teletini” controlada pol presidente del gobiernu. Daqué que los miembros socialistes del Gobiernu tan afitando coles sos declaraciones de que naide nun pue criticar a un xestor contratáu pa un muérganu en teoría independiente.

Dende la xunta del Conseyu de Gobiernu de güei, la tema va camín de convertise na serpiente informativa d’esti branu n’Asturies.

IX-BA desixe que Ornia rectifique

El conseyeru d’Economía Javier Rabanal refugó ayer les crítiques vertíes contra’l presidente del Ente Públicu de Comunicación, José Ramón Pérez Ornia por IX-BA y sofitaes pol conseyeru de Xusticia y Esteriores, Francisco Javier García Valledor. Rabanal pidió-y a Valledor “más prudencia” y defendió la marxinación del asturianu nes prebes de selección del Ente asegurando que se trataba de “la práctica establecida pol mercáu y el funcionamientu de la sociedá”.

El conseyeru d’Economía afirmó tamién que tocante “a cuestiones identitaries caún tien la so propia opinión”, aludiendo a les crítiques llanzaes dende IX-BA énte la convocatoria de les bases pa selección de personal de la radiotelevisión autonómica.

Al empar la conseyera de Cultura y de Comunicación Social, Ana Rosa Migoya, sumóse a los reproches a Valledor, al que-y afeó “que a pesar de les advertencies siga criticando proyectos del gobiernu”. Tocante al conteníu de les crítiques del so compañeru de gobiernu y d’Izquierda Xunida-Bloque, Migoya dixo que tres les crítiques de la coalición d’izquierdes “hai un intentu de mediatizar” un procesu de selección que calificó de rexíu polos criterios de “igualdá, méritu y capacidá”.

Pel so llau l’Asociación de la Prensa d’Uviéu, per voz del so presidente José Antonio Bron, salió en defensa del responsable del Ente autonómicu, José Ramón Pérez Ornia y acusó a IX-BA de que “dalgunos sectores políticos más desuníos qu’uníos fomenten l’intrusismu col únicu oxetivu de “colar” la so cuota política nes redacciones de los medios de comunicación». Ye la segunda vez na que l’asociación colexada presidida por Bron sal en defensa d’Ornia. N’anterior ocasión el motivu foi la reunión privada que’l másimu responable de la radiotelevisión autonómica caltuvo con miembros de l’Asociación de la Prensa d’Uviéu a los qu’informó del procesu de selección de personal pal ente públicu enantes de facelo nel Conseyu d’Administración y nel parlamentu asturianu.

La organización nacionalista Izquierda Asturiana (IAS) súmase a les crítiques que ta recibiendo la convocatoria de selección de personal del Ente Públicu de Comunicación del Principáu pola esclusión de la llingua asturiana ente los conocimientos requeríos nel temariu de les prebes.

El secretariu xeneral d’IAS, Inaciu Llope, calificó esta esclusión del asturianu escontra la obligatoriedá de conocer l’inglés o el francés de “despropósitu” y pidió la paralización de la puesta en funcionamientu de la Radiotelevisión Pública Asturiana y el camudamientu de la lexislación p’afayala a la realidá asturiana y a criterios de xestión “tresparentes y democráticos”.

Llope afirmó que “el despropósitu al que tamos asistiendo nesti momentu taba cantáu y ye la guinda d’un pastel que llevamos denunciando dende qu’escomenzó el procesu de creación d’una televisión que nun se va a rexir de forma democrática y que nun sirve a los intereses xenerales de la ciudadanía d’Asturies sinón al poder políticu actual y a la so concepción aldeana -teñida de cosmopolitismu de caleya- de la realidá de país”.

Pa la organización nacionalista nes prebes de selección de personal “el conocimientu del asturianu ha ser un requisitu para poder acceder a determinaos puestos, al igual que lo ye l’inglés” ya que, a xuciu d’IAS: “mal se va a poder promocionar, utilizar y normalizar l’idioma, como obliga la lexislación vixente n’Asturies, si los profesionales que tienen utilizalo nun lo dominen”.

Izquierda Asturiana truña contra’l modelu escoyíu pa poner en marcha l’Ente de Comunicación al que calfiica de “obsoletu, con un déficit democráticu evidente, con un Conseyu d’ Comunicación ensin nengún tipu de capacidá reguladora y un Conseyu d’Administración nel que se coloquen comisarios políticos qu’obedecen a la voz del so amu” y caltién que d’esi modelu “deriven los problemes de falta de tresparencia na xestión, de prieses inxustificables na puesta en marcha y de criterios que van contra el sentíu común, la promoción de la nuestra cultura, y la propia lexislación vixente”.

IAS pide, per voz del so secretariu xeneral, Inaciu Llope qu’énte la situación creada pola puesta en marcha del Ente que “se paralice el procesu de creación, se modifique la llei de creación del ente públicu para adaptala a los modelos de xestión democrática y tresparente que escomiencen a implantase en toa Europa, pa facer esplicita la condición del asturianu como llingua vehicular, pa dar más poder de maniobra al Conseyu de Comunicación y pa fixar la elección de director pola Xunta Xeneral”.

El conseyeru de Xusticia y Esteriores del Principáu Francisco Javier García Valledor sumóse ayer a les crítiques feches por Izquierda Xunida-Bloque por Asturies a la xestión desenvuelta pol presidente del Conseyu d’Administración del Ente Públicu de Comunicación, José Ramón Pérez Ornia y concretamente a la manera de poner en marcha la empresa y a les bases de la convocatoria de selección de personal pa la radiotelevisión autonómica.

Les crítiques del conseyeru lleguen después que’l pasáu viernes la so compañera de coalición, la diputada Noemí Martín y el portavoz nacional del Bloque por Asturies y director de l’Axencia de Cooperación, Rafael Palacios, dieran una rueda de prensa pa espresar el refugue d’IX-BA a la convocatoria de selección de personal, sobremanera pola precipitación de les prebes y la nula valoración del conocimientu de la llingua asturiana nel temariu.

Con un escuetu “sí, claro, como nun podía ser d’otra manera”, García Valledor contestó a los informadores cuando-y preguntaron si compartía les crítiques a Ornia y darréu afirmó que “l’enfotu puestu por IX-BA nel presidente del Conseyu d’Adminsitración del Ente ta quebráu”. El conseyeru declaró que pela so parte Pérez Ornia “ya nun tien el mio aval”.

Darréu de Rafael Palacios, García Valledor ye’l segundu miembru del Gobiernu y el primeru del so rangu, en desmarcase de la xestión desenvuelta por Ornia y en manifestar que nun cuenta col enfotu del so grupu políticu. Recientemente la FSA retrucó les crítiques d’IX-BA calificando a la coalición de “contradictoria” y dio-y un toque d’atención a Valledor pa que se reservare d’espresar públicamente crítiques a la xestión del gobiernu del que forma parte.

Izquierda Xunida-Bloque por Asturies escenificaron esti vienres lo que paez una ruptura inevitable. La coalición nun se siente responsable “y desmárcase” del procesu de puesta en marcha del Ente Públicu de Comunicación Social. Atalanta que la convocatoria de places ensin temari nidiu y enllena d’arbitrariedaes ye “ablucante”.

Nuna rueda de prensa convocada pa les 13:15 hores na Xunta Xeneral del Principáu lo ablucante yera pa entamar la nun comparecencia de periodistes de los tres periódicos impresos asturianos, qu’enxamás faltaren hasta agora (y muncho menos el mesmu día y na mesma convocatoria) a denguna comparecencia alrodiu de la futura televisión autonómica. L’ausencia d’una representación informativa de Vocento, Zeta y Prensa Española facía albidrar daqué y lo que diben a dicir Noemí Martín, diputada d’Izquierda Xunida, y Rafael Palacios, Direutor Xeneral de Cooperación y voceru del Bloque por Asturies afitábalo: “lo qu’asocede cola puesta en marcha del Ente Públicu de Comunicación ye ablucante y la coalición nun se siente responsable”.

Darréu d’ello, “tenemos de pidir al direutor xeneral que seya consecuente colo que comprometió na Xunta Xeneral y desixir que se corrixan cuatro aspectos mui importantes”.

Les estayes tienen de ver mayoritariamente cola recién convocatoria d’emplegu publicu espublizada esta selmana y centrense na necesidá d’una “mayor concreción y claridad de los temarios, un tiempu pa preparar los esámenes razonable y non menos d’un mes dende conocer les llistes d’almitíos” y otros dos puntos relacionaos col asturianu y cola “xestión racional” d’un serviciu públicu:”cumplir cola llei d’usu del asturianu y los principios y criterios de programación plantegaos nel Conseyu d’Alministración” y “que s’entame a emitir cuando se puea garantizar el funcionamientu y non cuando tenga caprichu’l presidente a costa de subcontratar trabayos a empreses privaes”.

Sigún Noemí Martín, “l’obxetivu de IX-BA nun ye destruir l’Ente, sino evitar un modelu estremáu del que se pactó nel Conseyu Alministración, nel Gobiernu y del que fal´´o’l propiu Direutor Xeneral”. Peréz Ornia prometió na Xunta Xeneral que se cumpliríen les lleis no que cinca a la llingua asturiana y qu’elli yera favoratible a promover l’usu de la llingua, “pero nun ta cumpliendo cola so pallabra nin colos criterios y principios de programación aprebaos nel Conseyu d’Alministración onde se diz que “el Ente Públicu de Comunicación, velará por un uso correcto, ajustado a los respectivos coinés, no sexista, claro y excelso, de la Llingua Asturiana y del Castellano como lenguas que conforman la realidad sociolongüística del Principado y que serán de uso en el ENTE PÚBLICO DE COMUNICACIÓN, a través de sus distintos medios“. Pero según Noemí Martín, la única llingua que sigún la convocatoria paez que va usase amás del castellán ye l’inglés (y el francés en delles places mui concretes).

Noemí Martín fizo alcordanza de que’l direutor del Ente dixo na Xunta que’l proyeutu afitábase “nel so calter públicu, plural, profesional, asturianu y lo menos onerosu económicamente que fora posible”. Y sobro’l calter públicu afitó que “mal entamen les coses si la emisión inaugural va encargáse-y a una empresa privada”.

Sobro la supuesta profesionalidá del proyeutu Martín dizo que “los profesionales que quieren presentáse a les prebes nun entienden les bases nin el temariu de la convocatoria, como nos dicen munchos profesionales que tan llamando a Izquierda Xunida pa que-yos despliquemos qué se pide nos temarios”. Como exemplu de “l’ambigüedá y falta de concreción” la diputada de IX-BA punxo como exemplu el tema referíu a la Xunta Xeneral onde se vien a entrugar “quién ye quién nel Parlamentu y non por el reglamentu o funcionamientu internu de la Xunta”. Sigún Noemí Martín, hasta ella misma duldaría si se entruga polos diputaos o polos bedeles o cualaquier otru coleutivu profesional de los que trabayen na institución.

Públícase nel BOPA la primer convocatoria de selección de personal pal Ente de Comunicación

La páxina web del Ente Públicu de Comunicación del Principáu d’Asturies “(www.rtpa.net) yá s’alcuentra operativa dende esti miércoles 27 de xunetu con 5 apartaos: quiénes somos, ónde tamos, convocatoria d’emplegu, gabinete prensa y e-mail.

La páxina entamaba a funcionar xustamente na xornada na que s’asoleyaben nel BOPA les primeres convocatories de places: Dos puestos de Técnicu Superior y cinco de Técnicu Mediu en Xestión, y trece de Técnicu Superior d’Antena y Conteníos, nes que la única valoración tocante al idioma asturianu ye un tema nomáu “característiques sociolingüístiques d’Asturies” nel programa d’Antena y Conteníos.

La direición d’internet onde los responsables del Ente Públicu de Comunicación anunciaren el llunes que se conocería la convocatoria de pruebes entá siguía inactiva un día depués, abellugada nel parque de dominios de la empresa arsys.es. A lo llargo de tola mañana del martes, la imaxen que presentaba la futura páxina web de la Radio Televisión del Principáu d’Asturies (RTPA) yera la que presenta por defectu la empresa d’allugamientu web de Logroño Arsys. Y espardíu l’escaezu y/o fallu téunicu por esta noticia d’Asturnews, al meudía esa páxina yera redireccionada p’hacia una diseñada col estilu de la web del Principáu, Princast, na que namái se podía ver una cabecera xeneérica y la páxina “http://www.rtpa.net/resto.htm” maquetada con dos “frames” como s’emplega davezu nesta web institucional pa los conteníos que tan camudándose o les secciones en construcción.

La situación ye una amuesa de les prises coles que se ta desendolcando’l procesu de creación de los medios públicos del Principáu nun procesu nel que’l Presidente del Principáu s’enfotara n’algamar la primer emisión de la TV autonómica pal Día d’Asturies 2005. A lo llargo del miércoles una páxina cenciella con información fundamentalmente sobre la convocatoria de places del Ente puo visitase ensin dengún problema.

La páxina web de la TV del Principáu entá nun funciona

Per otru llau la nueva empresa pública de Radio y Televisión va pasar a nomase Asturies 6 pa evitar la coincidencia del nome hasta entós camentáu: Asturies 4 o Televisión 4 con una canal de Sogecable de nome asemeyáu.

Los preparativos pa les primeres emisiones del Ente Públicu con motivu del Día d’Asturies tán ya en marcha y la publicidá va tar xestionada poles empreses Bitácora, Gigia y IMpact5.

El Boletín Oficial del Principáu d’Asturies (BOPA) publica esti miércoles 27 de xunetu la convocatoria de les primeres places pal Ente Públicu de Comunicación. Dos puestos de Técnicu Superior y cinco de Técnicu Mediu en Xestión, y trece de Técnicu Superior d’Antena y Conteníos igüen esta convocatoria. Nella la única valoración tocante al idioma asturianu ye un tema nomáu “característiques sociolingüístiques d’Asturies” nel programa d’Antena y Conteníos.

Talo anunciara esti llunes 25 l’Ente de Comunicación del Principáu el BOPA publica con fecha de 27 de xunetu la primer convocatoria pa la provisión de places a cubrir pa la empresa. Na edición de mañana habrán apaecer el restu de les places, ente elles les de redactor multimedia y les de técnicos de mantenimientu, esplotación y realización.

Nos temarios pa les places convocaes güei el conocimientu de la llingua asturiana nun cuenta per dayures como méritu y la única referencia a que la nuestra comunidá tien una realidá idiomática propia ye’l tema tituláu “características sociolingüísticas de Asturias” del programa pa Técnicos Superiores d’Antena y Conteníos.

Convocatoria BOPA

La direición d’internet onde los responsables del Ente Públicu de Comunicación anunciaren ayeri llunes que se conocerá la convocatoria de pruebes entá sigue inactiva, abellugada nel parque de dominios de la empresa arsys.es. A lo llargo de tola mañana, la imaxen que presentaba la futura páxina web de la Radio Televisión del Principáu d’Asturies (RTPA) yera la que presenta por defectu la empresa d’allugamientu web de Logroño Arsys. Y espardíu l’escaezu y/o fallu téunicu por esta noticia d’Asturnews, al meudía esa páxina yera redireccionada p’hacia una diseñada col estilu de la web del Principáu, Princast, na que namái se podía ver una cabecera xeneérica y la páxina “http://www.rtpa.net/resto.htm” maquetada con dos “frames” como s’emplega davezu nesta web institucional pa los conteníos que tan camudándose o les secciones en construcción. La situación ye una amuesa de les prises coles que se ta desendolcando’l procesu de creación de los medios públicos del Principáu nun procesu nel que’l Presidente del Principáu s’enfotara n’algamar la primer emisión de la TV autonómica pal Día d’Asturies 2005.

Esti llunes facíase l’anuncia de les prebes de selección pa cubrir les ochenta y cuatro puestos de trabayu de la plantiella de la nueva empresa y comunicábase que’l miércoles 27 o xueves 28 espublizaríase la convocatoria y fadríase anuncia d’ella nes direiciones d’internet www.princast.es y www.rtpa.net, pero esta cabera, que paez sedrá la direición principal del Ente Público n’Internet apaez dafechamente inoperativa a les 10 dela mañana d’esti martes 26 de xunetu.

Los exámenes van escomenzar a partir del prósimu 15 de setiembre y de les 84 places a cubrir, 39 pertenecen a la estaya técnica, 25 a la estaya de redacción multimedia, 13 pa la estaya d’antena y conteníos, 6 pa la estaya de xestiòn y recursos humanos y una pa relaciones corporatives.

L’Ente Públicu de Comunicación convoca oficialmente les prebes de selección del personal

Cosmopolitan TV y Canal Cocina son les nueves ufiertes temátiques que se pueden sintonizar na parriella televisiva de Telecable a partir del prósimu 1 de agostu. La operadora asturiana incorpora asina a la so ufierta la primer canal de pagu dirixía específicamente a un públicu femenín y otra canal especializada en gastronomía. La canal Cosmopolitan TV inclúi una programación de 24 hores sobre moda, belleza y actualidá, amás de películes y series d’estrenu y en Canal Cocina, van poder referenciase los productos gastronómicos de tol estáu, amás de la presencia de los maestros cocineros, ensin escaecer les novedaes de la cocina internacional.

Les nueves canales van poder vese nes posiciones 26 (Cosmopolitan) y 27 (Canal Cocina) del descodificador. Los clientes de TeleCable que nun dispongan de descodificador, van tener d’entamar una busca nel so televisor hasta que apaeza la señal.

La empresa TeleCable peslló l’añu 2004 con dalgo más de 80.000 servicios de televisión, lo que significó un aumentu del 16 por cientu. L’últimu barómetru de telecomunicaciones fechu pola empresa señala que ún de cada cuatro llares asturianos cuenta col serviciu de televisión por cable, porcentaxe que llega al 44,3% nel casu de la zona central.