Pablo Rodríguez Medina y Pablo Texón ganen el premiu “Teodoro Cuesta”

El xuráu del prestixosu premiu de poesía “Teodoro Cuesta” anunció les obres ganadores de la edición de 2006. Pablo Rodríguez Medina y Pablo Texón algamaron ex-aequo esti premiu de poesía qu’añalmente convoca’l conceyu de Mieres n’alcordanza de Teodoro Cuesta.
Los poemarios presentaos fueron “Aires de mudanza” de Pablo Rodríguez Medina y “La culpa y la lluz” de Pablo Texón. El xuráu de la edición de 2006 taba compuestu por Vicente García Oliva y Xuan Santori, l’editor Antón García, el ganador de la última edición Pablo Rodríguez Alonso y la encargada del serviciu de normalización de Mieres Paula Pulgar, la presidencia del xuráu correspondió-y a Ana González, conceyala de Cultura, y la secretaría a Ismael Arias.

Nesta edición presentáronse a esta convocatoria, d’un premiu nel qu’el factor económicu pasa a un segundu planu pola relevancia y repercusión que tien algamada.
La primer ganadora del Premiu Teodoro Cuesta fue la escritora Berta Piñán en 1991 col so llibru “Vida privada”. Dende entós autores como Lourdes Álvarez, Xuan Bello, Esther Prieto, Xuan Santori, Xabiero Cayarga, Ana Vanessa Gutiérrez, Marta Mori d’Arriba, Xelu Gutiérrez Morán o Pablo Rodríguez Alonso son dalgunos de los ganadores d’esti premiu.