Hai yá dalgunos años que l’Asociación de Trabayadores de la Normalización Llingüística vien denunciando la situación de dexadez y desamparu que sufren una parte importante de les persones responsables de los SNLs asturianos, sometíes a unes condiciones llaborales cuanto menos precaries.

Cada añu, n’acabando l’exerciciu correspondiente, la mayoría de les persones responsables de los SNLs son cesaes n’espera de bones nueves nos presupuestos que garanticen la so continuidá mediante llinies de subvención pal mantenimientu de los servicios, rompiéndose con estes actuaciones la so actividá y cualquier esperanza d’estabilidá llaboral.

Pero ye que nesti 2014 la situación lloñe de mexorar vien empeorando, según amuesa l’Asociación de Trabayadores d’estos servicios nuna nota de prensa: “cesóse al personal responsable de los SNLs de Mieres, Llaviana y Castrillón, esti últimu de recién creáu y yá peslláu. Esti casu concretu ye especialmente sangrante, dao que se creo un SNL al que nun se-y dio continuidá nenguna y que pierde cualquier posibilidá de facelo nun futuru cola prórroga presupuestaria, que limita la percepción de prestaciones a los SNLs de traxectoria anterior al exerciciu últimu.”

Un añu más, l’Asociación diz que nun-yos queda otra que “protestar escontra la situación de recortes y precariedá que sufrimos, reclamando un compromisu mínimu por parte de les alministraciones que garantice un serviciu de calidá a la ciudadanía en materia de normalización llingüística y un marcu d’actuación dignu pa les persones que representemos a los diferentes servicios de normalización llingüística d’Asturies”.

Darréu d’ello, esixen “que los conceyos asturianos asuman estos servicios como propios garantizando la estabilidá de les persones responsables y un diálogu permanente cola Dirección Xeneral de Política Llingüística d’Asturies”. Y de la mesma manera, reclamen a la Dirección Xeneral de Política Llingüística d’Asturies “mayor implicación, una coordinación de calidá permanente y un apoyu y una coherencia pa coles funciones, qu’entendemos, comparten colos SNLs: asegurar una visibilización digna y n’igualdá de condiciones col español pal asturianu y l’eonaviegu na alministración pública, normalizar l’usu del asturianu y del eonaviegu fuera del ámbitu priváu y garantizar el cumplimientu de los distintos decretos de toponimia a nivel autonómicu y estatal”.

L’Academia de la Llingua Asturiana vien siguiendo con esmolición los continuos casos de discriminación llingüística que tán sufriendo los ciudadanos de Noreña a lo llargo d’estos años pola actitú del so alcalde, César Movilla, pa col usu de la llingua asturiana na vida diaria del conceyu. La cabera decisión del alcalde de refugar la petición d’un coleutivu de “Paraos y Precarios de Siero y Noreña” por tar redactada n’asturianu, ye una vegada más una falta de respetu hacia la llingua y la cultura asturiana, ya inda más, hacia’l propiu derechu de los ciudadanos del conceyu a usar la llingua d’Asturies.

N’efeutu, refugar el mentáu escritu cola xida de tener que tar “redactada en castellano, lengua oficial de esta Comunidad Autónoma”, da cuenta perfeutamente del allugamientu, oxetivamente anti-asturianu, del Sr. Alcalde y del so desconocimientu del marcu xurídicu qu’ampara’l derechu de los ciudadanos al llibre usu de la llingua asturiana. L’Academia de la Llingua Asturiana treslladó a la FSA-PSOE (partíu al que pertenez l’alcalde) la so más fonda preocupación y perplexidá énte esti nuevu atropellu a la llingua asturiana y encamentó-y poner igua a una actuación que, con toa xusticia, podría calificase de pre-constitucional y antiestatutaria.

En sometiendo a información pública’l borrador de revisión del Plan de xestión del Llobu, frente al que se presentaron en plazu numberosos allegamientos per parte de les asociaciones conservacionistes, ecoloxistes y ciudadanos en xeneral comprometíos col caltenimientu d’esta especie y cola de la Ñatura, la Conseyería d’Agroganadería despreció la totalidá de les mesmes ensin motivación dalguna, lo que s’alvierte a mediu del documentu presentáu al trámite d’audiencia según l’anunciu publicáu’l pasáu día 24 de xineru de 2014 na páxina institucional del Gobiernu autonómicu, de redacción prácticamente idéntica al presentáu nel trámite precedente.

Nuevamente, al traviés d’esti documentu, les asociaciones ecoloxistes constaten que la llamentable falta d’atención por tolo relativo al caltenimientu de la naturaleza “vien siendo’l sellu identificativo de l’actuación garrafal de la Conseyería de Agroganadería que reincide nes sos clamorosos erros de xestión del Patrimoniu Ñatural, abandonada, como de fechu ta, a la so propia incompetencia, so l’actuación de cargos políticos que’l so nomamientu foi anuláu por sentencia xudicial, quien, llueñe de dimitir, faen patente’l viciu de nulidá radical de los actos alministrativos nos qu’intervengan, ente ellos, el referíu Plan de Xestión del Llobu”.

Como yá se dixo, el documentu sometíu a audiencia ye pa los conservacionistes un ecu de la “perceguera y de les egoístes ya insolidaries reivindicaciones de ganaderos y cazadores, que la so xíriga asume ensin reparu dalgunu l’autor del documentu, faciendo de la llegalidá un exerciciu de pura escusa y pura evasiva que va ser oxetu d’enxuiciamientu ante los Tribunales de Xusticia d’esta rexón y d’instancies cimeres”.

El Conceyu de L.lena presentó la última campaña del Serviciu de Normalización Llingüística, el Calandariu de la Güerta n’Asturies col que pretende recuperar la tradición de la sema nel conciyu. Sigún se quixo dexar afitao na presentación fecha esti martes pela mañana en La Pola, L.lena ye un conceyu de gran tradición agrícola, que tenía y tien na tierra’l frutu de munchu trabayu de los homes y muyeres de la zona.

Dende’l SNL quieren contribuyir a que nun se pierda la tradición de trabayar y cuidar la tierra y sobre manera de facelo n’asturianu. Por ello, la edición d’esti calandariu fai un recorríu peles distintes fases de la sema y recoyida de verdura y hortalices. Amás, acompáñase de dellos refranes y una guía breve de les fases llunares qu’hai de tener en cuenta pa la sema.

El calandariu, editáu a comuña col SNL de Llaviana, recibió subvención de la Conseyería de Cultura y Deporte por ser un proyectu destináu a la normalización social del asturianu. Editáronse 2.000 exemplares de los que se va facer repartu na zona rural, y na oficina del Serviciu de Normalización Llingüística de L.lena, asitiáu na Oficina de Turismu de La Pola.

Pal 2014 la idea ye siguir nesta llinia de trabayu y van editase materiales qu’apoyen el llabor que se vien desenvolviendo nes escueles públiques de L.lena onde trabayen y conciencien a los neños de la importancia de cultivar y cuidar la tierra. Editaránse materiales pa que la llingua asturiana siga siendo’l vehículu de tresmisión de los llabores agrícoles.