Los operadores de telefonía móvil van protexer a los menores qu’usen los sos servicios

Les compañíes caberes del sector firmaron ayeri durante la cellebración del Día Internacional por una Internet más Segura, un alcuerdu pol que se garantiza la proteición de la infancia qu’acceda a los servicios de telefonía móvil. El conveniu, firmáu ente otres por Telefónica, ta iguáu pola Comisión Europea y quier fixar códigos d’autorregulación antes de Febreru de 2008.

Esti nuevu Marcu europeu pa una utilización más segura de los telefonos móviles polos adolescentes y los neños, al que s’amestaron les principales empreses de telefonía propón midíes específiques como’l control del accesu a los conteníos empobinaos a los adultos; campañes de sensibilización, creación d’una clasificación de conteníos comerciales en base a normes de pertinencia y la llucha escontra los conteníos illegales nos telefonos móviles.

La Comisaria de Sociedá de la Información y Medios de Comunicación, Vivianne Reding sorayó la gran importancia que tien esti alcuerdu para la proteición del menor. “Felicito al sector de telefonía móvil por esta decisión en favor de la proteición de los menores. Con ello demuestrase que ye posible una autorregulación responsable a escala europea”. Asina mesmu anticipó que la Comisión va facer una estrecha llabor de vixilancia pa garantizar que se cumplen los obxetivos alcordaos de manera efectiva.

Esti conveniu ta suscritu, ente otres por Telefónica Móviles. Tamien s’amestaron a la iniciativa de la Comisión, Bouygues Telecom, Cosmote, Debitel AG, Deutsche Telekom Group, Go Mobile, Hutchison 3G Europe, Jamba! GmbH, Mobile Entertainment Forum, Orange Group, Royal KPN N.V., SFR, Telecom Italia S.p.A, Telefónica Móviles, S.A., Telenor, TeliaSonera y Vodafone Limited.