Cine

El Teatru Filarmónica foi escenariu’l martes, a les 20 hores, del estrenu del documental “Los últimos dragones d’Uviéu”, sobre les sacaveres d’Uviéu, poblaciones d’estos anfibios que lleven aisllaes dende la fundación de la ciudá, nel Sieglu VIII. El documental foi presentáu pol conceyal de Cultura, Roberto Sánchez Ramos; la cronista oficial d’Uviéu, Carmen Ruiz Tilve, Jorge Chachero y David Álvarez los encargaos d’esta producción.

L’abrazu de la culiebra, de Ciro Guerra, y Ixcanul, de Jayro Bustamante, llograron ocho candidatures na III edición de los Premios Platino, per delantre d’El club, de Pablo Larraín, y La cla, de Pablo Traperu, con seis nominaciones, y Truman, de Cesc Gai, con cinco.

El director estadounidense Robert Zemeckis va mover la selmana qiue vien al equipu de Allied, la so nueva película, dende Gran Canaria a Fuerteventura pa rodar nella escenes de sable y desiertu na ficción que protagonicen Brad Pitt y Marion Cotillard.

L’estudiu Warner Bros prepara una película sobre la figura de la villana Harley Quinn, un papel que va interpretar l’actriz Margot Robbie. La célebre enemiga de Batman yá va participar n’Escuadrón Suicida, película sobre los grandes villanos de DC Comics que se va estrenar n’agostu.

Santiago Segura foi reconocíu esti día cola Medaya d’Oru de l’Academia de Cine 2016 “pol so llabor como actor, director, productor y guionista; cuatro oficio colos que contribuyó a ameyorar el cine español nos sos aspeutos industrial y artístico”.

Les 17 cintes finalistes de les secciones Oficial y Asturies del ‘Avilés Acción Film Festival’ van repartir premios por importe total de 6.500 euros.

La Policía Nacional detuvo recién al alministrador d’una páxina web de descargues audiovisuales “pirates” en llingua castellana qu’ufiertaba miles de títulos frayando los derechos de los sos titulares y clausuró el portal. El dominiu foi creáu nel añu 2012 despintando la identificación de los sos titulares.

Gonzali Producciones, empresa dedicada a la realización de cine, televisión, doblaxe y comerciales, vieno acabante de convocar un casting p’actores y actrices, con edá a partir de 18 años, pa protagonista y secundarios en proyeutos televisivos y cinematográficos (trabayu remuneráu) y pal bancu de datos de la productora.

El grupu qatarí beIN anunció la selmana pasada l’alquisición de los estudios de televiisión y de cine Miramax, que rodaron películes tan conocíes como Pulp Fiction, Nun ye país pa vieyos o Chicago. BeIN, propietariu d’una rede de canales deportives y de cine en 24 países d’Oriente Próximu, el norte d’África, Europa, ente otros países, n’España, y Estaos Xuníos, dexó claro que Miramax va siguir operando como estudiu independiente tres la operación corporativa y nun fixo públicu’l montante qu’abonó pola compañía con see en Santo Mónica (California, EE UU).

El mundu máxicu de Harry Potter torna a la gran pantalla con Animales fantásticos y ónde atopalos. Esta nueva entrega va ser l’entamu d’una saga que va cuntar con otros dos películes, según aseguró J. K. Rowling.