MIAS refuga les xornaes de tauromaquia n’Asturies

Les Mocedaes d’Izquierda Asturiana (MIAS) amosaron el so esmolecimientu ente les prósimes xornaes de tauromaquia que se van dar nes fiestes de L’Ascensión n’Uvieu, llamentando “l’apoyu que les alministraciones asturianes dan a esti tipu d’actos nos que s’asesinen de manera violenta y gratuita a decenes d’animales”.

MIAS considera la importación d’estes actividaes a la cultura asturiana “un intentu de dignificación d’un elementu alóctonu, yá de per se indignu y dañible”, poro propón la tresformación integral y sostenible col ambiente urbanu de les places de toros, “faciendo un apueste poles manifestaciones culturales públiques alternatives, educatives y lúdiques”.

Nesi sen, Mocedá d’Izquierda Asturiana va repartir carteles alusivos y va participar nos actos que refugando esta realidá condenable per estes feches tán empezando a organizase.