Los llectores van poder votar esti añu pal Meyor Blogue n’Asturianu del 2010

Per tercer añu consecutivu, los blogueros escueyen el Meyor Blogue del añu. Nesta ocasión con novedaes, yá que los llectores, anque nun tengan blogue, van poder votar. El premiu busca, según los sos participantes “fortalecer una comunidá tan prestosa como ye la qu’usa la llingua asturiana”. Van dase trés premios: Meyor blogue según públicu (llectores), Meyor blogue según blogueros y Meyor diseñu según blogueros.

Cada blogueru pue votar con 1 puntu al blogue que meyor conteníu tenga y con 1 puntu al blogue con meyor estética, imaxe o diseñu, que pue ser a ún de los anteriores pero enxamás al propiu blogue del votante. En casu d’empate, ganará’l blogue que tea más actualizáu nel últimu añu (más entraes) y si asina persistiere l’empate, ganaría’l blogue más vieyu.

•

El votu del públicu será anónimu y dará llugar a una mención especial y estremada. El periodu de votaciones durará, dende’l 1 de xineru de 2011 hasta’l 31 de xineru de 2011. Cuanto tea recopilada tola información, espublizaránse los resultaos de los blogues ganadores.

Páxina web de la convocatoria 2010