Pablo Texón peñera les voces de la intimidá personal y el sentimientu colectivu nel so primer llibru de poesía

Pablo Texón Castañón (Felechosa, 1977)acaba de publicar el volume de poemes col que ganó en 2003 el premiu Nené Losada Rico: “Toles siendes”, una declaración de principios lliterarios que tien el sellu d’una nueva voz xeneracional y al empar xenuinamente personal.

Referencies a la esperiencia asimilada d’un llector y d’un home del so tiempu al que nun-y son ayenos los guiños de la cultura pop o del universu multimedia, una voz íntima y el verbu cenciellu de la poesía de llinia clara definen el conxuntu de poemes de “Toles siendes” (Trabe, 2005).

Texón Castañón nacíu en Felechosa en 1977 apurre nel so llibru dalgo más qu’un primer volume: toa una llección d’estrena nel panorama de les lletres asturianes más actuales. Una voz que busca el so propiu rostru ente les sombres de la realidá y un autor qu’al pesar de publicar la so opera prima amuesa la so destreza sabiamente ensayada en publicaciones disperses anteriormente. Agora axunta una colección cerrada de poemes onde s’albidren intenciones de continuar la serie en futures nueves entregues.