Política Llingüística presenta la campaña “La sidra, como siempre se dixo”

La Dirección Xeneral de Política Llingüística presentó nel Muséu de la Sidra de Nava la campaña «La sidra, como siempre se dixo», una iniciativa que quier dar a conocer ente la ciudadanía’l vocabulariu especificu vinculáu a la cultura sidrera, al traviés de 60.000 dípticos y 2.000 carteles que van repartise per tol país.

La imaxe central de la campaña supón un homenaxe del dibuxante Ernesto García del Castillo, Neto, al popular cartel «¿Qué tien la sidra?», realizáu va más de 40 años por Elías Antonio Garrido Barrientos (1933-2019), conocíu como Garrido. El recuerdu consiste na actualización d’aquella ilustración tan popular, incorporando la realidá social asturiana de güei, ensin perder la esencia, la tradición y l’humor qu’usó Garrido pa representar la cultura sidrera.

Los personaxes del cartel faen comentarios al respective de la sidra que tán bebiendo y pa eso usen delles de les munches espresiones tradicionales qu’existen pa valorar la sidra y que entá empleguen los asturianos davezu: “Ta de bandera”, “Fai bon vasu”, “Pue bebese”, “Ta cantarino”, “Rasca nel gargüelu”, etc.

La Dirección Xeneral de Política Llingüística va repartir ente les sidreríes el cartel nuevu, amás d’un folletu relativu al vocabulariu sidreru. Ta previsto distribuyir 60.000 dípticos y 2.000 carteles per tol territoriu.