Los grandes premios de la creación lliteraria n’asturianu rexistren un aumentu de participación

Más participación qu’en 2003. Los tres premios que l’Alministración autonómica concede con calter añal a les meyores obres de creación en llingua asturiana -nes modalidaes de narrativa, poesía y periodismu- atraxeron nesta edición a más aspirantes. Los nomes de los ganadores proclamaránse de forma oficial, según les previsiones de los xuraos, la prósima selmana.

Asina lo precisaron fontes prósimes a los encargaos de designar a los premiaos en ca una de les tres categoríes a concursu: la novela, al traviés del XXV Premiu ‘Xosefa Xovellanos’; la poesía, cola X edición del galardón ‘Xuan María Acebal’; y el periodismu, nes sos modalidaes de prensa escrita y audiovisual, na segunda convocatoria del premiu ‘Enriqueta González Rubín’.

Tolos galardones tienen una dotación económica de 6.000 euros -que nel casu de la categoría periodística repártense en dos premios de 3.000 euros ca ún- y tán consideraos ente los más prestixosos a los qu’opten los creadores qu’empleguen la llingua asturiana como idioma vehicular de les sos obres.

Los miembros de los xuraos yá cellebraron les sos xuntances correspondientes, dientro’l plazu de 45 díes que marca la convocatoria dende’l pieslle de la recepción d’orixinales, y prevén asoleyar les sos respectives actes con calter oficial el prósimu xueves, nel trescursu d’una comparecencia pública n’Uviéu.

Na pasada edición, la entrega de los premios del Principáu quedó desdibuxada pola decisión de los xuraos de declarar ermos los dos galardones más veteranos, los de novela y poesía. Na categoría de testos periodísticos, la vencedora foi Beatriz Redondo Viado.