Médicos del HUCA atopen un patóxenu nos ácaros del polvu que favorez les enfermedaes respiratories

Un equipu d’investigadores del Serviciu d’Anatomía Patolóxica II del Hospital Universitariu Central d’Asturies (HUCA) informaron güei del descubrimientu d’un nuevu patóxenu, más concretamente d’un protozóu flaxeláu, presente nos ácaros del polvu que, en contactu en seres humanos inmunodeprimíos, puen provocar l’apaición de patoloxíes de carácter respiratoriu, principalmente asma.

Según esplicó en rueda prensa, l’ex xefe del Serviciu de Patoloxía del HUCA, el doctor Andrés Ribas Barceló, el descubrimientu d’esti protozóu “abre una puerta” hacia l’estudiu del asma. L’atopadura d’esti axente patóxenu tien, poro, especial relevancia nuna rexón como Asturies, na que’l diez por cientu de la población tien asma. “Y lo más preocupante ye que’l cinco por cientu nun lo sabe”, afirmó’l doctor.

Nesti sen, el citólogu y investigador, Rafael Martínez Girón, explicó qu’estos protozoos, al tar nel interior de les víes respiratories, dañen la barrera de los bronquios. Esta situación pue provocar que los pacientes inmunodeprimíos, al ponese en contactu col polen, los escrementos de los ácaros o otres sustancies que puen ser alérxiques, desarrollen asma. “Nun tamos diciendo qu’estos protozoos provoquen asma, sinón que favorecen l’apaición de l’alerxa respiratoria”, afirmó l’espertu.