Samuel Armes homenaxea a Avilés nel cartelu del XXV Festival Intercélticu

Samuel Armes homenaxea a Avilés nel cartelu del XXV Festival Intercélticu de laVilla. Sobro la imaxe d’una gaita primixenia, l’artista afigura dalgunos de los monumentos más representativos del patrimoniu de la ciudá  nel cartel del Festival que va celebrase del 23 al 31 de xunetu.

Falten poco más de diez díes pal empiezu d’unu de los eventos culturales que marquen el branu n’Avilés, el Festival Intercélticu, que cumple so XXV edición, del 23 al 31 de xunetu. Y unu de los sos signos d’identidá ye’l cartelu, nesta ocasión xuna creación del artista local Samuel Armes, que plantega na so obra homenaxe a la ciudá.

El cartelu del certame foi presentáu esta selmana por Yolanda Alonso, conceyala de Cultura y Promoción de Ciudá d’Avilés, acompañada por Juan Luis Cases, presidente de l’agrupación cultural Esbardu, organizadora del festival, y por el mesmu Samuel Armes. Sobro la primixenia imaxe d’una gaita, Armes afigura de forma intuitiva dalgunos de los monumentos más representativos del patrimoniu de la ciudá, en conmemoración de les bodes de plata del Intercélticu. Asina, escondíos ente’l fuelle, el roncón o’l punteru pueden estremase el mesmu palaciu consistorial, el Centru Niemeyer, la ponte de San Sebastián, la estatua de Pedro Menéndez, la escultura Avilés del paséu de la ría o xuna chimenea de Ensidesa.

Armes ye unu de los cuatro artistes d’Avilés que dieron forma a los cartelos del Festival Intercélticu mientres estos 25 años, al pie de Luis Taboada, Miguel Solís y Vítor López, que destacaron nes sos creaciones pola so orixinalidá, siempres llamatives, máxiques, diferenciadoras. Dende aquel primer planu d’un gaiteru escocés  col que Luis Taboada inauguraba en 1997 la saga cartelista d’un certame, declaráu en 2008 Fiesta d’Interés Turísticu Rexonal, y que se convirtió nestos 25 años na gran referencia de la música celta n’Asturies, y unu de los más representativos del país.