Luis Sepúlveda axunta les sos duldes y esmoliciones en ‘Moleskine’, trescripción d’un cuadernu de notes

Apuntes sueltos, reflexones, capítulos de novela, recetes de cocina. L’escritor Luis Sepúlveda, exiliáu de la dictadura chilena y director del Salón del Llibru Iberoamericanu de Xixón, axunta toos esos xéneros en ‘Moleskine’, un llibru que ye resultáu de la trescripción d’un cuadernu de notes personales y que se presenta al públicu esta tarde na xixonesa Llibrería Central.

Recuperando la zuna de ciertos intelectuales de los últimos dos sieglos, qu’apuntaben compulsivamente testos mui diversos nun cuadernu que siempre los acompañaba, Sepúlveda define’l llibru qu’agora asoleya como “una llibreta de tapes negres na qu’espardo les mios duldes, les mios esmoliciones y les mios bronques de cada día”, y señala qu’esi cuadernu permite-y comprobar, al revisalu, “que nun perdí la capacidá de plasmu”.

‘Moleskine’, que se presenta al públicu na Llibrería Central a partir de les 20,15 hores de güei, incorpora apuntes que se corresponden con tres cuadernos sucesivos escritos pol autor chilenu ente 2002 y 2004, y nellos ve Sepúlveda una oportunidá pa “rebobinar la vida y vela fugazmente fotograma a fotograma”.

Nacíu na llocalidá d’Ovalle en 1949, Luis Sepúlveda ye ún de los autores en castellán más lleíos y tornaos d’Europa. Ente los sos títulos más destacaos figuren ‘Un viejo que leía novelas de amor’ (1992), ‘Mundo del fin del mundo’ (1994), ‘Patagonia Express’ (1995), ‘Historia de una gaviota y del gato que le enseñó a volar’ (1996), ‘Historias marginales’ (2000), y ‘Hot Line’ (2002).