Los Premios Timón 2011 yá tienen 14 candidatures

Según espubliza esti día nel so blog la organización del Premiu, ya ta abiertu’l plazu de presentación de candidatures pa los Premios Timón entamaos por L’Arribada, que terminará’l viniente 6 de mayu, y al que puen presentales una persona o un colectivu nes señes de corréu electrónicu de l’asociación: larribada@gmail.com.

Pa esta edición, opten a los gallardones los/es escritores que nacieren nel añu 1.961 o anteriormente. Trátase del V Premiu Timón, p’autores en llingua asturiana y n’eonaviego, y del II Premio Timón, p’autores asturianos en llingua castellana.

P’alcordar los gallardones, l’asociación convocará dos xuraos, ún por cada modalidá, integraos por persones venceyaes a la cultura del país. Estes distinciones, que consisten nuna obra del escultor y ceramista xixonés Jesus Castañón pa cada premiu, entregaránse mientres la cellebración de L’Arribada 2011, dientro de la so estaya Vagamar, que se desarrollará del 9 al 17 de setiembre en Xixón.

Les candidatures presentaes hasta’l momentu son les que vienen darréu: Pal V Premiu Timón; Lurdes Álvarez, Pablo Ardisana, Manuel Asur, Sabel de Fausta, Antón García, Vicente García Oliva, Esther Prieto, Miguel Rojo y Miguel Solís Santos. Pal II Premio Timón; Fulgencio Argüelles, José Luis Argüelles, Carmen Gómez Ojea, Juan Méjica y Carmen Ruiz-Tilve.

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009) y Roberto González-Quevedo (2010); y el del Premio Timón, Luis Fernández Roces (2010).