Cine

La película fala de los vínculos de cuatro collacios nel Valle de Turón que vuelven aconceyar tres la muerte de Suso. El mensaxe que’l director asturianu quier tresmitir ye’l de qu’a pesar de la situación de les Cuenques entovía hai esperances. La opera prima de Fernández cuenta con un repartu nel que destaquen Javier Cámara, Malena Alterio o Gonzalo de Castro.

El Festival Internacional de Cine de Xixón va proyectar hasta’l 30 d’avientu, nel Centru Integráu Pumarín Xixón Sur, dalgunes de les películes españoles más interesantes de los últimos ñaos nun ciclu que lleva por títulu ‘El ¿otro? cine español’. La propuesta ta formada por nueve llargometraxes de prestixu internacional que cuasimente son desconocíos n’España, abarcando un ampliu espectru d’estilos y xeneros como ‘El taxista ful’, ‘La bicicleta’ o ‘Azul oscuro casi negro’. Les proyecciones van facese los sábados a les ocho y media la tarde, por un preciu de 3 euros la entrada.

Dalgunos de los títulos que s’inclúin son “El taxista ful” de Jo Sol (Premiu a la Meyor Película nel Festival de Nantes y Mención Especial Nuevos Directores nel Festival de San Sebastián); “La bicicleta” de Sigfrid Monleón, interpretada por Pilar Bardem y Sancho Gracia; “Azul oscuro casi negro” de Daniel Sánchez Arevalo (presentada nel últimu Festival de Venecia, llogró los premios al Meyor Guión, Especial del Xuráu y de la Crítica nel Festival de Málaga); “El triunfo” de Mireia Ross, que participó na Sección Panorama del Festival de Berlín; y “La niebla en las palmeras” de Lola Salvador y Carlos Molinero (Meyor Película nel Festival Dixital de Barcelona), que cuenta l’aventura del fotógrafu asturianu Santiago Bergson, collaborador nel proyectu del que salió la bomba atómica.

‘Killer’ d’Ignacio Carballo Sánchez salió ganador por unanimidá del III Concursu de Guiones pa Cortos Villa d’Aviles, organizáu pol Ayuntamientu d’Aviles nel marcu del Certame Nacional de Cortos, qu’esta seronda va celebrar la sesta edición. El guión de Carballo foi escoyíu ente tres, quedando finalistes Daniel Rivaya Menendez con Consejos y Daniel García Narros con El último paciente.

Ignacio Carballo (Xixón, 1972) estudió Empresariales ya Historia del Arte na Universidá d’Uvieu. Depues d’una llarga carrera profesional qu’anicia en 1996, anguaño ye responsable de la producción n’Asturies de la película ‘Luz de domingo’ que dirixe Jose Luís Garcí y que produz Níkel Odeón. Amás, dirixe’l llargometraxe documental Actor, cola collaboración especial d’Antonio Banderas.

El Certame Internacional de Cortometraxes Aula 18 de L’Entregu, qu’esti añu celebra la so novena edición, va inagurase’l próximu día 23 d’ochobre cola proyección de les cintes participantes nel Teatru Municipal, amás de nos chigres Ochobre y La Yenda de L’Entregu, la Casa la Xuventú de Sotrondio, asina como otros locales collaboradores d’Uvieu y Aviles. Esta nueva edición del festival, pa la que se presentaron 310 cortos de los que’l xuráu tendrá que seleccionar ente 40 y 50, consolida a Aula 18 como ún de los principales concursos del estáu.

Los organizadores d’esti certame internacional celebraron l’alta calidá de los participantes, de los que destacaron la variedá temática y de xeneru presentada, señalando qu’ente los actores encuentrense cares tan conocíes como les de Paula Vázquez, Cayetana Guilen Cuervo, Mariví Bilbao, María Galiana o Antonio Resines.

Los premios d’esti festival van dende los 1800 euros y los 300, pal tercer clasificáu, toos ellos escoyíos polos propios espectadores.

Xixón va acoyer el próximu martes 26 de setiembre nel Teatru Xovellanos, dientro del so Festival Internacional de Cine, el preestrenu de la película ‘Vete de mí’, dirixida por Victor García León y protagonizada por Juan Diego y Juan Diego Botto. ‘Vete de mí’ ye la primera de les tres películes incluyíes nel proyectu ‘Primeras Tomas’, una iniciativa del productor Juan Gona que cuenta col apoyu del Gobiernu del Principáu d’Asturies.

‘Vete de mí’ y un baille de mázcares familiar, d’encuentros y desencuentros ente dos egoístes conxenitos: un mentirosu compulsivu (Juan Diego Botto) que llogra esquiciar l’estáu mental de los sos familiares, y un actor de repartu veníu a menos que descrubre de sópetu que la so vida ye una mentira (Juan Diego). Una comedia satírica y amarga sobre cómo llegar a los cincuenta, perder el trabayu, atopar un fíu y querer tolo contrario. El so director, Victor García León, diz d’ella que ye ‘una traxedia griega en Carabanchel, lo que Rabael Azcona llamaría traxedia grotesca’.

Les entraes pa esta proyección, que va empezar a les ocho y media la tarde, van ser de baldre. Los interesaos van poder retirales nes taquilles del Teatru Xovellanos el próximu llunes y tamien el mates con un tope de dos entraes por persona.

El próximu 7 d’agostu nel Teatru Prendes de Candás fadrase la I Muestra Audiovisual “Fecho n’Asturies” la muestra ta abierta a tolos autores asturianos que querian presentar les sos obres, mesmo en DVD como en VCD. La rececpción de los materiales acaba’l día 2 d’agostu.
La muestra “Fecho n’Asturies” ta entamada por Algamar Producciones en collaboración col conceyu de Carreño y el Centru Cultural Teatru Prendes.

Xixón acoyerá’l Primer Festival Internacional de Cine Gai y Lésbicu d’Asturies – CinegailesAST, que se celebrará nesta ciudá del 26 al 29 de xunetu del 2006, nel Salón d’Actos del Centru de Cultura Antigu Institutu, na cai Xovellanos 21, a partir de les 5 la tarde y destináu a promocionar n’Asturies el cine de temática homosexual, gai, lésbica o transexual de tol mundu. El Festival CinegailesAST recibió yá abondos trabayos procedentes d’América, Asia, Europa. L’asistencia a les proyecciones nel Salón d’Actos del Antigu Institutu de Xixón sedrán dafechu gratuítes y preténdese que’l festival seya un certame participativu y abiertu a tou tipu de públicos ensin nenguna clase d’esclusiones y por ello dedicáu a tol mundu interesáu nel cine de ficción y documental más actual que se ta faciendo alrodiu estes temátiques. Pa ponese en contactu cola organización y poder collaborar col Festival CinegailesAST nun hai más que dirixise a la seña electrónica festivalcineastur@wanadoo.es

Trabayada a lo llargo d’un añu, ‘La memoria recobrada’ fai un viaxe per Asturies y Lleón de la mano del cineasta Manuel Gutierrez Aragón nel documental tituláu ‘Los del monte’, nel que se toca la realidá de los maquis de la fastera del norte. El programa completu, inclúi tamien un percorríu per Galicia col escritor Manuel Rivas en ‘Galicia, la tempestad del 36′, Canarias al travies de la música de Pedro Guerra n’ ‘Huesos’, ‘Málaga, la carretera de la muerta’ col historiador Juan Madrid, y la ‘Extremadura amarga’ con Luis Pastor.

Nel capítulu dedicáu a Asturies, baxo la mano del cineasta Manuel Gutierrez Aragón, que yá nel añu 1978 dirixere ‘El corazón del bosque’, el director cántabru investiga la lleenda de Juan Fernández Ayala, ‘Juanín’, ente otros fugaos.

La historia de Juanín permite facer un repasu peles fases de la guerrilla asturiana y lleonesa, pa lo que Gutierrez Aragón cuntó col testimoniu directu de dalgunos fugaos supervivientes a la dictadura asina como de dellos enllaces en monte. El documental inclúi tamien la versión del xeneral Cereceda, de la Guardia Civil, que nos años de la posguerra fue teniente en Potes.

L’escritor Julio Llamazares, autor de “Lluna de Llobos”, tamien collabora nesti episodiu p’amosar nos montes de Lleon, cerca de Riaño, los refuxos y cueves que queden intactos y a los qu’acceden les cámares de televisión per primer vez.

‘La memoria recobrada’ va emitise los domingos a partir de les once la nueche na 2 de Televisión Española.

El ciclu de cine europeu enmarcáu na campaña del 20 aniversariu de la integración d’España na Unión Europea termina güei cola proyección de la película “Struggle” de la directora asturiaca Ruth Mader. Eurosferas, organizáu pola Dirección Xeneral de Rellaciones Esteriores y Asuntos Europeos y la Cámara de Comerciu d’Uvieu ufiertó una selección de películes europees d’actualidá a lo llargo del mes de xunu de 2006.

La clausura cuerre a cargu del Director Xeneral de Rellaciones Esteriores y Asuntos Europeos, Darío Díaz Álvarez, del Director Xeneral de la Cámara de Comerciu d’Uvieu, Javier Cuesta Menendez, y del Director de la Obra Social y Cultural de Caxastur, Jose Vega. L’actu va tener llugar güei a les 20 hores nel Salón d’Actos del Centru Cultural de Caxastur situáu nel númberu 4 de la cai San Francisco d’Uvieu.

La película escoyida pa ciarrar esti ciclu ye “Struggle”, ópera prima de la realizadora austriaca Ruth Mader. El film cunta la difícil vida d’una muyer, dedicada a pañar freses y procedente d’Europa del Este, que llega a Austria pa llabrase un futuru meyor pa si y pa la so fía, y u home, un vienes axente inmobiliariu. La película foi rodada nes fábriques austriaques, amosando sobre too trabayadores reales, poniendo la cámara pa que captare los detalles, la naturaleza y el ritmu d’una cadena de producción ensin perder una respetuosa distancia de les persones que son grabaes.

Xixón va acoyer el primer festival internacional de cine gai y lesbicu d’Asturies, llamáu CinegailesAST, que se celebrará ente los díes 26 al 29 de xunetu nel Auditoriu del Centru de Cultura Antigu Institutu. El festival, destináu a promocionar n’Asturies el cine de temática homosexual, gai, lesbica o transexual de tol mundu, ta organizáu pol Festival de Cine Asturianu en collaboración cola asociación xixonesa El Garrapiellu.

El Festival CinegailesAST premiará trabayos en tres modalidaes diferentes: la de Meyor Película, Meyor Curtiu, Meyor Documental, asina como los premios al Meyor Actor y a la Meyor Actriz, escoyíos pol públicu asistente a les sesiones oficiales competitives.

Sesiones de proyección de documentales y llargometraxes completarán les xornaes hasta’l sábadu 29 de xunetu cuando se fairá la Gala de Pieslle cola proclamación de ganadores.

Nel certame podrán participar trabayos preseleccionaos pol Festival CinegailesAST, en cualesquier formatu, y con cualesquier duración o añu de realización. El plazu presentación de trabayos termina’l 28 de xunu del 2006.