Preséntase la edición facsimilar de la novela “Viaxe del tíu Pacho el Sordu a Uviedo”

Güei martes y como parte de los actos oficiales de la XXX Selmana de les Lletres Asturianes va presentase na Casa Cultura de Llanes, a partir de les siete la tarde, la edición facsimilar de la novela atopada l’añu pasáu nesti conceyu, y hasta entós perdida, “Viaxe del tíu Pacho el Sordu a Uviedo”.

La novela, escrita por Enriqueta González Rubín, espublizóse n’Uviéu nel añu 1875, anque hasta l’añu pasáu nun s’atopó nengún exemplar. Esta obra ye la primera del xéneru narrativu en volume propiu espublizada na hestoria de la lliteratura asturiana.

Nel día de güei va celebrase, amás una conferencia de la escritora Ángeles Caso col títulu “Las olvidadas: una historia de mujeres creadoras”, tamién na Casa Cultura de Llanes.

Mañana miércioles 6, los actos treslládense a Uviéu, onde los políticos asturianos van facer una llectura pública de testos n’asturianu nel Salón Europa de la Xunta Xeneral; y yá pela tarde, a partir de les 19 hores, va entregase’l Premiu Arbidel de cuentos eróticos en Ribeseya.

24/10/2008 Apaez un exemplar de la primer novela n’asturianu “El viaxe del tíu Pacho el Sordu a Uviedo” espublizada por Enriqueta G. Rubín en 1875