Samartín del Rei Aurelio pon en marcha una campaña pa promocionar la toponimia oficial del conceyu

L’Ayuntamientu de Samartín del Rei Aurelio, aL traviés de la so Oficina de Normalización Llingüística, presenta esti xueves una nueva campaña destinada a reforzar l’usu de la toponimia oficial del conceyu, aprobada por decretu nel añu 2008. Pa ello editáronse 2000 chapes metáliques nes qu’apaecen recoyíos un total de 52 topónimos del conceyu. Sanamiés, La Güeria, L’Acebal, La Envernal o La Potoxa, ente otros munchos, son dalgunos de los nomes de llugar qu’apaecen reflexaos nestes chapes.

Tamién s’editaron pegatines col nome del conceyu y cartelos de la campaña col eslogan “Los nomes de llugar nun tienen preciu” que se van repartir per distintos edificios públicos de la zona como biblioteques, polideportivos o telecentros.

A too esto súmase la realización d’un videu nel que distintes persones lligaes a la cultura como Alfonso Zapico, Chus Pedro o Aurora Suárez, y tamién el propiu alcalde del conceyu, Enrique Fernández, animen al usu de la toponimia oficial. Esta campaña ta fecha en collaboración cola Rede de Normalización Llingüística nos Conceyos y cuenta col sofitu de la Conseyería d’Educación, Cultura y Deporte del Principáu d’Asturies.

L’actu de presentación va tener llugar esti próximu xueves 10 d’ochobre a les 7 la tarde na Casona del Bravial, y nel va participar la conceyala de Cultura de Samartín del Rei Aurelio, Gema Suárez Torre. Amás, va contase cola presencia del escritor y filólogu Xosé Lluis García Arias, que va ufiertar una charra sobre la toponimia del conceyu. García Arias cuenta na so trayeutoria con una amplia obra, sobre too ensayística y especializada en cuestiones del ámbitu llingüísticu, dedicando-y siempre una especial atención a les cuestiones rellacionaes cola toponimia y l’orixe de los nomes de los nuestros pueblos. Les persones qu’asistan al actu van poder llevar de regalu los materiales de la campaña.