Lucas Macías ye’l nuevu director de la Uviéu Filarmonía

L’alcalde, Wenceslao López y el presidente de la Fundación Municipal de Cultura, el conceyal Roberto Sánchez Ramos recibieron nel Conceyu, la selmana pasada, a Lucas Macías, el nuevu director titular d’Uviéu Filarmonía, nomáu pol Patronatu de la Fundación Musical Ciudá d’Uviéu.

Macías ye una de les batutes españoles de mayor proyección ente les de la so xeneración, y un artista que, magar la so mocedá, yá ta asitiáu na élite de los circuitos musicales internacionales. El Maestru Macías foi, hasta agora, director asistente de la orquesta de Paris. A la recepción tamién asistió Francisco Álvarez-Buylla, Presidente de la Fundación Musical Ciudá d’Uviéu; Cosme Marina, Director artísticu de la Fundación Musical Ciudá d’Uviéu y María Riera, Directora de la Fundación Musical Ciudá d’Uviéu.

Lucas Macías Navarro, l’apocayá nomáu director titular d’Uviéu Filarmonía, realizó’l so debú como director nel Teatru Colón de Bonos Aires en 2014 tres una escepcional carrera como xuno de los principales oboístas del mundu, siendo principal de la Royal Concertgebouw Orchestra y Lucerne Festival Orchestra y miembru fundador de la Orquesta Mozart xuntu a Claudio Abbado, mentor xuntu al qu’adquirió una fonda conocencia y comprensión tanto del repertoriu camerístico como del sinfónicu.

Na temporada 2018/19 va ponese al mandu de la Orquesta Filarmónica de Bonos Aires, nuna xira per Arxentina y va tornar a la temporada de la Orquesta Sinfónica del Samartín de Vallés, a la Orquesta de Castiella y Llión dirixiendo al flauteru Emmanuel Pahud o a la Uviéu Filarmonía. Amás, va debutar al mandu de la Sinfónica de Tenerife, la Orchestre de Cannes o Het Gelders Orkest nos Países Baxos.

Como director habitual de la Camerata RCO (Royal Concertgebouw Orchestra) va dirixir conciertos en Rusia y Holanda con un programa qu’inclúi los Siete cantares tempranes de Berg y la 4º Sinfonía de Mahler, obra que grabó con esta agrupación.

Nes dos últimes temporaes, Macías foi director asistente de la Orchestre de Paris trabayando n’estrecha collaboración con Daniel Harding y apocayá fizo un programa dedicáu a Leonard Bernstein cola mesma agrupación con motivu del centenariu de la nacencia del compositor y director.