Patricia A. Argüelles asoleya un llibru sobre les víes romanes

L’arqueóloga Argüelles Álvarez acaba d’asoleyar un llibru “La vía romana Lucus Asturum- Lucus Augusti”, nel que recueye un interesante trabayu qu’apurre nueva información sobre víes romanes n’Asturies. Amuesa’l trazáu d’una vía (el tramu Lucus Asturum- Passicin) malapenes conocida hasta la fecha, pesie a la so importancia mientres l’Imperiu Romanu. El so principal usu foi comunicar les esplotaciones auríferes del occidente asturianu.

El llibru, asoleyáu por Zahorí Ediciones, tien un gran interés hestóricu-arqueolóxicu, ufiertando, amás, una base sólida na qu’asitiar un posterior desenvolvimientu turísticu de la zona pola qu’escurría’l camín (conceyos de Llanera, Uviéu, Les Regueres, Grau y Salas).

L’autora

Ñacida en Xixón en 1983, Patricia A. Argüelles Álvarez ye titulada n’Arqueoloxía pola Universidá Autónoma de Madrid. La so investigación céntrase en calzaes romanes del norte peninsular. Amás trabayó en diversos proyectos en dellos países: China, Bélxica, Portugal… Anguaño realiza la so tesis doctoral sobre «Calzadas romanas en la Asturia Transmontana» na Universidá d’Uviéu.