MIAS posicionase énte un “nuevu insultu” del presidente Areces a la mocedá asturiano

La Mocedá d’Izquierda Asturiana dexixe-y a Areces “menos insultos y mentires y más fechos y propuestes series” Les últimes declaraciones del presidente asturianu afitando que “la mocedá d’Asturies emigra porque la so cualificación ye meyor a les d’otres comunidaes autónomes” son calificaos dende la organización xuvenil de la izquierda asturiana como insultos y mentires desixendo MIAS “más fechos y propuestes series”. Pal portavoz nacional de MIAS, Carlos Suari Rodrigue, ““esti fechu constitúi, una vegada más, un insultu per parte del presidente asturianu, que tornó a desmentir l’éxodu de miles de moces y mozos asturianes y asturianos cada añu a la gueta d’un trabayu dignu”.
Suari diz que “esti gobiernu de la esquierda plural non solo nun foi quién a desendolcar midíes afayadices pa evitar la emigración forciada de la mocedá sinon que tracamundia datos pa xustificase y engañar a la sociedá asturiana” fechu que’l portavoz de MIAS topa “gravísimu” anque afita que “nun son a engañar a naide, porque toes y toos conocemos bayura de casos de mocedá titulao que nun ye a topar un emplegu acordies cola so capacitación nesti País”.
Nesti sen, Carlos Suari quixo apuntar que “les declaraciones una tres d’otra del presidente Areces nun fain más qu’aumentar la indignación y l’enfadu de les families asturianes que ven colar a les sos fíes y fíos acullá de les nueses llendes”. Carlos Suari Rodrigue demandó “una política seria d’emplegu onde s’igüe la problemática de la emigración de la mocedá asturiano, ún de tantos fechos sangrinos que tamos padeciendo con estos malgobernantes”, polo que desixó “menos insultos y mentires y más fechos y propuestes series” pa rematar con un “¡Yá ta bien d’agresiones, Sr. Areces!”. El presidente asturianu fizo unes declaraciones nes qu’afirmaba que “la bona formación de la mocedá asturiano facilitaba que fuera demandada pa trabayar n’otres comunidaes autónomes” asina mesmo reconocío que los planes de trabayu pa la mocedá titulao nun diben solucionar l’éxodu xuvenil.