Portada Lliteratura Mánfer vuelve a Llangréu pa quedar n’alcordanza de la tierra que más quiso

Mánfer vuelve a Llangréu pa quedar n’alcordanza de la tierra que más quiso

by asturnet

Una ceremonia civil nel tanatoriu de Xixón va despidir al escritor y académicu de la Llingua Manuel d’Andrés Fernández, Mánfer de la Llera, arropielláu polos sos familiares y compañeros del mundu de la cultura asturiana. Versos y palabres na llingua pola que lluchó infatigablemente el poeta llangreanu van xuntase nun homenaxe d’urxencia a l’alcordanza del últimu presidente de Conceyu Bable, una referencia moral del movimientu pola revitalización del asturianu y ponte ente les xeneraciones anteriores al Surdimientu y les nueves. Darréu los restos del escritor van treslladase a Llangréu onde la familia quier espardir les povises cerca la tierra que tanto amó.

A última hora de la tarde d’ayer, mientres los familiares de Mánfer de la Llera, recibíen l’arropu de la xente qu’acudiera al tanatoriu de Cabueñes, Ramón d’Andrés, fíu del escritor remembraba énte’l so amigu Carlos Rubiera y un pequeñu círculu d’allegaos la llucidez qu’acompañó a so padre hasta’l final de la so enfermedá. L’académicu y responsable de la Oficina de Política Llingüística alcordábase emocionáu de la manera na que Mánfer siguía interesándose pola actualidá y pendiente del so llabor lliterariu, preguntando pola última edición del semanariu “Les Noticies” o la recién entrega de la sección “Alitar Asturies” del diariu El Comercio, onde siguía collaborando y que coordinara a lo llargo de casi venti años. Güei la familia del escritor llangreanu va vese arropiellada por amigos y compañeros del mundu de la cultura asturiana na ceremonia civil que va rendir homenaxe a l’alcordanza del autor de “Cielo bajo tierra” y “Cabalgando sol tiempu” nel tanatoriu de Cabueñes, en Xixón.

Mánfer de la Llera, nacíu en 1918 en Les Cuestes de Ciañu (Llangréu), representó dende los inicios del movimientu pola recuperación de la llingua asturiana, al que bien lluego se xuntó, la ponte de xuntura ente les xeneraciones nacíes nes primeres décades del sieglu XX y les qu’entamaron a mediaos de los años setenta el proyectu cultural de Conceyu Bable pa esparder la necesidá de remanecer una nueva concencia democrática p’Asturies dende la reivindicación de la so llingua y la so identidá como pueblu. Enantes, dende la so llucha na guerra civil como voluntariu del Exércitu Republicanu y más tarde nos años más duros de la dictadura como militante activu de la resistencia antifranquista, Mánfer amosara un fondu compromisu cola causa en defensa de les llibertaes y la dignidá de los trabayadores. Nes boquiaes del réxime de Franco tuvo un destacáu papel como fundador y activista del movimientu de trabayadores pensionistes, al través de l’asociación ARPA (Asociación Rexonal de Pensionistes Asturianos), que protagonizó diversos encierros reivindicativos y marches cíviques col oxetu d’algamar la dignificación del colectivu y contribuir al puxu poles llibertaes democrátiques.

Col mesmu enfotu cabal col que combatió la dictadura y procuró meyores condiciones de vida pa los trabayadores xubilaos Mánfer axuntóse dende’l primer momentu a les movilizaciones cíviques que desixíen la reconocencia de los derechos llingüísticos n’Asturies y participó activamente nelles,de mano como militante de Conceyu Bable y después de la desapaición d’esta plataforma, como ciudadanu consciente del valor social de la llingua pa la democratización definitiva del nuestru país.

Dende esta tarde los sos restos van reposar na tierra que lu vio nacer nel vai de Llangréu pa quedar n’alcordanza del tiempu y d’una llingua na que Mánfer de la Llera s’enfotó con pasión na so obra lliteraria y nos sos sueños obstinaos por un mundu más llibre y dignu.

L’actu civil en memoria de Manuel d’Andrés Fernández celébrase a les 18,00 hores nel tanatoriu de Cabueñes en Xixón y nél van participar el músicu Toli Morilla y el Coru d’El Llano, del que formaba parte l’escritor desapaecíu.

Tamién te podria gustar