El Conseyu de la Mocedá de Xixón entama la segunda fiesta d’asociaciones.

Dende’l xueves 27 de xunetu hasta’l domingu 31 la playa de Poniente de Xixón tendrá la II fiesta d’Asociaciones. La iniciativa del Conseyu de la Mocedá de Xixón busca ufrir un espaciu de convivencia pa los diferentes grupos participativos de Xixón y Asturies nel que poder amuesar les aiciones, proyectos y problemátiques d’esti colectivu. La fiesta ta abierta a asociaciones xuveniles, culturales, sociales, polítiques, sindicales. Amás de les presentaciones de les entidaes tamién hai espacios pa les artes, y ente éstes hai que destacar el conciertu de Dixebra’l sábadu 29 a les 22,30 hores.
El presidente del Conseyu de Mocedá de Xixón, Jordi Suárez, afirmó ayeri, na presentación de la fiesta, que “l’oxetivu de la fiesta nun ye otru que’l d’informar a la mocedá de tou’l movimientu asociativu qu’esiste” asina como amuesa-yos los proyectos ya idegues que se tan poniendo a funcionar nos barrios y ciudaes”. Na presentación tuvo tamién el presidente del Conseyu de la Mocedá d’Asturies, Paulino Feito, que dixo qu’hata esti momentu naide nun s’atreviere a facer dalgo asina, dando asina respuesta al interés qu’amuesen los xóvenes pol asociacionismu”
El Conseyu de Mocedá de Xixón ye un puntu d’alcuentru de les Asociaciones Xuveniles de Xixón. Faen actividaes empobianes a promocionar y sofitar a les asociaciones pal desendolcu de les sos actividaes, asina como a la formación en diferentes temes d’intervención o relacionaos cola problemática xuvenil mesmo de los cabezaleros, como de los voluntarios o asociaos de les mesmes.