Méndez de Vigo refuga qu’el ‘Guernica’ viaxe a Euskadi

El ministru d’Educación, Cultura y Deporte, Iñigo Méndez de Vigo, aseguró na fin de selmana que “ye imposible mover” el ‘Guernica’ de Picasso poles sos “descomanadamente difíciles” condiciones de caltenimientu y animó a visitar la esposición que-y rindirá homenaxe nel 80º aniversariu de la so creación nel Muséu Reina Sofía.

En declaraciones a los medios, el ministru pronuncióse d’esta manera minutos antes de visitar el Muséu de Belles Artes de Bilbao, preguntáu pola posibilidá de que puedan ser atendíos los repitíos pidimientos de treslláu d’esta obra a Euskadi.

Méndez de Vigo esplicó que, pol aso “azarosa vida”, esta obra tien “unes condiciones de caltenimientu descomanadamente difíciles”. “El ‘Guernica’ ye imposible movelo”, afirmó’l ministru, qu’esplicó qu’apocayá lo pidieron pa México y dixi que nun se puede tocar”.

El ministru destacó que, con motivu del aniversariu de la so creación, diseñóse “una pergrande esposición” nel Muséu Reina Sofía, onde s’atopa dende fai 25 años, a partir del mes d’abril pa “rindir l’homenaxe que merez esi gran cuadru”. Según indicó, va ser “la gran esposición d’esti añu en Madrid y n’España”.