Cine

Meyor película, ‘Vento di terra’. Meyor director, Pablo Trapero por ‘Familia rodante’. Meyores actores, Mohammed Khouas y Graciana Chironi. El 42 Festival Internacional de Cine de Xixón asoleyó esti mediudía el so palmarés, depués de disputaes deliberaciones, y reconoció ‘ex aequo’ como los meyores curtios del certame ‘Bregman, el Siguiente’, de Federico Veiroj, y ‘Heart is a Piece of Meat’, obra de Jan Cvitkovič.

L’honor cimeru del festival recibiólu, pues, el llargumetraxe dirixíu por Vincenzo Marra, una hestoria coral de personaxes desamparaos y arguyosos na llende’l neolliberalismu, mientres que Trapero regresará a la so Arxentina natal como meyor director del festival n’atención a la so capacidá pa plantegar el rellatu interxeneracional que ye ‘Familia rodante’, crónica d’un catárticu viaxe familiar p’hacia el norte arxentín, y con una güela premiada como meyor actriz en Xixón, Graciana Chironi.

La película ‘Lila diz’, na que’l realizador Ziad Doueiri retrata a una adolescente con capacidá y envís de manipular el so entornu, obtuvo dos premios: Al meyor guión y al meyor actor, na persona de Mohammed Khouas. El galardón ‘Gil Parrondo’ a la meyor dirección artística recayó en Antoine Platteau por ‘À tout de suite’, mientres que’l Premiu especial del xuráu foi pa ‘Wild Side’, de Sébastien Lifshitz.

Pol so llau, el xuráu mozu del festival -grupu de 50 xóvenes de tol Estáu que dicta un veredictu paralelu y honoríficu- decantóse por ‘Lila diz’ como la meyor de les catorce películes a concursu nel Festival de Xixón, y premió ‘Flatlife’, dirixíu por Jonas Geinaert, como’l meyor curtiumetraxe.

Con notable éxitu de públicu y ampliu siguimientu especializáu, el 42 Festival Internacional de Cine de Xixón remata esta nueche nuna gala conducida pola actriz Beatriz Rico, depués d’esparder pola ciudá 250 proyecciones de toa triba n’ocho escenarios distintos.

Creáu en 2003 col propósitu de fomentar la creatividá y la so plasmación en proyectos cinematográficos el concursu “No nos cuentes películas, ¡hazlas!” ta empobináu a estudiantes asturianos d’ente 16 y 23 años. Les bases del concursu afiten que la única orientación propuesta ye la de que se trate de proyectos de documentales que reflexen l’actual mocedá asturiana. Los dos trabayos ganadores de la edición de 2004 nun pueden amosar dos enfoques más distintos de la realidá de la xente mozo del nuestru país.

El primeru d’ellos: “A por ti”, de la productora Fobos, paez el perfectu exemplu de lo que nun hábía ser el primer proyectu cinematográficu d’unos mozos debutantes, nos que se podía esperar espontaneidá, atrevimientu, mesmo la frescura de la inesperiencia. Nada d’esto hai nesti cortometraxe que busca emponderar los valores del voluntariáu énte la mocedá escontra l’escapismu y les formes d’ociu poco recomendables. L’acartonamientu, el pastiche, la ñoñería, l’espíritu más acríticu enllenen cada planu d’esti documental que per momentos abulta más un video publicitariu institucional encarriláu a fomentar el voluntariáu ente los mozos qu’una obra fecha por mozos. La torpeza na dirección y na interpretación de los actores ye otru más de los munchos defectos d’esti trabayu fechu por alumnos de la escuela de cine de Ponferrada, que resumen la so visión de la mocedá asturiana actual nun sumideru maniquéu que vien proclamar: voluntariáu o botellón. Un mal estrenu pa unos mozos con ganes de realizar los sos enfotos cinematográficos.

Nel otru estremu de la calidá y l’interés ta “A la cola”, de la productora Si Nos Dejan, un trabayu que sorprende pol rigor y la seriedá cola que ta planteáu, y sobremanera pola denuncia crítica que-y val de leit-motiv: la emigración como única salida que paez espera-y a les xeneraciones más moces n’Asturies. Tanto la tesis como’l ritmu espositivu nel que se va desenvolviendo, marcáu por una gran axilidá de planos y secuencies, abulten d’una gran eficacia a la hora d’ufiertar un formatu clásicu de documental:combinación d’imáxenes d’archivu, actuales, voz n’off, testimonios orales argumentando alrodiu d’elles y un montaxe que lo ordena en forma de rueda, ensin por ello caer nel asonsañamientu o el pastiche. Únicamente hai de señalar como defectu d’esta película la escoyeta de dalgunos testimonios, como los ufiertaos por dos personaxes públicos de tan alloñaos del contactu directu cola realidá social del país como Arturo Fernández y Gustavo Bueno, que choca un tanto s’espongan equí como referentes pa la mocedá asturiana.

Inda asina, esti posible defectu, nun disuena nel conxuntu d’un documental tan bien pensáu como bien fechu. Provocativu y críticu cómo se supón tienen de ser los mozos cuando miren al so alrodiu y acolumbren una realidá como la d’Asturies.

P’acabar, adolescencia y guetu. El 42 Festival Internacional de Cine de Xixón pieslla güei la so sección oficial cola proyección del llargumetraxe francés ‘Lila diz’, un retratu d’adolescencia franco magreví, y l’amuesa de ‘Baadasss’, obra na que Mario Van Peebles s’ocupa d’un héroe negru salíu del guetu. El certame xixonés remata asina la exhibición de les catorce cintes en competición y mañana elixirá a la ganadora.

Con un gran éxitu de públicu y notable siguimientu de medios de comunicación, los espectadores del Festival de Xixón tendrán a partir d’última hora d’esta nueche tolos elementos de xuiciu pa escoyer una película ganadora. Nesi momentu culminarán los pases abiertos de los catorce llargos a concursu, ente los que’l xuráu internacional repartirá mañana los premios del certame.

D’esti mou, el teatru Xovellanos acoyerá a les 20 hores la proyección de ‘Lila dice’, una cinta de 89 minutos na que’l realizador Ziad Doueri retrata a una ‘lolita’ con plena capacidá pa manipular y enfrentar a los pandilleros de que s’arrodia. Darréu, el coliséu xixonés amosará ‘Baadasss’, revisión del atormentáu rodaxe dirixíu en 1970 por Melvin Van Peebles, agora nos güeyos del so fíu, con protagonista negru ‘fabricáu’ nel guetu.

El Festival Internacional de Cine de Xixón ufre amás na so cabera xornada de competición oficial les proyecciones de les películes ‘Iris’, ‘Ocurrió cerca de su casa’, ‘Oh uomo’ y una esbilla de curtios españoles, ente otres obres.

L’alcordanza de la revolucionaria Aida Lafuente o un repasu, en 23 curtiumetraxes, a los atentaos islamistes de Madrid. El 42 Festival Internacional de Cine de Xixón abre’l so abanicu al documental hestóricu y d’actualidá y proyecta un mediumetraxe de Ramón Lluis Bande sobro la militante comunista asesinada n’Uviéu en 1934 y una suma de güeyaes al rodiu del 11-M a beneficiu de les víctimes de los sucesos de Madrid.

Col estrenu de ‘De la Fuente’, que se pasará a les 22,30 hores nos Cines Centro como prolegómenu del llargu ‘Five’, d’Abbas Kiarostami, Bande pretende afondar nel so repasu cinematográficu a la memoria hestórica d’Asturies al traviés d’una pieza de 34 minutos de duración, grabada nun solu planu, col testimoniu de la única hermana sobreviviente de la revolucionaria, Pilar de Lafuente.

El realizador asturianu, autor ente otros trabayos de la cinta ‘Estratexa’, quier poner al algame del públicu “el testimoniu y la presencia de los auténticos protagonistes de la hestoria contada, ensin dala interferencia d’elementos ayenos a esi relatu”, y alluga a la relatora nun llateral del planu pa que’l públicu centre la so atención na hestoria en cuenta poner l’atención na espresión conmovida de la narradora.

Nel mesmu complexu cinematográficu, pero en sala distinta y a les 22,15 hores, el Festival de Xixón proyecta el documental collectivu ‘Madrid 11-M, todos íbamos en ese tren’, una suma de 23 curtios d’otros tantos autores que, con una duración d’ente 3 y 5 minutos por pieza, reivindica l’alcordanza de les víctimes de los atentaos islamistes y revisa los ataques col mensaxe central del refugu al terrorismu.

La presentación del documental cuenta cola collaboración del Atenéu Obreru de Xixón y empobinará los beneficios obteníos pola venta d’entraes a les víctimes de los atentaos. Na sección oficial del festival, el teatru Xovellanos acueye esta nueche la proyección de les películes ‘Revolution of pigs’ y ‘The four’.

Archivu. El realizador Ramón Lluis Bande remata un documental sobro Aida de Lafuente

Acabante casi d’estrenar la so película musical “Divina lluz”(2004) sobro’l discu del mesmu títulu de Mus, Ramón Lluis Bande presentó nel ciclu Llendes del Festival de Cine de Xixón el so últimu trabayu: ‘De la fuente’, un mediometraxe documental sobre l’alcordanza de la revolucionaria asturiana Aida de la Fuente.

Rodada en namás dos planos-secuencia, la película de Bande tenta somorguiase na busca del mitu Aida al través del testimoniu oral de la única hermana superviviente de la heroína comunista y a onde lu empobina el so camín ye a los oríxenes, cuando’l mitu yera realidá, aquella “neña que xugaba a la comba” y “saltaba les barricaes” del cantar popular, la que Pilar de la Fuente conoció cercana. La segunda parte del documental contrasta o complementa el relatu de Pilar cola interpretación respigante del cantar popular na voz de Mari Luz Cristóbal Caunedo.

El testimoniu de la hermana d’Aida ye amosáu por Bande dende un planu fixu con enfoque viráu al estremu de la imaxe col fin de llantar la distancia necesaria pa que lo emocional nun interfiera ente la protagonista y l’espectador. Nél Pilar de la Fuente fala de la revolucionaria pero sobretoo de la so familia, una familia pequeño burguesa d’Uviéu consagrada a la militancia nel Partíu Comunista y que tres la muerte d’Aida, na guerra civil sufrió les terribles consecuencies de la represión por ser los familiares de de la Fuente hasta quedar prácticamente aniquilada: namás sobrevivió Pilar. Ye la hestoria tamién d’unes xeneraciones enfotaes nel sueñu de la revolución social y derrotaes después pol facismu, décades enantes de que los volviere derrotar la realidá.

El relatu de Pilar de la Fuente, espresáu con una sobriedá averada a la xelidez, ayuda al propósitu de Bande de centrar el documental únicamente na hestoria y los protagonistes d’ella, ensin interferencies superflues que desvirtúen la realidá filmada, la mesma hestoria. El realizador xixonés nuna posición radical énte los usos comunes del documental clásicu cree nel poder de les palabres, el testimoniu y la memoria de los protagonistes directos d’una hestoria tienen pa Bande la lexitimidá verdadera, son ellos los que vuelven a vivir lo relatao nel momentu que lo recuerden.

Una vuelta de tuerca más dica la obstinada busca de Ramón Lluis Bande en procuru de la verdá fría y desnuda, de la realidá.

El Festival de Cine de Xixón ufiertó na so sesión de nueche del domingu y nel ciclu ‘Llendes’ una de les sorpreses más interesantes de tolo qu’hasta agora se pudo ver nél. ‘Medrana'(2004), el primer llargometraxe de Juan Luis Ruiz, amosó que ya nun ye ocurrencia d’inxenuos pensar na posibilidá de la esistencia d’un cine asturianu y n’asturianu. Tamién que se puede tratar un tema como’l de les enfermedaes terminales ensin deformalo col filtru de la demagoxa o el tremendismu. Hestories d’enfermos d’esclerosis múltiple nun mundu que tamién agoniza de la mesma enfermedá: el mundu campesín asturianu.

‘Medrana’, escrita en collaboración con Llucía Herrera -como’l so anterior y celebráu trabayu, ‘Lluvina’-, fala de la llucha na que s’enfrenten la vida y la muerte coles sos poderoses enerxíes, una llucha de la que se conoz el resultáu final y la imposibilidá d’evitalu. Inda asina hailos que nun se resignen a entregase a la derrota y siguen lluchando con tola so fuerza porque saben que cada minutu de combate ye siguir nel llau de la vida.

John Berger, l’autor de ‘Tierra puerca’, denunciaba a principios de los años setenta la muerte de la Europa campesina, una aceleración programada polos economistes de Bruseles de l’agonía que sufre dende hai décades, más d’un sieglu, el mundu campesín. A un espectador ayenu a la traxedia la llucha de los llabradores asturianos por siguir baldándose nuna tierra que nun tien otru destín prósimu que’l de convertise en prau o en tierra ermo, puede abultá-y tan inútil como’l d’un de los protagonistes de ‘Medrana’, Juan Ignacio, un casu emocionante del coraxe y la brenga cola qu’un enfermu terminal puede aferrase a la vida. ‘La raza de los supervivientes’ llamó John Berger a los campesinos y a esa raza pertenez Juan Ignacio y otros protagonistes de la película de Juan Luis Ruiz, xente avezada a nun concede-y nenguna tregua a la folganza o al desaliendu porque d’ello depende la so sobrevivencia.

Crónica d’una muerte anunciada na que tamién cuerre poderosu’l ríu de la vida, simbolizáu equí pola constante presencia del agua en fontes, regatos, el mar, el molín nel que nació Juan Ignacio y que ye símbolu arriendes del molín que s’alimenta de la so propia capacidá de producir enerxía.

El primer llargometraxe del tándem Juan Luis Ruiz y Llucía Herrera ye un testimoniu llúcidu y incómodu de l’agonía d’un mundu, d’unos homes, de nós mesmos qu’agora asistimos como conmovíos espectadores a una llucha con derrota que tamién ye la nuestra. Tamién nós sentimos medrana.

Los actores que participen en llargumetraxes de gran difusión nun tienen por qué ser profesionales. El director arxentín Pablo Trapero, que presenta nel Festival Internacional de Cine de Xixón la so cinta ‘Familia rodante’, avaló güei esi estremu y reivindicó la so película como una producción mui cara y de montaxe complicáu.

Como amuesa d’ello, recordó el realizador sudamericanu, el propiu rodaxe: Catorce selmanes con unes temperatures medies dacuando de 40 graos centígrados y la baxa prematura d’una anciana que, al superar el ‘casting’ como reserva de la propia güela’l director, qu’actúa na película, acabó nel hospital. “Naide nun s’enfotaba nel proyectu”, recordó Pablo Trapero, y esa falta d’apoyu financieru postergó el rodaxe durante años.

De fechu, Trapero realizó antes otres películes -ente elles ‘El Bonaerense’- antes de filmar ‘Familia rodante’, que se proyecta esta nueche dientro de la sección oficial del Festival de Xixón y que narra el viaxe catárticu d’una familia al completo nuna caravana p’hacia la provincia de Misiones, nel estremu norte d’Arxentina.

Pol so llau, Paulo Branco, productor de la políticamente incorrecta ‘Ma mère’ -hestoria d’incestu que antes d’aniciáu el rodaxe yá contaba con detractores-, recordó esta mañana que’l cine nun pue quedar en películes concebíes sólo “pa que la xente salga contenta del cine”, y defendió el cálter “duru, radical y violentu” de la cinta que concursa en Xixón.

Tamién consciente de la polémica que’l llargumetraxe diba suscitar darréu s’estrenare, el coprotagonista de ‘Ma mère’, Louis Garrel, señaló la fonda dualidá con que foi acoyida la película en Francia -grandes detractores, grandes apasionaos- y ensalzó el llabor de la so compañera de repartu, la yá veterana Isabelle Huppert.

Unes 250 proyecciones, ocho sales, catorce películes a concursu na sección oficial. El 42 Festival Internacional de Cine de Xixón abre güei les puertes cola amuesa del llargumetraxe ‘Clean’, d’Oliver Assayas, nuna gala d’apertura conducida polos actores Daniel Guzmán y Lola Dueñas que se cellebrará nel teatru Xovellanos y qu’inagura una selmana de cine.

Na sección oficial compiten cintes manufacturaes en llugares tan dispares como Estonia (‘Revolution of Pigs’), Arxentina (‘Familia Rodante’), Rusia (‘4’) y Estaos Xuníos, qu’unvía al certame xixonés los llargometraxes ‘Tarnation’, ‘The Woodsman’, ‘Baadasss!’ y ‘Mysterious Skin’. L’ámbitu de la Europa occidental, con Francia a la cabeza, contribúi coles siete películes restantes qu’opten a algamar un premiu nel festival, los llargos ‘Wild Side’, ‘A Tout de suite’, ‘Ma mère’, ‘La historia del camello que llora’, ‘Vento di terra’, ‘Lila Dice’ y ‘Sugar Orange’.

Na so estensa programación, que s’espardirá por sales del centru de la ciudá con una incursión nel centru municipal de Pumarín, el certame dirixíu por José Luis Cienfuegos amosará nes pantalles ciclos monográficos de los directores Lukas Moodysson, Tsai Ming-Liang, Peter Watkins y Simon Pummell, y dará-yos continuidá a les habituales secciones ‘Enfants terribles’ y ‘Esbilla’.

El Festival de Cine de Xixón centrará amás el so focu nel cine independiente norteamericanu, ocuparáse de los tabúes nun apartáu específicu y cellebrará el prósimu miércoles el Día d’Asturies, cola proyección de curtios de, ente otros autores, Iraida Lombardía, Patricia García Quesada, Bruno Mateos, Alberto Pardo y Pedro Antonio Curto.

La producción cinematográfica asturiana sedrá amás visible na sección ‘Llendes’, na que s’exhibirán los documentales ‘Medrana’, de Juan Luis Ruiz, y ‘De la fuente’, un repasu de la muerte de la revolucionaria asturiana homónima na visión del realizador Ramón Lluis Bande.

Web oficial del Festival Internacional de Cine de Xixón

Les actrices Lola Dueñas (‘Días de fútbol’, ‘Mar adentro’) y Beatriz Rico (‘Historia de un beso’, ‘Un paso adelante’) presentarán les gales d’apertura y pieslle, respectivamente, del 42 Festival Internacional de Cine de Xixón, qu’empezará el prósimu 25 de payares y tendrá como miembros del xuráu al actor Tristán Ulloa, la distribuidora Jane Balfour, la programadora Diana Sánchez y los directores Lisandro Alonso y Monte Hellman.

Esti últimu llega a Xixón depués d’una llarga trayectoria profesional qu’inclúi un montaxe en versión ‘western’ de la obra teatral ‘Esperando a Godot’ y la producción de la película ‘Reservoir Dogs’, dirixida por Quentin Tarantino, mientres qu’Alonso (Buenos Aires, 1975) destacóse na dirección de los sos dos primeros llargumetraxes, ‘La libertad’ y ‘Los muertos’.

Amás de Tristán Ulloa, rostru reconocible nes pantalles en cintes como ‘Lucía y el sexo’, ‘Mensaka’ o ‘Los sin nombre’, el xuráu del festival xixonés completaráse con dos espertes técniques: Diana Sánchez, programadora del Festival de Cine de Toronto, y Jane Balfour, directora durante más de diecisiete años d’una distribuidora internacional especializada en documentales, curtios y llargumetraxes d’arte y ensayu.

Col asoleyamientu esta mañana d’eses dos llistes de nomes -xuráu y presentadores-, el festival dirixíu por José Luis Cienfuegos apuró esta mañana l’encendíu de los motores del certame, qu’arranca el prósimu 25 de payares y espardirá pola ciudá unes 250 proyecciones hasta’l 3 d’avientu.

Web oficial del Festival de Cine de Xixón

Un Uviéu “triste, gris y feríu”. Eso ye lo que se pue contemplar, en pallabres del director xeneral de Promoción Cultural, Carlos Madera, nes dos películes documentales que la Filmoteca d’Asturies ta acabante restaurar y qu’esta mañana se proyectaron por primer vegada, en pase especial pa prensa, depués de la so recuperación. Les cintes incluyen, ente otres imáxenes en movimientu inédites, la recepción por Franco de la Cruz de la Victoria.

Acaba asina un camín entamáu hai más de cuatro años, cuando los espertos alertaron de la esistencia de los documentales. Depués d’una llarga busca d’archivu qu’afayó la compra municipal de les películes en 1943 por 10.000 pesetes, les cintes apaecieron nun despachu y l’Ayuntamientu d’Uviéu cedió-yles a la Filmoteca a cambiu de la so restauración.

Agora, final feliz. Los dos documentales, obra’l director Justo de la Cueva y redactaos en prosa inflada propia de la dómina, puen vese en formatu renováu, con importantes meyores na calidá de la imaxe y escenes en movimientu inédites, tales como la recepción de la Cruz de la Victoria por parte’l dictador Francisco Franco que antes namás podía contemplase en formatu fotográficu.

Esa imaxe apaez na cinta ‘El gnomo de la catedral’ -alusión al restaurador de la Cámara Santa, Víctor Hevia-, un documental qu’amuesa una sé catedralicia en reconstrucción depués de la revolución de 1934 y la Guerra Civil. Na otra película, ‘Oviedo, capital de Asturias’, el realizador retrata, en tonu dafechu franquista, los efectos de la llucha desatada na capital asturiana ente los republicanos y los partidarios de los militares sublevaos al mandu de Franco.

El director de la Filmoteca Asturiana, Bonifacio Lorenzo, sorrayó la importancia de les cintes recuperaes, yá que los sos negativos desapaecieren nun incendiu, y precisó que les dos películes restauraes integren una serie de seis documentales sobro Asturies, ún de los cuales dedícase a Xixón: “Esta película, que nun ye tan bona como les d’Uviéu, perdióse, pero tengo llocalizada una copia en 16 milímetros”, señaló Lorenzo.

A la presentación pública de les restauraciones asistió amás l’archivera mayor d’Uviéu, Ana Herrero, quien se felicitó pola calidá del remocicamientu de les cintes y aseguró que l’Ayuntamientu yá puso en manos de la Filmoteca otros documentos pa sometelos a un procesu asemeyáu.