Cine

Un certame añal de cine fechu nel oriente d’Asturies o dirixíu por directores de la comarca. L’Ayuntamientu de Ribedeva plantégase da-y continuidá nesos términos a l’amuesa cinematográfica que tien en marcha esta selmana y que quier afitar a partir de 2005 cola incorporación de llargumetraxes y l’apertura del certame al vecín occidente de Cantabria.

Asina lo espresa el responsable de la Casa Cultura de Colombres, Javier Sampedro, quien avanza qu’en tóu casu manexaráse un programa “pequeñu”, acordies cola capacidá presupuestaria del municipiu, y nun s’optará pola fórmula de concursu, sinón que se caltendrá l’apuesta por una amuesa audiovisual con tintes hestóricos ya etnográficos.

Nesti sen, l’Ayuntamientu de Ribedeva proyecta dende ayeri y hasta’l 31 d’agostu tres curtiumetraxes vinculaos a la comarca y tres documentales, ente ellos ‘Alma de Dios’, una cinta rodada a primeros del sieglu XX pol director Manuel Noriega, natural de Pimiangu, y recuperada recientemente del escaezu pola Filmoteca de Zaragoza.

Según Sampedro, l’envís de los rexidores municipales pasa por mantener les feches del certame de cine n’agostu, coincidiendo cola selmana grande de les fiestes llocales, y nel diseñu de la edición de 2005 tendrá muncho que dicir el siguimientu que’l públicu faiga de l’amuesa yá en marcha, cuyos organizadores consideren “una preba”.

Ente les pieces que se proyecten nos xardinos de la Casa Cultura de Colombres, baxo’l títulu xenéricu de ‘Luces y sombras del Oriente, un acercamiento al cine del oriente de Asturias’, figuren amás dos documentales sobro la llegada’l ferrocarril a Llanes y la vida nesa llocalidá nel críticu añu de 1917, cuando tres movimientos militares, obreros y parllamentarios confluyeron na más intensa crisis del periodu de la Restauración.

L’asturianu nun vende nel cine. Tres años depués del estrenu de ‘Carne de gallina’, llargumetraxe dirixíu por Javier Maqua con notable presencia de la llingua asturiana nos diálogos, la industria audiovisual nun xeneró nenguna otra obra cinematográfica de gran difusión asemeyada a la realizada por Maqua, que foi siguida nes sales por más de 67.000 espectadores.

Asina lo asoleyen les estadístiques del Ministeriu de Cultura, que cifren en 67.235 el númberu total de persones que fueron al cine a ver ‘Carne de gallina’ nel añu 2002, mientres el llargumetraxe permaneció en cartelera. Esi datu, que se traduxo nuna recaudación en taquilla de casi 300.000 euros, allugó la película rodada na cuenca’l Caudal na mitá de la llista de los llargumetraxes españoles más ‘taquilleros’ nel exerciciu d’hai dos años, per delantre de ‘Lucía y el sexo’, de Julio Medem, y xusto perbaxo de ‘En Construcción’, obra de José Luis Guerín.

Estrenada na clausura oficial del Festival Internacional de Cine de Xixón, en payares de 2001, ‘Carne de Gallina’ tuvo como protagonistes a los actores Karra Elejalde, Anabel Alonso, Nathalie Seseña y Maxi Rodríguez, sobro un guión d’esti dramaturgu asturianu.

Productores, actores y otros profesionales vinculaos a la industria audiovisual enfótense na puesta en marcha de la futura radiotelevisión autonómica asturiana, cuyes primeres emisiones regulares tán previstes pa mediaos de 2005, como motor de dinamización del sector.

El cine de Ventura Pons pasa per Uviéu. El director catalán, autor ente otros títulos de ‘El porqué de las cosas’, ‘Anita no pierde el tren’, ‘Caricias’ y ‘El gran gato’, grabará nel Auditoriu ‘Príncipe Felipe’ la banda sonora del so últimu llargumetraxe, ‘Amor idiota’, cuyu rodaxe ta acabante rematase en Barcelona protagonizáu por Santi Millán y Cayetana Guillén Cuervo.

La encargada d’executar la música de la película, compuesta por Carles Casas, sedrá la orquesta de Los Virtuosos de Moscú, que prevé completar la grabación nuna única xornada intensiva -esti vienres-, ente les 9,30 y les 22 hores. Con esi envís, los músicos tienen yá formalizada la reserva de la sala de cámara del auditoriu d’Uviéu y esperen dexar llistu’l llabor esi mesmu día pa facilitar el montaxe final de la cinta, que va estrenase na seronda.

Basada nuna novela de Lluís Antón Baulenas y rodada en llocalizaciones de Barcelona y Buenos Aires dende xunu pasáu, ‘Amor idiota’ ye una comedia de 105 minutos de duración que narra una hestoria d’amor pasional, n’ocasiones violenta, de dos mozos cuya dependencia mutua conduz-yos la vida.

Amás de los dos protagonistes principales, el repartu complétase colos actores Mercè Pons, Marc Cartes, Jordi Dauder, Gonzalo Cunill, Andrea Fantoni, Pere Tomàs, Héctor Mas y Xavi Fernández. ‘Amor idiota’ ya la película númberu dieciséis que sal del obradoriu cinematográficu de Ventura Pons (Barcelona, 1945), aniciáu nel mundu’l teatru a los 20 años d’edá y debutante na dirección en 1977 con ‘Ocaña, retrato intermitente’, un singular documental sobro un artista conocíu polos sos espectáculos de travestismu na rambla barcelonesa.

Carlos Navarro Suárez (Uviéu, 1968), llicenciáu en Ciencies Económiques y Empresariales ya esplorador de la realización cinematográfica, estrena’l palmarés del Concursu de guiones pa curtiumetraxes ‘Villa de Avilés’. El xuráu de la primer edición del certame premió la so obra ‘Último tren a Haití’ -una hestoria alredor de les oportunidaes perdíes y les consecuencies d’acciones pasaes- pol “aciertu” del autor uvieín nos diálogos, el bon desendolcu de los personaxes y la capacidá d’emocionar ensin cayer nel sentimentalismu.

Carlos Navarro, que yá caleyara poles siendes del guión y la dirección de cine en ‘La profecía’, ‘Truchas’, ‘El espejo’, ‘Al otro lado’ y ‘La neña los mios güeyos’ -esta última premiada en Portugal hai agora cuatro años- recibirá los 6.000 euros colos que ta dotáu el premiu y estrenará la so obra nel IV Certame Nacional de Curtiometraxes ‘Villa de Avilés’, que va cellebrase en 2005.

Les bases del concursu establecen asinamesmo que la pieza tien que se rodar a lo menos nun 60 por cientu en llocalizaciones d’Avilés, dos d’elles esteriores qu’han reconocese fácilmente.

A la final del concursu, al que concurrieron un total de 18 obres, llegaron amás los curtios ‘Una suma de certezas’, del avilesín Saúl Fernández; ‘La visita’, de la zaragozana Pilar Gutiérrez Aguado, y ‘Sesión continua’, de la uvieína Elena García Tamés.

Asturies tendrá qu’esperar el regresu de Woody Allen a lo menos hasta 2005. El director norteamericanu, que proyectaba rodar nel Principáu escenes d’una nueva película na prósima seronda, pospón la so visita énte la falta d’un alcuerdu concretu con Televisión Española pa financiar parte del so llargumetraxe. La postergación afecta tamién al conciertu qu’Allen pensaba ufrir en tierres asturianes, qu’agora tendrá qu’esperar.

Según espubliza na so edición de güei el diariu xixonés ‘El Comercio’, el departamentu de relaciones internacionales de la Fundación ‘Príncipe de Asturias’ -organismu que premió a Woody Allen en 2002 col ‘Príncipe’ de les Artes- confirmó l’aplazamientu de la visita’l cineasta a Asturies hasta l’añu prósimu, coincidiendo coles cellebraciones del 25 aniversariu de los galardones.

Tres de la postergación del rodaxe y el conciertu de jazz qu’Allen planificara pa la seronda prósima tá la falta d’entendimientu colos responsables de Televisión Española, que nun llegaron a concretar un alcuerdu pa sufragar parte’l presupuestu de la película que’l popular cineasta pensaba rodar a partir de setiembre n’estremaes llocalizaciones d’España.

Poro, según los responsables de la Fundación ‘Príncipe’, Woody Allen aprovechará la so participación comprometida nos actos conmemorativos de les bodes de plata de la entidá uvieína -pa la que va ellaborar un documental- pa llevar a bon puertu los dos proyectos planificaos, y agora aplazaos, n’Asturies.

Con ocasión de la concesión del Premiu ‘Príncipe de Asturias’ de les Artes na so edición de 2002, Allen amosó un especial afectu por Uviéu que-y valió, ente otros actos públicos de reconocencia, l’asitiamientu d’una estatua cola réplica de la so imaxen nel centru de la capital d’Asturies.

Tejedor fai una incursión nes bandes sonores. Composiciones del grupu avilesín de folk pondrán-y el soporte musical al curtiumetraxe ‘El pozu’, premiáu na última edición del Festival Internacional de Cine de Xixón y qu’agora empieza a rodar el so director, Tomás Fernández, con un repartu encabezáu pol dramaturgu y actor mierense Maxi Rodríguez.

Según anunció’l director del Festival de Cine, José Luis Cienfuegos, el director del curtiumetraxe y el grupu folk tán trabayando yá na banda sonora del curtiu, cuyu ‘casting’ ta acabante pesllar pa empezar darréu el rodaxe y poder cumplir colos plazos requeríos, que fixen l’estrenu de la obra pal prósimu mes de payares, dientro la programación del 42 Festival Internacional de Cine de Xixón.

‘El pozu’ algamó na última edición del eventu cinematográficu xixonés el segundu premiu’l certame Nuevos Realizadores del Principáu, que galardona proyectos n’asturianu o castellán d’una duración non superior a 25 minutos. El primer premiu correspondió-y al guión ‘Nenyure’, presentáu por Jorge Rivero, que yá s’alcuentra en fase de montaxe.

La Conseyería de Cultura, Comunicación Social y Turismu, en collaboración col Festival de Cine de Xixón, Caxastur y Canal Plus, acaba d’abrir el plazu pa que los autores interesaos puean concurrir al Premiu Nuevos Realizadores 2004, empobináu a cineastes menores de 35 años y dotáu con dos premios en metálicu de 12.000 y 6.000 euros pa la fechura’l proyectu. Los organizadores almiten trabayos hasta’l prósimu 29 d’ochobre.

El Festival de Cine de Xixón, en collaboración col Conseyu de la Mocedá de la mesma ciudá, mantién abiertu un procesu de selección de cuatro mozos o moces d’ente 14 y 19 años d’edá pa unvialos en calidá de miembros del xuráu al Festival de Cine de Giffoni, na rexón italiana de Campania, que va cellebrase del 17 al 24 del prósimu mes de xunetu.

Los requisitos establecíos pa facer la esbilla son tres: Precísase que los aspirantes a viaxar a Italia seyan nacíos ente el 1 de xineru de 1985 y el 31 de xunetu de 1989; que tengan conocimientos d’inglés o d’italiano; y que tengan participao col so correspondiente colexu o institutu nuna de les proyecciones entamaes pol Festival de Cine de Xixón.

Los cuatro seleccionaos habrán sufragar el viaxe del so propiu bolsiellu, pero darréu aporten a Giffoni gociarán d’agospiu y manutención gratis a cargu de los organizadores del festival, cuyu xuráu ta integráu por más de 800 mozos procedentes d’abondos países.

Los interesaos n’optar al viaxe puen unviar un corréu electrónicu a la dirección festivalgijon@telecable.es, llamar al númberu de teléfonu 985182940, o bien empobinar la solicitú al Paséu de Begoña, 24, entresuelu, siempre antes del próximu 31 de mayu.

Lleenda ‘glam’, autor de singulares puestes n’escena, collaciu de David Bowie. L’alcordanza del asturianu Tino Casal, fallecíu en 1991, regresa a Uviéu en forma de llargumetraxe documental firmáu pol director José Antonio Quirós. ‘Gran Casal, me como el mundo’ restola a la gueta del llau humanu del polifacéticu artista y productor, encumáu nos años ochenta pola so versión del tema ‘Eloise’, obra de Barry Ryan.

Camaleónicu y precursor, Casal xugó cola estética nuna dómina na que la ‘movida’ madrilana intentaba sescudise décades de dictadura pa coyer la rueda d’otros países europeos pioneros en nuevos movimientos musicales. Ente ellos, el ‘glam’, que l’artista asturianu conoció de primer mano nos sos viaxes a Gran Bretaña, onde ganó l’amistanza del músicu David Bowie.

El documental qu’agora presenta oficialmente n’Uviéu el tamién asturianu José Antonio Quirós, autor ente otros trabayos de ‘Pídele cuentas al Rey’, vien de collechar l’aplausu del públicu asistente al Festival de Cine de Málaga ya intenta rescatar la figura de Casal al traviés de la mirada de dellos de los sos compañeros de camín, ente los que se cuenten nomes tan lligaos a la ‘movida’ de los ochenta como los de Fabio McNamara, Paco Clavel y Olvido Gara, ‘Alaska’.

La presentación del trabayu de Quirós n’Uviéu cellebraráse a partir de les 20,30 hores de güei, xueves 13, nel Teatru Campoamor.

Según una información espublizada nel diariu xixonés El Comercio citando fontes de la distribuidora de les películes d’Allen n’España, Lauren Films, Allen desembarcará col so equipu n’Uviéu a lo menos durante la primer selmana de setiembre. Na capital asturiana empezará un rodaxe que se prollongará dos meses y qu’incluyirá amás llocalizaciones de Xixón.

L’afamáu director neoyorquín, con una vida paralela de concertista de clarinete, conoció ‘in situ’ Asturies tres de ser galardonáu en 2002 col premiu Príncipe de Asturias de les Artes. Amás de recoyer la distinción nel teatru Campoamor y d’hospedase na capital asturiana, Woody Allen cellebró entós un alcuentru con seguidores en Xixón. De dambes ciudaes fexo comentarios eloxosos.

Como ye vezu na preparación de cada nuevu trabayu d’Allen, el cineasta norteamericanu y l’equipu que lu arrodia caltienen un rigurosu silenciu sobre l’argumentu, el títulu y el repartu de la película que se grabará en Xixón y Uviéu, ciudá esta última onde’l director ta inmortalizáu nuna estatua allugada nel cascu urbanu.

Xuacu Carballido, Luisa Aguilar y Fernando Díaz. D’esi concisu repartu echa mano la realizadora Yhazmina Díaz pa retratar l’Asturies misteriosa y emborrinada de les fontes nes qu’habiten xanes. Una mirada a la veta de la mitoloxía que se materializa en curtiumetraxe y ñaz nuna posada vieya.

“La posada de las almas”, rodada en 2003, amiesta les tipoloxíes de paisanu corrompináu de lleendes y mozu en trance iniciáticu cola presencia d’una xana pasada por agua. Una cuyarada de ficción, otra de suspense y un ámbitu borrinosu ponen el restu de la hestoria.

Dientro’l programa de promoción del trabayu cinematográficu, la directora y los actores que protagonicen el curtiu asisten a una proyección comentada nel Fórum de la FNAC (Parque Principado, Sieru) a les 20 hores del vienres 6 de febreru.