La Fundación Belenos vieno acabante d’asoleyar esta selmana pasada’l númberu 34 de la so revista, “Asturies, memoria encesa d’un país”, na qu’amás de les estayes habituales, como Memoria Gráfica d’Asturies, nesta ocasión firmada por Antón Álvarez Sevilla y dedicada a apurrir dellos datos ya imáxenes sobre les nueses races autóctones nun asoleyaos enantes en trabayos de so, y Cartafueyos de Belenos, la espublización recueye trabayos de munchu interés como’l firmáu por García Arias alrodiu del celtismu llingüísticu n’Asturies.

La llista d’artículos d’esti númberu 34 entámala “Averamientu a la ecoloxía de los conceyos asturianos del Altu Navia” por Fernando Montes García y síguela “Una reflexón sol celtismu llingüísticu asturianu” de Xosé Lluís García Arias, tres del que pue lleese l’artículu “Afayu d’una estela con decoración castreña n’Antrialgu (Piloña)” por mor de la investigación d’Ástur Paredes, Daniel Cueli Canto y Alberto Álvarez Peña.

Completen esti númeru dellos otros artículos como “El guerreru durmiente” d’Alberto Álvarez Peña; “El palu: un arma na tradición asturiana” de Gausón Fernande Gutierri, “Catalogar pa protexer: el padremuñu etnográficu del conceyu de Cabrales” de Diego Ruiz de la Peña Ruiz y Alberto Álvarez Uría y “El “Celta o Astur”, una escultura de Folgueras” de Lluis Portal Hevia. El caberu de los artículos col que se pieslla’l númberu ye “Cill Áirne: trenta años d’un viaxe iniciáticu a la verde Erín” firmáu por Ignaciu Llope.

La revista va distribuyise ente los suscriptores nos prósimos díes y yá se pue mercar nes llibreríes Ojanguren (Uviéu), Paradiso (Xixón) y Rima (L’Infiestu).

Esti próximu sábadu 16 d’agostu celebraráse un “Ancontro Blogueiros de l Praino” na comarca portuguesa de Miranda dl Douro, que comparte llingua con Asturies, y onde la llingua asturiana, nomada ellí “mirandés”, tien reconocencia oficial. Nestos actos participarán represenantes d’entidaes de tol dominiu llingüísticu. Los representantes asturianos serán Iniciativa pol Asturianu y xunta ellos tarán Faceira de Lleón, Furmientu de Zamora, la entidá asturlleonesa El Teixu y l’Associçón de Lhéngua i Cultura Mirandesa.

Los actos van entamar a les 9 la mañana cola presentación del pendón del llugar, visita al llugar y llectura de versos en toles variedaes del dominiu llingüísticu. Darréu de la xinta, celebráse una rolda d’intervenciones que va abrir Amadeu Ferreira, de l’Associaçon de Lhéngua i Cultura Mirandesa. De siguío, Fernando Álvarez-Balbuena, d’El Teixu va falar “De Llenguas y Fronteiras”, “Mirandeses y llioneses: Dous Puebros Vecinos y Hermanos” sedrá la charra de Ricardo Chao, de Faceira.

Pela parte d’Iniciativa pol Asturianu, representada pol so presidente, Inaciu Galán, daráse llectura a la conferencia “¿Qué podemos facer xuntos pola nuesa llingua?”, echando’l pieslle a les charres. La conferencia va parase nes distintes acciones que dende la entidá asturiana camienten que ye posible poner en marcha pa trabayar a favor de la llingua común compartida por asturianos, lleoneses y mirandeses, mesmo nel ámbitu llocal, como nel internacional, onde la situación de la llingua asturiana preocupa a entidaes como’l Conseyu d’Europa, la UNESCO o l’Altu Comisionáu de Drechos Humanos de la ONX.

El númberu 127 de la revista mensual “La Sidra”, correspondiente al mes de xunetu, yá ta disponible on line pa la so llectura y descarga. Nesti númberu tien como conteníos destacaos reportaxes sobre la sidra DOP y sobre eventos sidreros en Nava y Candás, ente otros. Como siempre, los llectores puen atopen les distintes seiciones que recueye davezu la revista: artículos, entrevistes,ect.
Númberu 127 de La Sidra

La xunión de los grupos parlamentarios de PSOE y PP algamaba esta mañana 27 votos na Cámara asturiana y daba aprobación a la reforma de la llei que regula’l funcionamientu del la RTPA, antelas crítiques de Foru, IX y UPyD col proyectu que modifica’l modelu de xestión y pon en dulda’l modelu de comunicación pública al ser sofitáu por dos partíos que se manifestaron siempres nes antípodes al aldericar sobre la comunicación audiovisual de titularidá pública.

El Proyectu de Llei de segunda reestructuración del sector públicu autonómicu foi aprobáu cola votación de 64 enmiendes y les crítiques dende Foru, onde la so vocera, Cristina Coto, aseguró que too yera una pantomima y que lo que se pretendía yera tapar cola creación d’una nueva sociedá mercantil el xigantescu furacu del sector públicu asturianu. La vocera de Foru calificó la xestión de la RTPA y la so política de personal como “impresentable” y llamentó que la cúpula tuviera totalmente politizada, sollertando de posibles irregularidaes nesa xestión que comparó cola del Niemeyer.

Tamién foron bien críticos UPyD ya IX, que fixeron fincapié na necesidá d’ameyorar la tresparencia, la pluralidá y la calidá, llamentando tamién l’enclín a la politización. La diputada d’IX Noemí Martín punxo de manifiestu’l so apueste por impulsar l’usu del asturianu na programación, delantre miembros de la ‘Xunta pola defensa de la llingua’ que siguieron l’alderique dende la tribuna d’invitaos.

PSOE y PP dieron argumentos económicos favorables a la llei y criticaron la falta de propuestes de la oposición, a la qu’acusaron de alentar el mieu ente los trabajadores del Ente en llugar de negociar.

Esti martes pasáu, a les 22.50 hores, estrenose la segunda temporada de ‘El Club Musical’,el programa de TPA dirixíu y presentáu por Xune Elipe qu’abría esta serie de 13 programes con Losone y los temes del so álbum debú ‘Umbilical’. Col asturianu como llingua vehicular, esti programa de la televisión pública del país producíu por Goxe Producciones trai novedaes con respeuto a la primer temporada, sobre manera nel campu estéticu y visual.

Ente les novedaes alcuéntrase una realización “más atractiva y moderna”, a cargu de Javier Lueje, amás de la incorporación d’elementos d’atrezzo nel escenariu, una illuminación renovada, una sintonía nueva compuesta por Jorge Cambareli, más seiciones y un montaxe más dinámicu. Tamién se presenta un logu nuevu y esclusivu, obra del diseñador JM Navarro.

La dinámica va ser la mesma, con una entrevista al grupu convidáu y la interpretación de delles canciones sobre un escenariu, que nesta ocasión va ser el del Teatru El Llar de Los Campos (Corvera), “qu’ufierta unes condiciones acústiques y estétiques perafayadices” comenten dende Goxe. La esceición única ye l’episodiu protagonizáu por Fe de Ratas –va emitise’l martes próximu–, que se grabó na ilesia reconvertida en pista de skate asitiada nel Polígonu d’Asipo (Llanera). Pa dar más conteníu al programa, nesta segunda temporada incorpórase una seición na que dellos personaxes rellacionaos col mundu de la música n’Asturies –intérpretes, periodistes, llocutores, fotógrafos, realizadores, productores…– van facer una recomendación, yá sía de llibros, películes, esposiciones, discos o festivales. D’igual forma, nos capítulos finales va incluyise’l comentariu sobre un cómic que tenga ambientación musical, ente otres novedaes temátiques.

Los encargaos d’abrir esti segundu bloque de programes de ‘El Club Musical’ foron Losone, banda que bebe de dellos estilos y que, tres dellos años de conciertos y cambios na so formación, sacó nel 2013 el so primer álbum, ‘Umbilical’ (Algamar Producciones), con un soníu propiu que ta dando muncho que falar dientro y fuera d’Asturies. Tres d’ellos, el públicu va poer conocer de primer mano, tolos martes a les 22.50 hores, a otres munches bandes del país qu’abarquen soníos que van dende’l rock sureñu, el folk, el swing o’l punk a la canción d’autor, el hip hop, l’indie o’l jazz. El llistáu completu d’esta temporada ye’l siguiente: Losone, Fe de Ratas, Silvia Quesada, Eladio Díaz Control Z, La Tarrancha, Tyfpe, Trashtornados, Tejedor, Queen Bitch, Corquiéu, Eye in the sky y Dixebra. Amás, dedícase un programa especial al hip-hop nel que van participar Arma X, 13 Palabras y K-Nalón. Dende Goxe destaquen que’l porcentaxe de grupos qu’empleguen l’asturianu nesta etapa ye “peraltu” y apunten qu’un de los oxetivos del programa ye presentar a la llingua como “un vehículu de comunicación venceyáu a les xeneraciones más nueves y nun contestu de modernidá”.

Depués de conociese esti miércoles que PSOE y PP s’apautaran definitivamente nun alcuerdu pala llei nueva de la RTPA. la Xunta pola Defensa de la Llingua Asturiana (XDLA) calificábala esti día de “antidemocrática y privatizadora” al tiempu que “sigue marxinando sangrinamente al asturianu”. La organización diz nuna nota de prensa asoleyada güei que “fundirá l’Ente definitivamente na precariedá llaboral, el clientelismu y la manipulación política”.

Esti xueves 17 de xunetu, el plenu de la Xunta Xeneral va aprobar colos votos de PSOE y PP la llei que va regular la RTPA y que “supón la lliquidación de les esperances que tovía pudiera tener la ciudadanía de tener unos medios de comunicación públicos al servicio d’Asturies”, pala XDLA. La redacción conocida hasta esti momentu amuesa “la voluntá de la morrebunda clase dirixente asturiana d’impedir a cualquier preciu que la televisión y la radio de tolos asturianos y asturianes sirva como ferremienta de normalización y visibilización social de la nuestra llingua y como plataforma pa la industria audiovisual asturiana”.

Pero nun ye solo eso, la mayoría de les demás disposiciones de la llei “van encaminaes a privatizar, afogar y precarizar a la xente que trabaya nel Ente y a rebaxar hasta dexar irreconocible la calidá democrática del testu. Nun s’esplica d’otra manera coses como que’l director xeneral pueda acabar siendo un cargu a perpetuidá y ensin control democráticu o que se nome miembros de los conseyos, como el d’alministración, por 6 años… más de lo que dura una llexislatura y un evidente deliriu de poder col oxetivu d’amarrar con puñu de fierro la televisión hasta nin más nin menos que l’añu 2020”.

Por too ello, na XDLA consideren que se trata d’un testu insultante desde’l puntu de vista democráticu y demoledor pal futuru del idioma. Y por eso van tenenos siempre en contra de la so maquinaria mediática de sustitución llingüística reivindicando unos servicios públicos que tengan como prioridá a la xente d’Asturies y a la so llingua”.

Nun exemplu más de la esquizofrenia del gobiernu asturianu, el SEPA vieno acabante de contratar un serviciu d’atención d’emerxencies que funciona dende 2009 n’Andalucía y qu’atiende en 51 llingües, ente les que s’alcuentren munches que nun son oficiales nos sos países d’orixe, pero escaecíendose del asturiana. Un emigrante de gambia o Mauritania pue ser atendíu nuna de les llingües locales como’l Wolof, pero un asturianu enxamás sedará atendíu na so llingua materna. Debe ser qu’aprobarase una llei de promoción del suniki o el Wolof n’Asturies y nadie nun s’enterara.

El Serviciu d’Emerxencies del Principáu d’Asturies (SEPA) punzo recién en marcha un sistema de traducción que va dexar atender les llamaes d’emerxencia, en casu de necesidá, en 51 llingües distintes, ente lesque nun s’alcuentra l’asturian. Esti serviciu de teleinterpretación, disponible les 24 hores del día mientres tol añu, ufierta un procedimientu d’accesu automatizado qu’en menos de 30 segundos contacta con un intérprete pa que realice una traducción secuencial, na llingua materna de la persona que llama, de la conversación que caltienen los interlocutores al traviés de la llínea del 112. Faise en gallego, n’Euskera, en Catalán.. pero debe ser enferma difícil facelo n’asturianu.

Hasta agora, el 112 garantizaba l’atención n’inglés y francés, cuidando que tantu a los coordinadores como a los operadores d’esta llínea esíxese-yos la conocencia d’una d’estes llingües.

Esta ferramienta de teleinterpretación supon una importante meyora na calidá de l’atención que s’empresta al ciudadanu, que va poder comunicase con el operadores del 112 na so llingua materna de forma rápida y eficaz. Estes condiciones son especialmente importantes en situaciones d’emerxencia, nes que resulta fundamental caltener una comunicación lo más fluyida posible cola persona que solicita ayuda pa responder a les sos demandes con eficiencia.

Amás del inglés y francés, el sistema dexa la traducción simultánea al alemán, italianu, portugués, xaponés, chinu mandarín, rusu, árabe, polacu, farsi, bambara, suniki, noruegu, suecu, checu, finés, griegu, turcu, rumanu, ucranianu, tailandés, eslovenu, wolof, lituanu, hindi, poular, holandés, húngaru, búlgaru, brasileiro, chinu cantonés, eslovacu, servio-croata, danés, coreanu, urdu, armeniu, mandinca, afganu, albanés, bereber, bosniu, taiwanés, xeorxanu, persa y siriu. Tamién ufierta interpretación de gallegu, euskera y catalán.

La empresa Dualia va ser la encargada de poner en marcha esti sistema, que supon un costu añal de 5.200 euros. La compañía tamién empresta esti serviciu desde hai más de seis años a gobiernos como Galicia, Murcia y Andalucía, el 112 d’Aragón y los servicios de salú de Madrid, Estremadura, Castiella-La Mancha y Castiella y Llión.

Iniciativa pol Asturianu vieno acabante denunciar so descontentu “pola nula presencia de la promoción del asturianu na nueva llei de la RTPA, que va aprobase en comisión de la Xunta Xeneral esti llunes que vien”. La llei nun sigue, al so xuiciu l’espíritu del artículu cuartu del Estatutu d’Autonomía d’Asturies, onde s’especifica que “va promovese la difusión del asturianu nos medios de comunicación”, asina como la Llei d’Usu del Asturianu de 1998, que nel artículu 13 ye mui clara: “El Principáu d’Asturies va contribuir a la difusión nos medios de comunicación del asturianu”.

Iniciativa pol Asturianu caltuvo estes selmanes atrás contactos con formaciones polítiques buscando un cambiu nesti proyectu de llei que podría suponer un importante pasu alantre pa la llingua asturiana. Dende la organización queremos felicitar a Izquierda Xunida y Foru Asturies poles enmiendes presentaes al testu orixinal pa que nel artículáu de la llei se ficiere una mención específica al usu y promoción del asturianu per parte de la RTPA.

Amás, Iniciativa pol Asturianu firmó xunto a otres munches entidaes, sindicatos y partíos, el documentu “Cinco puntos por unos medios públicos al serviciu d’Asturies”, presentáu na Academia de la Llingua Asturiana nel mes de febreru. Na nota de prensa qu’asoleyara tres de la xunta con Foro Asturias, “namás queda esperar agora a que PP y la FSA-PSOE entren en razón y camuden el testu pa permitir que la RTPA seya una ferramienta útil pa la difusión de la llingua asturiana, lo que ye de sentíu común, y ta acordies colos resultaos de les audiencies, que dan un mayor ésitu a los programes emitíos n’asturianu na canal”.

La segunda llei de reestructuración del sector públicu, qu’afecta a la xestión de la Radiotelevisión del Principáu (RTPA) va salir alantre nel plenu de la Xunta Xeneral d’esti xueves, col apoyu de PSOE y PP, y ente les crítiques del restu de partíos, qu’acusen a dambes formaciones d’amagostar un usu partidista ya interesáu al ente de comunicación autonómicu no que deba bien a les clares el desinterés en construir un ente de comunicación publicu con futuru. Va ser una de les cuatro lleis que previsiblemente salgan aprobaes esti xueves después de que se trataren esti llunes, na Xunta de Voceros.

Les otees trés lleis que se camienta saldrán alantre son la de Reforma de la Función Pública, la de Cambiu de la Llei de Comerciu y la creación del Colexu d’Educadores Sociales.

Foro Asturias, IX y UPyD ficieron perdures crítiques güei contra la reforma qu’afecta a la RTPA, polla eliminación del actual Ente Públicu de Comunicación y la fusión de les otres trés sociedaes -Radio del Principáu, Productora de Programes y Televisión del Principáu- nuna única que va pasar a denominase Radio Televisión del Principáu. Tamién va reducise dafechu’l númberu de miembros del Conseyu d’Alministración, disculpa cola que’l PP amaña la so participación bel pautu.

Dende Foro Asturies, les crítiques centrense nos 160 millones d’euros que costó RTPA pa camudar agora nuna sociedá mercantil que puea vendese en cualquier momento. Y n’Izquierda Xunida averense a la consideranza d’alcuerdu partidista sin nenguna voluntá de sumar a los dos grupos.

Mañana miércoles 9 de xunetu, a les 17 hores, L’Arribada programa na Carpa del Encuentro, en dientro de la XXVII Semana Negra, la presentación del llibru” L’espeyu onde miranos. Televisiones de proximidá n’Europa Occidental y procesos de recuperación identitaria”, de Damián Barreiro, obra que llogró el VI Premiu Fierro Botas que convoca añalmente l’Ayuntamientu de Gijón / Xixón. Nesti actu tará l’autor del llibru, la representante d’Ediciones Trabe Eshter Prieto y l’escritor Humberto Gonzali.

Damián Barreiro Maceiras (A Estrada, Pontevedra, 1984) ye periodista. Tres de ser redactor demientres años del selmanariu Les Noticies y n’Asturies.com, amás de presentador en dellos programes de TLG, la televisión local de Xixón, collabora nel periódicu Diagonal Asturies, na sección «Escolinos» del diariu La Nueva España y n’otros medios asturianos.