Remedios Menéndez Calvo algama’l concursu de narrativa breve de Cangas

Remedios Menéndez Calvo algamó’l primer premiu del Concursu de Cuentos Breves n’asturianu del Conceyu de Cangas cola so obra “L.letra a l.letra”. L’escritor Xosé María Rodríguez quedó finalista del certame y Ezequiel Cala Arias llevó’l premiu al meyor relatu en variante occidental.

La madrilana d’orixen canguesu, Remedios Menéndez Calvo (1975)resultó ganadora del IV Concursu de Relatos Curtios en Llingua Asturiana “Ayuntamientu de Cangas del Narcea” pol so trabayu “L.letra a l.letra”, premiáu con 600 euros. Amás de ser galardonada nesti mesmu certamen n’anteriores ediciones, l’autora fue finalista del concursu de relatos hiperbreves de la editorial Alcumán nel año 2003 y una de les escritores incluíes nel volumen ‘Cuéntame’. Menéndez Calvo desarrolla la so actividá profesional na facultá de Derecho de la Universidá d’Alcalá de Henares.

Nel apartáu de meyor relatu n’ asturiano occidental, instituíu con oxetu de promover la creación nesta variante, el galardón fue parar a Ezequiel Cala Arias pol so cuentu “L.lobus d’anguano”. Colaborador habitual de la edición xixonesa de La Nueva España ente 1998 y 2004, también publicó en Les Noticies y El Canciu’l Cuélebre. Esta categoría tá dotada tamién con 600 euros.

Detrás del trabayu de Remedios Menéndez Calvo, resultó elexíu en segundu puestu el relatu ‘L’acabóse’, del cangués José María Rodríguez (1956), autor pioneru del Surdimientu y que recientemente publicó la novela ‘Tiempos de Nublina'(Trabe). A la fin Xuan Carlos Crespo Lanchas (1970) fue reconocíu pol so relatu ‘La hestoria de la muyer qu’escaeció cómo llorar y lo qu’aconteció cuando recordó’ con un tercer premiu de 180 euros. Crespos Lanchas, natural de Xixón, publicó esti mesmu añu na editorial Trabe “Poemes raros (de sangre seco)” y colaboró nes revistes Lletres Asturianes, Lliteratura, Reciella Malory y La Ratonera.

El xuráu taba presidíu pola conceyal de Cultura, Mónica Díaz y formábenlu el secretariu de l’Academia de la Llingua Asturiana, Roberto González-Quevedo; l’escritor Xuan Bello; el responsable del Serviciu de Normalización Lingüística de Cangas del Narcea, Nacho González; y la maestra d’asturianu Mar Llano. Los miembros del xuráu resaltaron l’altu númberu de relatos presentaos n’asturiano occidental amás de la mocedá de los participantes.