Muerre a los 87 años Mánfer de La Llera, decanu de les lletres asturianes y hestóricu defensor de la llingua

L’escritor y académicu de la Llingua Mánfer de La Llera morrió esta mañana en Xixón a los 87 años. La noticia conocíase a poco de producise’l fallecimientu y causó una fonda conmoción nel senu del movimientu asturianista y del mundu lliterariu asturianu, de los que Mánfer yera un referente moral. Padre del responsable de la Oficina de Política Llingüística Ramón d’Andrés y del tamién escritor Vital d’Andrés, l’autor de “Cabalgando sol tiempu”, “Coses vivíes” y decanu de les lletres asturianes va recibir un homenaxe de los sos familiares y amigos nuna ceremonia civil nel Tanatoriu de Xixón.

Amigos y xente del mundu de la lliteratura y la cultura asturianes van xuntase mañana pela tarde en Xixón pa despidir a Mánfer de la Llera nun homenaxe que la familia quier íntimu y nel que dellos poetes en llingua asturiana xunta al cantautor Toli Morilla remembrarán la figura del escritor llangreanu.

Mánfer de la Llera, alcuñu lde Manuel d’Andrés Fernández nació en Les Cuestes de Ciañu (Llangréu) en 1918, trabayó dende bien nenu na mina, un oficiu al que diba dedicar parte de la so vida y de la so obra lliteraria. Vivió mui cerca los sucesos de la revolución del 34 y combatió na guerra civil pola causa republicana, destacándose mientres la dictadura franquista como un resaltáu militante poles llibertaes y fundador del movimientu reivindicativu de los pensionistes asturianos. Amás del so trabayu como mineru desenvolvió llabores profesionales como corresponsal de “La Nueva España” en Llangréu y collaboró en diversos medios periodísticos d’Asturies abondos años. Los sos primeros trabayos en llingua asturiana foron monólogos y poemes sobre’l mundu de la mina. Nos años setenta vinculóse enfotáu al incipiente movimientu asturianista atropáu alrodiu de l’asociación Conceyu Bable, de la que diba ser el so últimu presidente. En 1981 Mánfer de la Llera formó parte de la primer promoción d’académicos de la Llingua nel empiezu d’esta institución. L’escritor llangreanu foi tamién el coordinador de la sección n’asturianu “Alitar” del diariu El Comercio a lo llargo de casi dos décades.

Como escritor, Mánfer, ye autor d’una amplia y diversa obra anto en llingua asturiana como en castellanu, con títulos como “Cuentos en verso asturiano”(1953), “Cielo bajo tierra”(1982), “Garrapiellu lliterariu asturianu”(1982) y “Cabalgando sol tiempu”(1990). En 1998 publicó un llibru d’alcordances tituláu “Coses Vivíes”. Manuel d’Andrés Fernández ye autor tamién del “Vocabulariu asturianu de la mina”(1997) y d’una nueva edición ampliada d’esi trabayu fecha en collaboración col so fíu Ramón d’Andrés.

Cola perda de Mánfer de la Llera la nuestra lliteratura y el movimientu pola defensa de la llingua pierde una referencia moral y hestórica de primer orde. Mañana amigos y xente del mundu de la cultura asturiana van despidilu en Xixón con un homenaxe cenciellu, talo yera esti lliteratu humilde y honestu que quiso escribir del mundu que conocía y les inxusticies arreyaes a él, y quiso facelo na llingua de los suyos nun tiempu nel que nun yera fácil facelo.