Los Humanitarios de Samartín y Morea algamen el Premiu al Pueblu Exemplar d’Asturies

Los Humanitarios de Samartín y el pueblu de Morea, en conceyu d’Ayer, algamaron esti llunes 17 el Premiu al Pueblu Exemplar d’Asturies qu’otorga la Fundación Príncipe d’Asturies y que ye’l premiu más popular n’Asturies de la Fundación. Torazu foi l’otru pueblu finalista, de les 21 candidatures presentaes, nes deliberaciones del xuráu qu’el llunes s’aconceyó nel Hotel Reconquista d’Uviéu.

El Xuráu destacó la “capacidá y determín nel caltenimientu del espíritu d’activa solidaridá al qu’históricamente fai honor el so nome y que tan eficazmente representó al traviés del tiempu y de difíciles vicisitudes, y que les sucesives xeneraciones supieron asumir con fidelidá a los sos principios y renováu entusiasmu colectivu, custodiando y enriqueciendo la herencia cultural que güei se reconoz y premia por mayoría”.

El Xuráu del Premiu tuvo presidíu por Francisco Rodríguez, presidente de Reny Picot, y integráu, ente otros, por Jesús Arango, profesor d’Economía aplicada de la Universidá d’Uviéu, Evaristo Arce, escritor y periodista, Isabel Campuzano, miembru del Institutu pa la Calidá Turística Española n’Asturies, Efrén Cires, presidente de Carbonar, Fernando Delgado, fundador de ‘Los Quijotes de Asturias’, María Ángeles Fernández, presidenta de la Federación de Muyeres Empresaries y Directores Asturianes, Luis Felipe Fernández, profesor del IES de A Veiga, Nicanor Fernández, director de la Fundación HC, y José María Fernández del Viso, ex conceyal de Cultura del Conceyu d’Uviéu.