Marta Mori y Xosé Ánxelu Gutiérrez algamen el premiu de poesía ‘Teodoro Cuesta’

Los versos de Marta Mori y Xosé Ánxelu Gutiérrez Morán ganen el XIV ‘Teodoro Cuesta’. Los dos autores repartiránse los 4.000 euros del prestixosu galardón de poesía en llingua asturiana, depués que’l xuráu del certame, entamáu pol Ayuntamientu de Mieres, decidiera ayeri por unanimidá galardonar los sos poemarios, ‘El tiempu de la espera’ y ‘Países’, respectivamente.

A la fase final del concursu llegó un tercer poemariu orixinal, pero finalmente el xuráu determinó reconocer por igual la calidá de los trabayos presentaos pol biólogu avilesín Xosé Ánxelu Gutiérrez Morán y la profesora xixonesa Marta Mori, que suceden nel palmarés del certame a Ana Vanessa Gutiérrez, vencedora na edición de 2003.

Esta autora formó parte’l xuráu qu’ayeri premió a Mori y Gutiérrez Morán, del qu’amás formaron parte José Luis Argüelles, Antón García, Vicente García Oliva y Ramón D’Andrés, toos ellos baxo la presidencia de la conceyala delegada de Cultura de Mieres, Beatriz González Prieto.

Falláu habitualmente na primer quincena del mes d’avientu y dotáu con un premiu en metálicu de 4.000 euros, el premiu ‘Teodoro Cuesta’ ye ún de los más emblemáticos galardones que distinguen a los meyores creadores de poesía en llingua asturiana. Nel so palmarés figuren, ente otros, los escritores Berta Piñán, Xuan Bello y Antón García.