Publicaciones Ámbitu saca una colección de narrativa contemporánea n’asturianu

Publicaciones Ámbitu va distribuir dende güei, xunto col periódicu Les Noticies y por un preciu de 4 auros, l’últimu llibru de la escritora Berta Piñán, tituláu ‘La maleta al agua’. Nes prósimes selmanes van facer otro tanto les obres de Xandru Fernández, Pablo Antón Marín Estrada y Martín López-Vega.

‘La maleta al agua’ ye una colección de relatos curtios, estampes y poemes que toquen la temática de la emigración, repasando histories que van de la tenrura a lo dramático de les vides de los sos personaxes.

El siguiente volume lleva por títulu ‘El nuesu mar de los Sargazos’, de Xandru Fernández, autor que ta acabante sacar, con gran esitu, ‘Les ruines’. ‘Secretos y dos sombres’ de Pablo Antón Marín Estrada ye’l terceru de los llibros de la colección. Nel, Marín Estrada axunta una riestra de relatos con una temática común: la represión y cómo supervivir a ella. P’acabar, el más mozu de los autores d’esta serie, Martín López-Vega ufierta un viaxe hacia la infancia en ‘Parte meteorolóxicu p’Arcadia y redolada’.

Con ‘La maleta al agua’ de Berta Piñán, la editorial abre una colección de narrativa contemporánea asturiana cola que quier averar a los llectores a la lliteratura n’asturianu y que cuenta colos atractivos de les firmes que tán nella, por ser autores de gran calidá y prestixu, amás de pola asequibilidá del preciu col que salen a la cai.